出埃及記 1
1
以色列人在埃及受壞款待
1 以色列該兜孻仔逐儕帶等家屬，㧯雅各共下到埃及去。佢等个名係： 2呂便、西緬、利未、猶大、 3以薩迦、西布倫、便雅憫、 4但、拿弗他利、迦得、亞設。 5雅各傳下个子孫，總數有七十人。雅各另外一個孻仔約瑟早就在埃及。 6後來，約瑟死掉，佢該兜兄弟㧯該世代个人也全部死掉。 7總係，佢等个後代，就係以色列人，人口增加當遽，當旺當強；埃及國內逐位看得到佢等。
8後來，埃及有一個新王興起，佢對約瑟个事完全毋知。 9佢對埃及人講：「這兜以色列人又多又強壯，對𠊎等係盡大个威脅。 10若係發生戰爭，佢等可能㧯敵人聯合攻打𫣆等，離開𠊎等个國家。𠊎等一定愛設法莫俾佢等个人口增加。」 11所以埃及人指派監工，強迫以色列人做苦工，喊佢等起比東城㧯蘭塞城，來做國王个補給中心；用這方法來打擊佢等个心情。 12總係埃及人越壞款待以色列人，以色列人就越𫱔越多，人口分佈越闊；所以埃及人盡驚以色列人。 13埃及人強強迫以色列人做當重个苦工， 14蹧踏佢等，愛佢等煉泥做磚仔，又愛做田肚一切个工作，使佢等非常痛苦。
15 埃及王喊希伯來个產婆來，一個安到施弗拉，另外一個安到普阿；佢吩咐姖等講： 16「你等為希伯來个婦女接生 #1:16 「接生」希伯來文直譯係「接生，看姖等坐在兩垤石頭項愛𫱔」。个時，若係姖等𫱔个係細孻仔，愛將佢㓾掉；若係細妹仔，就留姖个生命。」 17總係這兩個產婆敬畏上帝，無照埃及王个命令做；姖等還係留細孻仔个生命。 18所以埃及王喊兩個產婆來，問姖等：「你等做麼介恁樣做？做麼介留細孻仔个生命呢？」
19產婆應王講：「希伯來个婦女無像埃及个婦女；姖等當扎，𠊎等還吂趕到，姖等已經𫱔了。」 20-21因為產婆敬畏上帝，上帝特別看顧姖等，俾姖等有自家个家庭。以色列人繼續增加，越來越強。 22最後，埃及王命令全國人民講：「希伯來人 #1:22 「希伯來人」係照一兜古譯本；希伯來文無這幾隻字。一切所𫱔个細孻仔，愛全部㧒落尼羅河，細妹仔个生命就留下來。」
اکنون انتخاب شده:
出埃及記 1: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012