使徒 21
21
保羅上耶路撒冷
1𠊎等離開眾人，就開船直直去哥士島。第二日到羅底，又對該位去到帕大喇。 2在帕大喇堵到一隻愛去腓尼基个船，𠊎等就上船出發。 3駛到有看到塞浦路斯，船就對南片行過，向敘利亞去。𠊎等在泰爾上陸，因為船愛在這位下貨。 4𠊎等在這位尋到一兜信徒，就同佢等共下住七日。佢等得到聖靈个指示，勸保羅毋好上去耶路撒冷。 5總係，停跎幾日後，𠊎等還係繼續原來个旅程。該兜信徒㧯佢等个𡜵娘子女全部送𠊎等到城外。大家在沙灘跪下來祈禱。 6彼此辭別以後，𠊎等上船，佢等就轉去屋下。
7𠊎等繼續向前，對泰爾到多利買，向該位个信徒請安，同佢等共下住一日。 8第二日，𠊎等離開該位，去到凱撒利亞，就去傳道人腓利个屋下，住在該位。佢係在耶路撒冷被人選出七個執事中个一個。 9佢有四個吂出嫁个妹仔，全部有講預言个恩賜。 10𠊎等在該位住幾日後，有一個先知名安到亞迦布，對猶太省來。 11佢來看𠊎等，拿保羅个腰帶，䌈等自家个手腳，講：「聖靈恁樣講：『這腰帶个主人會在耶路撒冷被猶太人像恁樣䌈起來，交給外邦人。』」
12𠊎等一聽到這個話，就㧯當地个人共下勸保羅莫去耶路撒冷。 13總係，佢講：「你等做麼介噭到恁樣，害𠊎傷心？𠊎為到主耶穌个名，莫講在耶路撒冷被人䌈起來，就係死在該位，𠊎也甘願。」
14𠊎等無法度勸服佢，就恬下來，只有講：「願主个旨意得到成就。」
15在該位住幾日後，𠊎等就打包袱，上耶路撒冷去。 16有兜對凱撒利亞來个信徒同𠊎等共下去，帶𠊎等去一個塞浦路斯人拿孫个屋下住；佢成做信徒已經盡久。
保羅訪問雅各
17𠊎等到耶路撒冷，信徒歡歡喜喜接待𠊎等。 18第二日，保羅同𠊎等共下去見雅各；教會所有个長老也在場。 19保羅對佢等請安，然後將上帝樣般用佢在外邦人中間所做一切个事全部對佢等報告。 20佢等聽了就頌讚上帝，然後對保羅講：「兄弟啊，你看，情形係恁樣：猶太人中間有幾下萬人信主，攏總也熱心遵守摩西个法律。 21佢等聽講，你教訓所有住在外邦个猶太人放掉摩西个法律，喊佢等莫㧯細人仔行割禮，也毋使遵守猶太人个規矩。 22佢等一定會聽到你已經來這位个消息；𠊎等愛樣般正好哪？ 23這下，請你照𠊎等个話去做！這位有四個人識許願。 24你愛帶等佢等，同佢等共下去接受潔淨禮，代佢等納潔淨禮个所費；恁樣，佢等就做得將頭那毛剪掉。你恁樣做，大家就會知佢等所聽到關係你个事毋係事實，也會知你自家也係遵守摩西法律个人。 25關係信主个外邦人，𠊎等已經寫信仔吩咐佢等，毋好食拜過偶像个食物，毋好食血抑係揢死个頭牲，也毋好行淫亂个事。」
26因為恁樣，第二日保羅就帶等該兜人，共下去行潔淨禮。佢到聖殿去報告潔淨期滿个日仔，就係祭司愛為佢等每一個人獻祭該日。
保羅在聖殿肚被人捉去
27七日个期間會滿以前，有兜對亞細亞省來个猶太人看到保羅在聖殿肚，就煽動大眾去捉保羅。 28佢等喊講：「以色列人啊，大家來𢯭手！這人逐所在教人反對以色列人、摩西个法律，㧯這聖殿。佢又帶希臘人入聖殿來，褻瀆這聖个所在！」 29(佢等恁樣講，係因為看到以弗所人特羅非摩㧯保羅共下在城肚，恅到保羅識帶佢入去聖殿。)
30這時，全城騷動，眾人歸下走過來，捉等保羅，將佢對聖殿肚拉出去；聖殿个門即時就關起來。 31暴民堵堵想愛㓾保羅个時，有人報告羅馬駐軍个指揮官，講耶路撒冷全城在暴動中。 32指揮官黏時帶領軍隊㧯幾個軍官，走等去眾人該位。暴民一看到指揮官㧯軍隊，就無再過打保羅。 33指揮官進前揪等保羅，吩咐用兩條鐵鍊仔鎖等佢。佢問講：「這個人係麼人？佢做了麼介事哪？」 34人群中，有人喊東，有人喊西，亂做一團；指揮官無法度查出真相，就命令部下帶保羅入營房。 35保羅行等上石崁个時，因為眾人尖到盡兇，兵仔只有將保羅擎等過去。 36眾人跈在後背，大聲喊：「除掉佢！」
保羅為自家辯護
37會到營房个時，保羅對指揮官講：「𠊎做得㧯你講一句話麼？」
指揮官講：「你也會講希臘話？ 38恁樣，你就毋係前無幾久作亂、帶四千個暴徒逃走去曠野个埃及人囉？」
39 保羅應講：「𠊎係猶太人，出世在基利家个大數，並毋係無名小城个公民。請你准𠊎對大眾講話。」
40指揮官准佢。保羅就企在石崁頂，對眾人擛手；大家恬下來後，保羅就用希伯來話對佢等講話。
اکنون انتخاب شده:
使徒 21: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
