使徒 22
22
1 保羅講：「各位父老兄弟，請聽𠊎个辯護。」 2佢等一聽到保羅用希伯來話對佢等講話，就還較恬。保羅繼續講：
3「𠊎係猶太人，出世在基利家个大數，總係在耶路撒冷長大个，係迦瑪列个學生，接受祖先一切法律个嚴格訓練，熱心事奉上帝，同你等今晡日在場个每一個人共樣。 4𠊎識將遵行這道个人迫到死，也搜查男女信徒，捉佢等，關在監獄肚。 5大祭司㧯全議會个長老做得證明𠊎所講个話係實在个。𠊎對佢等拿到給大馬士革个猶太同胞个信仔，所以𠊎去該位，愛捉該兜人，將佢等䌈等，帶轉耶路撒冷來接受刑罰。
保羅講信主个經過
(使徒 9:1-19；26:12-18)
6「𠊎會到大馬士革个時，約在當晝頭，忽然有大光對天頂下來，照在𠊎个周圍。 7𠊎橫在地上，聽到有聲對𠊎講：『掃羅，掃羅！你做麼介迫害𠊎？』 8𠊎問講：『主啊，你係麼人？』佢講：『𠊎就係你所迫害个拿撒勒人耶穌。』 9該兜同𠊎共下去个人看到該光，總係無聽明該對𠊎講話个聲。 10𠊎又問：『主啊，𠊎愛做麼介正好？』主對𠊎講：『䟘起來，入大馬士革城去，在該位有人會㧯你講上帝愛你做个一切事。』 11因為該光盡強，害𠊎个目珠看毋到，同𠊎共下去个人就牽等𠊎个手，帶𠊎入大馬士革城。
12「在該位，有一個人名安到亞拿尼亞。佢係虔誠、嚴守法律个人，盡受大馬士革所有猶太人个尊重。 13佢來看𠊎，企在𠊎个身邊，講：『掃羅兄弟啊，願你看得到！』該時，𠊎个目珠好了，𠊎就看到佢。 14佢講：『𠊎等祖先个上帝已經揀選你，愛使你明白佢个旨意，可以看到佢公義个僕人，也聽到佢親口所講个聲音。 15因為你愛為佢做見證，將你所看到所聽到个㧯萬民講。 16這下，你還延纏麼介？䟘起來，求喊佢个名，來領洗禮，使你个罪得到洗淨！』
保羅受派去傳道給外邦人
17「後來，𠊎轉到耶路撒冷；在聖殿肚祈禱个時，𠊎入神得到一個異象， 18在異象中，𠊎看到主。佢對𠊎講：『遽遽離開耶路撒冷，因為這地方个人毋會接受你為𠊎所做个見證。』 19𠊎講：『主啊，佢等攏總知𠊎識入各會堂，捉信你个人去關，並鞭打佢等。 20你个見證人司提反受害流血到死个時，𠊎也在場，贊成該件事，還代該兜害死佢个人掌衫。』 21主㧯𠊎講：『你去！𠊎愛派你去遠方，到外邦人該位。』」
22眾人本來恬恬聽保羅講話；總係一聽到這句話，就大聲喊講：「除掉佢！㓾死佢！這種人係該死个！」 23佢等就一片吵，一片將衫抨掉，又向天委泥粉。 24羅馬个指揮官就命令將保羅帶入營房，又吩咐兵仔鞭打拷問佢，愛查出眾人為麼介對佢恁樣盡喊。 25佢等將佢捆起來愛打个時，保羅對企在身邊个一個軍官講：「對一個羅馬公民，無經過審判，你等就鞭打佢，這係合法个嗎？」
26該軍官一聽到這句話，就去見指揮官，對佢講：「你想樣般正好？該人係羅馬个公民！」
27指揮官去見保羅，問佢講：「㧯𠊎講，你係羅馬公民無？」
保羅應講：「係。」
28指揮官講：「𠊎用一大筆个錢，正得到公民个身份。」
保羅講：「𠊎出世就係。」
29所以，該兜愛拷問保羅个人遽遽閃開；指揮官一知保羅係羅馬公民，又因為識捆過保羅，就著驚起來。
保羅在議會申訴
30該指揮官想愛知猶太人告保羅實在个原因，所以，第二日，佢解開保羅个鎖鍊，召集祭司長㧯全議會，然後將保羅帶出來，喊佢企在佢等面前。
اکنون انتخاب شده:
使徒 22: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
