使徒 11
11
彼得對耶路撒冷教會報告
1使徒㧯在猶太全地个信徒聽到有兜外邦人也接受上帝个道這件事。 2所以，彼得到耶路撒冷个時，該兜主張外邦人也愛領受割禮个人就批評佢講： 3「你樣般去無受割禮个外邦人屋下做人客，又同佢等共下食飯啊！」 4彼得就將事情个經過一一㧯佢等說明。
5佢講：「在約帕城肚祈禱个時，𠊎入神看到一個異象。有東西對天頂降下來，像一垤大布仔，四隻角䌈等，縋落在𠊎个面前。 6𠊎注意看，底背有地上四腳个頭牲、野獸、爬蟲，也有天頂个飛鳥。 7𠊎又聽到有聲對𠊎講：『彼得，䟘起來，㓾來食！』 8𠊎講：『主啊，絕對做毋得！𠊎從來無食過禮儀上麼介污穢無淨浰个東西。』 9對天頂來个聲又講：『上帝所潔淨个，你做毋得看做無淨浰。』 10恁樣一連三擺；最後，該東西就收轉天頂去。 11堵堵在該時，受派對凱撒利亞來尋𠊎該三個人，到𠊎所住該家人个屋下。 12聖靈指示𠊎同佢等共下去，毋使懷疑。這六個約帕个兄弟也同𠊎共下去；𠊎等攏總入去哥尼流个屋肚。 13哥尼流㧯𠊎等講，佢樣般看到一個天使企在佢个屋肚，對佢講：『你愛派人去約帕，請該喊做彼得个西門來。 14佢有話愛對你講，使你㧯你个全家得救。』 15𠊎一開始講道，聖靈就降臨在佢等个身上，像頭一擺降臨在𠊎等身上共樣。 16𠊎就想起主識講過：『約翰用水行洗禮，總係你等會領受聖靈个洗禮。』 17既然上帝將這個恩賜也賜給該兜外邦人，像𠊎等信主耶穌基督个時佢賜給𠊎等个共樣；𠊎係麼人，敢做得阻擋上帝嗎？」
18佢等聽到這兜話，就無再過批評，只有頌讚上帝講：「恁樣看起來，上帝也賜恩典給外邦人，使佢等因悔改得到生命！」
安提阿个教會
19這時，該兜信徒因為司提反殉道所引起个迫害，分散到腓尼基、塞浦路斯，㧯安提阿；佢等只有對猶太人傳道。 20總係，有兜住在塞浦路斯㧯古利奈个信徒來到安提阿；佢等也向希臘人傳主耶穌个福音。 21主个能力同佢等共下，就有盡多人相信來歸主。
22這消息傳到耶路撒冷个教會，佢等就派巴拿巴去安提阿。 23巴拿巴去到个時，看到上帝賜福給該兜人，就盡歡喜；佢勸佢等大家愛專心一意信靠主。 24巴拿巴係一個好人，被聖靈充滿，有堅強个信心。因為恁樣，就有盡多个人歸屬主。
25後來，巴拿巴去大數尋掃羅； 26尋到以後，就帶佢轉安提阿。足足有一年个時間，佢兩儕同教會个會友共下聚會，也教訓多多个人。信徒被人喊做「基督徒」就係對安提阿開始个。
27該時，有幾個先知對耶路撒冷來到安提阿。 28其中有一個名安到亞迦布；佢得到聖靈个指示，䟘起來預言天下會有嚴重个飢荒。 (這個事到克勞第掌權个時正經發生。) 29所以信徒決定，照逐儕个力量，出錢幫助住在猶太个兄弟姊妹。 30佢等就照恁樣行，託巴拿巴㧯掃羅將錢帶去交給教會个眾長老。
اکنون انتخاب شده:
使徒 11: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
