使徒 10
10
彼得傳福音給哥尼流
1在凱撒利亞有一個人安到哥尼流，係羅馬軍隊「意大利營」个軍官。 2佢係一個虔誠人；佢㧯佢全家人都敬畏上帝；佢盡大方救濟窮苦个猶太人，常常熱心對上帝祈禱。 3有一日下晝，三點鐘左右，佢得到一個異象；在異象中，佢清清楚楚看到上帝个一個使者入來，喊佢：「哥尼流！」
4佢注目看等天使，非常著驚，講：「主啊，麼介事？」
天使講：「上帝已經聽你个祈禱，也紀念你所做救濟人个好事。 5這下你愛派人去約帕，請該喊做彼得个西門來。 6佢住在一個製皮師傅西門个屋下；西門个屋就在海滣。」 7該㧯佢講話个天使離開以後，哥尼流喊兩個僕人㧯平常服事佢个一個虔誠个侍衛來， 8將所堵到个事㧯佢等講，然後派佢等去約帕。
9第二日，佢等行路將近約帕。差毋多當晝个時，彼得去屋頂祈禱。 10佢肚飢，想愛食東西；該家人準備食晝个時，彼得入神看到一個異象。 11佢看到天開，有東西降下來，像一垤大布仔，四隻角䌈等，縋到地上， 12底背有地上各種四腳个走獸、爬蟲，也有天頂个飛鳥。 13有聲對佢講：「彼得，䟘起來，㓾來食！」
14總係彼得應講：「主啊，絕對做毋得！𠊎從來無食過禮儀上麼介污穢無淨浰个東西。」
15該聲第二擺對佢講：「上帝所潔淨个，你做毋得看做無淨浰。」 16恁樣一連三擺，該東西就收轉天頂去。
17 彼得當疑狐所看到个異象係麼介意思个時，哥尼流所派來个人已經尋到西門个屋下來，企在門口， 18大聲喊講：「有一個喊做彼得个西門住在這位麼？」
19 彼得還在該位想，該異象到底係麼介意思，聖靈㧯佢講：「有三個人 #10:19 「有三個人」有古卷係「有兩個人」；另外有兜古卷係「有兜人」。來尋你！ 20你下去，同佢等共下去，毋使懷疑，因為係𠊎差佢等來个。」 21所以彼得下去，㧯該兜人講：「𠊎就係你等所愛尋个人。你等係為到麼介來呢？」
22佢等應講：「係軍官哥尼流派𠊎等來个；佢係敬畏上帝个義人，猶太个人民全部盡尊敬佢。有一個聖天使指示佢，請你去厥屋下，愛聽你个教訓。」 23彼得就請佢等入去，留佢等過夜。
第二日，彼得䟘身同佢等共下去；有幾個約帕个兄弟也同佢等去。 24又過一日，佢等就到凱撒利亞。哥尼流已經請佢个親戚㧯好朋友來到，在厥屋下等等。 25彼得一入門，哥尼流就進前，伏在佢个腳前拜佢。 26彼得遽遽扶佢䟘起來，講：「請䟘起來，𠊎自家也係人。」 27彼得一片㧯哥尼流講話，一片行等入去屋肚；佢看到有盡多人聚集在該位。 28佢㧯佢等講：「你等知，照𠊎等个規矩，猶太人係做毋得同外邦人親近抑係來往个；總係上帝已經指示𠊎，毋好將任何人看做粗俗抑係無淨浰个。 29所以你等差人去請𠊎个時，𠊎無推辭就來。這下，請問，你等係為到麼介原因喊𠊎來？」
30 哥尼流講：「四日前，共樣係下晝三點鐘个時，𠊎在屋下祈禱。忽然有一個人，衫褲皓光，企在𠊎面前， 31講：『哥尼流！上帝已經聽你个祈禱，也紀念你所做救濟人个好事。 32你愛派人去約帕，請該喊做彼得个西門來。佢住在製皮師傅西門个屋下；西門个屋就在海滣。』 33所以，𠊎黏時派人去請你；你肯光臨，實在盡好。這下，𠊎等全部在上帝个面前，愛聽主所吩咐你講一切个話。」
彼得个講道
34 彼得開口講：「𠊎這下確實知：上帝對待所有个人全部平等。 35一切敬畏佢、行為正直个人，無論係麼介種族，全部係佢所歡喜个。 36你等知，佢通過萬民个主 — 耶穌基督，傳給以色列人个真道係和平个福音。 37約翰宣傳洗禮以來，該對加利利開始傳遍猶太全地个道理，你等全部知。 38你等也聽過：上帝係樣般用聖靈㧯能力充滿拿撒勒人耶穌。佢去到逐所在行好事，醫好所有被魔鬼控制个人，因為上帝㧯佢同在。 39佢在耶路撒冷㧯其他猶太人个地方所做个一切事，有𠊎等做見證人。佢等將佢釘死在十字架頂； 40總係，第三日，上帝使佢對死復活，並對人顯現。 41佢毋係顯現給所有个人看，只有給𠊎這兜上帝先揀選來做見證个人看。佢對死復活以後，𠊎等識同佢共下食共下啉。 42佢命令𠊎等將福音傳給眾人，證明佢就係上帝所設立、愛做生人㧯死人个審判者。 43所有个先知也為佢做見證；佢等講：凡信佢个，就做得通過佢个名得到赦罪。」
外邦人接受聖靈
44 彼得還講等道理个時，聖靈降在所有領受道理个人身上。 45該兜跈彼得對約帕來个猶太信徒，看到上帝將聖靈个恩賜也倒在外邦人个身上，就感覺盡奇怪； 46因為佢等聽到這兜人用屬靈个語言講話，也頌讚上帝為大。所以彼得就講： 47「這兜人已經領受聖靈，同𠊎等共樣；麼人做得禁止佢等領受水个洗禮呢？」 48因為恁樣，佢吩咐佢等奉耶穌基督个名領洗禮。佢等又要求彼得同佢等共下住幾日。
اکنون انتخاب شده:
使徒 10: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
