使徒 12
12
迫害越來越多
1該時，希律王下手迫害教會个一兜人。 2佢用刀仔㓾死約翰个阿哥雅各。 3佢看猶太人盡歡喜這個事，又去捉彼得。 (這個事發生在除酵節个期間。) 4佢捉到彼得後，將佢關在監獄肚，交給四班个警衛看守，每班有四個人。希律計劃在𨃟過節後將佢帶出來，當眾審判佢。 5所以，彼得在監獄肚被人掌到死死；總係，教會个兄弟姊妹為佢對上帝迫切祈禱。
彼得脫離監獄
6 希律愛將彼得帶出來審判个前一暗晡，彼得睡在兩個警衛个當中，有兩條鐵鍊仔鎖等佢，門外又有警衛掌等。 7忽然，主个一個天使企在佢塍頭，有光照在監牢肚。天使拍彼得个肩頭，喊醒佢，講：「遽遽䟘起來！」該鐵鍊仔就對彼得个手𢫫下來。 8天使㧯佢講：「腰帶繫好，鞋仔著起來。」彼得就照恁樣做。天使又講：「外衫袈等，跈𠊎來。」 9彼得跈等佢行出監獄，還毋知天使所做个係真實个事，恅到係看到異象。 10佢等通過第一關个警衛，又過第二關，最後，來到直接透到城肚个鐵門；該門自家打開來。佢等出來，行過一條街路；天使忽然間就離開彼得。
11這時，彼得正清醒過來；佢講：「這下𠊎正知這係真實个；主差佢个天使來，救𠊎脫離希律个手㧯猶太人所期待一切个陷害。」
12了解這個情形以後，佢就去約翰‧馬可个阿姆馬利亞个屋下；有好多人聚集在該位祈禱。 13彼得掽外門，有一個名安到羅大个使女出來聽看仔。 14姖認出係彼得个聲音，歡喜到毋記得開門，就走去㧯大家講彼得企在門外。 15佢等講：「你發癲係麼！」該使女堅持講正經有這個事。佢等就講：「怕係佢个天使！」
16 彼得繼續緊掽門。佢等打開門，看到正經係彼得，就著驚又歡喜。 17彼得用手做記號，喊佢等莫出聲，然後㧯佢等說明：主係樣般帶佢出監獄个。彼得又吩咐佢等：「將消息同雅各㧯眾兄弟講」；佢就離開，去別个所在。
18天光个時，警衛亂到無葛無煞，毋知彼得到底發生麼介事情。 19希律下令搜查，總係無彼得个影跡；佢就審問警衛，吩咐將佢等拉去㓾死。
這個事以後，希律離開猶太，去凱撒利亞，住在該位。
希律个死
20 希律對泰爾㧯西頓个人民大發譴；所以，佢等推派代表團去見希律。佢等先得到宮廷个總管伯拉斯都个同情，然後對希律求和，因為佢等个糧食係對王所管个所在來得到供給。
21在所定个日仔，希律著等王服，坐在王位，對人民演講。 22佢等大聲喊講：「這係神明个聲，毋係人个聲！」 23因為希律無將榮光歸給上帝，主个天使即時就責罰佢。佢就被蟲仔咬死。
24上帝个道繼續發展，日日興旺。
25 巴拿巴㧯掃羅辦好受交託个事以後，就對耶路撒冷倒轉去 #12:25 「對耶路撒冷倒轉去」另外有兜古卷係「倒轉去耶路撒冷」。；佢等也帶約翰‧馬可共下去。
اکنون انتخاب شده:
使徒 12: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
