Lom 14
14
Na bɔɔ́nɛ́nánɔ́ na bɔcɔ́ɔ́cɔ́ o olumitinine noómi
1Ánɔ káha bɔmbányɛ e úúnú ɔlɔŋɔ ɔɔcɔ ooci awɔ́ u tɛ ŋɔ yɔ́ɔ́nɛ́ná o olumitinine noómi ; nuti bícúcúlékíne cííyé isuŋí. 2Túá kɔɔna anyía olumitinine ú sɔ́ɔ́kɔ́ ŋeé wuúci ɔɔ́lɔ ɔ ɔ-tɛ-táfa bɛnyɛ́ma bɛ́ ɔnyíá ; mbá, olumitinine ú sɔ́ɔ́kɔ́ a wɔ́mɔtɛ́ a wáŋa ɔcɔ́ɔ́cɔ́ ŋeé wuúci nyɛkɛtɛna ɔ ɔnyíá hú bihuti. 3Ɛ́ɛhɛ́ sɔ́ɔ́kɔ́ ewú u ŋee bíkéti anyía wáŋa wu ɔnyíáka bɛnyɛ́ma bikime tɛ ɔ́mɔ́ nyɛ́mana wu okényéméke sɔ́ɔ́kɔ́ awɔ́ u tɛ ŋá kɛ́la aáná ; sɔ́ɔ́kɔ́ awɔ́ u tɛ ŋá nyíá bɛnyɛ́ma hú anyía ɔyá maá yá tɛ ɔ́mɔ nyɛmána wu okélísíki sɔ́ɔ́kɔ́ awɔ́ u tɛ ŋá táfa bɛnyɛ́ma bɛ́ ɔnyíá#14.2-3 Ta anyía : « …onyiké ewú bikotí bɛ́ Bandɔ́mɛsɛ́ ŋeé léke », anyía Bandɔ́mɛsɛ́ áŋa o wuúci káhánɔ́ tɔ́na. 4Ɔ ɔ́ŋa aányɛ́, kuɔŋɔ́ ewú o ŋoó kélísi munyiɔnɔ mɔ bɔsɔ́ɔ́kɔ́ e ? Ta wɔ́ nyíɔ́kɔ bɔɔbɛ́, ta wɔ́ nyíɔ́kɔ bɔmbányɛ, bú ŋa lɛ́ca hú ciayɛ́ síkíne ci buólí. Yááŋa anyía, munyiɔnɔ eémú ké yeéhínyínyi ɔnyiɔ búáyɛ́ buólí, u tɛ kua, ananyía Otéŋí a Waáŋá ŋeé wuúci kíndísi aáná.
5Yááŋa anyíaʼo, baacɔ a bɔ́mɔtɛ́ ŋa bɔ́ lɛ́ca anyía mɔɔ́sɛ́ ŋa hɔ́lana ; mbá ɔ bɔ́mɔtɛ́ ábɔ́ lɛ́caka anyía mɔɔ́sɛ́ mekime áŋa bɔkɔ búmɔtɛ́. Aáná ɔɔcɔ okime á nyɛ́mána wu omenyi bɔmbányɛ bɔmbányɛ aátɛ́ u ŋa bɛ́táá e úúyé ɔtɛ́má noómi. 6Ɔɔcɔ awɔ́ u ŋa lɛ́ca anyía mɔɔ́sɛ́ ŋa hɔ́lana ŋa kɛ́la aáná a asana ne Otéŋí a Waáŋá ; ooci awɔ́ u tɛ ŋá táfa bɛnyɛ́ma bɛ́ ɔnyíá ŋaá kɛla aáná a asana ne Otéŋí a Waáŋá, anyía u naŋa wé yiínjíékíne Bandɔ́mɛsɛ́ bitéŋíti ɔ ɔnyíá oócí. Ooci a wɔmɔtɛ́ awɔ́ u tɛ ŋá nyíá bɛnyɛ́ma bikime hú anyía ɔyá maá yá ŋaá kɛ́la aáná a asana ne Otéŋí a Waáŋá, te wuúci tɔ́na u naŋa wé yiínjíékíne Bandɔ́mɛsɛ́ bitéŋíti a asana ne bihuti abɛ́ u ŋaá nyíá. 7Yááŋa anyíaʼo, ta ɔɔcɔ a basɔ́ ti ŋe líhe a ciayɛ́ciayɛ́ ; ta ɔɔcɔ ti wé a ciayɛ́ciayɛ́. 8Ɛ́ɛhɛ́ yááŋa anyía, mbɔ́kɔ tu ŋé sú líhe, tu ŋé sú líhe a asana ne Otéŋí a Waáŋá ; híáná tɔ́na, mbɔ́kɔ tu ŋe sú wé, tu ŋe sú wé a asana ne Otéŋí a Waáŋá. Aáná, te túésú líhéke, te túésú wéékúne, tua sɔ́ŋa baacɔ bé Otéŋí a Waáŋá Yésus *Kilís. 9Yaátɛ́ asana Kilís ŋeé wé, yɔ́ háányúa e biwéewé ɔ ɔkɛla anyía wéé téŋgínyi na a bɔɔ́sɔ ne e bewéékúnénú áyá. 10Mbá kuɔŋɔ́ aná, anyíatɛ́ o ŋoó kélísi sɔ́ɔ́kɔ́, e wuúci bábákɛ́na e ? Yaŋɔ́ ɛsɛ, basɔ́ bekime tu ká sɔ́ tálɛ́mákɛ́na eé buúse bɔ́ Bandɔ́mɛsɛ́ a nyɛkála e ? Tɛ́ka, yááŋa aatɔ́ ɔlama e ? 11Aáná yááŋa yɔɔ́ŋɔ́kɔ́nɔ́ anyía : « Yaŋɔ́, Otéŋí a Waáŋá a wáŋa wɔɔ́sɔ, i ŋeé mi óónyísínyi ɔkɔɔna ɛsɛ́ : Baacɔ bekime ké bú mi túmékíne eŋéndu, bé sóbiki okelú ɔ ɔmuaná anyía nuúmi áŋa nɔ́ Bandɔ́mɛsɛ́. »#Ɛsa 45.23 12Ɛ́ɛhɛ́ ɔɔcɔ okime aá basɔ́ kóó tóŋgínyi aná Bandɔ́mɛsɛ́ úúyé olíhe ewú u ŋeé líhéke wuúci bɛ́muátá.
Eti kúfítínyi sɔ́ɔ́kɔ́
13Tu ŋá sɔ́ nyɛ́mána tú ɔnyɛanaka aná mɔbábánana ; indélímínyínyi ci ohiite áŋa anyía atɛ kɛla asana yí okúfítínyi sɔ́ɔ́kɔ́, mbá te yí o wuúci nénisi ohónyí ɔ ɔkɛla bɔɔbɛ́. 14I ŋe mí menyi aá taaká taaká a nyɛlatana anyɛ́ ya mɛ́ŋa ne Yésus *Kilís anyía ta bɔkɔ bɔ́ ɔnyíá a búmɔtɛ́ tɛ a bá a búáŋa bɔ́ mɔnyɔ́kɔ́lɔ́ eé buúbu bɛ́muátá ; mbá mbɔ́kɔ ɔɔcɔ a wɔmɔtɛ́ ŋe híite bɔkɔ bɔ́ ɔnyíá a búmɔtɛ́ okotí, bɔkɔ eébú á yáaŋa taaká okotí e úúyé ɔtɛ́má noómi. 15Mbɔ́kɔ o ŋoó nuesi sɔ́ɔ́kɔ́ ɔtɛ́má a nyɛnamá nyɛ́ bɛnyɛ́ma anyɛ́ ɔ ŋɔɔ́ nyíá, ɛ́cɛ anyía ɔ tɛ ŋɔ́ háná ɔ látɛ́na nulénéne háyɛ yɛ́ ŋá bɛ́ámba. Ɔ ŋɔ́ɔ nyɛmána wu obíkékényíki, anyía ooci ewú Yésus Kilís ŋe keé wééne eeyé eé buúse ti nyíme a asana na bɛnyɛ́ma bɛ́ ɔnyíá. 16Aáná bɔkɔ abɔ́ ɔ ŋɔɔ́ lɛca#14.16 Cɛ́mɔtɛ́ Ciɔɔ́ŋɛ́ cɛ́ buáyá áŋa na « tu ŋa sɔ́ lɛca », ta anyía « nu ŋa nɔ́ lɛca ». háyɛ ambányɛ yɛ́ bɔkɔ tɛ́ bɛ́cáŋa bɔkɔ a bɔɔbɛ́ ; buúbu bɔsɔ́ɔ́kɔ́ ŋe bú kényéme. 17Yááŋa anyíaʼo, *Butéŋí bɔ́ Bandɔ́mɛsɛ́ tɛ á bá asana yɛ́ na ɔnyíá na ɔmúána ; mbá búáŋa na ɔkɛlaka bɛsana a bɛtálɛ́mánánɔ́, ne olimine mbuumu na bɔsɔ́ɔ́kɔ́, na ɔbámɔ́kɔ́na ne obíléne weéŋí ; biíbi eébí bí ŋeé húle né *Efúúménénú yí Elilé. 18Aáná ɔɔcɔ okime awɔ́ u ŋɔɔ́ nyíɔnɔ Kilís i indélímínyínyi eécí kéé bílénékine Bandɔ́mɛsɛ́, baacɔ wuúci kékéke tɔ́na.
19Yaátɛ́ asana túásɔ́ nyɛ́mana tú ɔbɛ́kɛ́ndákɛ́na#14.19 Cɛ́mɔtɛ́ Ciɔɔ́ŋɛ́ cɛ́ buáyá áŋa na « tu ŋa sɔ́ bɛ́kɛ́ndɛ́na » aná o búle kɛla bɛsana a bɛ́ ŋa basɔ́ héléníne hú mbuumu aasɔ́ ɛ ɛkatɛ́katɛ́ ; bɛsana eébí basɔ́ kíndísíki basɔ́ bekime o olumitinine noómi. 20Atɛ cáŋɛ́na buólí bɔ́ Bandɔ́mɛsɛ́#14.20 Onyíinyí u olumitinine áŋa atámá yí buólí bɔ́ Bandɔ́mɛsɛ́. a asana na bɛnyɛ́ma bɛ́ ɔnyíá. Yááŋa taaká anyía ta bɔkɔ bɔ́ ɔnyíá a búmɔtɛ́ tɛ á bá a búáŋa okotí, mbá bú tɛ ŋa hɛ́ka anyía ɔɔcɔ á nyíáka bɔkɔ a búáŋa bú okúfítínyi sɔ́ɔ́kɔ́ e úúyé olumitinine. 21Ambányɛ́kɛ́ yɛ́ asana áŋa anyía atɛ nyíá ɛnyama acɛ́ bá sɔ́mbɛ́na e esíéké ; atɛ múána meluku, mbá e bíkíilie ɔkɛla bɔkɔ bukime a búáŋa bú okúfítínyi sɔ́ɔ́kɔ́ e úúye olumitinine. 22Bɔkɔ abɔ́ ɔ ŋɔɔ́ bɛ́táá a asana eéyé a aháŋá ne úúwu olumitinine ŋɔ yɔ́ɔ lɛca hú na kuɔŋɔ́ na Bandɔ́mɛsɛ́. Ɔɔcɔ awɔ́ u ŋa kɛ́la asana ekime eyí hííyé hɛcɔɔ́cɔ́ hɛ́ ɔtɛ́má ti ŋéé wuúci kákálɛ́na áŋa ɔmbányɛ. 23Mbá ɔɔcɔ okime awɔ́ u ŋaá nyíá bɔkɔ, u bɛ́ákákɛ́na e úúyé ɔtɛ́má noómi, Bandɔ́mɛsɛ́ kéé wuúci bɔ́nɔ́sɛa anyía u tɛ ɔ́mɔɔ́ kɛ́la asana eéyé na mɔŋɔlɛ́ ɔ ɔtɛ́má ; híáná bɔkɔ bukime abɔ́ ɔɔcɔ ŋa kɛ́la tɛ́ka na mɔŋɔlɛ́ ɔ ɔtɛ́má áŋa aabɛ́ yɛ́ asana.
اکنون انتخاب شده:
Lom 14: lem
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2008, Wycliffe Bible Translators, Inc. All rights reserved.