Galəshi 4
4
1Sə àmyɛ́ nʼâ bùl bə̀ bə̀sɔ́bwɛ̀lɛ́ gə la bə̀ e cìní è da jɛ̃̀-kɔn myɛ, è gə́ gwẽ̌ wɔ́ námpɔ́lɛ́ mɔ́ ce, è nyɛ̌ ǹdə yóm ta, e jʼà wɔ́ èmyɛ́ è la bə̀ e cìní kɔn gakó. 2È mə̂ sʼe zwẽ lyì bí byɛ̀bɛ́ bə̀ nʼê nyǐ èmyɛ́ ǹdə́ è kɔn dɛ́ ga yò mó nyí ni, kɔn bʼe yí yi rí tɛ̀bɛ́ è da byili mú. 3Nə́myɛ wɔ́ èta. Nə́ gə́ yʼà gwẽ̌ wɔ́ ǹdə bə̀sɔ́ná ta yi ní, nə́ yʼâ wɔ́ lũ w wẽ̀ dé tɛ̀bɛ́ yírhə́ wàr nə̀ nɛ mɔ́ yómə́. 4Sə yi rí gə́ tú e yí, Yi twĩ̀ rə̀ Byǐ mú. Wɔ́ kɛ̃ ń lùl mò; ń lùl mò Zhwifubá wẽ́, n zwẽ bə̀ nyə́ né, 5mùnì n vwârh byɛ̀bɛ́ bə̀ wɔ́ nyə́ né yómə́ mó, sə nə́myɛ ŋwɛ̀nɛ́ nə́ tó rə̀myɛ́ dɛnnɛ nə́ jǐrh Yi byâ.
6Yi twĩ̀ rə̀ Byǐ mú Eshirhə y nə́ wun ní wẽ́, rə mʼe byili bʼâ wɔ́ rə̀ byâ zhə̀nà, sə Eshirhə y ce nə́ rʼé bya nə́ zhe: “Aba”, rə̀ kùr wɔ́: “À Da”. 7Rə̀myɛ́ ce, ǹ kə́ ǹ də̀ yóm yé. Ǹ wɔ́ Yi byǐ. Sə ǹ gə́ wɔ́ Yi byǐ mú ce, ǹ bʼâ nə cəl kɔn dɛ́ dɛ̀bɛ́ Yi tɛnɛ rə̀ byâ bɛ́ yil mó wẽ́.
Pwəə wu nʼô zɛ̃̀ Galəshi Kristə-lyì bí yilə
8Á yʼâ yə̀l Yi pár shãã ga yé. Á yʼâ wɔ́ wẽ̀ dé tɛ̀bɛ́ yírhə́ bə nɛ, rə jʼà də̀ yə mó yómə́. 9Sə èlâsɛ̃´, á lwar Yi párá. Kɔn du, Yi cìcì mú myɛ yě bʼâ wɔ́ rə̀myɛ́ byâ. Byè yil á nə zɛ̃̀ á kʼá nʼá yâl á zù wẽ̀ dé rə̀myɛ́ tɛ̀bɛ́ rə̀ bə ŋwɔ̀nɔ́ zhe, rə jʼà bə kùr zhe mó? E zɛ̃̀ wɔ́ yál á kʼá nʼá yâl á jǐrh rə̀ yómə́, náá etəra? 10Á nʼá bùl bə̀ dwã ǹdə́ cànsɛ̀ ǹdə́ byinə jàlà ŋwɛ́nɛ́ nə̀ zhe kùr du nə̀ dwã bɛ́. Á nʼá bùl myɛ bə̀ yə jàlà ŋwɛ́nɛ́ nə̀ du nə̀ dwã bɛ́. 11À tʼâ yâl bə̀ tum dí à twĩ̀ á yil mó yál nánfò yé. Wɔ́ rə̀myɛ́ ywẽ è zhe ne.
12Da-byâ, à jǐrh ǹdə á ta. Rə̀myɛ́ ce, à nʼâ lwə̀l ába: wɛ̀rhɛ́na ǹdə à ta. Á yə̀ nɛ lwɛlɛ də́-byǐ wɛ̀rhɛ́ yé. 13Á yě bə̀ à gə́ jɛ̀rɛ̀ a bwə̀l yò-ècɔ̀nɔ̀ nyí rí a byili ába mó, wɔ́ à gə́ yʼà bə jàn zhe mó yi ní. 14À yala nɛ́ gə́ yʼà nyɛ̌ nɛ́ mɔ́ yʼà wɔ̌ rə̀ bʼa ce á nyɛ̃´ nɛ, ráá á dùr á yẽ̌ ne, sə á yə̀ èta wɛ̀rhɛ́ yé. Á zwẽ à zhəəlé ǹdə Yi màlɛ́ka ta. Á gaga mɔ́ zwẽ ne ǹdə Yezu Kristə ta. 15Á wu-nyɔ̃̀ w shãã ga mɔ́ tó yẽ̀? Á gə yʼâ wɔ̌ á yírhə́ né á la jârh á pɛ̃ rə̀myɛ́ yi ní myɛ, á gə jàrh nɛ̀. Àmyɛ́ cìcì mú wɔ́ rə̀myɛ́ zhə̀n-cí. 16E zɛ̃̀ wɔ́ à gə́ nʼâ byili ába zhə̀n dɛ́ mɔ́ è ce a jǐrh á zù-bal èlâsɛ̃´?
17Lyì ŋwɛ́nɛ́ bə̀ nʼê wɛ̀rhɛ́ ǹdə wɔ́ só bə̀ só ába ta, e jʼà wɔ́ kɔma. Wɔ́ yál bə̀ nʼê yâl bə pɔr ába àmyɛ́ kwã nɛ́, á kʼá tó bə̀myɛ́ nɛ. 18Á mə̂ sʼá zə yə̀wâl twéé twéé ǹdə́ cɛ̀nɛ̀ wɔ̀rhɔ́, sə è bə̀kʼa yə̀ à gə ŋwɛ́nɛ́ á sõ yi ní dúdú yé. 19À byâ, zwini kʼê zhe ne dɛ̃´dɛ̃´ á yilə, ǹdə kɛ̃ pwǐ gə́ yʼa yì ní, sə rə̀ nʼê nwɛ̀nɛ̀ nɛ̀ kɔn la mʼe yí Kristə jòm á wẽ́ pamparɛ̃ɛ̃. 20À yʼà só ǹdə́ à wu gakó sʼa yə̀ á sõ a kwɛrhɛ a zɔ̀m ǹdʼába, bʼà wu nʼô zɛ̃̀ á yilə.
Agaarɛ ǹdə́ Sara wɔ́ dɔbrɛ kùrə̀ nə̀lyè myɔrhɔ
21Ámyɛ̌ byɛ̀bɛ́ á nʼá yâl á yə̀ Muyiisi nyə́ né yómə́ mó, wálna àmyɛ́ nɛ: á bə kɔn dɛ́ dɛ̀bɛ́ bə̀ kɛ̃ nyə́ né sɛ́bɛ́ rɛ́ wẽ́ mó kùr nyɛ̌ nà? 22Rə̀ nʼê byili bə̀ Abəraham nɔ bala-byâ bə̀lyè. Mə̀dù y wɔ́ Agaarɛ ń lùl mò; ń dõ mó wɔ́ Sara ń lùl mò. Sə Agaarɛ mɔ́ yà ń wɔ́ yóm. Wɔ́ Sara ń yà ń wɔ́ Abəraham kɛ̃ mɔ́ páá mɔ́. 23Byǐ mú mɔ̀bɔ́ Agaarɛ lùl mó, yàl numbyíní pùbùlə̀ kɔna, sə mɔ̀bɔ́ Sara lùl mó wɔ́ Yi nyì-bwelé y pyǐrh kɔna.
24-25Rə̀myɛ́ nʼê byili nə́ba bə̀ kana bɛ́ bə̀lyè y nʼê myɛrhɛ dɔbrɛ́ kùrə̀ nə̀lyè yə́. Agaarɛ byâ bɛ́ wɔ́ yómə́. Ń nə́ ń myɛrhɛ dɔbrɛ́ tɛ̀bɛ́ Yi zɔ Sənəyi pyɔ̀ w yó mó. Pyɔ̀ w òmyɛ́ ŋwɛ́nɛ́ Arəbyi ní, n jà ń nə́ ń myɛrhɛ Zhərəzalɛm. Cɔ w òmyɛ́ ŋwɛ́nɛ́ zà zà, òmyɛ́ ǹdə́ ò lyì bí ga wɔ́ yómə́. 26Sə Zhərəzalɛm, cɔ w kɔ̀bɔ́ ò ŋwɛ́nɛ́ dɛ̃̌ Arəzana w mɔ́, cǐ ò cìnə̀. Wɔ́ òmyɛ́ ò wɔ́ nə́ ná mɔ́. 27Èta, bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Ǹmyɛ́ kɛ̃ mɔ́ mɔ̀bɔ́ ǹ yə̀ lùl mó, ce ǹ wu yə̀ nyɛ̀n.
Ǹmyɛ́ mɔ̀bɔ́ ǹ yə̀ byǐ lul zúzúnú pár lwar mɔ́, búbwéé ǹdə́ wu-nyɔ̃̀;
bə̀ kɛ̃ mɔ̀bɔ́ bə̀ yârh tɛ̃´, bə̀ tʼâ cili ń sõ, ń mà n nə bə̀sɔ́ná nánzhəzhɔ̌ du mɔ̀bɔ́ ń byal mɔ́ só mó.”
28Da-byâ, è gə wɔ́ ámyɛ̌ yilə, á wɔ́ Yi nyì-bwelé y byâ ǹdə Yəzakɛ ta. 29Sə shãã ga, byǐ mú mɔ̀bɔ́ bə̀ yʼà lùl ǹdə́ numbyíní pùbùlə̀ mó, yà ń nə́ ń nwɛ̀nɛ̀ mɔ̀bɔ́ ń yàl Yi Eshirhə y kɔn mɔ́, sə zà zà myɛ, kɔn gwẽ̌ wɔ́ èta. 30Wɔ́ bə̀kɔ́n Yi zɔ̀mɛ̀ rɛ́ sɛ́bɛ́ rɛ́ nʼê byili? Rə̀ wòwə̀: “Vǔr yə-kɛ̃ mɔ́ ǹdə́ ń byǐ mú ga ǹ sono, bə̀ yə-kɛ̃ mɔ́ byǐ mú bə mə̂ sə n zə cəl ń da jɛ̃̀-kɔn dɛ́ wẽ́ yé. Wɔ́ da mɔ́ kɛ̃ mɔ́ páá mɔ́ byǐ mú ń mə̂ sə n cìní ri.” 31Da-byâ, nə́ də̀ yə-kɛ̃ mɔ́ byâ yé. Nə́ wɔ́ kɛ̃ mɔ́ páá mɔ́ byâ.
اکنون انتخاب شده:
Galəshi 4: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.