2 Tesəloniki 1
1
Pwəə nə́ ń ce Tesəloniki Kristə-lyì bí
1Wɔ́ àmyɛ́ Pwəə ǹdə́ Shəlvɛ̃ ǹdə́ Timote nə́ rʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ Tesəloniki Kristə-lyì gùlú w lyì bí ni pɔ. Á zhí nə́ Da Yi ǹdə́ nə́ Cinu Yezu Kristə ne. 2Bə̀ mʼa cĩ́ bwəl á yó, sə bə pə ába yə̀-zùlə́!
Pwəə nə́ ń ce Yi nə̀bán Tesəloniki Kristə-lyì bí yilə
3Da-byâ, nə́ mə̂ dwã sə nə́ ce Yi nə̀bán twéé twéé á yilə, bʼâ Yi-ni-zhú mú nʼê súlí, e jà á dwã sónó w myɛ nʼô súlí ò la gaga. Rə̀myɛ́ wɔ́ kɔn dɛ̀bɛ́ rə̀ càn. 4Wɔ́ rə̀myɛ́ è ce, nə́ rʼé zɔ̀m á yò, nə́ rʼé ji á gar nə́ byili Yi gùúlí dwã bɛ́ lyì bí ni. Nə́ rʼé byili bə̀ nə́ wun nyɛ̀ á gə́ zhí Cinu ni á zhǐ kẽkẽ nɔ̀nɔ̀ ǹdə́ zwini tɛ̀bɛ́ á nʼá nɛ mɔ́ ga yírh w mó yilə.
5Rə̀myɛ́ nʼê byili pamparɛ̃ɛ̃ bə̀ lyì bí bùrsí Yi la kɔ́ mɔ́ bʼa yə̀ cángá. Rə̀myɛ́ mɔ́ yilə, nɔ̀nɔ̀ w kɔ̀bɔ́ á pyɛ́nɛ́ á nʼá nwɛ̀nɛ̀ mɔ́ ce Yi bʼa ce á zù rə̀ tənà y wa, bə̀ wɔ́ èmyɛ́ yil á nʼá nwɛ̀nɛ̀. 6Zhə̀nà, Yi bʼa wɛ̀rhɛ́ kɔn dɛ̀bɛ́ rə̀ wɔ́ cángá: rə̀ bʼa kʼa ce byɛ̀bɛ́ bə̀ nʼê nwɛ̀nɛ̀ ába mɔ́ nwɛ̀nɛ̀. 7Sə è gə wɔ́ ámyɛ̌ byɛ̀bɛ́ á nʼá nwɛ̀nɛ̀ zà zà mɔ́ yilə, Yi bʼa pə shìrhə́ nə́myɛ̌ ǹdʼámyɛ̌ ga nɛ, dɛ̃ rɛ́ tɛ̀bɛ́ Cinu Yezu ká ń bàn mɔ́ yùwə̀. Ń gə tú ń ká ń bàn yi ní, ń bà n zə ń màlɛ́kabá ǹdə́ bə̀ jàn nánfɔ̀lɔ̀ w n shí dɛ̃̌, 8n mə n bə̀ ǹdə́ myìn-zhù nánfɔ̀lɔ̀, n zɛ̃̀ n pə còrhò-tum byɛ̀bɛ́ bə̀ yə̀ Yi zwì, bə̀ jʼà yə̀ nə́ Cinu Yezu yò-ècɔ̀nɔ̀ nyí rí zwẽ mó ne. 9Nyǐnə còrhò-tum dí Yi la lyì bí bə̀myɛ́ nɛ pɔ mɔ́: rə̀ bʼa zhìlì bə̀ yò lyɛ́lyɛ́; rə̀ bʼa jì bì bə vò pyépyé; bə̀ tʼâ la rə̀ zùwə́ myɛ nyí ni bwəlse yé. 10Rə̀myɛ́ gakó bʼa wɛ̀rhɛ́ dɛ̃ rɛ́ tɛ̀bɛ́ Cinu ká ń bàn mɔ́ yùwə̀. Rə̀myɛ́ yi ní, ń lyì bí byɛ̀bɛ́ bə̀ zwẽ ń nyí mú gakó bʼa cèrhé mo. Ámyɛ bʼâ tó á yə̀ bə̀ wẽ́, á gə́ shɛ̀nɛ́ á zwẽ zɔ̀mà nɛ́ nə́ byili ába mó yilə.
11Wɔ́ rə̀myɛ́ è ce nə́ rʼé lwə̀l Yi twéé twéé á yilə. È gə́ wɔ́ rə̀myɛ́ rə̀ byẽ̀ ába mó ce, nə́ rʼé lwə̀l lè bə̀ rə̀ sɛ̃ ába á ŋwɛ̀nɛ́ á wɛ̀rhɛ́ kɔn gakó rə tó rə̀ pùbùlə̀ nè. Kɔn dɛ̀bɛ́ gakó á nʼá yâl á wɛ̀rhɛ́, sə Yi sɛ̃ ába ǹdə́ rə̀ jàn dɛ́, mùnì ga á wɛ̀rhɛ́ cɛ̀nɛ̀, sə rə sɛ̃ ába á twĩ̀ á Yi-ni-zhú tumə né á báásɛ. 12Èta, nə́ Cinu Yezu yil lé mʼa tó á dɛnnɛ rə du ǹdə́ còrhó, sə ńmyɛ mà n ce ámyɛ yil du. Rə̀myɛ́ gakó bʼa wɛ̀rhɛ́ nə́ Yi ǹdə́ Cinu Yezu Kristə jàn yilə.
اکنون انتخاب شده:
2 Tesəloniki 1: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.