Matio' 7
7
A-a' :chehn-' a 'bei'-a' zabe 'i 'suh
(Lu 6.37-38, 41-42)
1:Yee' :Yusu'-a kpa or-a' wlu 'dlu bo :chio'lo:, or 'dae:, A-a' :chehn-' a 'bei'-a' zabe 'i 'suh, 'de Nyorsoa :ne-' a-a' zabe zi :ke. 2Deh no-eh, :ka a no-a a 'bei'-a' zabe-a' zi-a', 'ka-: Nyorsoa-a mu a-a' ne-a' zi-a' :no :ke. :Yee' :ka a no-a a 'bei'-a' ne-a' :yba-dih-eh, 'ka-: Nyorsoa-a mu a-a' ne-a' :yba-dih-eh :no :ke. 3:Eh no 'de :an 'ye :gbehne-eh-yu :due' :ne-a 'de :an-a' 'de-di' 'yli-e :eh? Jorwor: tu 'kplo :yor :or :ne-a 'de :an-a' 'jeh 'yor-eh 'yli-e, :an-a' 'ye-or' :e? 4:Yee' :kaa :on 'beh-dih: :on 'ye 'de or bo :wlu-eh no :eh? :On 'ye :ao', 'An 'de-di', 'yle, 'on 'ye :gbehne-eh 'de :on 'yli-e :za, :mor tu 'kplo :ne 'de :an-a' 'jeh-a' 'yli-e :eh? 5:Mor nyor⧾-a' 'yli 'ye-nyor: :daa, :za 'de tu 'kplo :dao' 'de :an-a' 'jeh 'yli-e :zai', :yee' :an mu dih 'ye-: deh 'jeh, 'de :on 'ye :gbehne-eh-yu 'de :on 'be 'yli :za.
6A-a' 'nyi-:-' gbe⧾ deh⧾ :en :ne-a gban 'i 'do Nyorsoa bo. :Mor a no-eh, en mu-' dih 'bili: en 'ye a dih :chehn-dih:. A-a' :po-' a-a'a: 'dhama-yor 'do :bee'⧾ ybei' dih. :Mor a no-eh, :yee' en mu-or ken dih :ye-dih:.
'Yba-dih: Nyorsoa deh
(Lu 11.9-13)
7A 'yba-dih: Nyorsoa deh, :yee' a mu-eh 'ye-:. A 'bhorn-eh dih, :yee' a mu-eh 'ye-:. :Mor a bla :kpaa', :yee' or mu 'o 'wluh-: 'do a bo. 8Deh no-eh, nyor⧾-a' klehkpeh :an 'yba-dih-a Nyorsoa deh, an 'ye-eh'. :Yee' nyor :or 'bhorn-a deh dih, or 'ye-eh'. 'De mor nyor :or bla-a :kpaa', or mu 'o 'wluh-: 'do or bo. 9'De a 'nyne-', nyor :yor-a' 'jeh, :or :korn 'yu-a mu-or 'bhlee 'yba-dih:, 'de :or 'ye-or' sobu' 'nyi :eh? 10'De mor, :mor or-a'a: 'yu 'yba-dih-or zimi-eh, 'de :or 'ye-or' sehn 'nyi :eh? 11'De mor :ka a-a' kplen-a' :yeh :nyni 'yi dih, a yubo: 'nyii'-deh:⧾ 'jeh, a 'ye-a' a-a'a: 'nynuu 'nyi 'weh, :yee' a :Baa' :yor :or :ne-a 'de yai', dha or mu :na-dih: 'do nyor⧾ :an 'yba-dih-or deh⧾ 'jeh, an-a' dhih bo :eh?
12Deh a 'bhorn-a nyor⧾ 'ye-a' no 'do a bo, eh-a' 'jeh :dao', eh-: a 'ye no 'do nyor⧾ bo :ke. Eh-: :Mose'-a' 'tele'-: 'dekorn: Nyorsoa-a' wele-eh: :po-nyor⧾-a' nyor⧾ deh :torne-eh-: en 'dhu-eh:-'.
Gba-dih-gba-a' worn :or se-a bo dih 'beh
(Lu 13.24)
13:Yee' a :yi-dih: 'do gba-dih-gba-a' worn :yor se-a bo dih 'beh ka. Deh no-eh, gba-dih-gba :or 'beh-a 'worn dih, 'de mor :gwie: :eh :ne-a bo dih bhou, eh-a' :sie: 'da, :wor 'dhu gbe :zie: 'da-'. Gba-dih-gba-a' 'jeh :dao', or-: :gwlor-nyor:⧾ :doru'-a yi-dih 'o 'worn. 14Jorwor: gba-dih-gba-a' worn, :or se-a bo dih 'beh-: 'dekorn: :gwie: :eh :kma-a 'i 'do kpa 'da-: me-: kpa nyor⧾ 'de 'kmo :sie: :febeh' bo. Eh-a' 'jeh :wor :gwlor-nyor⧾-kpor-a 'ye, 'de an kpa.
Tu-: 'dekorn: an-a' 'bi-:
(Lu 6.43-44)
15:Yee' a 'dhu a-a' 'jeh :dhororn', 'do sih 'tmo :wele-eh: :po-nyor:⧾ :an yi-a 'o a bo, 'de :on pa-a 'blae'⧾-a' ku⧾-', jorwor: :on 'ble-a ji⧾-a' :porluh⧾. 16An-a' 'bi an mu-a :tlo, me-: nyor⧾-a mu-uh yubo-dih:. 'Wu⧾-kwla :se-' 'nyoeh' :tlo i, 'de dlan :se-' gwehn :tlo i. 17'Ka-: 'o eh :ne, tu⧾-a' klehkpeh :en no-a tu⧾ 'jeh, en tlo 'bi 'jeh, jorwor: tu 'dhu-a tu-zon-', an tlo 'bi-zon:⧾. 18Tu 'jeh se 'beh-dih: on 'ye 'bi-zon⧾ :tlo, 'de tu-zon se 'beh-dih: on 'ye 'bi 'jeh :tlo. 19'De tu⧾-a' klehkpeh :en :se-a 'bi 'jeh :tlo i, en mu :dba-eh:, 'de en 'ye 'de neh-' :po-eh:. 20:Yee' 'do an-a' 'bi an tlo-a bo, 'do :wor a mu-uh yubo-dih:.
'On se a yubo:
(Lu 13.25-27)
21:Yee' eh :se nyor⧾-a' klehkpeh :an 'da-dih-a 'on, :Gwlor :baa', :Gwlor :baa', mo-: :an mu Nyorsoa-a' nyor⧾ wlu 'ken :korn-eh 'zorn :pa :deh. Jorwor: nyor :dao' :or mu-a 'On-ba: :or :ne-a 'de yai', or-a' 'ton :korn-deh :no, or :due' gbai, or-: mu-eh 'zorn :pa. 22:Yee' :mor Nyorsoa-a' zabe: :zi-we-eh nyni 'o, :yee' :gwlor-nyor:⧾ :dhulu'-a mu :aa 'da-:, 'de 'on bo, :Gwlor :baa', :Gwlor :baa', eh :se 'de :an-a' 'nyne 'di, :a se Nyorsoa-a' wele-eh :po-dih: :e? 'De eh :se 'de :an-a' 'nyne 'di, :a se nyor⧾ 'kwla 'ye-dih-deh⧾ 'de :za-dih: :e? 'De eh :se 'de :an-a' 'nyne 'di, :a se deh⧾ :kolu'⧾ :dhulu' :no-dih: :e? 23:Mor on 'da :ao', :yee' 'an mu-uh :gwluhuh' zela: deh 'jeh, 'On se a yubo:. A 'wluh 'o 'on ybei', a :mor deh⧾-zon:⧾ :no-nyor:⧾ :daa.
'Gbu⧾ :po-nyor⧾ 'sororn'
(Lu 6.47-49)
24:Yee' nyor⧾-a' klehkpeh :on 'worn-a 'an wlu :daa, 'de :on 'chean'-a deh⧾ 'an za-a-' en-' no-a', :yee' on gweh :toror' :korn-nyor: :or po-a or-a'a: 'gbu 'do 'soba ken. 25:Yee' :yeh 'ni-a dba-a, 'de 'ni 'yi-a, 'de :pobor' :dhulu' :yi-dih-uh-a-', :yee' 'gbu :dao', on :se-' blu. Deh no-eh, on :po-eh: 'o 'soba ken.
26Jorwor: nyor⧾-a' klehkpeh :on 'worn-a 'an wlu :daa, 'de :on se-a deh⧾ 'an za-a-' en-' no-a' 'chean', :yee' on gweh :bobo-nyor: :or po-a or-a'a: 'gbu 'do :bhehneh'-dhu-'. 27:Yee' :yeh 'ni-a dba-a, 'de 'ni 'yi-a, 'de :pobor' :dhulu' :yi-dih-uh-a-', :yee' 'gbu :dao', on blu-', 'de on :wa-dih: dih.
:Yusu'-a' 'kpih
28:Yee' :yeh :Yusu' jla-a 'do deh⧾ :daa or za-a-' bo, :yee' or-a' nyor⧾ deh :torne-eh :florn-dih: :gwlor-nyor:⧾ :doru' :dao'-: worn. 29Deh no-eh, or torne-uh deh, :ka nyor :or 'ble-a 'kpih 'de Nyorsoa-deh 'di, :eh :se-a :ka an-a' nyor⧾ 'tele' :torne-nyor⧾-a no-a.
اکنون انتخاب شده:
Matio' 7: TCHKR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Tchien Krahn published as KUO :DELE' © The Bible Society in Liberia, 1995.
