Matio' 17
17
:Yusu'-a' yau :za-dih:-' 'do tluh ken
(Mk 9.2-13; Lu 9.28-36)
1:Yee' :yeh 'we :meheh'lo zi-a, :yee' :Yusu' 'duo: :Piteh'-: 'Jeen-: 'dekorn: 'Jeen-a' dei' :Jororn'-: 'weh, 'de or kpa-uh 'de tluh :dhorno' ken, on 'ye kpor chehn. 2:Yeh an pobo-a 'o, :yee' or-a' yau :za-dih:-', 'de or-a' 'yuba-a fan, :ka 'yluh-a no-a fan-a', 'de 'tiei: or pa-a-', en :za-dih: :ke, en :ne :bhoror: :ka zorn-pli :ne-a. 3'Yli :a bla-a 'i, :yee' on 'ye :Mose'-: 'dekorn: :Ila'yor-: mo-: :an wlu 'de or bo. 4'De :Piteh' :wlu 'de or bo, or 'dae:, :Gwlor :baa', eh :nmor-: 'yi, 'de :a :ne dha. :Mor :on :taa-eh 'bhorn, :yee' 'an mu gbe :dhe dih :gbalie⧾ taan :po dha mor, :due' 'do :on bo, :due' 'do :Mose' bo, :due' 'do :Ila'yor bo.
5:Yeh :Piteh' 'si-a 'o :wlu 'da, :yee' 'yli :a bla-a 'i, yao-pli: :en fan-a, me-: 'jli-uh 'dlu. 'De yao-pli: :dao' 'di, 'do :wor wlu 'wluh, on 'dae:, 'An-a: :dhih :kma-yu: 'o, or-: :dhe dih. 'An :porluh 'pehn-: dih 'do or bo. A :to or-a' wlu :dou'⧾ bo.
6:Yeh or-a'a: bo :na-nyor⧾ 'worn-a wlu :daa, :yee' :fano-a: no-uh, 'de on slo an-a' 'jeh, on 'jli dih 'do 'bluhbor. 7Jorwor: :Yusu' yi 'o on bo, 'de or 'tuh-uh dih, or 'dae:, A :sorn-', a mu yai'. A 'bor :fano: :ple-eh. 8:Yeh on 'duo:-a 'dlu⧾ ya-', an pobo-a 'o, :yee' on :se-' nyor :noror' 'ye. Jorwor: :Yusu' :due', or-: on 'ye.
9:Yeh an 'dhle-a tluh, :yee' or dhe-uh 'tele' 'i, or 'dae:, A-a' zela:-' nyor-beh :gwluhuh' deh a 'ye-a kele'a: o. :Mor 'yu an 'da-dih-a Nyor-kpalu-a' 'yu 'meh, 'de or 'ye 'de nma-dih-deh 'di 'wluh, 'de a 'ye-eh' nyor⧾ :gwluhuh' zela: 'o.
10'De on dhele-or dih, on 'da, :Eh :korn dhih 'de nyor⧾ 'tele' :torne-nyor⧾ 'da :Ila'yor:, or-: :korn :or 'ye 'de yi :zai' :eh?
11'De or zela-uh :gwluhuh', or 'da, :Ila'yor :korn or 'ye 'de yi, 'de or 'ye deh⧾-a' klehkpeh 'kpa po. 12Jorwor: 'nyi 'on zela: a :gwluhuh', :Ila'yor 'yle :weh, jorwor: on se-or 'i yubo:, 'de deh an 'bhorn-a on 'ye-or' :no-dih:, 'de on :no-dih-eh or. 'Ka :wor 'yu an 'da-dih-a Nyor-kpalu-a' 'yu-a mu or-a' 'jeh-a' worn 'ye-eh :no :ke, 'de on 'kwa.
13:Yee' or-a'a: bo :na-nyor⧾ 'worn-eh-: dih :ka eh 'dhu-a nyor⧾ 'ni 'dlu :po :Jororn'-a' dhih-' or za-a-' 'de on bo.
:Yusu' :za nyor-kpalu-yu :due' 'kwla 'ye-dih-deh 'de
(Mk 9.14-29; Lu 9.37-43a)
14:Yee' :Yusu'-: 'dekorn: or-a'a: bo :na-nyor⧾-a' nyor⧾ taan :dao'-: mo-: yi 'o nyor⧾ :doru' :on :ne-a 'o tluh 'zorn bo. :Yeh on nyni-a 'o, :yee' nyor-kpalu :due', or-: yi 'o :Yusu' bo, or-: 'jli dih 'do or 'zorn, 15or 'dae:, :Gwlor :baa', 'ye 'an-a: nyor-kpalu-yu-a' :wehlih, 'nyi 'on. Or 'ble 'dbaa'-deh:, eh-: no-or 'suh, 'de or 'ye or-a' 'jeh worn 'gabaa. Deh no-eh, ti :dhulu' or 'ga-: dih 'de 'yli deh⧾-' dih-: 'dekorn: 'de 'nior-:. 16'On kpa-or 'o :an-a'a: bo :na-nyor⧾ bo 'weh. Jorwor: on se or-a' 'puh-dih-eh 'beh-dih:.
17'De :Yusu' :wlu 'de on bo, or 'dae:, A :mor :kana-nyor:⧾ :daa :or se-a dhih 'jeh-' :po-eh 'ble, 'de :or :korn-a noo-deh:⧾ se-a 'i 'sleh, ti dhie 'on 'ye dha a bo no :eh? :Kaa 'on 'ye :porluh-a' 'yi 'dba-eh no 'do a bo :eh? A :ya 'de 'yu :daa 'noror 'on bo. 'De on kpa-or 'de or bo. 18:Yee' :Yusu' 'nyi 'kwla 'ye-dih-deh 'tele', eh 'ye 'o 'yu 'de 'wluh. 'De eh 'wluh 'o or 'de. :Yee' 'do :dha :due' 'jeh :dao', or 'puh-'.
19:Yee' :Yusu'-a'a: bo :na-nyor⧾ yi 'o or bo 'de 'slan-', on dhele-or-: dih, on 'dae:, :Eh :korn dhih 'de :a se 'kpih 'ble 'do 'yu :dao' or-a' 'kwla 'ye-dih-deh 'de :za-eh bo :eh?
20'De or zela-uh :gwluhuh', or 'da, A se eh-a' no-a' 'beh-dih:, deh no-eh, a-a' dhih 'jeh-' :po-eh se 'i 'beh. Dhih 'jeh, 'an zela a :gwluhuh', :mor a-a' dhih 'jeh-' :po-eh :ne :zlaan'-a' 'yor-eh :sloror' 'beh-dih:, :yee' a 'beh-dih: :wlu 'de tluh :daa bo 'weh, :mor a 'da, Mu, 'wluh 'o :dha :on :ne-a, 'de :on 'ye 'do :dao' mu, :yee' an mu 'o 'wluh-:. :Yee' deh⧾-a' klehkpeh 'beh-dih: en 'ye :no-eh: 'do a bo. [ 21'De mor Nyorsoa bo :wlu-eh-: 'dekorn: 'suehn-' :pa-eh-: en :due', me-: 'beh-dih: :en 'ye nyor⧾ 'kwla 'ye-dih-deh⧾-a' :yih :dao' nyor⧾ 'de :za.]
:Yusu'-a za or-a' 'meh :sorn-' dhih-' 'weh :neheh'
(Mk 9.30-32; Lu 9.43b-45)
22:Yee' :Yusu'-a'a: bo :na-nyor⧾-a' klehkpeh 'kpa :dha :due' 'de :Galali'i-bluhba ken. 'Do :wor :Yusu' zela-uh :gwluhuh', or 'dae:, An yi 'yu an 'da-dih-a Nyor-kpalu-a' 'yu :plo 'da, 'de :gwlor-nyor⧾ bo. 23An mu-or 'dba-:. :Yee' 'do 'we-eh-a' taan neh 'di, Nyorsoa-a mu-or 'de :za.
:Yeh or-a'a: bo :na-nyor⧾ 'worn-ih'-a, :yee' an-a' :porluh⧾ 'kpa-: 'zorn 'gabaa.
Nyorsoa-a' 'sla-a' 'taa-deh⧾-wlii:
24:Yee' :Yusu'-: 'dekorn: or-a'a: bo :na-nyor⧾-: on mu :Kapa'nior-gwlor-', 'do :wor Nyorsoa-a' 'sla-a' 'taa-deh:⧾ :za-nyor⧾ :yi-dih: 'o :Piteh' bo, 'de on dhele-or dih, on 'dae:, A-a'a: nyor⧾ deh :torne-nyor:, or-a' :za Nyorsoa-a' 'sla-a' 'taa-deh⧾ :e?
25'De :Piteh' 'dae:, 'Kei:, or za-ih' o.
:Yee' :yeh :Piteh' 'wluh-a 'o :dha 'o, :yee' or mu 'de 'gbu. :Yeh or pa-a, :yee' :Yusu', or-: no :zai'-nyor, :or dhele-or dih, or 'dae:, Samor', :kaa :an-a' :porluh no eh-a' 'ye-a' :eh? Deh 'i-deh-nyor: :or :korn :or 'ye 'taa-deh⧾ :za 'do 'keen-boi' :on :ne-a dha 'bluhba ken bo :eh? An-a' 'nynuu :e? :Ae' nyor⧾ 'sluh⧾?
26'De :Piteh' 'dae:, Nyor⧾ 'sluh⧾ :oo'.
'De :Yusu' 'da, Eh :oo'. :Yee' 'do eh-a' dha, an-a'a: 'nynuu se :korn on 'ye 'taa-deh:⧾ :za 'da. 27Jorwor: nyor⧾ :daa, on :ne-' deh⧾-zon⧾ :gwluhuh' dih :na-dih: 'do :a 'bhun, mu 'de yobo'-pehnu worn 'i, :on 'ye :koeh'eh po. :Yee' :zai'-zimi-eh: :an mu-a 'fla-:, :yee' kan-dih: eh-a' worn 'i, 'do :wor :an mu 'wlii-eh 'ye-dih:. 'Duo-eh, 'de :on 'ye-eh' kpa 'de 'taa-deh:⧾ :za-nyor⧾ bo, 'do mor-: 'dekorn: 'mor-: :a-a'a: Nyorsoa-a' 'sla-a' 'taa-deh⧾ bo.
اکنون انتخاب شده:
Matio' 17: TCHKR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Tchien Krahn published as KUO :DELE' © The Bible Society in Liberia, 1995.
