Matio' 14
14
'Keen :Hehlo' 'dba nyor⧾ 'ni 'dlu :po :Jororn'
(Mk 6.14-29; Lu 9.7-9)
1:Yee' 'do ti :dao' 'di, :Hehlo' :or no-a nyor⧾ wlu 'ken :korn-nyor 'de :Galali'i-bluhba ken, or-: 'worn :Yusu'-a' 'nyne. 2'De :Hehlo' :wlu 'de or-a' 'jeh-a'a: bo :na-nyor⧾ bo, or 'dae:, Nyor⧾ 'ni 'dlu :po :Jororn' :oo', or-: 'wluh 'de nma-dih-deh 'di. Eh-: no-eh, 'de or 'ble 'kpih, or no nyor⧾ 'di dih 'ma-dih-deh⧾ deh :dao'.
3Deh :korn-a dhih or 'da :ao', eh-: 'dhu. Or-a' 'jeh 'yor-eh: 'nyi nyor⧾ 'tele', 'de on kpon :Jororn', on san-or, 'de on po-or :kasue 'di see. Or no deh :daa 'weh, 'do :Hehlo'dia-a' dhih bo, :or :Hehlo' :za-a or-a' dei' Felor' 'kwa. 4:Jororn' za-eh' 'weh :dee' see, 'de :Hehlo' bo, 'do kpor⧾ :dhulu' 'di, or 'dae:, Eh se 'o :a-a'a: 'tele'-a' :gwie 'i :ne, nyor 'ye or-a' 'de-di' :yi-nyor 'nynor 'kwa :za. 5Eh-a' dhih, :Hehlo'-a 'bhorn or 'ye-or' 'dba, jorwor: or ple nyor⧾-a' 'yli. Deh no-eh, on 'duo: :Jororn'-' 'weh, or 'ye Nyorsoa-a' wele-eh: :po-nyor no.
6Jorwor: 'do :Hehlo'-a' 'wluh-dih-we-eh bo, 'do :wor :Hehlo'dia-a'a: 'nynor-kpao'-yu 'kpa-dih: 'o :gwlea, 'de or ye. :Yee' or 'pehn-dih: :Hehlo'-a' :porluh-: dih 'gabaa. 7Eh-: :korn dhih, or po or-a' wlu :dhama'-', or :zlehn-dih: deh, or 'da or mu-or deh-beh-deh-beh: or mu-or 'yba-dih: 'nyi-:.
8:Yee' or 'de zela-or-: :gwluhuh' deh or 'ye-a' 'yba. Eh-: no-eh, 'de or 'da, 'Nyi 'on nyor⧾ 'ni 'dlu :po :Jororn'-a' 'dlu 'de 'pani' 'di.
9:Yeh 'keen 'worn-a deh :daa, :yee' or-a' :porluh pa-' :chehbe'. Jorwor: :ka or :zlehn-dih:-a-: 'dekorn: or 'bei' or 'da-a, an-a' dhih-: eh-: no-eh 'de or 'dhu nyor⧾ wlu worn, eh 'ye :no-eh:. 10'De or dbo nyor⧾, :Jororn'-a' 'dlu 'ye 'o :chehn-eh: 'de :kasue 'di, 11'de on po-uh 'de 'pani' 'di, on 'nyi-uh 'nynor-kpao'-yu, 'de or ya-uh 'de or 'de bo. 12'De :Jororn'-a'a: bo :na-nyor⧾ 'yle, on 'duo: or-a' 'ku-', 'de on nma-dih-uh dih. 'De on mu, on zela: :Yusu' :gwluhuh'.
:Yusu' 'nyi nyor⧾-kpalu⧾-a' 'wlu :mm' dii-deh:⧾
(Mk 6.30-44; Lu 9.10-17; Jn 6.1-14)
13:Yee' :yeh :Yusu' 'worn-a :Jororn'-a' 'meheh'-nyne, :yee' or 'wluh 'o :dha 'o 'weh, or kpa 'blagbe:, 'de or mu 'de :dha nyor se-a :ne, or 'ye kpor chehn. Jorwor: :yeh :gwlor-nyor:⧾ :doru' 'worn-ih'-a, :yee' on 'wluh :gwlor⧾ :nyene' 'di dih, an na 'bluhbor, an zi 'o or klei'. 14:Yeh or 'si-a 'bluhbor, or 'wluh-a 'de 'blagbe 'di, :yee' or :yeh-dih: :gwlor-nyor:⧾ :doru' ken. :Yeh or 'ye-uh'-a, :yee' an-a' :wehlih-a: no-or, 'de or 'puh-dih: :yuh 'ble-a puhba-deh⧾ 'de on 'klu-'.
15:Yeh glu-a gor-a, :yee' or-a'a: bo :na-nyor⧾ yi 'o or bo, on 'dae:, Dha :daa :a :ne-a, nyor se-a :ne, 'de mor ti zi-a :ke. Dbo :gwlor-nyor:⧾ :doru' :daa, :gwlor⧾ :nyene' 'di dih, on 'ye dii-deh⧾ dhen 'do an-a' 'jeh bo.
16Jorwor: :Yusu' :wlu-' 'de on bo, or 'dae:, On se :korn on 'ye mu. A :mor 'ye-uh' deh 'nyi on 'ye di.
17'De on 'da, Deh :due' :a 'ble-a dha mor, eh-: 'dhu, 'bhlee: :kpuan'⧾ :mm'-: 'dekorn: zimi 'sororn'-:.
18'De or 'da, A ya-ih 'noror 'on bo. 19'De or zela: nyor⧾ :gwluhuh' on 'ye-' dih dhele: 'do :peli' ken. :Yee' or 'duo: 'bhlee: :kpuan'⧾ :mm'-: 'dekorn: zimi 'sororn' :dao'-: 'weh, 'de or pobo: 'de yai', or po Nyorsoa-a' 'zio, 'de or :chehn-dih: 'bhlee: :kpuan'⧾ :dao' dih, 'de or 'kwa. Or 'nyi-ih or-a'a: bo :na-nyor⧾, 'de on 'nyi-ih :gwlor-nyor:⧾ :doru' :dao'. 20'De an-a' klehkpeh di deh, on dbo. :Yeh on gweh-a deh :di-eh 'i, :yee' :yih :en :sie:-a 'o dih, or-a'a: bo :na-nyor⧾ po-a :dha :due', me-: 'yi :too'⧾-a' :bhue: 'yor 'sororn'. 21Nyor⧾ :on di-a deh, on 'beh-dih: on 'ye nyor⧾-kpalu⧾-a' 'wlu :mm' no. Jorwor: 'nynor⧾-: 'dekorn: 'nynuu: :nyene'-: on :se-' :zlo-eh:.
:Yusu' :na yobo'-pehnu ken dih
(Mk 6.45-52; Jn 6.15-21)
22:Yee' :yeh eh no :ao', :yee' :Yusu' po 'de or-a'a: bo :na-nyor⧾ 'blagbe 'di, 'de or 'da, A mu 'on ybei' 'de :Galali'i-yobo'-pehnu-a' 'for :a 'wluh-a bo de. :Yeh an mu-a, :yee' or :sie: de, 'de or dbo nyor⧾ :doru' :dao' on 'bli deh⧾-' dih. 23:Yeh or dbo-uh-a on 'bli, :yee' or :due' mu 'de tluh ken, or 'ye 'de Nyorsoa bo :wlu. :Yeh glu gor-a, :yee' 'do :wor or :due' :ne. 24:Yee' :yeh eh no :ao', :yee' 'blagbe :tehn bo 'weh 'de 'ni ken. Yobo'-pehnu-a' 'duh⧾-a bla-uh-: 'i. Deh no-eh, :pobor'-a 'beh-dih-uh 'worn dih.
25:Yee' 'do :dha 'o zorn-a yi-dih-a :zen-dih: 'da, 'do :wor or na-dih 'ni ken dih, or mu 'de on bo. 26Jorwor: :yeh on 'ye-or, 'de or na-a 'ni ken dih, :yee' :fano-a: no-uh 'gabaa, an po 'geh⧾, an no, 'Meheh'-nyor-a' :zulu: 'o.
27Jorwor: 'do :dha :due' :dao', or :wlu-' 'de on bo, or 'dae:, A :ku :gwluhuh'-'. 'Mor :oo'. A 'bor :fano-a' :no-' a-uh.
28:Yee' :Piteh' zela-or-: :gwluhuh', or 'dae:, :Gwlor :baa', :mor eh 'dhu :on mor-' deh 'jeh, :yee' 'da 'on, 'on 'ye 'ni ken dih :na, 'on 'ye 'de :on bo yi.
29'De :Yusu' 'dae:, 'Yle. :Yee' :Piteh' 'wluh 'de 'blagbe 'di 'weh, or 'si 'o 'ni ken dih, 'de or na-eh ken dih, or mu 'de :Yusu' bo. 30Jorwor: :yeh or 'ye-a :pobor'-a bla-or 'i, :yee' :fano-a: no-or. :Yee' or-a' buh⧾-a pa-' 'de 'ni 'zorn, 'de or po 'geh, or 'da, :Gwlor :baa', 'puh-dih: 'on.
31:Yee' 'do :dha :due' :dao', :yee' :Yusu' slo or-a' son, 'de or kpon-or dih, or 'da, :Mor :or :korn-a dhih 'jeh-' :po-eh se-a 'i 'beh. :Eh no 'de :an-a' :porluh-a dhobo :eh?
32'De on 'kpa 'de 'blagbe 'di, 'de :pobor' 'bor. 33:Yee' :yuh :ne-a 'de eh 'di, an za or-a' :weheh', an no, Dhih 'jeh, :mor Nyorsoa-a' 'Yu :oo'.
:Yusu' 'puh-dih: puhba-nyor⧾ 'do :Gehneh'sla
(Mk 6.53-56)
34:Yeh on 'dhan-a :Galali'i-yobo'-pehnu, :yee' on 'si 'bluhbor: 'do :gwlor an 'da-dih-a :Gehneh'sla. 35:Yeh nyor⧾ :on 'ti-a 'o :dha 'o, on yubo-or 'i, :yee' on dbo wlu⧾ 'do 'for⧾-a' klehkpeh :dao' 'di dih, 'de on :ya 'de or bo puhba-nyor⧾-a' klehkpeh, 36on bale-or, or 'ye 'worn, puhba-nyor⧾ 'ye or-a'a: :gba 'vuu-a' 'mla-a' deh-beh dih 'tuh :sloror'. Nyor⧾-a' klehkpeh :on 'tuh-uh-a dih, an-a' klehkpeh 'puh-' 'tene' :kpeen:.
اکنون انتخاب شده:
Matio' 14: TCHKR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Tchien Krahn published as KUO :DELE' © The Bible Society in Liberia, 1995.
