Matio' 10
10
:Yusu'-a' dboo-nyor⧾-a' :bhue: 'yor :ne-a 'sororn'
(Mk 3.13-19; Lu 6.12-16)
1:Yee' :Yusu' 'da or-a'a: bo :na-nyor:⧾ :on :korn-a :bhue: 'yor :ne-a 'sororn' 'do or bo, 'de or 'nyi-uh 'kpih 'do 'kwla 'ye-dih-deh⧾ ken, on 'ye-ih' nyor⧾ 'de :za, 'de jorwor: or 'nyi-uh 'kpih, on 'ye puhba-nyor⧾-: 'dekorn: :nea:-nyor⧾-: an-a' klehkpeh 'puh-dih:. 2Or-a'a: dboo-nyor:⧾ :on :korn-a :bhue: 'yor :ne-a 'sororn', an-a' 'nyne :wor :dhe dih,
:Zai' nor-a' 'nyne :wor Samor', an 'da-dih-a :Piteh'-: :Piteh'-a' dei' Andlu'-: :Zehbehli'-a'a: 'nynuu 'Jeen-: :korn or-a' dei' :Jororn'-: 3Felor'-: :Batale'meor-: :Tormor'-: Matio'-: :or no-a 'taa-deh:⧾ :za-nyor, 'Ehfea-a' 'yu 'Jeen-: 'Talior-: 4:korn Samor' :or no-a or-a'a: 'bluhba-dlu-a' dhih :vorn-nyor-: 'dekorn: :Juda' :Ehkeh'lior :or plo-a :Yusu'-:.
:Yusu'-a'a: dboo-nyor⧾-a' :koan:
(Mk 6.7-13; Lu 9.1-6)
5:Yee' nyor⧾-a' :bhue: 'yor 'sororn' :daa, mo-: :Yusu' 'dhu wlu worn, or dbo-uh deh⧾-' dih, or 'dae:, A-a' :mu-' nyor⧾ :on :se-a :Jueh'-nyor⧾-a' 'bluhba⧾ ken o. 'De mor a-a' :pa-dih:-' 'de Sehmeh'la-nyor⧾-a'a: gwlor⧾ 'di dih :ke o. 6Jorwor: a :korn a 'ye 'de 'Ezlea-nyor⧾ :on gweh-a 'blae'⧾ :en 'ma-a bo mu. 7:Mor a :taa mu, :yee' a po tubo-wlu:⧾ :daa, a 'dae:, Nyorsoa-a' nyor⧾ wlu 'ken :korn-eh 'koan'-: bo. 8A 'puh-dih: puhba-nyor⧾, a :ya 'meheh'-nyor⧾ 'noror 'kmo bo deka, a 'puh-dih: nyor⧾ :yuh yau-zon-weh kpon-a, 'de on 'ye :vlehehn'-' :gweh :ka :Mose'-a' 'tele' no-a mu-a'. :Yee' a :za nyor⧾ 'kwla 'ye-dih-deh⧾ 'de dih. A 'ye 'kpih :daa 'weh yaa'e, :yee' a 'nyi-ih nyor⧾ yaa'e :ke. 9Nyor-a' :kpa-' 'goo-: 'sebla-: :korn mor 'wlii: :nee'-: 'de or 'paa-dih-'. 10:Dha a mu-a, nyor-a' :kpa-' 'tiei 'di :po :gleu', 'de mor nyor-a' :kpa-' 'wla :noror'-: :buhbuh:⧾ :nee'-: 'dekorn: deh⧾ :tba-tu-:. Deh no-eh, nyor :or no-a :koan, or :korn or 'ye eh-a' dii-deh 'ye.
11:Yee' :gwlor a mu-a 'di :nyni, :gwlor :klaba'-: :eh beh :gwlor-yu-: a mu 'o a 'ye nyor :or mu-a a dih :kpon dih 'bhorn. :Mor a 'ye eh-a' nyor :dao', :yee' a :ne 'o or bo, eh 'ye 'o a-a' :gwlor-a' 'wluhuh'-ti ken :yeh-dih:. 12:Mor a pa 'de 'gbu 'di, :yee' a 'da, :Bhorlie' 'do a bo o. 13:Mor nyor⧾ :ne-a 'de 'gbu :dao' 'di, on kpon a dih, :yee' 'nyi a-a' :bhorlie' :sie: 'de on bo 'gbu :dao' 'di. Jorwor: :mor on se a dih kpon, :yee' a kpa a-a' :bhorlie'-wlu de. 14:Mor nyor se a dih kpon, 'de :mor on se a-a' wlu :dou'⧾ bo :to, :mor a :taa 'do :gwlor :dao'-: :eh beh 'gbu :dao'-: 'di 'wluh, :yee' a 'gbabo: :buhbuh⧾ 'zorn dih, a 'ye 'o 'wluh, eh 'ye-uh 'i :to-dih: :ka Nyorsoa :za-a an-a' deh son 'di. 15Dhih 'jeh, 'an zela a :gwluhuh', :eh :mor 'do Nyorsoa-a' zabe: :zi-we-eh 'di, Nyorsoa-a mu :wehlih 'ye-: 'do nyor⧾ :on :ne-a 'de 'Salor-gwlor-: 'dekorn: :Gormor'la-gwlor-: bo, eh 'ye 'o nyor⧾ :on :ne-a 'o :gwlor :dao' 'di-' :zi.
'Kle 'ye-eh: :eh yi-a 'de
(Mk 13.9-13; Lu 21.12-17)
16A :gbee'e:. 'An dbo a-uh 'weh, :eh gweh-a :ka 'blae'⧾ mu-a 'de ji⧾ 'klu-'. Eh-a' dhih, a 'yaa: :ka sehn :ne-a, :yee' a :kpoehn: 'i :ka pabu' :ne-a. 17A 'dhu a-a' 'jeh :dhororn' 'do :gwlor-nyor⧾ bo. Deh no-eh, an mu a 'kwla :za 'de 'koti-', 'de on 'ye a bla 'de an-a' 'di :gweh-dih-sla⧾ 'zorn dih. 18An mu a dih 'kla-: 'do 'gomla-nyor⧾-a' nyor⧾ :klaba'⧾-: 'dekorn: 'keen-boi'-: ybei', 'do 'an dhih bo, 'de a 'ye Nyorsoa-a' tubo-wlu:⧾ 'jeh-a' dhih bo zela: 'de on bo-: 'dekorn: 'de nyor⧾ :on :se-a :Jueh'-nyor⧾ bo-:. 19:Mor nyor⧾ kpon a-uh, eh-a' 'beh-dih:-' a-a' :porluh⧾ 'worn dih, 'do deh a mu-a-' :za-: 'dekorn: :ka a mu-a eh-a' :za-a' :no-:. Deh no-eh, :mor eh-a' :zaa-ti :taa 'o nyni, deh a mu-a-' :za, Nyorsoa-a mu-eh a :torne:. 20Deh no-eh, eh :se a-a' 'jeh :or :se-' :wlu i. Jorwor: a :Baa' Nyorsoa-a' :Zulu: 'o, mo-: :an mu a-uh' :yi-dih:, :on 'ye :wlu.
21:Yee' 'de-di'-a mu or-a' 'de-di' nyor⧾ bo :plo-dih: on 'ye-or' 'dba. :Baa'-a mu deh :due' :dao' :no 'do or-a'a: 'yu bo :ke. 'Nynuu-a mu on 'de-: 'dekorn: :baa'-: worn :bla-dih:, 'de on 'ye-uh' nyor⧾ ya po, on 'ye-uh' 'dba. 22:Gwlor-nyor⧾-a' klehkpeh, an mu a-uh' 'nyeh-:, 'an dhih. Jorwor: nyor :or se-a sea, 'de ti 'ye-a' 'dlu-' :jla, :yee' or mu 'puh-:. 23:Mor on 'ye-dih a 'kle 'do gwlor :due' 'di, :yee' a ple, a mu 'de :gwlor :noror' 'di. Dhih 'jeh, 'an zela a :gwluhuh', a :se-' 'Ezlea-gwlor⧾-a' klehkpeh 'di dih :mu i, 'de 'yu an 'da-dih-a Nyor-kpalu-a' 'yu, or 'ye 'de yi.
24Nyor :or 'chean'-a deh, or se 'i 'beh, or se 'o nyor :or torne-or deh-' :zi. 'De mor 'bhoi-yu se 'i 'beh, or se 'o or-a'a: nyor :klaba'-' :zi. 25Eh :korn eh 'ye :porluh-a' dih 'pehn-deh no, 'de nyor :or 'chean'-a deh, or 'ye nyor :or torne-or deh gweh. 'De jorwor: 'bhoi-yu 'ye or-a'a: nyor :klaba' gweh. :Mor on :taa 'gbu :baa' :Behzeh'bu :on no-a 'ku 'da-dih, :yee' dha nyor⧾ :on :ne-a 'de or 'bli 'gbu, an mu :na-dih: :eh?
Nyor :a :korn-a :a 'ye-a' ple
(Lu 12.2-7)
26:Yee' a-a' :ple-' :gwlor-nyor⧾. Deh no-eh, deh-beh: :eh :kan-eh worn 'i, eh mu ken :nyeh. 'De deh-beh: :eh 'zile-eh, eh mu yubo-eh:. 27Deh 'an zela a :gwluhuh' 'de :kule-', a :korn a 'ye-eh' :za 'de zorn-pli-'. 'De deh nyor :pa-dih:-a a 'slan-', a :korn a 'ye-eh' :za 'de 'gbu 'dlu. 28A-a' :ple-' nyor⧾ :yuh-a: 'dba-a nyor-a' yau, 'de :on se-a or-a' :zulu-a' 'dba-a' 'beh-dih:. Jorwor: a ple Nyorsoa, :or 'beh-dih:-a :or 'ye-a' nyor-a' :zulu-: yau-: en-a' klehkpeh gbe :zie-dih: 'de 'ku 'bli. 29Eh :se 'yalih 'sororn' :en se :plo-eh: 'do 'kaba-yor-eh :due' bo :e? Jorwor: en-' deh :due' :se 'o 'bluhbor 'kpa-: i, :mor eh 'dhu, a :Baa' se-eh ken dih 'worn-dih:. 30A-a' 'mii: :sloror' :en :ne-a 'o a 'dlu-a' 'jeh, en-' klehkpeh :zlo-eh:-', 'tene' :kpeen:. 31:Yee' 'do eh-a' dha, :fano-a' :no-' a-uh. A 'kpa deh ken 'gabaa, :eh :zi 'o 'yalih :dhulu'-'.
'Klae-a' dhih ken dih 'worn-dih-eh-: 'dekorn: se or-a' dhih ken dih 'worn-dih:-:
(Lu 12.8-9)
32:Yee' nyor-beh: :or 'worn-dih:-a 'an dhih, 'do :gwlor-nyor⧾ ybei', :yee' 'an mu or-a' dhih 'worn-dih: :ke, 'do 'On-ba: :or :ne-a 'de yai' ybei'. 33Jorwor: nyor-beh: :or dhobo:-a 'an dhih-' 'do :gwlor-nyor⧾ ybei', :yee' 'an mu or-a' dhih-' dhobo: 'do 'On-ba: :or :ne-a 'de yai' ybei' :ke.
Eh :se wlu-' dih 'worn-eh: jorwor: :bhla 'jlehn :oo' 'Klae :ya 'de
(Lu 12.51-53; 14.26-27)
34:Yee' :Yusu'-a kpa or-a' wlu 'dlu bo, or 'dae:, A-a' :na-dih-eh' :gwluhuh' dih, :eh :mor 'on yi-: 'de, 'on 'ye 'de wlu-' dih 'worn-eh :ya, dha 'bluhba ken. 'Kei o. 'On :se 'de yi, 'on 'ye 'de wlu-' dih 'worn-eh :ya. Jorwor: :bhla 'jlehn :oo', 'on :ya 'de. 35Deh no-eh, 'on yi-: 'de 'on 'ye-eh' no, 'de nyor-kpalu 'ye 'de or :baa' ya 'bili:. 'De 'on 'ye-eh' no, 'de 'nynor-kpao'-yu 'ye 'de or 'de ya 'bili:. 'De 'on 'ye-eh' no, 'de 'nynor 'ye 'de or-a'a: yibeor 'de ya 'bili:. 36'De nyor-a' 'jeh 'bli 'gbu 'di, 'do :wor nyor⧾ :an mu-or' 'nyeh-: an mu 'wluh-:.
37:Yee' nyor :or :ybeh-a or 'de-: :eh beh or :baa'-: :eh :zi-a 'o 'on-', :yee' or se-eh 'i :bleh-dih:, or 'ye 'de 'an 'for bo :ne. 'De mor nyor :or :ybeh-a or-a'a: nyor-kpalu-yu-: :eh beh or-a'a: 'nynor-kpao'-yu: 'o-: :eh :zi-a 'o 'on-', :yee' or se-eh 'i :bleh-dih:, or 'ye 'de 'an 'for bo :ne. 38:Yee' nyor :or se-a or-a'a: 'kle 'ye-eh-a' 'klorse tu ya-' 'duo:, :or 'ye-a' 'o 'on klei' zi, :yee' or se-eh 'i :bleh-dih:, or 'ye 'de 'an 'for bo :ne. 39Nyor :or dhe-a or-a' :febeh' dih, :yee' or mu-eh 'ma-dih:. Jorwor: nyor :or 'ma-dih:-a or-a' :febeh' 'do 'an dhih, :yee' eh-a' dih :dhe-eh: 'o or no.
Geli' :za-dih-deh:
(Mk 9.41)
40:Yee' nyor :or kpon-a a dih, :yee' 'mor-: 'o or kpon dih. 'De nyor :or kpon-a 'on dih, :yee' nyor :or dbo-a 'on, or-: 'o or kpon dih :ke. 41Nyor :or kpon-a Nyorsoa-a' wele-eh: :po-nyor dih, or-a' Nyorsoa-a' wele-eh: :po-nyor-dhih:, :yee' geli' :za-dih-deh: :korn-a 'be Nyorsoa-a' wele-eh: :po-nyor-a mu-a 'ye-: eh-: or mu 'ye-: :ke. 'De jorwor: nyor :or kpon-a 'yi 'sleh-nyor dih, or-a' 'yi 'sleh-nyor-dhih:, :yee' geli' :za-dih-deh: :korn-a 'be 'yi 'sleh-nyor-a mu-a 'ye-: eh-: or mu 'ye-: :ke. 42:Yee' nyor-beh: :or 'nyi-a 'an-a: bo :na-nyor⧾-a' nyor :due' :or no-a 'zeehn nor, 'ni :chehbe'-a' 'korbuh :sloror', :ka or 'dhu-a 'an bo :na-nyor-', eh-a' dhih, :yee' dhih 'jeh, 'an zela a :gwluhuh', or mu eh-a' geli' :za-dih-deh 'ye-: :gbor :gbor.
اکنون انتخاب شده:
Matio' 10: TCHKR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Tchien Krahn published as KUO :DELE' © The Bible Society in Liberia, 1995.
