Proverbios 13
13
1Ti ixjan jína nohe la titekaon ti nkehe kjua̱ko̱he̱ itꞌé;
a̱ndá ti nkexro nchejié a̱sén la tjinkakonhña tsoxrenduéhe.
2Ti nkexro nixja jína la tsꞌáyéhe̱ nkehe jína;
a̱ndá ti chojni chꞌia la tsjacha ti nkehe náxrjónhña ichꞌe.
3Ti nkexro chji̱ñéhña nixja la tjue̱he a̱sén;
a̱ndá ti chojni chji̱ñé nixja la jehó tsꞌitjáñaxín.
4Ti chojni séhe tjinkaon tsochónta nchónhña nkehe la ninkehó tsochontahya;
a̱ndá ti nkexro ichꞌe ixra̱ jína la tsjacha tsochónta nchónhña nkehe tjete.
5Ti chojni jína la tóxrìe̱nhña ti kjuachꞌia;
a̱ndá ti chojni tjenka̱yáxin ti nkehe jínahña la tso̱suéhe̱ sin la ko tsꞌáyèhya sin kjuasàya.
6Ti nkehe jína ichꞌe chojni la tjinki̱tsa kixin ijnko nti̱a jína tsꞌaji sin;
a̱ndá ti nkehe jínahña ichꞌe ti sin tjasin ijie̱ la tsꞌitjáñaxín sin.
7Siín chojni ndáchro kixin rico sin, kjánchó chóntahya sin ninkehó,
la siín chojni ndáchro kixin nóa sin, kjánchó chónta sin kaín nkehe.
8Ti chojni rico la ti nkehe tjete chónta sin la tíha tsjinki̱tsa ti ó itsi ijnko kjuaxikaon chrókꞌuexin sin,
a̱ndá ti chojni nóa la kohya nkexro sinchechrákon kixin chóntahya sin ninkehó.
9Ti chojni ndoá ixri la éxi ijnko xrohi náxrjón tꞌinkaséñaxín la tjajon kjuachéhe̱;
a̱ndá ti chojni tjenka̱yáxin nkehe jínahña la éxi ijnko xrohi tsíkꞌanka.
10Ti chojni nchejié a̱sén la jehó xritjeyá kjuanínkaon;
a̱ndá ti chojni titekaon ti kjuaxrexinkaon jína la chónta tso̱nohe sin jína.
11Ti chichaon tꞌáyéhe̱ ti chojni teé la tuénxín tjeje̱;
a̱ndá ti chichaon tjacha ti chojni jína la tsinkákꞌánkí.
12Ti nkehe chóhen chojni ndá xiteyáhya la ncheníhi a̱sén chojni;
a̱ndá ti nkehe xiteyá la imá tso̱chèxin chojni.
13Ti nkexro tsitekakonhña ti nkehe xráko̱he̱ la tsjasóte;
a̱ndá ti nkexro titekaon ti nkehe kꞌuítuehen la jína tsjacha sin.
14Ti nkehe tsjako ti nkexro nohe la éxi ti ìnta̱ tjajon kjuachón,
la ti nkexro tsitekaon la tso̱kohya kjuaxikaon tsꞌenxín sin.
15Ti nkexro jína tjenka̱yáxin la chóntehe chojni kjuasàya;
a̱ndá ti nkexro xrichꞌia la tsꞌitjáña.
16Ti chojni nohe jína la tjenka̱yáxin jína ti ixra̱ sichꞌe;
a̱ndá ti chojni lo̱nti̱ la tja̱ko̱xi̱n kixin chóntahya kjuaxrexinkaon jína.
17Ti chojni nduáhya tjixín ixra̱ la tji̱ka̱o kjuanínkaon;
a̱ndá ti nkexro ndoá tjixín ixra̱ la éxi ijnko xro̱a̱n tsito̱exín chojni jína.
18Ti nkexro tóxrìe̱nhña tsoxrenduéhe la tsochónta kjuatosuéhe̱ la ko tso̱nóa;
a̱ndá ti nkexro titekaon ti ó xrenduéhe la tsꞌáyéhe̱ kjuasàya.
19Ti ó xiteyá ti nkehe tjenka̱yáxini la tóchéhe̱ a̱séni;
a̱ndá ti chojni lo̱nti̱ la tjinkakonhña tsíto̱he ti nkehe jínahña.
20Ti nkexro xrico ijnko chojni nohe la kja̱xin sin tsꞌitja sin;
a̱ndá ti nkexro tꞌiton ti chojni lo̱nti̱ la kja̱xin sin tsjasóte sin.
21Ti nkexro tjasin ijie̱ la chréhe̱ kaín kjuaxikaon ti jehe sin;
a̱ndá ti chojni jína la tsjacha sin ti nkehe jína.
22Ti ó itsꞌen ti nkexro jína ndá tsíto̱he ti nkehe kꞌuéchónta la tsꞌáyéhe̱ ti xje̱en sin la ko ti ìnté sin;
a̱ndá ti nkehe kuènté ti chojni tjasin ijie̱ la tsꞌáyéhe̱ ti chojni jína tjejó.
23Ti no̱nte̱e ijnko chojni nóa la tꞌóna nchónhña nkehe sinie,
kjánchó ti siín chojni chꞌiyehe ti jehe sin la tsꞌitjáña kaín tíha.
24Ti chojni tjenduéhña xje̱en la tja̱ko̱xi̱n kixin tjue̱hya;
a̱ndá ti nkexro tjue̱he ti xje̱en la tjenduéhe.
25Ti chojni jína la sinie sin hasta tókje̱he sin;
a̱ndá ti chojni jínahña la tꞌenxín sin kjinta.
اکنون انتخاب شده:
Proverbios 13: poeNTplus
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.