Salmos 34
34
Jito jini ña ia Dios jin ñayiu ndaa
Yaa ni tee David nuu ni saꞌa jani ini de ja ni ndukueꞌe de
1Ndiꞌi ni jichi na kochiñuꞌu san Jitoꞌo,
te siun ni na kokata san yaa nuu ya.
2Te kosaꞌa kaꞌnu san Jitoꞌo,
te na vi konini ñayiu ka saꞌa ndaꞌu ka saꞌa kei mai,
te vi kokusii ini.
3Vi kata ni, na vi kata inuo nuu Jitoꞌo,
te na vi saꞌa kaꞌnuo ya.
4Chi ni ndanduku san Jitoꞌo, te ni onini ya tnoꞌo ni kaꞌan san,
te ni skaku ña ya nuu ndiꞌi ja yuꞌu san.
5Te ñayiu ka yinuu nuu ya, chi ka tnuu ka yeꞌe nui,
te tu ka kendoo kanoi.
6Chi ni jikantaꞌu maa sein ja kuu san tee ndaꞌu nuu Jitoꞌo,
te ni onini ya tnoꞌo ni kaꞌan san,
te ni skaku ña ya nuu ndiꞌi tnoꞌo suchi ini tnaꞌa san.
7Te jionduu ña ia jinokuechi nuu Jitoꞌo ninii nuu ka oo ñayiu ka yuꞌu niꞌnu ya,
te skaku niꞌnu ña.
8Vi skuaꞌa ni naxa oo Jitoꞌo, te vi kuni ni ja ia guaꞌa kuu ya.
¡Na taꞌu na ndetu ñayiu kukanu ini ya!
9Vi koyuꞌu niꞌnu maa ni nuu Jitoꞌo ja ka kuu ni ñayiu maa ya,
chi tu nagua kokaꞌni ña jin ñayiu ka yuꞌu niꞌnu ya.
10Chi vi ndee ndikaꞌa jaꞌni ña ja vi kaa ti, te ka kokin ti,
su ñayiu ka ndanduku Jitoꞌo, chi tu nagua kokaꞌni ña jin.
11Neꞌekuei, vi seꞌe, te vi konini ron,
na kaxtnoꞌo rin naxa vi koyuꞌu niꞌnu ron Jitoꞌo.
12Nuu ja ka kuini ron ja vi koo vii vi koo vaꞌa ron,
te vi kosii ini ron ndiꞌi ni kiuu,
13vi kaꞌnu yaa ron ja ma vi kaneꞌe ron
te vi koto yuꞌu ron ja ma vi kaꞌan tnoꞌo ron.
14Vi kujioo nuu jakueꞌe, te vi saꞌa javaꞌa,
vi nduku ja vi koo vii vi koo vaꞌa ron, te saa vi kondikin ron vi saꞌa ron.
15Chi maa Jitoꞌo jito jini ñayiu ndaa,
te nini guaꞌa ya nuu ka jikantaꞌui nuu ya.
16Su kiti ini ya nuu ñayiu ka saꞌa jakueꞌe, te xnaa ña ya nuu ñuyiu,
te ma vi kondakaꞌan saꞌun ka ña jin ñayiu kueꞌe yun.
17Ka jikantaꞌu ñayiu ndaa nuu Jitoꞌo, te nini ya tnoꞌo ka kaꞌin,
te skaku ña ya nuu ndiꞌi tnoꞌo suchi ini ka tnaꞌi.
18Chi yatni ñuꞌu oo Jitoꞌo ja chituu ya ñayiu ka tnaꞌa tnundoꞌo,
vi skaku niꞌnu ya ñayiu ka kusuchi ini, ja tu saꞌun ka nagua ka ndetui.
19Te kuakuaꞌa tnundoꞌo tnaꞌa tee ndaa,
su maa Jitoꞌo skaku niꞌnu ña nuu ndiꞌi tnundoꞌo yun.
20Chi maa ya jito ndiꞌi yiki de,
te ni invaa ma tnaꞌnu.
21Su ñayiu kueꞌe, chi kuu mai nuu jakueꞌe saꞌi yun,
te ñayiu ka skexiko ña jin ñayiu ndaa, chi vi tniuyaꞌu mai jakueꞌe ka saꞌi yun.
22Su ndatau ña maa Jitoꞌo jin ñayiu ka jinokuechi nuu ya,
te ma kiꞌinkuei ja vi tniuyaꞌui yika kuechi, chi ka kukanu ini ñai jin maa ya.
اکنون انتخاب شده:
Salmos 34: xtnNTplus
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.