MARK 3
3
Kut Kangōi Inkhat Amandam
(Mt 12.9–14; Lk 6.6–11)
1Khava sōa Jesu intûpna innpuia inle nôk, khana khan kut kangōi mi inkhat leika-oma kae. 2Jesu khan akadik mak atlo tia a’nherhnōm mi ṭhahrep khana khan leika-om hei; khava jâra Châmhngat kani ning mipa kha amandam sik mo tia anlei en mathlip a kae. 3Jesu’n mipa hneng khan, “Hiva hmatinga hin heihong roh,” ati. 4Khava sōa Jesu’n mihei hneng ader hei, “Heimo Châmhngat kani ning eini tatlo sik a nidân in ahnōm pek me? Mi inthōpuina achangmak leh mi inhmangna mo? Mi inkhat hringkhō hukmanhring achangmak leh suk manhmang mo?”
Tâk anmani’n heite masôn mak hei. 5Jesu’n a-en manve bit heia ahnuk leikana, tâk anmani sik a lungkhamna aleinei, ajârchu anmani anmalung kasak khana dikmak hei. Khava sōa mipa hnenga, “Nakut manzit roh,” ati. Ama’n amanzit a akut kha kadam jo. 6Khava jâra Phariseehei kha intûpna innpui kha andahlon jo, inrangtak a Herod mi ṭhahrep leh inhmutō jo hei, khana anmani’n Jesu thatna sik a ṭōn anmantluk jo.
Dîr Panga Mipuihei
7Jesu leh asonlehei Galilee Dîr langting leikasesōt hei, mi katamtak in anleijui. Anmani Galileea, Judea, 8Jerusalema, Indumea ramṭhen leh Jordan nisōtinga ramṭhen a, khana Tyre leh Sidon khōpui ramṭhen vena inphut hei kae. Hiva mi rakip hei hi Jesu hneng kahong hei ajârchu aṭōn tlohei kha anleitheia kae. 9Mipui kha katam hêr hei, mipui khan anhnenga ankacheptō makna sik, rakōng inkhat anmantluk pekna sik, asonlehei kha aleihri pek hei.#Mk 4.1; Lk 5.1-3 10Ama’n mi katamtak aleimandam hei khana mikana rakip hei khan ama antôn theina sik ahnengting hong inhnengtō heia kae. 11Khana rathla kaṭhamak karônhei khan ama anhmu kataia, ahmai kunga katlu heia ka-ông heia, “Nang Pathen Sapa che kae!” anti.
12Ama tu mo kae ti hi tûte inkhat hneng anhrimakna sik rathla kaṭhamak-hei hneng ṭong rahnaktak a aleipek hei.
Sonle 12 Akadei hei
(Mt 10.1-4; Lk 6.12–16)
13Khava sōa Jesu’n tlâng chunga kakea ami madu hei seng ahnenga abek hei. Anmani ahnenga kahong hei, 14khana ama’n sonle tia aphō mi 12 akadei hei. “Kei leh aka-omsap sik a kakadeisōt jo chei kae,” tia ahri pek hei. “Ke’n nangni ṭong kahrile sik a katirsōt sik chei, 15khana rathla kaṭhamak hnongsōtna ratha kha nannei sik,” ati.
16Akadeisōt 12 kha hihei hi kae: Simon (Jesu’n Peter tia aleiphō); 17Zebedi sahei, James leh anaipa John (Jesu’n ‘Boanerge,’ tia aphō hei ti chu “Khō inphe Mihei” tina kae); 18Andreu, Philip, Bartholomew, Matthew, Thomas, khana Alphaeus sapa James, Thaddaeas, Aram inlungsetpa Simon, 19khana mikut chunga akapek sōtpa Judas Iscariot hei seng hi kae.
Jesu leh Beelzebul
(Mt 12.22–32; Lk 11.14–23; 12.10)
20Khava sōa Jesu inna kase jo. Avea khanga mipui katamtak hong intûp nôk heia Jesu leh asonlehei kha bu sâkna sik pha leihmu mak hei. 21A-innkō he’n aṭong hi anthei pha, ama inkôk sik a leikasōksōt hei, ajârchu mipui he’n “Ama invet jo,” anleitia kae.
22Jerusalema inphut Dân oja ṭhahrep akahong he’n, “Ashunga Beelzebul aka-om kae! Anmani hnongsōtna sik ahnenga ratha akapek kha ṭaihei rengpa kae,” anti.
23Khava jâra Jesu’n mihei kha ahnenga abek heia, anhnenga ṭong tekâk a ahri, “Seitan in heikhong mo Seitan ahnong sōt tor sik? 24Rengram inkhat kha abinga arup-rup a a’nsemṭhena khat leh khat an-indōitō jo’nchu, khava rengram kha kakōisō sik. 25Innshung inkhat kha abinga arup-rup a a’nsemṭhena khat leh khat an-indōitō jo’nchu, khava innshung kha kakōisō sik. 26Khang’khan Seitan rengram kha arup-rup a a’nsemṭhen jo’nchu akasôt om tor mak ning, tâk kakōi sik jo khana a’nchaina kha kachang sik jo.
27“Mikahrat inkhat kha hma inkeia ankhit dekmak inchu, tûte’n a-innshunga hlut tor mak, khana aneinâk losōt tor mak ning; akhitsō leh rōk a-inn kha asukmanram tor kae.
28“Kahri manchên pek chei kae mihringhei setna rakip leh akaṭhamak antahri rakip chu rangei mandam thei kae. 29Tâk tu achang inum Rathla Intheng dōina kahri inset mi kha rangei mandam chenmak ning, ajârchu ama’n kumleikōa setna inkhat atlo jo kae,” ati.#Lk 12.10 30(Mi ṭhahrep in, “Ama shunga rathla kaṭhamak ka-om,” anti jâra Jesu’n hi ahri kae.)
Jesu Nu leh Asōpuihei
(Mt 12.46-50; Lk 8.19–21)
31Khava sōa Jesu anu leh asōpuihei hong katlung jo hei. Anmani khava inn vângting leikangir hei khana ama inhmupui sik a ṭong anleipek. 32Jesu kimvea mipui le’n ong hei khana anmani’n ahnenga, “Enroh, nanu leh nanaipa hei, nanainu hei vânga ka-om hei, nang anjong che,” anti.
33Jesu’n amasôn heia, “Tu mo kanu? Tuhei mo kanaipahei?” ati. 34Ama’n akimvea a’n-ong hei kha a-en manve bit heia, “Enruh! Kanu leh kanaipahei kha hin ka-om hei! 35Tu achang inum Pathen lungdo katlo kha kanaipahei, kanainuhei khana kanu kae,” ati.
اکنون انتخاب شده:
MARK 3: KOMRBSI
هایلایت
به اشتراک گذاشتن
کپی

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.