MARK 4
4
Chimu Vor Pa Le Tetan na
(Mat. 13:1-9; Luk. 8:4-8)
1Jisun Galili pat sira a man chu a phut ret jui. A ma jiang mipui an hong kan chun ngaiha antamrei jarra tuidung chunga rokuang sunga Jisu a lut a ong jui, hale mipui ngaiha patsir tianga an om jui. 2A man tetan na chong a tam tak alui man chu, a man chuna han anmani jiang, a ti.
3“Ngairu! Mi an khat in chimu vor ranga a hong suak jui. 4A man chimu ha alui a avorra, her khat lamlaia a chul, hava ngaiha vate ngain anrutsojui. 5Chimu dang her khat leipak om makna lung chunga a chul, hava leipak ha atom jarra chimu ha a rak tak a hong mong, 6Hava suale nisat ahongkang ahonglum pha, a rajung a thuk mak jarra avuai-a acharjui. 7Chimu dang her khat ning ling karra a chul, ling ha ahonglianna a hong khu de jui, ralaimak. 8Tak-ha chimu dang her khat leipak satna mun na a chul, hava ngaiha a hong chiak a hong kansonna, a ra jui, her khat a ra somthum, her khat som ka ruk, hale a dang her khat riakhat apungdet.”
9Hale Jisun a ti, “Ngainarang kuar a nei ngain ngairu.”
Tetan na Lungdo
(Mat. 13:10-17; Luk. 8:9-10)
10Jisu ha a binga a-ompha, ama jiang a-omngai le thiamruoi somleini an honga, tetan na chong ha man thiang ranga an hong dingkel. 11Jisun a sang, “Pathian rengram a kan thup ha nang ni ka na pek jui. Tak-ha tualla a om a dangngai rang ko i rakip tenna jak anjetrang ani. 12Hiva jarra anmanin, ‘A enko an en mu tor ma u, anngaiko anngaichak, aninom jet thei ma u, ajarko anmanin an mu a, anjetsa a chang inko, ngaidam an mu na ranga, Pathian tiang an hong kan hei rang ke a ti.’ ”
Chimu Vor Tetan na Jisun Ari
(Mat. 13:18-23; Luk. 8:11-15)
13Hava suale Jisun ading kel, “Nang nin hiva chong tetan na hi jet mak che u mo? Ha a chang inko, tetan na rakipngai hi ija mo nan jet torang a ti, 14Chimu vorpa han Pathian chong ha a vor ani. 15A man avora lamlai a achulngai ha ko hi ani; mingain chong ha an jet pha, a rak tak Seitan ha a honga an sunga chong an vor ha aluisoakpe ani. 16Adang lung chunga a chul ha ko hiva anga mingai anni, anmanin chong ha an jet lim le ningsat tak an lui ani; 17Tak-ha anmanin anbinga anrajung a thuk an nei mak jarra a sot khang tor ma u, hava chong jarra han manmangna, khodengthei na a hong ompha, anmanin a rak tak, an kan lum chachakjui. 18Hale midangngai ha ko lingkarra a chul chimu anga ke anni, hava mingai han a chong ha an ngaija an jet. 19Tak-ha ramuol chung ringkhuo, lungdo nei na, hale a dang deina a hong lut chong ha lui jot ma u a ra neilui an chang. 20Tak-ha a dang leipak satna chunga an vor ngai ha ko, hiva mingai anga anni, anmanin chong ha an jet an lui a anlungrilla ansiak, her khat in somthuma, som ka ruk, hale riakhat a rangai ha anni.”
Thaimei Ruia
(Luk. 8:16-18)
21Jisun anmani jiang a ri ret, “Thaimei an khat a ong na chunga siakluia, zamun thuoia a chang mak le luk thuoi-a khuranga tunmo an hong choingai? 22Ajarko akanphuang lui rang a kan thup tor rang i om om mak; animakle jet lui rang chong ruk i om omtheimak. 23Tu a chang innom ngaina ranga kuar a nei mi ning jetrase,” a ti.
24Hale a man anmani jiang ariret, “Nang nin nan jet chong ha kan ching theiru; nang in mi jiang chong natanna nuk jui han nang jiang na pek nati hale a khel la nang jiang napek de nati. 25Ajarko a nei mingai jiang anpekde rang ke; hale a nei lui mi ha aneisalep ha ansut de rang ke a ti.”
Chimu Mongna Ruia Tetan na
26Jisun hingan a ri, “Pathian rengram ha mi an khat in aluipuka chimu ivor ang hin ani; 27A ma jan na a jal, sunna a thui, ha ang han chimu ha a chiak a hong suak jui, ha nom a man chimu ha ija mo a hong chiak ha jet mak. 28Leipak han abibinga a man amasat tak a chiak, hava suale a chang, a om ma a lian pha han a hong ra. 29Hana a ra a hong minpha, mipa han akoite a at a phut jui, ajarko chang atpha a hong tung jui a ti.”
Anchamru Tetan na
(Mat. 13:31-32; Luk. 13:18-19)
30Jisun a ri a, “Pathian rengram hi kein in ilemo tetan na kan tho rang” hale “I tetanna mo kannei man na kan ri man thiang rang?” 31“Pathian rengram ha leipak chunga a sin tet anchamru an khat anga ani. Hava ha mi an khat in alui a leipak a avorpha, 32a hong chiak-a, ramsul karra a lian tak an khat a hong chang jui, hale a chang a lian tam tak a hong om ma chunga vatengai an honga nilim thuoia rabu an sin na an om ke.”
33Ha anga mingain an jet thei na rang tetan na a tam tak alui ripe. 34Jisun anmani jiang tetanna chonga aripe ni lui a i om rimak; tak-ha ama a bing a a om pha thiamruoingai jiang i rakip a ri man thiang jui.
Jisun Amanbang Phaivou
(Mat. 8:22-27; Luk. 8:22-25)
35Havani nikhuo nitak a hong ni pha han, Jisun thiamruoingai jiang, “keini pat an khat tiang kan in lang che tarei a ti.” 36Hiva jarra mipui ngaiha an mak jui; Jisu chuongna rokuanghan anchuonga an tuang jui. 37Hana phaivuo puinu phirsib a hong ranga, tuipui a kan nok ha rokuang sunga tui a lut siprang ani jui. 38Tak-ha Jisu ko rokuang mor ha a lu akhamma ajalla alui om; thiamruoingain ankei thuija ama jiang, “Oja, keini thirang kan ni jui nasanno nichemo anti.”
39Jisu a thuia, rothi phaivuo rang ha akhap, “Ahip jinna omro” a ti pe, hale tui a kan nok ha, “Chip tia omro,” alui ti. Hale phaivuo rang ha a bang jui adairipjui. 40Hava pha han Jisun anmani jiang alui ti, “Ijarra mo hi ang khan nan chit? Nan takngai om mak mo alui tipe.”
41Tak-ha anmani an chit reia, “Phaivuo le tui a kan nok ngainom a chong anjuihi, imimo ani?” an khat le an khat an kan dingkeljui.
اکنون انتخاب شده:
MARK 4: AIMOLBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
