MATHIU 14
14
Johon Baptis Thina
(Mrk. 6:14-29; Luk. 9:7-9)
1Hava pha han Herod rengpan Jisu ruia a jet a, 2hale suakngai jiang a ti, “Hivahi Johon Baptis ke; ama hi a thi tenna a ringkhir jui; hiva jarra ama jiang hiva tho torna ranak a nei tor ani.”
3Ajarko Herod in Johon hi a churra, a khit, hale ren inna a thun; hivahi a naipangpa Philip lomnu Herodia jarra ani. 4Ajarko Johon in ama jiang alui ti, “Nang in numeinu na om pui rang hi dan ning jot mak.” 5Hale a man ama hi alui that jot innom a man mitam ha alui chit; ajarko anmanin ama hi tashanthei khat ke tia an lui ngaidon.
6Tak-ha Herod naichangna ut a tho han Herodia a nai numeinu in; mitam madonna a lam ma Herod a lung alui mankhopjui. 7Hiva jarra a man chong sam na a nei a, ama jiang a ti, “Nang in na na lam tak-ha na pek ati.”
8Hava han a nu ning a masiatna nuk jui a, “Johon Baptis a lu ha kheng khat hivahin na pero a luiti.”
9Hale rengpa huipelaima, aninom; a chongshamna le ama le ongsuamngai jarra, a man ama jiang pe na rang chong a bejui. 10Hava han a man mi a tirra, ren inna Johon a lu a hong mantan jui. 11Hale a lu ha keng khat chunga an hong choia, dongmanu jiang an lui pek hale a man a nu jiang a hong choi. 12Hava suale ama a thiamruoingain an honga a thi sa ruok rong ha an lui a an phumjui; hale Jisu jiang an chea an hong manjet jui,
Pasal Lishing Ranga Jisun A vai
(Mrk. 6:30-44; Luk. 9:10-17; Jhn. 6:1-14)
13Jisun a jet, hava mun tenna rokuang a chuanga mun dang khat a che jui; tak-ha mitamin an jet; khuo tenna kea an honglonna; ama a nuk a hong jui. 14Hale Jisun a hong suak pha han, mitam ha a mu a; a man anmani ha lungsiat a mu jui, hale anmani ha alui mandamjui.
15Nitak a hong nipha, a thiamruoingain ama jiang an honga anti; hivahi ramtong na ke, hale a pha hi om a hong buijui; mitamngai hi man che taro, han anmanin khuo khuo chesen nang, an chak an nek rang hong kan tok rase u.
16Tak-ha Jisun anmani jiang a ti, “Anmanin an che rang hi a nem na om ma; nang in anmani jiang chak rang peru.”
17Hale anmanin ama jiang anti, kein in tallom ranga le nga anni jak hivahin kan nei.
18A man a ti, “Hava ha kei jiang hong choiru,” 19hava suale a man mitamngai ha ramsul chunga ong na rang chong abea, hale a man tallom ranga le nga anni a luia vanram tiang a en na phual a pek jui, hale a ek khuia talngai ha a thiamruoingai jiang a pek jui, hale a thiamruoingain mitam jiang an semjui. 20An khat om, anmani ning an chak an lui khop; hale anmanin a liam a her ahak an nanchun karra luk somleini aluisip. 21Hale a chak a nek mingai ha numei le nai pang telde lui a pasal lising ranga duk an lui ni.
Jisun Tuichunga A lon
(Mrk. 6:45-52; Jhn. 6:15-21)
22Hava phatak han Jisun mitamngai ha amanche mak ma, a thiamruoingai ha rokuang chunga mandet varaltiang alui man che jui. 23Hale a man mitamngai ha a manchea, a thei jak lam na ranga tangbung khat tiang alui che, hale nitaktiang a hong ni pha han hava mun han ama a thei jak alui ni. 24Tak-ha rokuang ha ko tuionglian laia lithukna tunga, tuikanok in aluimanpong, ajarko phaivuo phirship alui kanher.
25Janna pung manli a chul pha han, Jisun tuionglian chunga a hong lon na anmani jiang alui che. 26Hale a man tuionglian chunga a lon ha a thiamruoingain an mu han an hong ti “Hivahi thavang ke” tia an lui chit a an lui khek.
27Tak-ha hava lai tak han Jisun anmani jiang a ti, “Lungngamtak a om ru, kei ke, chit maru.”
28Hale Pitar ning ama jiang a hong shanga a ti puma, nang naninko nang na kol la kein tui chunga hong na ranga chamna pero.
29Han a man a ti, “Hongro,” hale Pitar ning rokuang tenna a chumma, tui chunga a lon na Jisu jiang alui che. 30Tak-ha a man phaivuo rang ha a mu pha han, alui chit hale a hong tunga a hong khek a ti “Puma na sanro.”
31Hale hava lai tak han Jisun a kut a hong banna a churra ama jiang a ti, “O aviar jak takngai i ruia mo nang in nikan ching na?”
32Hale anmanin rokuang sunga an lut pha han phaivuo ha a bang jui. 33Hava suale rokuang sunga alui om anmaningai ning ama ha chubei an buk an hong ti, “Adik tak a nang hi Pathian Pasalnai ha na ni.”
Genesaret A Anatngai A mandam
(Mrk. 6:53-56)
34Hava tenna anmanin an hong suak a, Gennesaret ramtiang an hong jui. 35Hale hava mun na mingain ama ha an jet ha, hava ram sirra om a mun rakip chong an pek, a nat rakip ama jiang an lui hong choi, 36Hale anmanin ama a puan mor ha sitjak sitna rang lam na an lui nei, hale a puan a sit rakip in an dam ver jui.
اکنون انتخاب شده:
MATHIU 14: AIMOLBSI
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
