Salmo 139
139
No mapia a kapanmoan diaten no Dios
Salmo ni David.
1Apo ko a Dios, mapanmo mo o atavo a komapet diaken as kano mian do irahem no tawol ko. 2Mapanmo mo o atavo a parinyen ko as aran do mavawa am mapanmo mo o atavo a mian do aktokto ko. 3Mavoya mo yaken an maytrabaho ako anmana maynaynehah ako. Mapanmo mo o atavo a pariparinyen ko. 4Aran manam pa o kapayliliak ko am mapanmo mo na an ango anti o vatahen ko. 5Mayalit do anaman kano dichoran ko am yanan mo as onongan mo yaken do ipakapamarin mo. 6No kapanmoan mo diaken am oyod a makakniknin, ta manghavas pa kano kaintindian ko sia.
7Dino angayan ko a omotap dimo. Anmana ara paro angayan ko a kaboan mo? 8An mangay ako do hanyit am mian ka daw as an mangay ako do yanan da no nadiman am mian ka daw. 9An somayap ako as kangay ko a matda do marayi dana logar, 10am ari ka daw a mapawnot as kano somidong diaken. 11An vatahen ko o katayo ko do kasarian as kapayvadiw no sehdang a mahep, 12amna aran no kasarian am masari ava dimo ta no mahep am akmay maraw dimo takwan mayalit o kasarian kano kasehdangan dimo.
13Inamaog mo o atavo a parte no karakohan ko as kapayonawnay mo diaken do irahem no vodek no ina ko.
14Dadayen koymo ta mayanong ka sincharan do atavo a pinarin mo do mapia kano makakniknin a nakamaog mo diaken. Mapanmo ko ya so oyod a mapia. 15Do kayan ko pa a tomovo do vodek no ina ko am ari mo napanmo o yanan ko. 16Navoya mo yaken a manam so nakawara ko as kaplano mo na so viay ko. Maday do araw no kaviay ko am nakatolas do libro mo a manam so kasitnan ko a ominawa.
17Oyod a makasoyosoyot o kapanmo ko sia o kafermi mo a komtokto niaken, O Dios. Kavidangan ko pava an maypipira do asa karaw o kaktokto mo niaken! 18Aroaro sigoro kano vidang no anay do kanayan. An mayokay ako an mavekhas am ari mo pa yaken a iktokto.
19Apo a Dios, dimanen mo sa o mararahet saya so pariparinyen as sidongen mo yaken tapian machivawa sa diaken o manita saya so rarayawen da. 20Maychirichirin sira so mararahet a komapet dimo as kapamahbo da so mato a ngaran mo. 21Oyod ko sa ipsok o maket aya nimo as kanira no machisobna aya dimo! 22Oyod ko sira ipsok, ta ividang ko sira a kontra ko!
23Tiban mo so kapiahen o tawol ko as kaproyba mo so atavo a mian do aktokto ko. 24Chitahen mo a ipavoya diaken o atavo a sinadan ko as kapawnot mo na diaken do kaparin no abo aya so pandan a viay a ipakamia mo.
اکنون انتخاب شده:
Salmo 139: VTSP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.