Mateo 7
7
No kadi omhosga do kadwan
(Lucas 6:37-38,41-42)
1“Manhosga kamoava tapian di kamo a hosgan. 2Ta an ango o hosgan mo do kadwan am nawri pa o mismo a ihosga dimo, ta an ango parinyen mo do kadwan am nawri o parinyen dimo. 3Ta ango paro ichasonosonong no kavoya nio so podin no kadwan as kadi nio makavoyan so akmayay poget a mian do mata nio. 4Anmana ango vatan nio so, ‘Pakarohen ko o podin moaya, kakteh,’ as kadi nio makavoyan so akmayay poget a podin nio! 5Mayanong paroava o kapanma nio pa sia pakarohen o poget aya do mata nio tapian masonosonong o kapakaro nio so podin no kakteh nio, inio a toman?
6“Itoroh nioava do chito o rakoh so balor, ta tod daynio a sonyiten. As torohan nio sava so perlas o bago, ta no kalalasag da dia.
No kahes ta so kaylangan do Dios
(Lucas 11:9-13)
7“Mavidin kamo a machipangdaw, ta marawat nio anti o iyahes nioaya. Omhes kamoava manita, ta mavoya nio anti o chitahen nioaya. Mavidin kamo a manogtog, ta ipanyiwang kamo anti. 8Ta an sino o mangahes am makarawat, as no manita am makavoya as no manogtog am ipanyiwang sia. 9Ara do vata nio asa ka ama a tomoroh so bato do manganak na an mangahes so tinapay? 10Anmana tomoroh paro ya so boday an among o iyahes na? 11An no asa ka tawo a makagatogatos as mapanmo na o katoroh na so mapia do kamanganakan na am chapanngo no kasonosonong no Ama nio do hanyit a tomoroh so atavo a mapia do mangahes sia? 12An ango o ichakey nio a parinyen dinio no kadwan am akma pa saw o parinyen nio dira, ta niaya o paytavoan no onotan ta a pinatolas da Moises kanira no profeta.
No masopit a pantaw
(Lucas 13:24)
13“Somdep kamo do masopit aya a pantaw, ta no panahanan aya a mangwan do infierno am mawvong as aro o manahan dia. 14Amna masopit o pantaw as masadit o panahanan a mangwan aya do viay a abo so pandan as mayhahaw o makavoya sia.
No asi o kasincharan so kakayo na
(Lucas 6:43-44)
15“Makapatak kamo dira do mangay sa dinio a kadakadaday a mananawo a toman a mapawnot do mapia asna no kakawyoran na am oyod sa mangananawa. 16Masinchad nio sa do kaparin no pariparinyen da. Omsi ava so obas o ayem as omsi ava so bayawas o kamanolok. 17No mapia a kayo am omsi so mapia as no marahet a kayo am omsi so marahet. 18Maparin ava omsi so marahet o mapia a kayo as maparin ava a omsi so mapia o marahet a kayo. 19Atavo a kayo a di omsi so mapia am akteven as kasosoh dia. 20Dawa akma pa sawri ta masinchad sira o kadakadaday a mananawo do mararahet a pariparinyen da.
No makasdep sa anti do hanyit
(Lucas 13:25-27)
21“Maytavo sava anti a tomawag diaken so Apo o makasdep do paypatolan do hanyit asna sira o omparin so inolay no Ama ko a mian do hanyit. 22Do ito anti araw no kapaysekasekad am aro sa anti o makavata so, ‘Apo, nananawo kami so komapet dimo as kapahbet namen so mararahet a espirito do ngaran mo as mian pa o aro a milagro a pinarin namen do ngaran mo.’ 23Amna vatahen ko anti dira, ‘Masinchad koavaynio. Komaro kamo, inio a mararahet so pariparinyen.’
Sira o masolib kano dia solib a mayvahay
(Lucas 6:46-49)
24“No tawo a domngey sia o vatahen ko as kaparin na sia am komparahen ko do asa ka tawo a masolib a mayvahay. Mahni o nakapatnek na sia, ta bato o soyid na. 25As do kawara no mawyas a timoy as kawara no rakoh a ayo as kano mayet a salawsaw am nararayaw ava ta bato o soyid na. 26As no tawo a domngey sia o vatahen ko as kadi na sia a parinyen am komparahen ko do dia solib a tawo a mayvahay do kanayan. 27As do katimoy na so mawyas as kawara no rakoh a ayo kano mayet a salawsaw am nyeng a mararayaw o vahay naya.”
28As do nakatayoka na mayliliak ni Jesus am oyod sa naychaknin o nakadngey ori sia, 29ta mananawo dira a mian so rakoh a ipakapamarin a dia akma sira so eskriba sirawri.
اکنون انتخاب شده:
Mateo 7: VTSP
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.
