Mak 5

Ya꞉su eyo꞉ mama mogago꞉wo꞉ o꞉luga꞉felo꞉

Madi 8.28-34, Luk 8.26-39

1Iyo꞉ ho꞉no꞉ nodowa ha꞉nakiyo꞉, Gelasa kalulo꞉ sa꞉sen doba꞉da꞉ a꞉na ha꞉na꞉sa꞉ga꞉, ho꞉n golo꞉ aniba fa꞉la꞉dowo꞉. 2Fa꞉la꞉dowa꞉sa꞉ga꞉yo꞉, Ya꞉suwo꞉ ho꞉n ko꞉suwa a꞉la꞉ta꞉ga꞉ tibo꞉lowakiyo꞉, kalu mama mogago꞉lo꞉ dowo꞉wo꞉ a꞉na galili. 3,4Kalu we a꞉ido꞉lo꞉wa sia꞉sen ko꞉lo꞉ mio꞉. Tamin amio꞉ sa꞉niya꞉ dagi o꞉lia꞉ gib o꞉lia꞉yo꞉ melea꞉ta꞉sen ko꞉sega, ene halaido꞉wa꞉yo꞉ gegedela꞉sa꞉ga꞉ ha꞉nab amio꞉, kaluwa꞉ ta꞉lia꞉sa꞉ga꞉lo꞉ a꞉melea꞉fa꞉no꞉wo꞉ mo꞉dowa꞉sen. A꞉la꞉fo꞉ko꞉lo꞉ e sa꞉nia꞉yo꞉ wa꞉kabiyo꞉ mo꞉melefa꞉. 5E nuluwo꞉lo꞉ ho꞉lenowo꞉lo꞉ tambo kalu a꞉ido꞉lo꞉wa a꞉la꞉ta꞉ga꞉ hen misio꞉ a꞉nami nai sia꞉liki, enena꞉ma꞉la꞉ ene do꞉mo꞉wo꞉ uwa꞉ yame tandea꞉liki, ya꞉lilia꞉ sia꞉len.

6Eyo꞉ Ya꞉su yabo꞉ ko꞉na꞉ka iliki ba꞉da꞉sa꞉ga꞉, nai ya꞉ga꞉, Ya꞉su e ko꞉lo꞉ wabuluma꞉niki, Ya꞉suwa꞉ gido꞉fo꞉lo꞉wa gumisi ali. 7,8#Mak 1.24Ya꞉su eyo꞉ kalu mogago꞉lo꞉ dowo꞉ o꞉mo꞉wo꞉ a꞉la꞉sio꞉, “Mama mogago꞉ ge, ha꞉la꞉ya hamana” a꞉la꞉sio꞉. Kalu a꞉ma꞉yo꞉ a꞉ma꞉la꞉bo꞉ towo꞉ halale sa꞉laki, “Ya꞉su, Gode Alan Iwalulo꞉ a꞉lab a꞉ma꞉ so꞉wa giyo꞉, nemo꞉wo꞉ waga dimidama꞉ni mio꞉wo꞉? Godeya꞉ wiya ilikiyo꞉, ne mogagima꞉no꞉ towo꞉ nemo꞉wo꞉ sa꞉la꞉so꞉bo.” 9A꞉la꞉gabiki, Ya꞉suwa꞉ sa꞉laki, “Ge wiyo꞉ o꞉ba?” “Ne wiyo꞉ Modo꞉, mo꞉wo꞉ mama mogago꞉ niasiyo꞉ modo꞉ agelema꞉no꞉wo꞉ babalo꞉ ko꞉lo꞉ sab.” 10Kalu a꞉ma꞉yo꞉ Ya꞉sumo꞉ ha꞉nolo sa꞉lakiyo꞉, “Nio꞉ hen no amio꞉ mada iliga꞉ta꞉so꞉bo” a꞉la꞉sa꞉laki susio꞉. 11Misio꞉ anib a꞉namio꞉, kabo fofo꞉wo꞉ modo꞉ ko꞉lo꞉ ma꞉no꞉ na꞉liki sen. 12A꞉la꞉ta꞉ga꞉ mama mogago꞉wa꞉yo꞉ Ya꞉sumo꞉wo꞉ susiaki a꞉la꞉sio꞉, “Nio꞉ kabowa doma꞉ hamana꞉ki, giyo꞉ nio꞉ a꞉na iliga꞉foma.” 13A꞉la꞉fo꞉ko꞉lo꞉ Ya꞉suwa꞉yo꞉ mama mogago꞉mo꞉wo꞉ o꞉lika꞉ a꞉la꞉sa꞉labiki, mama mogago꞉ kalu amilo꞉ sen a꞉no꞉ ha꞉la꞉ya sili alifela꞉sa꞉ga꞉, kabowa tiane. Kabo a꞉no꞉ daosen a꞉la꞉ sen ko꞉lo꞉, iyo꞉ dalalelia꞉ga꞉ do꞉mo꞉wa tina꞉sa꞉ga꞉, ho꞉na tambo ho꞉lufa꞉la꞉sa꞉ga꞉ kanda sowo꞉.

14Kabolo꞉ bo꞉fo꞉len kalu i a꞉no꞉ nai ha꞉na꞉sa꞉ga꞉, amisa꞉n kaluka꞉isale noldo꞉ sen amio꞉lo꞉, ha꞉la꞉ doba꞉da꞉lo꞉ kandaya꞉i ane i o꞉mo꞉wo꞉lo꞉ dimido꞉ a꞉no꞉ bo꞉bo꞉ge malola꞉i ha꞉nabiki, kaluka꞉isaleyo꞉ dimidab a꞉no꞉ ilo꞉ ba꞉ba꞉ni Ya꞉sulo꞉wa mio꞉. 15Iyo꞉ ya꞉sa꞉ga꞉yo꞉, kalu mama mogago꞉ modo꞉lo꞉ dowo꞉ a꞉no꞉ o꞉li dowo꞉ ko꞉lo꞉, Ya꞉suwa꞉ aniba sena ba꞉ba꞉. Kalu a꞉no꞉ asulo꞉ elo꞉wo꞉ nafale dowabiki, e helebeso꞉g ka꞉la꞉liki elena ba꞉da꞉sa꞉ga꞉, iyo꞉ tagio꞉ alan dowo꞉. 16Mama mogago꞉lo꞉ dofo꞉len kalu amilo꞉ fa꞉la꞉dowo꞉ a꞉no꞉ kaluka꞉isale iliyo꞉ ba꞉ba꞉ ko꞉lo꞉, nolbo꞉wo꞉ malolo꞉ mea꞉liki ane. A꞉la꞉ta꞉ga꞉ kabo amilo꞉ dimido꞉ a꞉no꞉lo꞉ nolbo꞉wo꞉ malolo꞉ me. 17A꞉la꞉do꞉ dimidab a꞉no꞉ ba꞉da꞉ga꞉, Ya꞉suwo꞉ ili heno꞉ ta꞉fo꞉ hamana꞉ki, towo꞉ halaido꞉ sio꞉.

18Ya꞉suwo꞉ ho꞉n ko꞉suwa disa꞉labikiyo꞉, kalu mama mogago꞉lo꞉ dowo꞉ ko꞉lo꞉ o꞉luga꞉felo꞉ a꞉no꞉ Ya꞉su o꞉lia꞉ ha꞉na꞉no꞉ susio꞉. 19Ya꞉su eyo꞉ e mena a꞉la꞉bo꞉ mo꞉sio꞉ ko꞉sega, eyo꞉ emo꞉ sa꞉lakiyo꞉, “Ge a꞉ma꞉la꞉ go꞉no꞉n so꞉lo꞉lo꞉wa ha꞉na꞉ga꞉, Godeya꞉lo꞉ gemo꞉lo꞉ dimido꞉ a꞉no꞉, imo꞉wo꞉ malolo꞉ mea꞉ni hamana. Gode eyo꞉ ge asulaki nofolo꞉ alifa꞉ ko꞉lo꞉, giyo꞉ a꞉no꞉ malola꞉bi.” 20A꞉la꞉fo꞉ko꞉lo꞉ kalu a꞉ma꞉yo꞉ ha꞉na꞉sa꞉ga꞉, Dekabolis hen us a꞉namilo꞉ sa꞉sen kaluka꞉isalemo꞉wo꞉ Ya꞉suwa꞉lo꞉ e amilo꞉ dimido꞉ a꞉no꞉ kalaba wida꞉len ko꞉lo꞉, tambowo꞉ dabulia꞉sa꞉ga꞉yo꞉, molo asulo꞉.

Walaf ga o꞉lia꞉ ka꞉isale so꞉wa sowo꞉ o꞉lia꞉yo꞉ falele alifelo꞉

Madi 9.18-26, Luk 8.41-56

21Ya꞉suwo꞉ a꞉ma꞉la꞉ ha꞉na꞉sa꞉ga꞉, ho꞉n golo꞉ a꞉no꞉ nodowa a꞉ta꞉nota꞉ga꞉ elen amio꞉, kaluka꞉isale modo꞉wo꞉ ho꞉n anib a꞉na kegeo꞉. 22-23Tolo꞉ wida꞉sen alo꞉ bo꞉fo꞉lowan kalu nowo꞉, Yailes elo꞉ a꞉namio꞉ elen. E Ya꞉suwo꞉ galilia꞉sa꞉ga꞉, Ya꞉suwa꞉ gido꞉fo꞉lo꞉wa gumisi asifo꞉liki, emo꞉wo꞉ a꞉la꞉sio꞉, “Ni ka꞉isale so꞉wayo꞉ soma꞉nigab ko꞉lo꞉, ge ni aya ya꞉ga꞉ gi dagiya꞉ golalikiyo꞉ falelema꞉ib ko꞉lo꞉, ge ni aya mena. Giyo꞉ ko꞉lo꞉ a꞉la꞉dimidalega, e o꞉li doma꞉ib,” a꞉la꞉sa꞉laki susio꞉.

24Ya꞉suwo꞉ Yailesa꞉ sendelia꞉ga꞉ ha꞉nabiki, kaluka꞉isale modo꞉ kegeo꞉ a꞉no꞉ ko꞉lo꞉ ha꞉na꞉siakiyo꞉, anitandeya꞉i ane. 25Ga imili nowo꞉ tin hoda꞉likilo꞉ eleno꞉, donayo꞉ kugula꞉fo꞉ ko꞉lo꞉ gulula꞉fo꞉len. 26Ho꞉leno꞉ tambo ga a꞉no꞉ mulumulo꞉lo꞉ mean kaluwa꞉yo꞉ e ba꞉da꞉sa꞉ga꞉ dinafa ya꞉len ko꞉sega, emo꞉wo꞉ hida꞉yo꞉ dimiaki, e amilo꞉ tin hoda꞉len a꞉no꞉ mo꞉falelaki, mole elo꞉wo꞉ tambo wala꞉len. 27Ya꞉suwa꞉lo꞉ dimido꞉ a꞉no꞉ e dabu ko꞉lo꞉, Ya꞉suwo꞉ kaluka꞉isale kegeo꞉ a꞉lab us a꞉na yabiki, e Ya꞉suwa꞉ fa꞉sa ha꞉na꞉sa꞉ga꞉, ene so꞉g sa꞉ga꞉lo꞉ a꞉na golo꞉. 28A꞉la꞉do꞉ go꞉ a꞉no꞉ ga a꞉ma꞉ asulakiyo꞉, “Niyo꞉ ko꞉lo꞉ ene so꞉g sa꞉ga꞉lo꞉ a꞉na golo꞉loga, ne falelema꞉ib” a꞉la꞉asula꞉sa꞉ga꞉, a꞉na golo꞉. 29Golabiki wigibo a꞉naka, tin hoda꞉len a꞉no꞉ bulutabikiyo꞉, eneno꞉ walaf e amilo꞉ elen a꞉no꞉ tambo falelabo꞉lo꞉b a꞉la꞉asulo꞉. 30#Luk 6.19Ga a꞉ma꞉yo꞉ Ya꞉suwa golab amio꞉, Ya꞉suwa꞉ halaido꞉wo꞉ a꞉ma꞉la꞉ susululia꞉ga꞉ ha꞉nano꞉ a꞉ngabiki, kalu noma꞉yo꞉ e amio꞉ golabo꞉lo꞉b a꞉la꞉asula꞉sa꞉ga꞉, a꞉ma꞉la꞉ bale ba꞉dakiyo꞉ a꞉la꞉sio꞉, “Ni helebeso꞉g amio꞉ abe golo꞉wo꞉?” 31A꞉la꞉dabu ba꞉dabiki, enedo꞉ tili wida꞉sen kaluwa꞉yo꞉ Ya꞉sumo꞉wo꞉ a꞉la꞉sio꞉, “Kaluka꞉isaleyo꞉ modo꞉ yab wema꞉ anilaki gab ko꞉lo꞉, giyo꞉ ‘Ne abe golaba?’ a꞉la꞉do꞉ sa꞉lab ko wangabiki sa꞉laya?” 32Ko꞉sega Ya꞉su eyo꞉ e amio꞉ abe golo꞉wa꞉le a꞉la꞉liki, sigili keda꞉li ane. 33Ya꞉suwa꞉lo꞉ dabu ba꞉dab a꞉no꞉ ga a꞉ma꞉yo꞉ ha꞉go꞉ asula꞉sa꞉ga꞉, e tagilakiyo꞉ bibisoda꞉liki, Ya꞉sulo꞉wa ya꞉sa꞉ga꞉, a꞉na gumisi alifo꞉liki, e amilo꞉ dimido꞉wo꞉ a꞉na fanda sio꞉. 34#Mak 10.52, Luk 7.50, 17.19Ya꞉su eyo꞉ ga o꞉mo꞉wo꞉ a꞉la꞉sio꞉, “Na꞉la꞉, ge go꞉no꞉n tilidabu koma꞉yo꞉, ge falele alifa꞉. Walaf ge amilo꞉ elen ko ga꞉li dowab ko꞉lo꞉, ge ha꞉sa mesa꞉ni ha꞉na꞉bi.”

35Ya꞉suwo꞉ to a꞉no꞉ ko꞉lo꞉ gamo꞉ sa꞉la꞉lena, kalu nolo꞉ Yailesa꞉ aya a꞉la꞉ta꞉ga꞉ ya꞉ga꞉, Yailes emo꞉wo꞉ a꞉la꞉sio꞉, “Ga꞉la꞉yo꞉ sowo꞉ ko꞉m. Gilo꞉ widan kalu we tililia꞉ ha꞉na꞉no꞉wo꞉, mo꞉wo꞉ aundo꞉malo꞉ka꞉.” 36Ya꞉su eyo꞉lo꞉ to a꞉no꞉ da꞉dakiyo꞉, Yailesbo꞉wo꞉ a꞉la꞉sio꞉, “Ge iligi da꞉da꞉so꞉bo. Ge neka tilida꞉da꞉bi.” 37A꞉la꞉fo꞉ko꞉lo꞉ Ya꞉su eyo꞉ kaluka꞉isale nolo꞉ a꞉na kagafo꞉melea꞉ki ta꞉takiyo꞉, Bidayo꞉, Ya꞉ma꞉so꞉, Ya꞉ma꞉sa꞉ ao Yo꞉no꞉, i a꞉no꞉leko꞉ tililia꞉gane. 38Iyo꞉ Yailesa꞉ aya fa꞉la꞉dowo꞉ amio꞉, kaluka꞉isaleyo꞉ tambo kegea꞉sa꞉ga꞉ ya꞉fowo꞉ modo꞉ elena ba꞉ba꞉. 39Ya꞉suwo꞉ a usa tina꞉sa꞉ga꞉, imo꞉wo꞉ a꞉la꞉sio꞉, “Gio꞉ waga ya꞉fodaya? So꞉wa we sowo꞉lema. E ba mida꞉iyo꞉ alifo꞉lab.” 40Elo꞉ to sa꞉lab a꞉no꞉ da꞉da꞉sa꞉ga꞉yo꞉ iyo꞉ o꞉gabiki, Ya꞉su eyo꞉ iyo꞉ ha꞉la꞉ya iliga꞉fo꞉. A꞉la꞉go꞉ko꞉lo꞉ so꞉walo꞉ iya o꞉lia꞉, ano o꞉lia꞉yo꞉ a꞉la꞉ta꞉ga꞉ tili wida꞉sen kalu otalen, i a꞉no꞉ko꞉ sowo꞉lo꞉ da꞉lab galala꞉ a꞉na tiane. 41#Luk 7.14Iyo꞉ a꞉na ti ha꞉na꞉sa꞉ga꞉, eyo꞉ gala꞉su a꞉ma꞉ dagiya ta꞉li dotakiyo꞉ a꞉la꞉sio꞉, “Talita kum.” A꞉la꞉do꞉ sa꞉lab a꞉ma꞉ ha꞉go꞉ we, “Ka꞉isale so꞉wa, ge dasima.” 42Wigibo a꞉naka ka꞉isale so꞉wa a꞉no꞉ a꞉na dasilia꞉ga꞉ sia꞉len. Ka꞉isale so꞉wa a꞉no꞉ donayo꞉ kugula꞉fo꞉ gulula꞉. Iyo꞉ dimidab a꞉no꞉ ko꞉lo꞉ ba꞉ba꞉ amio꞉ molo asulo꞉. 43Ya꞉su eyo꞉ imo꞉wo꞉ halale sa꞉laki, “Dimido꞉ we kalu nolbo꞉wo꞉ kalab amio꞉ malola꞉i ha꞉na꞉so꞉bo!” A꞉la꞉ta꞉ga꞉ ma꞉no꞉wo꞉ ka꞉isale so꞉wa o꞉mo꞉wo꞉ maiya꞉ki dimina Ya꞉su eyo꞉ a꞉la꞉sio꞉.

اکنون انتخاب شده:

Mak 5: BCO

های‌لایت

کپی

مقایسه

به اشتراک گذاشتن