Mak 3

1Ho꞉len no amio꞉ Ya꞉suwo꞉ tolo꞉ wida꞉sen aya ha꞉na꞉sa꞉ga꞉, dagiyo꞉ ga꞉ga꞉nuli kalu nowo꞉ a꞉na sena ba꞉ba꞉. 2Kalu nolba꞉yo꞉ Ya꞉su e hala dimidab a꞉la꞉likilo꞉ mo꞉walilima꞉no꞉ togo꞉ kedo꞉ ko꞉lo꞉, iliyo꞉ Ya꞉su eyo꞉ Ha꞉fo꞉lo꞉ Dowan ho꞉len a꞉namio꞉ dagiyo꞉ ga꞉ga꞉nuli kalu a꞉no꞉ falele alitaba꞉le a꞉la꞉liki bo꞉fo꞉len. 3A꞉la꞉gabiki Ya꞉su eyo꞉ dagiyo꞉ ga꞉ga꞉nuli kalumo꞉wo꞉ a꞉la꞉sio꞉, “Ge dasilia꞉ga꞉, kalu kegeo꞉ siwa꞉l wena kagama꞉ni mena.” 4#Luk 14.3Kalu a꞉no꞉ dasilia꞉ga꞉ kagatabiki, Ya꞉suwa꞉ imo꞉wo꞉ a꞉la꞉dabu ba꞉ba꞉, “Ele saetakiyo꞉, Ha꞉fo꞉lo꞉ Dowan ho꞉len a꞉namio꞉ o꞉b ko꞉lo꞉ dimidama꞉no꞉ saefa꞉yo꞉? Man nafaleyo꞉ o꞉li dimidama꞉no꞉wa꞉le? Mo꞉ man mogago꞉wo꞉ o꞉li dimidama꞉no꞉wa꞉le? Sana soma꞉no꞉wa꞉le? Mo꞉ mela꞉no꞉wo꞉ a꞉ma꞉la꞉ gasiliakilo꞉ asuwa꞉fa꞉no꞉wa꞉le? Ele saefa꞉ a꞉no꞉ ho꞉bo꞉ko꞉mo꞉lo꞉bo꞉?” A꞉la꞉dabu ba꞉ba꞉ ko꞉sega iliyo꞉ a꞉ma꞉la꞉yo꞉ mo꞉sa꞉laki heela꞉li. 5Iyo꞉ asulo꞉wo꞉ halaido꞉ ko꞉lo꞉, Ya꞉suwa꞉yo꞉ iyo꞉ sigili ba꞉da꞉sa꞉ga꞉ imo꞉wo꞉ gadiaki, dagiyo꞉ ga꞉ga꞉nuli kalumo꞉wo꞉ a꞉la꞉sio꞉, “Ge dagiyo꞉ talagalema.” A꞉la꞉sa꞉labiki kalu a꞉ma꞉yo꞉ a꞉la꞉dimidaki, dagi a꞉no꞉ e elen o꞉ngo꞉ dowo꞉. 6#Madi 22.15-16Fa꞉lisi kalu iliyo꞉ dimidab a꞉no꞉ ba꞉da꞉sa꞉ga꞉, ha꞉la꞉ya ha꞉nakiyo꞉, i o꞉lia꞉ Ha꞉lodo꞉ kudu sian kalu o꞉lia꞉ma꞉yo꞉ Ya꞉su sa꞉ma꞉no꞉ towo꞉ o꞉g a꞉na mo꞉mo꞉da nenelo꞉.

Kaluka꞉isale modo꞉wo꞉ Ya꞉su kudu ane

Madi 12.15-16, Luk 6.17-19

7-8Ya꞉su o꞉lia꞉ enedo꞉ tili wida꞉sen kalu o꞉lia꞉yo꞉ Ga꞉lili ho꞉n golo꞉ seya ha꞉nabiki, kaluka꞉isaleyo꞉ modo꞉ ko꞉lo꞉ e kudu ane. Kaluka꞉isale i a꞉no꞉ Ga꞉lili kaluka꞉isaleyo꞉lo꞉, Yudiayo꞉lo꞉, Ya꞉lusalemo꞉lo꞉, Idomeayo꞉lo꞉, Yodano꞉ nodo amilo꞉ sano꞉lo꞉, Tayayo꞉lo꞉ ami Saido꞉n kaluka꞉isale iyo꞉ Ya꞉suwa꞉lo꞉ dimidab a꞉no꞉ da꞉da꞉sa꞉ga꞉, tambo Ya꞉sulo꞉wa ya꞉sio꞉. 9,10#Madi 14.36Eyo꞉ kaluka꞉isaleyo꞉ modo꞉ ko꞉lo꞉ falele alifelabiki, walafdo꞉ dosdo꞉ nolo꞉ ya꞉siakiyo꞉, e goma꞉no꞉ a꞉la꞉ta꞉ga꞉ ani tandeo꞉. Kaluka꞉isaleyo꞉ Ya꞉sulo꞉ amio꞉ modo꞉ kegeakiyo꞉, e mo꞉ani tandema꞉ki a꞉la꞉ta꞉ga꞉ Ya꞉suwa꞉yo꞉ enedo꞉ tili wida꞉senbo꞉wo꞉ a꞉la꞉sio꞉, “Gio꞉ ho꞉n ko꞉su nowo꞉ bo꞉bo꞉li alifa꞉ni hamana.” 11#Luk 4.41Mama mogago꞉ a꞉ma꞉yo꞉ e ba꞉da꞉sa꞉ga꞉yo꞉, Ya꞉sulo꞉ a꞉lab a꞉na gumisi fufuda꞉sa꞉ga꞉ a꞉na ho꞉le sa꞉laki, “Ge mada Godeya꞉ ene So꞉wa” a꞉la꞉sa꞉la꞉sen. 12#Mak 1.34Ko꞉sega e kalu o꞉mka꞉ a꞉la꞉bo꞉ mo꞉fanda sama꞉kiyo꞉, mama mogago꞉mo꞉wo꞉ towo꞉ halaido꞉ sio꞉.

Kalu kugula꞉fo꞉wo꞉ da꞉feyo꞉

Madi 10.2-4, 12.25-29, Luk 6.14-16, 11.17-22

13Ya꞉suwo꞉ hen misio꞉ doba꞉da꞉ halona ha꞉na꞉no꞉ ha꞉nakiyo꞉, kalu enedo꞉ da꞉fema꞉no꞉ asulo꞉le a꞉no꞉ko꞉ ho꞉leliabiki, iyo꞉ Ya꞉sulo꞉wa ane. 14A꞉la꞉ta꞉ga꞉ Ya꞉suwa꞉yo꞉ enen o꞉lia꞉ sia꞉mela꞉no꞉ a꞉la꞉ta꞉ga꞉ mando꞉ walama꞉kilo꞉ iliga꞉felema꞉no꞉, kalu kugula꞉fo꞉ a꞉no꞉ko꞉ da꞉feyo꞉. A꞉la꞉fo꞉ko꞉lo꞉ Ya꞉suwa꞉yo꞉ i a꞉no꞉ iliga꞉felo꞉ kalu wikilo꞉. 15A꞉la꞉gabiki iliyo꞉ mano꞉ widalikiyo꞉, mama mogago꞉wo꞉ i a꞉ma꞉yo꞉ o꞉luga꞉felema꞉ki, halaido꞉wo꞉ imo꞉ dimi. 16#Yo꞉n 1.42Elo꞉ kalu kugula꞉fo꞉ da꞉feyo꞉wo꞉ we. Nowo꞉ Saimon, Saimon e Ya꞉suwa꞉lo꞉ wi ho꞉gi wikilo꞉wo꞉ Bida. 17#Luk 9.54Nowo꞉ Ya꞉ma꞉s, Sa꞉ba꞉diya꞉ inso꞉, ene ao nowo꞉ Yo꞉n. Ao a꞉la꞉ a꞉no꞉ Ya꞉suwa꞉lo꞉ wi ho꞉gi wikilo꞉wo꞉ Boana꞉ga꞉s. Boana꞉ga꞉s a꞉la꞉do꞉ sa꞉lab a꞉ma꞉ ha꞉go꞉ we, guna꞉ so꞉wa. 18Nowo꞉ Andulu, nowo꞉ Filib, nowo꞉ Batolomiyu, nowo꞉ Madiyu, nowo꞉ Tomas, nowo꞉ Ya꞉ma꞉s, Aofiusa꞉ inso꞉, nowo꞉ Tadius, nowo꞉ Saimon, gamani ho꞉giyo꞉ e dimo꞉losa꞉ a꞉lakilo꞉ asula꞉seno꞉ e ko꞉lo꞉, Sa꞉la꞉t kalu a꞉la꞉sa꞉lan,#3.18 Sa꞉la꞉t a꞉la꞉do꞉ sa꞉lab a꞉ma꞉ ha꞉ga we. Kalu nolo꞉ man ko꞉li ko꞉lilo꞉ sa꞉la꞉likiyo꞉ elo꞉wa mena꞉kilo꞉ to halaido꞉lo꞉ wida꞉lowano꞉ e. A꞉la꞉ta꞉ga꞉ ho꞉len a꞉namio꞉ kaluwo꞉ modo꞉ kegea꞉sa꞉sa꞉, towo꞉ imilig saeta꞉ga꞉lo꞉ sa꞉sen a꞉ma꞉ wiyo꞉ we. 19Nowo꞉ Yudas Iskaliot, Ya꞉sulo꞉ teledowo꞉wo꞉ e.

20Ya꞉suwa꞉yo꞉ kalu kugula꞉fo꞉ a꞉no꞉ da꞉fea꞉sa꞉ga꞉yo꞉, e a꞉ma꞉la꞉ aya ane. Iyo꞉ aya ha꞉na꞉sa꞉ga꞉ sen amio꞉, kaluka꞉isaleyo꞉ modo꞉ wa꞉ka kegeabiki, ma꞉no꞉ ma꞉no꞉wo꞉ fogo꞉ mo꞉dowo꞉. 21Elo꞉ dimida꞉len a꞉no꞉ e so꞉lo꞉wa꞉ da꞉da꞉sa꞉ga꞉yo꞉, iliyo꞉ e no꞉nolo꞉ dowab a꞉la꞉asula꞉sa꞉ga꞉, e bo꞉fo꞉melea꞉ki mio꞉. 22#Madi 9.34, 10.25Ya꞉lusalem a꞉la꞉ta꞉ga꞉lo꞉ elelo꞉ wida꞉sen kalu i mio꞉ a꞉ma꞉yo꞉ a꞉la꞉sio꞉, “Bia꞉sabul, mama mogago꞉lo꞉ bo꞉fo꞉lowan a꞉no꞉ eya dowa꞉sen ko꞉lo꞉, ene halaido꞉ a꞉na ilikiyo꞉ mama mogago꞉ nolo꞉ eyo꞉ o꞉luga꞉fela꞉sen.” 23Ya꞉su eyo꞉ kalu i a꞉no꞉ ho꞉le kegea꞉sa꞉ga꞉, towo꞉ a꞉na bale sio꞉, “Sa꞉da꞉na꞉ eyo꞉, Sa꞉da꞉na꞉ eneno꞉ waga o꞉luga꞉felano꞉? 24Amisa꞉n imilig no amio꞉ ko꞉lo꞉ aloba꞉da꞉sa꞉ga꞉ bubalega, amisa꞉n a꞉no꞉ mo꞉dinafa halale mesa꞉ib. 25A꞉la꞉ta꞉ga꞉yo꞉ so꞉lo꞉ imilig nowo꞉ egele aloba꞉da꞉sa꞉ga꞉ gis dialega, so꞉lo꞉ a꞉no꞉ mo꞉dinafa mesa꞉ib. 26O꞉leaumbo꞉, Sa꞉da꞉na꞉ eyo꞉ enena꞉ma꞉la꞉yo꞉ aloba꞉da꞉sa꞉ga꞉ bubalega, e halaido꞉wo꞉ mo꞉dowaliki, e kelegema꞉ib.” Ya꞉su eyo꞉ a꞉la꞉sio꞉. 27A꞉la꞉ta꞉ga꞉ Ya꞉su e halaido꞉ kaluka꞉ a꞉lakiyo꞉, eyo꞉ bale sio꞉ to nowo꞉ a꞉la꞉sio꞉. “Afalo꞉ dian kalu noma꞉yo꞉ halaido꞉ kalu a꞉ma꞉ aya tina꞉sa꞉ga꞉ kelego꞉wo꞉ afale dia꞉no꞉ asulakiyo꞉, eyo꞉ waga dimidama꞉iba? Eyo꞉ halaido꞉ kalu a꞉no꞉ ko꞉le melea꞉takiyo꞉, kelego꞉wo꞉ a꞉namio꞉ o꞉li dia꞉ha꞉na꞉ib.

28“Niyo꞉ gemo꞉wo꞉ hendele so꞉lo꞉l. Mogago꞉lo꞉ dimida꞉sen o꞉lia꞉ Godemo꞉lo꞉ dio꞉ge sio꞉wo꞉lo꞉, Gode eyo꞉ o꞉li ga꞉lila꞉ma꞉ib. 29Ko꞉sega kalu abeyo꞉ Mama Malilo꞉mo꞉wo꞉ dio꞉ge sa꞉lalega, mogago꞉ elo꞉ sa꞉lab a꞉no꞉ mada mo꞉ga꞉lila꞉ma꞉ib. Enedo꞉ hala dimido꞉ a꞉no꞉ mela꞉no꞉ mela꞉no꞉ mela꞉ib,” Ya꞉suwa꞉yo꞉ a꞉la꞉sio꞉. 30Ya꞉suwa꞉lo꞉ to sio꞉ a꞉no꞉ mo꞉wo꞉ we. Ili sa꞉lakiyo꞉, “Ya꞉su e amio꞉ mama mogago꞉wo꞉ dofo꞉lab,” a꞉la꞉sio꞉ ko꞉lo꞉ eyo꞉ to a꞉no꞉ imo꞉wo꞉ a꞉na sio꞉.

Ya꞉suwa꞉ ene ano o꞉lia꞉ ao o꞉lia꞉yo꞉ mio꞉

Madi 12.46-50, Luk 8.19-21

31 # Mak 6.3, Yo꞉n 2.12, Ilig 1.14 Ya꞉suwa꞉ ano o꞉lia꞉ ao o꞉lia꞉yo꞉ a꞉na fa꞉la꞉dowa꞉sa꞉ga꞉yo꞉, ha꞉la꞉ya kagafo꞉liki, kalu nowo꞉ Ya꞉suwo꞉ a usa ba꞉ba꞉ni ha꞉na꞉sa꞉ga꞉, ilo꞉wa mena꞉ki iliga꞉fo꞉. 32A꞉la꞉ta꞉ga꞉ kalu modo꞉wo꞉ Ya꞉su e o꞉lia꞉ silikiyo꞉, iliyo꞉ emo꞉wo꞉ a꞉la꞉sio꞉, “Go꞉ o꞉lia꞉ gao o꞉lia꞉ma꞉yo꞉ ge keda꞉liki, ha꞉la꞉ya a꞉lab” a꞉la꞉sio꞉. 33A꞉la꞉sa꞉labiki Ya꞉su eyo꞉ a꞉ma꞉la꞉ sa꞉laki, “Ni no꞉wo꞉, ni naowo꞉ o꞉ba꞉le?” a꞉la꞉dabu ba꞉ba꞉. 34Kaluka꞉isale ko꞉lo꞉ e anib amilo꞉ kandayo꞉ a꞉no꞉ eyo꞉ sigiliga꞉takiyo꞉ a꞉la꞉sio꞉, “A us amilo꞉ sab we ni no꞉leyo꞉ a꞉la꞉ta꞉ga꞉ ni naoleyo꞉ i o꞉m. 35Kaluka꞉isale abeyo꞉ Godeya꞉ mando꞉ tilida꞉da꞉sa꞉ga꞉lo꞉ kudu ha꞉na꞉lab a꞉no꞉, naoleyo꞉ nadoleyo꞉ no꞉leyo꞉ i o꞉m,” Ya꞉su eyo꞉ a꞉la꞉sio꞉.

اکنون انتخاب شده:

Mak 3: BCO

های‌لایت

کپی

مقایسه

به اشتراک گذاشتن