Mak 12

Ya꞉su eyo꞉ e sa꞉ndakilo꞉ dikidima꞉no꞉ a꞉no꞉ ko꞉lo꞉ bale sio꞉

Madi 21.33-46, Luk 20.9-19

1 # Ais 5.1-2 Ya꞉su eyo꞉ Yu misa꞉ kalumo꞉wo꞉ to nowo꞉ bale malolo꞉. “Hendo꞉ biso꞉ kalu noma꞉yo꞉ waina꞉ fowo꞉ gela꞉sa꞉ga꞉, ilifo꞉ tololia꞉ difa꞉. Egelo꞉ us a꞉namio꞉, eyo꞉ waina꞉ folo꞉ basima꞉no꞉ ho꞉wo꞉ daida꞉sa꞉ga꞉yo꞉, wain egelo꞉ o꞉lo꞉ bo꞉fo꞉likilo꞉ mesa꞉no꞉wo꞉ ayo꞉ iwalu dialifa꞉. A꞉la꞉ta꞉ga꞉ eyo꞉ egelo꞉ a꞉no꞉ nanogdo꞉ dia꞉no꞉ kalu nolba꞉ dagiya dia꞉ta꞉sa꞉ga꞉, hendo꞉ biso꞉ kalu a꞉no꞉ hen nowa ko꞉na꞉ ha꞉nakiyo꞉ a꞉la꞉sio꞉, ‘Ge ni egelo꞉ we bo꞉fo꞉lubi. Tif amio꞉ fowo꞉ tulakiyo꞉, nolo꞉ ge diaki, nolo꞉ no꞉no꞉ dia꞉no꞉’ a꞉la꞉salifo꞉gane. 2A꞉la꞉fo꞉ko꞉lo꞉ folo꞉ tuma꞉no꞉ ho꞉leno꞉ dowabikiyo꞉, kalu bo꞉fo꞉melea꞉kilo꞉ ta꞉fo꞉ i a꞉ma꞉yo꞉ fo nolo꞉ enebo꞉ iliga꞉foma꞉kiyo꞉, hendo꞉ biso꞉ kalu eyo꞉ ene nanogdo꞉ dian kalu nowo꞉ a꞉na iliga꞉fo꞉. 3Nanog kalu e a꞉na fa꞉la꞉dowo꞉ ko꞉sega, egelo꞉lo꞉ bo꞉fo꞉len kalu iliyo꞉ e ta꞉lia꞉sa꞉ga꞉ yame tandea꞉sa꞉ga꞉, e hendo꞉ biso꞉lo꞉wa a꞉ma꞉la꞉ madali iliga꞉fo꞉. 4A꞉la꞉ta꞉ga꞉ hendo꞉ biso꞉ eyo꞉ nanog kalu nowo꞉ wa꞉ka iliga꞉fo꞉, ko꞉sega iliyo꞉ kalu a꞉no꞉ misa꞉ya yame tandea꞉sa꞉ga꞉, sasedeaki sendelo alifa꞉. 5A꞉la꞉go꞉lo꞉biki eyo꞉ nowo꞉lo꞉ wa꞉ka iliga꞉fo꞉ ko꞉sega, iliyo꞉ kalu a꞉no꞉ sana sowo꞉. Tif amio꞉ kalu modo꞉ nolo꞉ wa꞉ka a꞉iliga꞉fo꞉, ko꞉sega kalu a꞉no꞉ nolo꞉ yame tandeaki, nolo꞉ sana sowo꞉.

6“A꞉la꞉gabiki hendo꞉ biso꞉ a꞉ma꞉yo꞉ nanog kalu nowo꞉ a꞉iliga꞉fa꞉no꞉wo꞉ aundo꞉ma dowabiki, ene so꞉wa imilise ha꞉fo꞉lo꞉ disa꞉ a꞉no꞉ko꞉ dowabi iliga꞉fa꞉nikiyo꞉, eneno꞉ a꞉la꞉sio꞉, ‘Iliyo꞉ ne so꞉wa we iligi ba꞉da꞉sa꞉ga꞉, kudu ha꞉na꞉ib.’ A꞉la꞉asula꞉sa꞉ga꞉yo꞉, ene so꞉wa a꞉no꞉ a꞉na iliga꞉fo꞉. 7Ko꞉sega egelo꞉lo꞉ bo꞉fo꞉len kalu iliyo꞉ egele nenelakiyo꞉ a꞉la꞉sio꞉, ‘Ene so꞉wa imilig yab wema꞉yo꞉, iyayo꞉ sowalikiyo꞉ dabuno꞉ e tambo dia꞉ib. Dabun a꞉no꞉ nili dia꞉no꞉ ko꞉lo꞉ e sana soma꞉niki.’ 8#Hibu 13.12A꞉la꞉fo꞉ko꞉lo꞉ iliyo꞉ e ta꞉lia꞉sa꞉ga꞉ sanaeta꞉ga꞉yo꞉, iliyo꞉ e dia꞉ga꞉ wain egelo꞉ ha꞉la꞉ya sandifo꞉.

9“A꞉la꞉dimido꞉ ko꞉lo꞉, hendo꞉ biso꞉ a꞉ma꞉yo꞉ egelo꞉lo꞉ bo꞉fo꞉len kalu i o꞉mo꞉wo꞉ waga dimidama꞉iba? Hendo꞉ biso꞉ e ya꞉ga꞉yo꞉, egelo꞉lo꞉ bo꞉fo꞉len kalu a꞉no꞉ tambo yasala꞉sa꞉ga꞉, wain egelo꞉ a꞉no꞉ kalu nolbo꞉ dimia꞉ib. 10#Song 118.22-23Godeya꞉ to ko꞉lo꞉ sa꞉sa꞉lo꞉ we giliyo꞉ agelo꞉wo꞉? Hendele, to a꞉na sa꞉lakiyo꞉ a꞉la꞉sio꞉,

“ ‘U ko꞉lo꞉ alo꞉ dian ililo꞉ mo꞉beakilo꞉ sandifo꞉ a꞉no꞉,

o꞉go꞉ ayo꞉ halaido꞉ dofo꞉melea꞉kilo꞉ u wa꞉la꞉b ko꞉lo꞉ fa꞉la꞉dowo꞉wo꞉ o꞉m.

11Alana꞉ ene dimida꞉sa꞉ga꞉ fa꞉la꞉do alifa꞉ ko꞉lo꞉,

nini siya꞉yo꞉ mada nafa ba꞉ba꞉ ko꞉lo꞉ nio꞉ sagalab.’”

12Ya꞉su eyo꞉ a꞉la꞉ malolabikiyo꞉, Yu misa꞉ kalu iliyo꞉ Ya꞉suwa꞉lo꞉ bale sa꞉lab a꞉no꞉ iyo꞉ ko꞉lo꞉ sa꞉lab a꞉la꞉asulo꞉. Ya꞉su eyo꞉ iyo꞉ egelo꞉lo꞉ bo꞉fo꞉len kalu mogago꞉ o꞉ngo꞉ a꞉la꞉liki bale sio꞉ ko꞉lo꞉, iliyo꞉ e ta꞉lia꞉sa꞉ga꞉ emo꞉wo꞉ mo꞉walilima꞉no꞉ a꞉la꞉ta꞉ga꞉ togo꞉ kedo꞉. Ko꞉sega iyo꞉ kaluka꞉isale kegeo꞉ a꞉no꞉ tagilaki, Ya꞉suwo꞉ a꞉naka ta꞉ta꞉sa꞉ga꞉, iyo꞉ a꞉ma꞉la꞉ ha꞉na꞉sio꞉.

Takis moleyo꞉ Sisamo꞉ dimia꞉no꞉wa꞉le a꞉la꞉liki Ya꞉sumo꞉ dabu ba꞉ba꞉

Madi 22.15-22, Luk 20.20-26

13 # Luk 11.53-54 Tif amio꞉ Yu misa꞉ kaluwa꞉yo꞉ Ya꞉suwa꞉lo꞉ to sa꞉labo꞉ ka꞉la꞉gedema꞉ki asulo꞉ ko꞉lo꞉, iliyo꞉ Fa꞉lisi kalu o꞉lia꞉ Ha꞉lodo꞉ kudu sian kalu o꞉lia꞉ nolo꞉ Ya꞉sulo꞉wa iliga꞉fo꞉. 14Iyo꞉ elo꞉wa fa꞉la꞉dowakiyo꞉ a꞉la꞉sio꞉, “Widan kalu, nili asulakiyo꞉, ge to hendele sa꞉laki wida꞉sen a꞉la꞉asulo꞉. Kalu nolba꞉lo꞉ to sa꞉lab a꞉no꞉ giyo꞉ mo꞉kele asula꞉sen ko꞉lo꞉, giyo꞉ kaluka꞉isale ko꞉li ko꞉lilo꞉mo꞉wo꞉ man imilise a꞉la꞉ka dimida꞉sen. Godeya꞉ mano꞉ giyo꞉ digalo꞉le wida꞉sen. A꞉la꞉fo꞉ko꞉lo꞉ niliyo꞉ gemo꞉wo꞉ we au dabu ba꞉ba꞉nigo꞉l. Loma꞉ gamani misa꞉ kalu alan, Sisa o꞉mo꞉lo꞉ takis mole dimia꞉no꞉ a꞉no꞉ niliyo꞉ o꞉li dimia꞉no꞉wa꞉le? O꞉ mo꞉dimia꞉no꞉wa꞉le, giyo꞉ waga asulaya? 15Niliyo꞉ takis moleyo꞉ dimia꞉no꞉wa꞉le a꞉la꞉bo꞉, giyo꞉ waga sa꞉ma꞉nigaya?” A꞉la꞉dabu ba꞉dabiki, Ya꞉su eyo꞉ ililo꞉ e ko꞉lo꞉ diga꞉li sa꞉ma꞉nikilo꞉ dimidab a꞉no꞉ ba꞉da꞉sa꞉ga꞉, imo꞉wo꞉ a꞉la꞉dabu ba꞉ba꞉, “Giliyo꞉ ne dikidakilo꞉ bale kedako, mo꞉wo꞉ ha꞉? Loma꞉ mole us a꞉no꞉ nelo꞉ ba꞉ba꞉nigo꞉l ko꞉lo꞉, nelo꞉ wena dia꞉mena” a꞉la꞉sio꞉. 16Iliyo꞉ mole us a꞉no꞉ Ya꞉sulo꞉ bo꞉ba꞉ki dimia꞉sa꞉ga꞉, eyo꞉ imo꞉wo꞉ a꞉la꞉dabu ba꞉ba꞉, “Mole wema꞉ wa꞉l amio꞉ abe wo꞉lokano꞉lo꞉bo꞉? A꞉la꞉ta꞉ga꞉ mole wa꞉l amilo꞉ wi sa꞉sa꞉lo꞉ a꞉no꞉ abeno꞉lo꞉bo꞉?” Iliyo꞉ a꞉ma꞉la꞉bo꞉ a꞉la꞉sio꞉, “Sisa eno꞉.” 17#Lom 13.7A꞉la꞉sa꞉labiki Ya꞉su eyo꞉ imo꞉wo꞉ a꞉la꞉sio꞉, “A꞉la꞉fo꞉ko꞉lo꞉ kelego꞉ Sisa elo꞉wo꞉, a꞉ma꞉la꞉ Sisamo꞉ dimia꞉bi. A꞉la꞉ta꞉ga꞉ kelego꞉ Gode elo꞉wo꞉, a꞉ma꞉la꞉ Godemo꞉ dimia꞉bi.” Ya꞉su eyo꞉ a꞉ma꞉la꞉bo꞉ towo꞉ nafa sa꞉labi, iyo꞉ iliga꞉sa꞉ga꞉ molo asulo꞉.

Sadusi kaluwa꞉yo꞉ kalu sowo꞉ a꞉ma꞉yo꞉ gayo꞉ dia꞉iba a꞉la꞉li Ya꞉sumo꞉ dabu ba꞉ba꞉

Madi 22.23-33, Luk 20.27-38

18 # Ilig 23.8 Sadusi kalu iliyo꞉ tili asulakiyo꞉, sowo꞉ kaluwo꞉ a꞉ma꞉la꞉yo꞉ mada mo꞉dasima꞉ib a꞉la꞉asula꞉sen. A꞉la꞉fo꞉ko꞉lo꞉ iyo꞉ Ya꞉sulo꞉wa ya꞉sa꞉ga꞉ a꞉la꞉dabu ba꞉ba꞉. 19#Lo 25.5“Widan kalu, tamin amio꞉ Mo꞉sa꞉s elo꞉ ele nimo꞉lo꞉ sa꞉sa꞉li me a꞉ma꞉yo꞉ a꞉la꞉sio꞉, ‘Kalu nowo꞉ so꞉walo꞉ mo꞉sa꞉la꞉li ka sowalega, kalu sowo꞉ a꞉ma꞉ ga sa꞉ba꞉lo꞉ a꞉no꞉, ene aowa꞉ mada dia꞉ib. A꞉la꞉ta꞉ga꞉ kalu sowo꞉ a꞉ma꞉ wiyo꞉ mo꞉elema꞉ki, aowa꞉ inga sa꞉ba꞉lo꞉ a꞉no꞉ ene dia꞉sa꞉ga꞉, so꞉wa sa꞉la꞉liab a꞉no꞉, ao sowo꞉ a꞉ma꞉ no꞉ doma꞉ib.’ Mo꞉sa꞉s eyo꞉ a꞉la꞉saefa꞉.

20“Nio꞉ a꞉no꞉ ko꞉lo꞉ da꞉feaki maloloma꞉nigo꞉l. Kalu noma꞉yo꞉ kalu so꞉wayo꞉ doma꞉la꞉fo꞉ ko꞉lo꞉ sa꞉la꞉li. Ao wa꞉la꞉bo꞉ gayo꞉ di, ko꞉sega e so꞉wayo꞉ mo꞉sa꞉la꞉li ka sowo꞉. 21-22Ga sa꞉ba꞉lo꞉ a꞉no꞉ wa꞉la꞉ba꞉ fa꞉s a꞉ma꞉ a꞉di, ko꞉sega elo꞉ so꞉walo꞉ mo꞉sa꞉la꞉li ka sowabiki, ao asol a꞉ma꞉yo꞉lo꞉ a꞉la꞉ka dimido꞉. Ao i doma꞉la꞉fo꞉ a꞉no꞉ tambo ga imilise a꞉no꞉ko꞉ dia꞉li ane ko꞉sega, iyo꞉ tambo so꞉walo꞉ mo꞉sa꞉la꞉li ka danili. Tif amio꞉ ga a꞉no꞉lo꞉ sowo꞉. 23Kalu doma꞉la꞉fo꞉ a꞉ma꞉yo꞉ ga imilig a꞉no꞉ko꞉ dia꞉i ane. A꞉la꞉fo꞉ko꞉lo꞉ kalu sowo꞉lo꞉ a꞉ma꞉la꞉ dasi alifelab ho꞉len a꞉namio꞉, ga a꞉ma꞉ indeyo꞉ o꞉b doma꞉iba?” Sadusi kalu iliyo꞉ Ya꞉sumo꞉ dehege kedaki a꞉na dabu ba꞉ba꞉.

24Ya꞉su eyo꞉ imo꞉wo꞉ a꞉la꞉sio꞉, “Godeya꞉ to sa꞉sa꞉lo꞉ o꞉lia꞉ Godeya꞉ halaido꞉ o꞉lia꞉yo꞉ gio꞉ mo꞉fanda asulo꞉ ko꞉lo꞉, giliyo꞉ mada babale asula꞉sa꞉ga꞉ ha꞉na꞉lab. 25Sowo꞉ kaluka꞉isale iyo꞉ a꞉ma꞉la꞉ a꞉dasilalikiyo꞉, kaluwa꞉yo꞉ gayo꞉ mo꞉diaki, gaya꞉lo꞉ kaluwo꞉ mo꞉ha꞉na꞉ib. Ko꞉sega iyo꞉ Hebenelo꞉ ma꞉mula꞉ kalu sab o꞉leo꞉ngo꞉ doma꞉ib. 26#Kis 3.2,6A꞉la꞉ta꞉ga꞉ o꞉go꞉ niyo꞉ gimo꞉wo꞉ kalu sowo꞉ ko꞉lo꞉ a꞉ma꞉la꞉do꞉ dasilan a꞉no꞉ walama꞉nigo꞉l. Godeyo꞉ i usa ilikilo꞉ Mo꞉sa꞉s emo꞉ sa꞉labilo꞉, Mo꞉sa꞉s elo꞉ sa꞉sa꞉lo꞉ a꞉no꞉ gio꞉ mada agelo꞉. Malolo꞉ a꞉namio꞉, Gode eyo꞉ Mo꞉sa꞉sbo꞉wo꞉ a꞉la꞉sio꞉, ‘Ablahama꞉ Godeyo꞉ Ne, Aisa꞉ga꞉ Godeyo꞉ Ne, a꞉la꞉ta꞉ga꞉ Ya꞉koba꞉ Godeyo꞉ Ne.’ 27Kalu i a꞉no꞉ sowo꞉ ko꞉sega Godeya꞉ sa꞉lakiyo꞉ i a꞉no꞉ mela꞉no꞉wo꞉ o꞉lab a꞉la꞉sa꞉lab ko꞉lo꞉ Gode e kalu sowo꞉ a꞉ma꞉no꞉ma. E kalu mela꞉no꞉lo꞉ a꞉lab a꞉ma꞉ Gode. A꞉la꞉fo꞉ko꞉lo꞉ gililo꞉ kalu sowo꞉wo꞉ mo꞉dasima꞉ib a꞉la꞉do꞉ asulo꞉ a꞉no꞉, giliyo꞉ hala asula꞉lab.”

Elelo꞉ widan kalu imilig noma꞉yo꞉ ele alano꞉ o꞉ba꞉le a꞉la꞉dabu ba꞉ba꞉

Madi 22.34-40

28 # Luk 10.25-28 Elelo꞉ wida꞉sen kalu imilig nowo꞉ a꞉na fa꞉la꞉dowa꞉sa꞉ga꞉, Sadusi kalu o꞉lia꞉ Ya꞉su o꞉lia꞉ kegakilo꞉ nenelab a꞉namio꞉, Ya꞉suwa꞉lo꞉ to nafa a꞉ma꞉la꞉ sa꞉lab a꞉no꞉ e da꞉da꞉sa꞉ga꞉, kalu a꞉ma꞉yo꞉ Ya꞉sumo꞉wo꞉ a꞉la꞉dabu ba꞉ba꞉, “Gode eyo꞉ eleyo꞉ modo꞉ difa꞉ ko꞉sega, nililo꞉ hendele kudu ha꞉na꞉no꞉wo꞉ ele imilig a꞉no꞉ o꞉ba꞉le?” 29#Lo 6.4-5Ya꞉su eyo꞉ a꞉ma꞉la꞉bo꞉ a꞉la꞉sio꞉, “Gilo꞉ mada kudu ha꞉na꞉no꞉ eleyo꞉ we, ‘Isolael kaluka꞉isale gio꞉ dinafa dabuma. Godeyo꞉ nili misa꞉ Alano꞉ e. Godeyo꞉ imilise ko꞉lo꞉ a꞉lab. 30Kalu Alano꞉ gi Gode, ge mada asula꞉bi. Gi mela꞉no꞉ o꞉lia꞉ asulo꞉ o꞉lia꞉yo꞉ Godemo꞉ dimia꞉bi. Go꞉no꞉n halaido꞉wa꞉ iliki, Godeyo꞉ a꞉na kudu ha꞉na꞉lubi.’ Ele we tamindeyo꞉ o꞉m. 31#Wkp 19.18A꞉la꞉ta꞉ga꞉ ele a꞉ma꞉ fa꞉s amilo꞉ da꞉labo꞉ we, ‘Go꞉no꞉n asulan o꞉leaumbo꞉, giasi kaluka꞉isale nolo꞉lo꞉ a꞉la꞉asulaki ha꞉fo꞉wo꞉ disa꞉la꞉lubi.’ Ele difa꞉ da꞉lab nolba꞉yo꞉ ele a꞉la꞉ we, mo꞉tinio꞉ ko꞉lo꞉ a꞉lab.” Ya꞉su eyo꞉ kalu o꞉mo꞉wo꞉ a꞉la꞉sio꞉.

32Kalu a꞉ma꞉yo꞉ Ya꞉sumo꞉wo꞉ a꞉la꞉sio꞉, “Widan kalu, giyo꞉ nafa sio꞉. Godeyo꞉ imilise ko꞉lo꞉ a꞉lab, a꞉la꞉ta꞉ga꞉ Godeyo꞉ nowo꞉ mada aundo꞉ma a꞉la꞉do꞉ gilo꞉ sa꞉lab a꞉no꞉ hendele. 33#1Sam 15.22, Hos 6.6Giliyo꞉ Gode emo꞉wo꞉ ha꞉fo꞉ disa꞉laki, go꞉no꞉ndo꞉ asulan o꞉lia꞉, go꞉no꞉n asulo꞉ o꞉lia꞉, go꞉no꞉n halaido꞉ o꞉lia꞉ a꞉na tambo ilikiyo꞉, Gode emo꞉wo꞉ alan asula꞉bi. A꞉la꞉ta꞉ga꞉ gio꞉ go꞉no꞉n asulan o꞉leaumbo꞉, giasi kaluka꞉isale nolo꞉lo꞉ a꞉la꞉asulaki ha꞉fo꞉wo꞉ disa꞉la꞉lubi. Man a꞉la꞉do꞉ dimidab a꞉ma꞉yo꞉ Godeyo꞉ mada sagale alitab ko꞉lo꞉, man a꞉ma꞉yo꞉ Godemo꞉lo꞉ boba dimian o꞉lia꞉ no꞉ so꞉kugulu mean o꞉lia꞉yo꞉ tinio꞉ ko꞉lo꞉lab.”

34Ya꞉su eyo꞉ kalu elo꞉ a꞉ma꞉la꞉ sa꞉lab a꞉no꞉ nafale da꞉da꞉ga꞉yo꞉, emo꞉wo꞉ a꞉la꞉sio꞉, “Ge Godeya꞉lo꞉ bo꞉fo꞉mela꞉no꞉ hen a꞉namio꞉ semo꞉ tiane ko꞉sega ko꞉na꞉ma dofo꞉lab.” A꞉la꞉sa꞉labiki kaluka꞉isaleyo꞉ tambo Ya꞉sumo꞉lo꞉ dehege dabu kelema꞉no꞉wo꞉ tagilaki, wa꞉kabiyo꞉ mo꞉dabu ba꞉ba꞉.

Ya꞉su eyo꞉ Godeya꞉ malilo꞉ a isagena towo꞉ wido꞉

Madi 22.41-46, 23.1-7, Luk 20.41-47

35Ya꞉suwo꞉ Godeya꞉ malilo꞉ a isagena Godeya꞉ man wida꞉likiyo꞉, eyo꞉ imo꞉wo꞉ a꞉la꞉dabu ba꞉ba꞉, “Elelo꞉ wida꞉sen kaluwa꞉lo꞉ Keliso, Godeya꞉lo꞉ Da꞉feyo꞉ kalu a꞉no꞉, Da꞉ibida꞉ inso꞉ a꞉la꞉do꞉ sa꞉la꞉sen a꞉no꞉ mo꞉wo꞉ waga asulaki sio꞉wo꞉? 36#Song 110.1Da꞉ibid eyamio꞉ Godeya꞉ Mamaya꞉yo꞉ asulo꞉wo꞉ dimiabikiyo꞉, eyo꞉ a꞉la꞉sio꞉,

“Gode eyo꞉ ni Alanbo꞉ sa꞉lakiyo꞉,

‘Niyo꞉ gis kalu gilo꞉wo꞉ gi ha꞉g amio꞉ semo꞉ difa꞉ amio꞉,

Nani bo꞉fo꞉mela꞉niki, ge ni dagi ililiba mesa꞉ni mena.’

37Da꞉ibid eyo꞉ Godeya꞉lo꞉ Da꞉feyo꞉ kalu a꞉no꞉ ‘Alan’ a꞉la꞉ da꞉feyo꞉ ko꞉lo꞉, kalu a꞉no꞉ Da꞉ibida꞉ inso꞉wo꞉ waga dowaba꞉le?” A꞉la꞉widabiki kaluka꞉isale modo꞉ kegeo꞉ iliyo꞉ Ya꞉suwa꞉lo꞉ to widab a꞉no꞉ sagala꞉liki dabu.

38Ya꞉su eyo꞉ a꞉no꞉ ko꞉lo꞉ widakiyo꞉ a꞉la꞉sio꞉, “Giliyo꞉ elelo꞉ wida꞉sen kaluwa꞉ man a꞉no꞉ dinafa aloba꞉da꞉sa꞉ga꞉ dinafa dowa꞉bi. Iliyo꞉ helebeso꞉go꞉ mada nafale tigilo꞉ sa꞉ga꞉lela꞉sa꞉ga꞉yo꞉, kalu nolba꞉yo꞉ e momado꞉ a꞉no꞉ ba꞉da꞉sa꞉ga꞉ iyo꞉ wabuluma꞉ki, ma꞉no꞉lo꞉ kililia꞉sen hen a꞉na ha꞉na꞉no꞉ asula꞉sen. 39Tolo꞉ wida꞉sen ayamio꞉lo꞉, ililo꞉ mesa꞉no꞉ i fofodo꞉wo꞉lo꞉ ko꞉li nafale nowa mesa꞉no꞉ asula꞉sen. A꞉la꞉ta꞉ga꞉ ma꞉no꞉wo꞉ alan ma꞉ni kegeakiyo꞉, iyo꞉ kalu alando꞉ sa꞉sen a꞉na mesa꞉no꞉ asula꞉sen. 40Iliyo꞉ ga sa꞉ba꞉lo꞉ i a꞉no꞉ dikida꞉sa꞉ga꞉, a ililo꞉wo꞉ afale dia꞉sen. Iliyo꞉ a꞉la꞉dimida꞉likiyo꞉, kalu nolba꞉yo꞉ iyo꞉ nafa kalu a꞉la꞉bo꞉ba꞉ki, Godemo꞉ dulugu sa꞉lakiyo꞉, towo꞉ sambo sa꞉la꞉sen. A꞉la꞉fo꞉ko꞉lo꞉ kalu a꞉la꞉do꞉ dimida꞉lab o꞉mo꞉wo꞉ mada alan falasila꞉ma꞉ib.”

Ga sa꞉ba꞉lo꞉ molela꞉su enedo꞉ delen a꞉no꞉ Godemo꞉ dimi

Luk 21.1-4

41Kaluka꞉isaleyo꞉ modo꞉ ya꞉sia꞉labikiyo꞉, Ya꞉su e molelo꞉ to꞉lola꞉sen go꞉fo꞉ anib a꞉na kagafo꞉liki bo꞉fo꞉len. Kaluka꞉isale moleyo꞉ modo꞉lo꞉ delen iliyo꞉ moleyo꞉ modo꞉ ko꞉lo꞉ to꞉lolo꞉. 42Ko꞉sega ga sa꞉ba꞉lo꞉ imilig noma꞉yo꞉ e mole nolo꞉ aundo꞉ma ko꞉lo꞉ mole us a꞉la꞉ a꞉no꞉ko꞉ to꞉lolabi ba꞉ba꞉. 43#2Kol 8.12Enedo꞉ tili wida꞉sen kalu iyo꞉ elo꞉wa mena a꞉la꞉ta꞉ga꞉, Ya꞉su eyo꞉ imo꞉wo꞉ a꞉la꞉sio꞉, “Niyo꞉ to we gimo꞉wo꞉ hendele sa꞉ma꞉nigo꞉l. Ga sa꞉ba꞉lo꞉ wema꞉lo꞉ mole ha꞉lu ko꞉lo꞉ to꞉lolab we, Godeya꞉ si wa꞉l amio꞉ nolba꞉lo꞉ alan dimiab a꞉no꞉ e tinio꞉ ko꞉lo꞉lab. 44Kaluka꞉isale moleyo꞉ modo꞉lo꞉ delen iliyo꞉, mole ililo꞉wo꞉ alobanalia꞉ga꞉, heb alano꞉ inino꞉ dia꞉taki, heb nolo꞉ a꞉na to꞉lolab. Ko꞉sega ga sa꞉ba꞉lo꞉ eyo꞉, mole ha꞉lula꞉su enedo꞉ ma꞉no꞉ kililia꞉no꞉ delen a꞉no꞉ko꞉ tambo dia꞉sa꞉ga꞉ to꞉lolab.”

اکنون انتخاب شده:

Mak 12: BCO

های‌لایت

کپی

مقایسه

به اشتراک گذاشتن