Madiyu 26
26
Ya꞉suwo꞉ sana soma꞉no꞉ a꞉la꞉li saefa꞉
Mak 14.1,2, Luk 22.1,2, Yo꞉n 11.45-53
1Ya꞉su eyo꞉ to a꞉no꞉ sa꞉la꞉la꞉ga꞉ eletakiyo꞉, enedo꞉ tili wida꞉sen kalumo꞉wo꞉ towo꞉ a꞉la꞉sio꞉, 2#Kis 12.1-27, Madi 20.18“Gio꞉ asulo꞉ ko꞉lo꞉lab. Ho꞉len a꞉la꞉yo꞉ ta꞉takiyo꞉, Tinio꞉ Asulo꞉ Ma꞉no꞉ ho꞉len a꞉no꞉ fa꞉la꞉doma꞉nigab ko꞉lo꞉, o꞉g a꞉namio꞉ Kalule Dowo꞉ e i malana sana soma꞉ki, gis kaluwa꞉ dagiya gasi mia꞉ib.” Ya꞉su eyo꞉ a꞉la꞉sio꞉.
3Ho꞉len a꞉namio꞉ Godemo꞉lo꞉ bobalo꞉ so꞉mea꞉sen misa꞉ kalu i o꞉lia꞉ Yu ko꞉go꞉do꞉ kaluwo꞉lo꞉ iyo꞉ tambo bobalo꞉ so꞉mea꞉sen misa꞉ kalu, Kaiafasa꞉ ene aya kegea꞉sa꞉ga꞉, towo꞉ a꞉na nenelo꞉. 4Iliyo꞉ Ya꞉suwo꞉ dikidaki ta꞉lia꞉sa꞉ga꞉lo꞉ sana soma꞉no꞉ tog a꞉no꞉ kedaki nenelo꞉. 5Ko꞉sega iliyo꞉ a꞉la꞉nenelo꞉, “Niliyo꞉ Tinio꞉ Asulo꞉lo꞉ Ma꞉no꞉ ho꞉len a꞉namio꞉ Ya꞉suwo꞉ mo꞉ta꞉lia꞉no꞉, mo꞉wo꞉ ho꞉len a꞉na ta꞉lialega, kaluka꞉isale kegeo꞉ a꞉ma꞉yo꞉ gadiaki, towo꞉ alan kegema꞉ib.”
Ga noma꞉yo꞉ wa ho꞉no꞉ Ya꞉suwa꞉ misa꞉ya tulu alifa꞉
Mak 14.3-9, Yo꞉n 12.1-8
6Ya꞉suwo꞉ Ba꞉tani amisa꞉na ilikiyo꞉, Saimon, aintalo꞉ ta꞉len kalu a꞉ma꞉ aya sen. 7#Luk 7.37-38E a꞉na sabiyo꞉, ga imilig nowo꞉ elo꞉wa ya꞉sa꞉ga꞉, wa ho꞉n mudo꞉ nafa, u ho꞉lo꞉ nafale no꞉no꞉ a꞉namilo꞉ wasu a꞉no꞉ dia꞉mio꞉. Wa ho꞉n a꞉no꞉ moleyo꞉ alana꞉ kilili ko꞉lo꞉, Ya꞉suwo꞉ ma꞉no꞉ na꞉li sabikiyo꞉, ga a꞉ma꞉yo꞉ wa ho꞉n a꞉no꞉, Ya꞉suwa꞉ misa꞉ wa꞉l a꞉na tulo꞉.
8Ya꞉suwa꞉ tili wida꞉sen kaluwo꞉ ga a꞉ma꞉lo꞉ dimidab a꞉no꞉ ba꞉da꞉sa꞉ga꞉ mo꞉beaki, egelebo꞉ a꞉la꞉sio꞉, “Ga wema꞉lo꞉ wa ho꞉n mudo꞉ nafa wasu walab we mo꞉wo꞉ ha꞉? 9Wa ho꞉n a꞉no꞉ mo꞉walai kibo꞉bowo꞉, wa ho꞉n a꞉no꞉ kalu nolbo꞉wo꞉ moleyo꞉ alana꞉ kililia꞉sa꞉ga꞉, mole a꞉no꞉ wa꞉feyo꞉ kalumo꞉wo꞉ o꞉li dimibabe.”
10Ya꞉su eyo꞉ to ilido꞉ nenelab a꞉no꞉ asula꞉sa꞉ga꞉, eyo꞉ imo꞉wo꞉ a꞉la꞉sio꞉, “Giliyo꞉ ga wemo꞉lo꞉ mo꞉beo꞉ to sio꞉wo꞉ mo꞉wo꞉ ha꞉? Ga wema꞉yo꞉ nemo꞉wo꞉ man nafale dimidab. 11#Lo 15.11Wa꞉feyo꞉ kaluwo꞉ ho꞉leno꞉ tambo gi o꞉lia꞉ mela꞉ib, ko꞉sega ne ho꞉leno꞉ tambo gi o꞉lia꞉yo꞉ mo꞉mela꞉no꞉. 12Ga wema꞉lo꞉ wa ho꞉n ko꞉lo꞉ ni do꞉mo꞉ amilo꞉ mulu alitab we, nelo꞉ sowa꞉sa꞉ga꞉lo꞉ a꞉le alifa꞉no꞉ a꞉no꞉ ko꞉lo꞉ dimidaitaki gab. 13A꞉la꞉fo꞉ko꞉lo꞉ niyo꞉ to we gimo꞉wo꞉ hendele sa꞉ma꞉nigo꞉l. Henfelo꞉ o꞉bamida꞉ya꞉le Godeya꞉ to nafa a꞉no꞉ henfelo꞉ amio꞉ widalikiyo꞉, ga wema꞉lo꞉ dimidab a꞉no꞉ mo꞉ga꞉lilaki, sa꞉la꞉li ha꞉na꞉mela꞉ib.”
Yudas eyo꞉ Ya꞉suwo꞉ teledoma꞉no꞉ a꞉la꞉saefa꞉
Mak 14.10,11, Luk 22.3-6
14Yudas Iskalioto꞉, Ya꞉suwa꞉lo꞉ tili wida꞉sen kalu kugula꞉fo꞉ nowo꞉ e ko꞉lo꞉, e ha꞉na꞉sa꞉ga꞉ bobalo꞉ so꞉mea꞉sen misa꞉ kalulo꞉wa fa꞉la꞉dowo꞉. 15#Sek 11.12, Yo꞉n 11.57Eyo꞉ imo꞉wo꞉ a꞉la꞉sio꞉, “Niyo꞉ Ya꞉suwo꞉ teledowaki, gili dagiya dia꞉talega, giliyo꞉ nemo꞉wo꞉ o꞉b dimia꞉no꞉wo꞉?” A꞉la꞉sa꞉labikiyo꞉ iliyo꞉ silba moleyo꞉ do꞉la꞉fo꞉ otalen a꞉la꞉fo꞉ko꞉lo꞉ dimi. 16Ho꞉len a꞉na a꞉la꞉ta꞉ga꞉yo꞉, Yudas eyo꞉ Ya꞉sulo꞉ teledoma꞉no꞉ ho꞉lende a꞉no꞉ fa꞉la꞉doma꞉ki togo꞉ keda꞉li elen.
Ya꞉suwo꞉ Tinio꞉ Asulo꞉lo꞉ ma꞉no꞉wo꞉ tili wida꞉sen kalu o꞉lia꞉ mo꞉no꞉
Mak 14.12-21, Luk 22.7-13,21-23, Yo꞉n 13.21-30
17 #
Kis 12.14-20
Falawa Mosolo꞉ Dowo꞉fa꞉ sagala꞉sen ho꞉len a꞉no꞉ mo꞉mo꞉da fa꞉la꞉dowabiki, ho꞉len agel a꞉namio꞉ Ya꞉suwa꞉ ene tili wida꞉sen kaluwo꞉ elo꞉wa ya꞉ga꞉, emo꞉wo꞉ a꞉la꞉dabu ba꞉ba꞉, “Giyo꞉ Tinio꞉ Asulo꞉lo꞉ Ma꞉no꞉ ma꞉nikiyo꞉, niliyo꞉ o꞉ba ha꞉na꞉sa꞉ga꞉ dimidaefoma꞉ki asulaya?” 18A꞉la꞉sa꞉labiki Ya꞉su eyo꞉ a꞉ma꞉la꞉yo꞉ a꞉la꞉sio꞉, “Gio꞉ Ya꞉lusalem tina꞉sa꞉ga꞉yo꞉, kalu nowo꞉ a꞉na ba꞉ba꞉ib ko꞉lo꞉, gio꞉ emo꞉wo꞉ a꞉la꞉sa꞉la꞉bi, ‘Widan kaluwa꞉yo꞉ a꞉la꞉sa꞉labe, “Ni ho꞉lendeyo꞉ ko꞉na꞉ma ililima꞉nigab ko꞉lo꞉, ne o꞉lia꞉ no꞉no꞉n tili wida꞉sen kalu i o꞉lia꞉yo꞉ Tinio꞉ Asulo꞉ Ma꞉no꞉ a꞉no꞉ gi aya siliki ma꞉no꞉.” ’ ” 19Ya꞉suwa꞉lo꞉ imo꞉lo꞉ sio꞉ aumbo꞉ iyo꞉ kudu ha꞉naki, Tinio꞉ Asulo꞉ Ma꞉no꞉ ma꞉no꞉wo꞉ a꞉na dimidala꞉li sen.
20-21Ga꞉lo dowabiki, Ya꞉su o꞉lia꞉ enedo꞉ tili wida꞉sen kalu kugula꞉fo꞉ o꞉lia꞉yo꞉ a꞉na siliki ma꞉no꞉ na꞉likiyo꞉, Ya꞉su eyo꞉ towo꞉ a꞉la꞉sio꞉, “Niyo꞉ gimo꞉wo꞉ hendele so꞉lo꞉l. Gio꞉ imilig noma꞉yo꞉ ne teledoma꞉ib.” 22Ya꞉suwa꞉lo꞉ to sa꞉lab a꞉no꞉ da꞉da꞉sa꞉ga꞉, ili asulo꞉wo꞉ mada hida꞉liaki emo꞉wo꞉ a꞉la꞉sio꞉, “Kalu Alan, neya꞉le?” A꞉la꞉tandeaki Ya꞉sumo꞉ dabu kedo꞉. 23#Song 41.9Ya꞉su eyo꞉ imo꞉wo꞉ a꞉ma꞉la꞉bo꞉ a꞉la꞉sio꞉, “Kalu ni dagi o꞉lia꞉lo꞉ fafo amilo꞉ ma꞉no꞉lo꞉ gele nab a꞉ma꞉yo꞉sa ne teledoma꞉ib. 24Godeya꞉lo꞉ tolo꞉ dinali sa꞉lan kaluwa꞉lo꞉ to saetakilo꞉ sa꞉sa꞉lo꞉ o꞉leauka, Kalule Dowo꞉wo꞉ tog a꞉no꞉ko꞉ kudu ha꞉na꞉no꞉. A꞉la꞉fo꞉ ko꞉sega wai, elo꞉ teledowab kalu a꞉no꞉ hida꞉yo꞉wo꞉ alan dia꞉ib. Kalu a꞉no꞉ anowa꞉yo꞉ mo꞉sa꞉la꞉li kibo꞉bowo꞉ o꞉li domabe.” Ya꞉su eyo꞉ a꞉la꞉sio꞉. 25Yudas, Ya꞉sulo꞉ teledoma꞉no꞉ kalu eyo꞉lo꞉ Ya꞉sumo꞉wo꞉ a꞉la꞉dabu ba꞉ba꞉, “Widan kalu giyo꞉ ne ko꞉lo꞉ sa꞉laya꞉le?” A꞉la꞉sa꞉labiki Ya꞉su eyo꞉ emo꞉wo꞉ a꞉la꞉sio꞉, “Go꞉no꞉ndo꞉ sa꞉lab ko꞉m.”
Ya꞉su Asulo꞉ Ma꞉no꞉ nan man a꞉no꞉ mo꞉mo꞉do꞉
Mak 14.22-26, Luk 22.14-20, 1Kol 11.23-34
26Iyo꞉ ma꞉no꞉ na꞉likiyo꞉, Ya꞉su eyo꞉ ma꞉n so꞉fa꞉ nowo꞉ dia꞉sa꞉ga꞉, Godemo꞉ mada o꞉m a꞉la꞉sa꞉la꞉sa꞉ga꞉ ma꞉n a꞉no꞉ enedo꞉ tili wida꞉sen kalumo꞉ goloso꞉go꞉. A꞉no꞉ dimiakiyo꞉ a꞉la꞉sio꞉, “Ma꞉n we no꞉no꞉n do꞉mo꞉ ko꞉lo꞉, giliyo꞉ dia꞉sa꞉ga꞉ maiya.” 27A꞉la꞉ta꞉ga꞉ eyo꞉ kab amilo꞉ wain ho꞉n wasu a꞉no꞉ dia꞉sa꞉ga꞉, Godemo꞉ mada o꞉m a꞉la꞉sa꞉la꞉sa꞉ga꞉, imo꞉ maiya꞉ki dimiakiyo꞉ a꞉la꞉sio꞉, “Gio꞉ tambo dia꞉sa꞉ga꞉ maiya. 28#Kis 24.8, Jer 31.31-34, Sek 9.11, 1Kol 10.16Ho꞉n wasu we, no꞉no꞉n ho꞉bo꞉wo꞉ o꞉m. Ni ho꞉bo꞉ ko꞉lo꞉ kaluka꞉isaleya꞉ mogago꞉ hama꞉kilo꞉ tulu alifelab wema꞉yo꞉, Godeya꞉lo꞉ to dinali saefa꞉ a꞉no꞉ halale alitakigab. 29Niyo꞉ gimo꞉wo꞉ so꞉lo꞉l. Ne wain ho꞉no꞉ wa꞉kabiyo꞉ mo꞉mo꞉no꞉ka a꞉la꞉ga꞉, Godeya꞉lo꞉ bo꞉fo꞉mela꞉no꞉ man ho꞉gi us a꞉namio꞉, ne gi o꞉lia꞉ siliki a꞉na wa꞉ka ma꞉no꞉.”
30 #
Luk 22.39, Yo꞉n 18.1 Iyo꞉ ma꞉no꞉wo꞉ na꞉sa꞉ga꞉ eletakiyo꞉, gisalo꞉ imilig nowo꞉ a꞉na mo꞉la꞉sa꞉ga꞉ handalowakiyo꞉, iyo꞉ hen misio꞉ O꞉lif a꞉namida꞉ ha꞉na꞉sio꞉.
Bida eyo꞉ Ya꞉suwo꞉ gola ba꞉ba꞉ib a꞉la꞉sio꞉
Mak 14.27-31, Luk 22.31-34, Yo꞉n 13.36-38
31 #
Sek 13.7, Yo꞉n 16.32 Ya꞉su eyo꞉ imo꞉wo꞉ a꞉la꞉sio꞉, “O꞉g nulu wenamio꞉ gio꞉ tambo ne gola ba꞉daki ha꞉la꞉ya ha꞉na꞉ib. Mo꞉wo꞉ tamin amio꞉ Godeya꞉ bugo꞉ amio꞉ towo꞉ sa꞉sa꞉lakiyo꞉ a꞉la꞉sio꞉,
“ ‘Niyo꞉ sibilo꞉ bo꞉fo꞉lowano꞉ sana soma꞉no꞉ ko꞉lo꞉,
kabo sibiyo꞉ a꞉na dalalelia꞉ga꞉ ha꞉na꞉sima꞉ib.’
32 #
Madi 28.7,16 Ko꞉sega ne a꞉ma꞉la꞉ dasi alitalikiyo꞉, Ga꞉lili hen amio꞉ ne ko꞉le tamina ha꞉na꞉no꞉.” 33Bida eyo꞉ Ya꞉suwa꞉lo꞉ to sa꞉lab a꞉no꞉ da꞉da꞉sa꞉ga꞉yo꞉, a꞉ma꞉la꞉bo꞉ a꞉la꞉sio꞉, “Kalu nolo꞉ tambo ge gola ba꞉daki, ha꞉la꞉ya ha꞉na꞉ib, ko꞉sega imilise niyo꞉ ge mada mo꞉gola ba꞉ba꞉no꞉.” 34#Madi 26.69-75A꞉la꞉sa꞉labiki Ya꞉su eyo꞉ Bidamo꞉wo꞉ a꞉la꞉sio꞉, “Niyo꞉ gemo꞉wo꞉ hendele so꞉lo꞉l. O꞉g nulu wenakabiyo꞉, gogonowo꞉ o꞉ganama꞉no꞉ o꞉lalikiyo꞉, giyo꞉ ne mo꞉asulo꞉ a꞉la꞉bo꞉ otalen sa꞉ma꞉ib.” 35Ko꞉sega Bida eyo꞉ a꞉la꞉sio꞉, “Niyo꞉ a꞉la꞉bo꞉ mada mo꞉sa꞉ma꞉no꞉. Ne ge o꞉lia꞉ soma꞉no꞉ dowo꞉lalega, niyo꞉ ge mo꞉asulo꞉ a꞉la꞉bo꞉ mada mo꞉sa꞉ma꞉no꞉.” Bida eyo꞉ a꞉la꞉sa꞉labiki, tili wida꞉sen kalu nolba꞉yo꞉lo꞉ to imilise a꞉no꞉ko꞉ sa꞉la꞉i ane.
Ya꞉suwo꞉ Ga꞉sa꞉ma꞉ni dulugu sa꞉ma꞉ni ane
Mak 14.32-42, Luk 22.39-46
36Ya꞉su o꞉lia꞉ ene tili wida꞉sen kalu i o꞉lia꞉yo꞉ hen Ga꞉sa꞉ma꞉ni a꞉la꞉do꞉ sa꞉lab a꞉na ha꞉na꞉ni ane. A꞉na fa꞉la꞉dowakiyo꞉, Ya꞉su eyo꞉ enedo꞉ tili wida꞉sen kalumo꞉wo꞉ a꞉la꞉sio꞉, “Gio꞉ wena ta꞉bi. Ne honona Godemo꞉ sa꞉ma꞉ni ho꞉no꞉l.” 37-38#Yo꞉n 12.27A꞉la꞉sa꞉la꞉sa꞉ga꞉ eyo꞉ Bida o꞉lia꞉ Sa꞉ba꞉di inso꞉ Ya꞉ma꞉so꞉, Yo꞉no꞉ a꞉no꞉ko꞉ tililia꞉ fina꞉sa꞉ga꞉yo꞉, Ya꞉su e hida꞉liaki kele asulakiyo꞉ imo꞉wo꞉ a꞉la꞉sio꞉, “Ni asulo꞉wo꞉ hida꞉yo꞉ alan dowaki, ne tilialila soma꞉no꞉ o꞉ngo꞉ dowab. Gio꞉ wena siliki ne o꞉lia꞉ bo꞉fo꞉melea.”
39Ya꞉su eyo꞉ a꞉la꞉sa꞉la꞉sa꞉ga꞉, e heb doba꞉da꞉ o꞉fina꞉sa꞉ga꞉yo꞉, hena gulalu misa꞉fu siliki, Godemo꞉ dulugu sa꞉lakiyo꞉ a꞉la꞉sio꞉. “Dowa, we au dimidama꞉no꞉wo꞉ o꞉li dowo꞉lalega, ho꞉n halo꞉ go꞉fo꞉ amilo꞉ wasu ko꞉lo꞉ nemo꞉lo꞉ mea꞉nigab a꞉no꞉, ne mo꞉maiya꞉ki dila꞉bi. Ko꞉sega nilo꞉ asulab aumbo꞉ dimida꞉so꞉bo. Gode gilo꞉ asulab aumbo꞉ dimidama.” 40To a꞉no꞉ dulugu sa꞉la꞉sa꞉ga꞉yo꞉, enedo꞉ tili wida꞉sen kalulo꞉wa ha꞉na꞉sa꞉ga꞉ fa꞉la꞉dowaki ba꞉ba꞉ amio꞉, iyo꞉ mida꞉iyo꞉ fufulufo꞉lena ba꞉ba꞉. E ba꞉da꞉sa꞉ga꞉, Bidamo꞉wo꞉ a꞉la꞉sio꞉, “Saimon, gio꞉ ofa꞉si imilig nowo꞉ ne o꞉lia꞉ yasilakiyo꞉ mo꞉sikaga seno꞉lo꞉ka꞉. 41Gio꞉ da꞉fe ba꞉dab amio꞉ sulufo꞉ tinabena꞉ki, gio꞉ sikaga siliki, Godemo꞉ dulugu sa꞉la꞉lubi. Gili mamaya꞉yo꞉ dimidama꞉no꞉wo꞉ asulab ko꞉sega, gili do꞉mo꞉wo꞉ halaido꞉lo꞉ma dowab.” Ya꞉su eyo꞉ a꞉la꞉sio꞉.
42A꞉la꞉ta꞉ga꞉ Ya꞉su eyo꞉ to andebo꞉ wa꞉ka dulugu sa꞉ma꞉ni fina꞉ga꞉yo꞉ a꞉la꞉sio꞉, “Do Gode, ho꞉n wasu we dila꞉ma꞉no꞉wo꞉ tog nowo꞉ mo꞉dowalega, ne o꞉li ma꞉no꞉. Gilo꞉ asulab au dimidama.” 43A꞉la꞉dulugu sa꞉la꞉sa꞉ga꞉yo꞉, e wa꞉ka a꞉ma꞉la꞉ ya꞉ga꞉ ba꞉ba꞉ amio꞉, iyo꞉ mida꞉iyo꞉ alifo꞉lena ba꞉ba꞉. 44A꞉la꞉fo꞉ko꞉lo꞉ iyo꞉ ta꞉ta꞉sa꞉ga꞉yo꞉, e asolo꞉ wa꞉ka dulugu sa꞉ma꞉ni ha꞉na꞉sa꞉ga꞉, Godemo꞉lo꞉ to tamin amilo꞉ sio꞉ o꞉leauka wa꞉ka sio꞉. 45Eyo꞉ dulugu sa꞉la꞉sa꞉ga꞉ eletakiyo꞉, enedo꞉ tili wida꞉sen kalulo꞉wa a꞉ma꞉la꞉ ha꞉na꞉sa꞉ga꞉ a꞉la꞉sio꞉, “Gio꞉ alifo꞉mela꞉no꞉ ko꞉ alifo꞉leya? Bo꞉ba! Ofa꞉sileyo꞉ o꞉ma fa꞉la꞉dowab ko꞉lo꞉, Kalule Dowo꞉wo꞉ mogago꞉lo꞉ dimidan kalumo꞉ teledowaki gasimia꞉nigab. 46#Yo꞉n 14.31Dasima! Nelo꞉ teledoma꞉ibo꞉ weyako bo꞉ba. Nio꞉ e galima꞉niki, ha꞉na꞉n.”
Ya꞉suwo꞉ teledowaki, gis kaluwa꞉ dagiya difa꞉
Mak 14.43-50, Luk 22.47-53, Yo꞉n 18.3-12
47Ya꞉suwo꞉ to a꞉no꞉ ko꞉lo꞉ sa꞉la꞉lena, enedo꞉ tiliwida꞉sen kalu imilig nowo꞉ Yudas e a꞉na fa꞉la꞉dowo꞉. Yudasa꞉ fa꞉s amio꞉, bobalo꞉ so꞉mea꞉sen misa꞉ kalu i o꞉lia꞉ Yu ko꞉go꞉dego꞉ kalu o꞉lia꞉ma꞉lo꞉ wati kaluwo꞉ modo꞉ mio꞉. Kalu i a꞉ma꞉yo꞉ ko꞉lo꞉dowo꞉lo꞉, helebesi sambowo꞉lo꞉ diadela꞉sa꞉ga꞉ mio꞉. 48Tamin amio꞉ Yudas eyo꞉ wati kalumo꞉wo꞉ a꞉la꞉sio꞉. “Kalu nilo꞉ mimilab a꞉no꞉ o꞉m ko꞉lo꞉, giliyo꞉ e ta꞉lia꞉bi.” 49A꞉la꞉fo꞉ko꞉lo꞉ Yudas e Ya꞉sulo꞉ka tigini ha꞉na꞉sa꞉ga꞉ kagayaki a꞉la꞉sio꞉, “Widan kalu, ge nulu nafa.” A꞉la꞉sa꞉la꞉sa꞉ga꞉ ami Ya꞉suwo꞉ a꞉na mimilo꞉. 50Ya꞉su eyo꞉ emo꞉wo꞉ a꞉la꞉sio꞉, “Ni mili, gilo꞉ dimidama꞉no꞉ asulo꞉ mio꞉wo꞉ dimidama.” A꞉la꞉sa꞉labiki gis kaluwa꞉yo꞉ Ya꞉suwo꞉ a꞉na ta꞉li.
51 #
Yo꞉n 18.26
Ya꞉su e ta꞉liabiki, kalu e anib amilo꞉ kagafo꞉len imilig noma꞉yo꞉, ene helebesi sambowo꞉ sililia꞉ga꞉, bobalo꞉ so꞉mea꞉sen misa꞉ kaluwa꞉ nanog dian kalu a꞉no꞉ helebesi a꞉ma꞉ yamelabiki, ka꞉la꞉na꞉ fo꞉so꞉ a꞉na gede to꞉lolo꞉. 52#Mo꞉mo꞉ 9.6, Kala 13.10Ya꞉su eyo꞉ kalu o꞉mo꞉wo꞉ a꞉la꞉sio꞉, “Go꞉no꞉n helebesi sambo ko a꞉ma꞉la꞉ disa꞉ma. Mo꞉wo꞉ kalu abeyo꞉ helebesi o꞉lia꞉ma꞉lo꞉ buba꞉sen a꞉no꞉, helebesi a꞉ma꞉yo꞉ inino꞉lo꞉ tambo yasala꞉ma꞉ib. 53Niyo꞉ Domo꞉wo꞉ dulugu sa꞉laki dabu ba꞉dalega, eyo꞉ ma꞉mula꞉ kalu daosen daosen mo꞉agela꞉ma꞉no꞉ dowo꞉ a꞉no꞉#26.53 Madiyu eyo꞉ ma꞉mula꞉ kalu a꞉no꞉ da꞉feakiyo꞉, ame kugula꞉fo꞉wo꞉ a꞉la꞉ta꞉ga꞉ nolo꞉lo꞉ a꞉dowo꞉ a꞉la꞉sa꞉sa꞉lo꞉. O꞉g a꞉namio꞉, ame kalu aloba꞉dakiyo꞉, 6,000 ame kaluwo꞉ a꞉la꞉ aloba꞉da꞉sa꞉ga꞉ ta꞉fela꞉i ha꞉na꞉sen. A꞉la꞉fo꞉ko꞉lo꞉ ame kalu kugula꞉fo꞉ ko꞉lo꞉ alobanalifelo꞉ us a꞉namio꞉, 72,000 kalu o꞉leo꞉ngo꞉ dowo꞉. ne asuwa꞉foma꞉kiyo꞉ o꞉li iliga꞉fa꞉ib. Giyo꞉ a꞉la꞉bo꞉ mo꞉asulaya? 54Ko꞉sega niyo꞉ a꞉la꞉dimidai kibo꞉bowo꞉, Godeya꞉ bugo꞉ amilo꞉ to saefa꞉ o꞉leaumbo꞉ mo꞉ililimabe. Mo꞉wo꞉ Godeya꞉ to a꞉ma꞉yo꞉ kelego꞉ we ne amio꞉ mada fa꞉la꞉doma꞉ib a꞉la꞉sa꞉sa꞉lo꞉ da꞉lab,” Ya꞉su eyo꞉ a꞉la꞉sio꞉.
55 #
Luk 19.47, 21.37 A꞉la꞉ta꞉ga꞉ Ya꞉su eyo꞉ kalu kegeo꞉ i o꞉mo꞉wo꞉ a꞉la꞉sio꞉, “Giliyo꞉ helebesi o꞉lia꞉ ko꞉lo꞉do o꞉lia꞉yo꞉ dia꞉sa꞉ga꞉, ne ta꞉lia꞉ni mio꞉lo꞉b. Gililo꞉ a꞉la꞉dimido꞉ a꞉no꞉, afalo꞉ dian kalu ko꞉lo꞉ ta꞉lia꞉no꞉ yakilo꞉ gan o꞉leo꞉ngo꞉lo꞉ka꞉. Giliyo꞉ ne kalu we o꞉ngo꞉ka꞉ a꞉la꞉asulo꞉ kibo꞉bowo꞉, ho꞉leno꞉ tambowo꞉ ne Godeya꞉ malilo꞉ ayami tolo꞉ wida꞉len amio꞉, giliyo꞉ ne wangabiki mo꞉ta꞉liyo꞉? 56Ko꞉sega o꞉gdo꞉ fa꞉la꞉dowab wema꞉yo꞉, Godeya꞉ tolo꞉ dinali sa꞉lan kaluwa꞉lo꞉ to sa꞉sa꞉lifa꞉ a꞉no꞉ ko꞉lo꞉ ilili alitakigab.” Ya꞉su eyo꞉ a꞉la꞉sa꞉labiki, enedo꞉ tili wida꞉sen kalu iyo꞉ tambo e ta꞉ta꞉sa꞉ga꞉ dalale ane.
Yu misa꞉ kaluwa꞉ Ya꞉suwo꞉ mo꞉walilo꞉
Mak 14.53-65, Luk 22.54,55,63-71, Yo꞉n 18.13,14,19-21
57Elelo꞉ widan kalu iyo꞉lo꞉ Yu ko꞉go꞉do꞉ kaluwo꞉lo꞉, bobalo꞉ so꞉mea꞉sen misa꞉ kalu alan, Kaiafasa꞉ ene aya ya꞉sa꞉ga꞉ a꞉na kegenefo꞉len ko꞉lo꞉, Ya꞉sulo꞉ ta꞉li kalu iliyo꞉, Ya꞉suwo꞉ a a꞉na tililia꞉gane. 58Ya꞉suwo꞉ tililia꞉ ha꞉na꞉ga꞉ ha꞉nabikiyo꞉, Bidayo꞉ Ya꞉suwa꞉ fa꞉sa gulu dowa꞉liki ha꞉na꞉gane. Bidayo꞉ ha꞉na꞉sa꞉ga꞉, bobalo꞉ so꞉mea꞉sen misa꞉ kaluwa꞉ ayamilo꞉ tolo꞉ us a꞉na tina꞉sa꞉ga꞉yo꞉, Ya꞉su amilo꞉ dimidabo꞉ ko꞉lo꞉ ba꞉ba꞉no꞉ a꞉laki, e da꞉la꞉di kalu o꞉lia꞉ a꞉na sen.
59Bobalo꞉ so꞉mea꞉sen misa꞉ kalu i o꞉lia꞉ Yu amilo꞉ ganisolo kalu i a꞉no꞉lo꞉ tambo Ya꞉suwo꞉ sana soma꞉no꞉ a꞉la꞉liki, Ya꞉suwa꞉lo꞉ mogago꞉ dimido꞉ nowo꞉ kaluka꞉isaleyo꞉ madali sama꞉ki, iyo꞉ ho꞉ido꞉. 60-61#Yo꞉n 2.19-21Madali tolo꞉ sa꞉ma꞉no꞉ kaluka꞉isale modo꞉wo꞉ ilo꞉wa mio꞉ ko꞉sega, Ya꞉sulo꞉ sana soma꞉kilo꞉ mo꞉walilima꞉no꞉ to a꞉no꞉, imilig noma꞉yo꞉ mo꞉sio꞉. A꞉la꞉ta꞉ga꞉ tif amio꞉ kalu a꞉la꞉ nowo꞉ ya꞉ga꞉yo꞉, towo꞉ a꞉la꞉sio꞉, “Kalu wema꞉yo꞉ a꞉la꞉sio꞉, ‘Godeya꞉ ene malilo꞉ ayo꞉ niyo꞉ o꞉li bidila꞉sa꞉ga꞉, ho꞉len otalen a꞉namio꞉ a꞉ma꞉la꞉ dialifa꞉no꞉,’ a꞉la꞉sa꞉labe.” 62To a꞉no꞉ da꞉dakiyo꞉, bobalo꞉ so꞉mea꞉sen misa꞉ kaluwo꞉ kagafo꞉liki, Ya꞉sumo꞉wo꞉ a꞉la꞉dabu ba꞉ba꞉, “Ililo꞉ gemo꞉lo꞉ to sa꞉lab we, giyo꞉ a꞉ma꞉la꞉bo꞉ mo꞉sa꞉ma꞉no꞉lo꞉bo꞉?” 63#Ais 53.7, Madi 27.12Ko꞉sega Ya꞉su eyo꞉ a꞉ma꞉la꞉ towo꞉ mo꞉sio꞉. A꞉la꞉ta꞉ga꞉ bobalo꞉ so꞉mea꞉sen misa꞉ kalu eyo꞉ Ya꞉sumo꞉wo꞉ a꞉la꞉sio꞉, “Niyo꞉ Mela꞉no꞉lo꞉ A꞉lab Gode, ene wiya iliki so꞉lo꞉l ko꞉lo꞉, giyo꞉ nimo꞉wo꞉ kalaba fanda sama. Godeya꞉ enedo꞉ Da꞉feyo꞉ Kaluwo꞉ geya꞉le? A꞉la꞉ta꞉ga꞉ Godeya꞉ ene so꞉wa a꞉no꞉ geya꞉le?” 64#Song 110.1, Dan 7.13, Madi 24.30A꞉la꞉dabu ba꞉dabiki, Ya꞉suwa꞉ sa꞉laki, “Go꞉no꞉n gio꞉sa sa꞉lale. Ko꞉sega niyo꞉ gimo꞉wo꞉ a꞉la꞉so꞉lo꞉l. O꞉g a꞉la꞉ta꞉ga꞉lo꞉ aneyo꞉, gio꞉ Kalule Dowo꞉ e, Gode Halaido꞉lelo꞉ A꞉lab a꞉ma꞉ dagi ililiba sena ba꞉ba꞉ib. A꞉la꞉ta꞉ga꞉ gio꞉ e akin halona kola꞉ wa꞉la fa꞉la꞉dowaliki ba꞉ba꞉ib.”
65 #
Madi 9.3, Yo꞉n 10.33 Ya꞉suwa꞉yo꞉ a꞉la꞉sa꞉labiki da꞉da꞉sa꞉ga꞉, bobalo꞉ so꞉mea꞉sen misa꞉ kaluwa꞉yo꞉ e kulufa꞉yaki, ene so꞉g kafo꞉len a꞉no꞉ bidilaki, eyo꞉ towo꞉ a꞉la꞉sio꞉, “Kalu wema꞉yo꞉ Godeyo꞉ dio꞉ge sio꞉ ko꞉lo꞉, niliyo꞉ kalu nolbo꞉wo꞉ a꞉dabu keda꞉so꞉bo. Elo꞉ dio꞉ge sa꞉lab to a꞉no꞉ gio꞉ tambo dabu. 66#Wkp 24.16, Yo꞉n 19.7A꞉la꞉fo꞉ko꞉lo꞉ giliyo꞉ waga asulaya?” A꞉la꞉dabu ba꞉dabiki, iyo꞉ tambowa꞉yo꞉ a꞉la꞉sio꞉, “Kalu we soma꞉no꞉ dowo꞉ au soma꞉ib.” 67-68#Ais 50.6, 53.5A꞉la꞉ta꞉ga꞉ iliyo꞉ ene wo꞉lokan ami kodofela꞉sa꞉ga꞉ yamelaki, kalu nolba꞉yo꞉ ene babowa sa꞉ndaki a꞉la꞉sio꞉, “Ge Godeya꞉ Da꞉feyo꞉ kalu ko꞉lo꞉, nimo꞉wo꞉ dinali sama. Kalu gelo꞉ sa꞉ndab ko giyo꞉ ho꞉le ba꞉daki wiyo꞉ sama.”
Bidayo꞉ Ya꞉suwo꞉ gola ba꞉ba꞉
Mak 14.66-72, Luk 22.56-62, Yo꞉n 18.15-18,25-27
69Bidayo꞉ a baya o꞉sen amio꞉, nanog dian ka꞉isale nowo꞉ elo꞉wa ya꞉sa꞉ga꞉, emo꞉wo꞉ a꞉la꞉sio꞉, “Ga꞉lili kalu Ya꞉su o꞉lia꞉lo꞉ dowa꞉seno꞉ nowo꞉ ge.” 70Ko꞉sega Bida eyo꞉ kalu kegeo꞉ imo꞉wo꞉ a꞉la꞉sio꞉, “Gilo꞉ sa꞉lab ko ne babalab.” 71Bida eyo꞉ a꞉la꞉sa꞉la꞉sa꞉ga꞉, ilif tolo꞉ a꞉ma꞉ tog aniba ha꞉na꞉sa꞉ga꞉yo꞉, nanog dian ka꞉isale noma꞉yo꞉ Bidayo꞉ a꞉na ba꞉ba꞉ ko꞉lo꞉, eyo꞉ kalu kagafo꞉lab i o꞉mo꞉wo꞉ a꞉la꞉sio꞉, “Kalu we, e Nasala꞉t kalu Ya꞉su o꞉lia꞉ dowa꞉sen.” 72A꞉la꞉sa꞉labiki Bida eyo꞉ ene towo꞉ halale alitakiyo꞉ wo꞉lokana golaki a꞉la꞉sio꞉, “Mada hendele, ne kalu ko mada mo꞉asulo꞉,” a꞉la꞉sio꞉. 73Ha꞉lu o꞉a꞉la꞉ga꞉, kalu kagafo꞉len nol a꞉ma꞉yo꞉ Bidalo꞉wa ya꞉sa꞉ga꞉ a꞉la꞉sio꞉, “Dagan gilo꞉ sa꞉lab koma꞉yo꞉, ge hendele Ya꞉su o꞉lia꞉lo꞉ sia꞉seno꞉ nowo꞉ gelo꞉b.” 74Bida eyo꞉ wa꞉sa꞉le sa꞉la꞉sa꞉ga꞉, to we a꞉la꞉sio꞉, “Niyo꞉ do꞉lo꞉idalega, Gode eyo꞉ nemo꞉wo꞉ hida꞉yo꞉ nagalo꞉ mada dimia꞉ib. Kalu gilo꞉ sa꞉labko, ne mada mo꞉asulo꞉ka꞉!” Wigibo a꞉nakabiyo꞉, gogonowo꞉ a꞉na go꞉no꞉. 75#Madi 26.34Gogonowo꞉ ganalabiki, Bidayo꞉ Ya꞉suwa꞉lo꞉ to tamin amilo꞉ sio꞉ a꞉no꞉ a꞉na asulo꞉. To sio꞉ a꞉no꞉ we, “Gogonowo꞉ o꞉ganama꞉no꞉ o꞉lalikiyo꞉, giyo꞉ ne mo꞉asulo꞉ a꞉la꞉bo꞉ otalen sa꞉ma꞉ib.” Bida eyo꞉ a꞉no꞉ kele asulaki, e ha꞉la꞉ya handalota꞉ga꞉ ha꞉nakiyo꞉, mada ya꞉lo꞉.
اکنون انتخاب شده:
Madiyu 26: BCO
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 (Active), Wycliffe Bible Translators, Inc. All rights reserved.
