Mo꞉mo꞉do꞉ 18
18
Sa꞉la e so꞉wayo꞉ sa꞉la꞉lima꞉ki, dinali sio꞉wo꞉ we
1Disi ofo꞉ halaido꞉ ta꞉ndabiki, Ablaham e Mameleya꞉ ba꞉ ilo꞉ gelo꞉ anib a꞉namio꞉, ene helebeso꞉g a toga꞉meya sen amio꞉, Yaweyo꞉ elo꞉wa fa꞉la꞉dowo꞉. 2#Hibu 13.2Ablaham e ba꞉ba꞉ amio꞉, kalu otaleno꞉ e milif doba꞉da꞉ a꞉na kagafo꞉lena ba꞉ba꞉. Iyo꞉ ba꞉da꞉sa꞉ga꞉yo꞉, e ene ayamilo꞉ sen a꞉no꞉ ta꞉ta꞉ga꞉, ilo꞉wa nai ha꞉na꞉ga꞉yo꞉, hena gulalu misa꞉fu alilakiyo꞉ a꞉la꞉sio꞉, 3“Ni misa꞉ kalu, ge nemo꞉wo꞉ sagalalega, gi nanog dian kaluwo꞉ ne ko꞉lo꞉ tinia꞉so꞉bo. 4Ni asulo꞉wa꞉yo꞉, gio꞉ i ha꞉g wena saliki, kalu nowo꞉ ho꞉no꞉ wasulia꞉ga꞉, gili gibo꞉ to꞉go꞉dema꞉ki, gio꞉ ha꞉fo꞉la꞉su mesea. 5Ne gili nanogdo꞉ dian kalu. Gio꞉ nelo꞉wa mio꞉ ko꞉lo꞉, gio꞉ ha꞉fo꞉ saliki, ma꞉no꞉wo꞉ na꞉sa꞉ga꞉ halaido꞉wo꞉ dima꞉ki, niyo꞉ ma꞉nda꞉suwo꞉ gimo꞉ dia꞉ mia꞉no꞉. Gio꞉ a꞉no꞉ na꞉sa꞉ga꞉yo꞉, o꞉li ha꞉na꞉bi, niyo꞉ a꞉la꞉asulo꞉l.” Ablaham eyo꞉ a꞉la꞉sa꞉labiki, iliyo꞉ a꞉ma꞉la꞉ sa꞉laki, “A꞉, gilo꞉ sa꞉lab au dimidama” a꞉la꞉sio꞉. 6A꞉la꞉fo꞉ko꞉lo꞉ Ablaham e helebeso꞉g aya bo꞉bo꞉ge ha꞉na꞉sa꞉ga꞉, Selamo꞉ sa꞉laki, “Bo꞉bo꞉ge! Ge falawa nafale wo꞉fa꞉ imilig nowo꞉ dia꞉sa꞉ga꞉, wo꞉gela꞉sa꞉ga꞉yo꞉, ma꞉no꞉wo꞉ so꞉da꞉bi” a꞉la꞉sio꞉. 7A꞉la꞉ta꞉ga꞉ Ablaham e kaolo꞉ fofan hen a꞉na nai ha꞉na꞉sa꞉ga꞉, kao kalofo nafale imilise nowo꞉ dia꞉sa꞉ga꞉, ene nanog kalumo꞉ dimiabiki, eyo꞉ bo꞉bo꞉ge dimidalia꞉ga꞉ so꞉fa꞉. 8A꞉la꞉fo꞉ko꞉lo꞉ Ablaham eyo꞉ kao howo꞉lo꞉, bo ibo꞉lo꞉, ma꞉no꞉ nowo꞉lo꞉ dia꞉ga꞉, kalu i o꞉mo꞉ dimi. Iyo꞉ ma꞉no꞉ na꞉li sabiki, Ablaham e ili aniba, i ha꞉ga kagafo꞉len.
9A꞉la꞉ta꞉ga꞉ iliyo꞉ Ablahambo꞉ dabu ba꞉daki a꞉la꞉sio꞉, “Ga꞉ ga Selayo꞉, o꞉ba saba?” Ablaham eyo꞉ a꞉ma꞉la꞉ sa꞉laki, “E helebeso꞉g aya sab.” 10#Lom 9.9Kalu imilig noma꞉yo꞉ a꞉la꞉sio꞉, “Dona no honona ho꞉len wengalikiyo꞉, ne mada gelo꞉ amio꞉ a꞉mia꞉no꞉ ko꞉lo꞉, ga꞉ ga Sa꞉la eyo꞉ kalu so꞉wayo꞉ sa꞉la꞉lia꞉sa꞉ga꞉ elena doma꞉ib.” Eyo꞉ Ablaham o꞉lia꞉ a꞉la꞉sa꞉la꞉lab amio꞉, helebeso꞉g ayo꞉ e fa꞉sa elen ko꞉lo꞉, Sa꞉la e toga꞉meya kagafo꞉liki da꞉da꞉len. 11Ablaham o꞉lia꞉ Sa꞉la o꞉lia꞉yo꞉ donayo꞉ modo꞉ gulula꞉ ko꞉lo꞉ anaso꞉ dowo꞉. A꞉la꞉ta꞉ga꞉ Sa꞉la e so꞉wa sa꞉la꞉lia꞉no꞉ ho꞉leno꞉ edo꞉. 12#1Bid 3.6A꞉la꞉fo꞉ko꞉lo꞉ Sa꞉la e ene asulo꞉ amio꞉ o꞉ga꞉liki a꞉la꞉asulo꞉, “Kalu nilo꞉wo꞉lo꞉, nelo꞉ anaso꞉ dowab ko꞉lo꞉, ne wa꞉ka sagale alifa꞉nigaba꞉le?” 13A꞉la꞉ta꞉ga꞉ Yawe eyo꞉ Ablahambo꞉ dabu ba꞉daki, “Sa꞉la e o꞉ga꞉li sa꞉laki, ‘Ne anaso꞉ dowab amio꞉, so꞉wa sa꞉la꞉lia꞉no꞉wo꞉ mada aundo꞉ma’ a꞉la꞉do꞉ sa꞉lab a꞉no꞉ waga sa꞉laba꞉le? Ne halaido꞉lo꞉ma a꞉laki gaba꞉le? 14#Luk 1.37A꞉la꞉ba! Ne amio꞉ mo꞉dimidama꞉no꞉ kelego꞉ imilig nowo꞉ mada aundo꞉ma. Niyo꞉ kelego꞉wo꞉ tambo niyo꞉ o꞉li dimidama꞉no꞉. Dona no hononamio꞉, ho꞉len da꞉feyo꞉wo꞉ fa꞉la꞉dowaliki, ne gelo꞉ amio꞉ a꞉mia꞉no꞉ ko꞉lo꞉, Sa꞉la eyo꞉ kalu so꞉wayo꞉ sa꞉la꞉lia꞉sa꞉ga꞉ elena doma꞉ib,” a꞉la꞉sio꞉. 15Ko꞉sega Sa꞉la e tagi dowo꞉ ko꞉lo꞉, eyo꞉ do꞉lo꞉le sa꞉laki, “Ne mo꞉o꞉go꞉” a꞉la꞉sio꞉. Ko꞉sega Yawe e a꞉ma꞉la꞉ sa꞉laki, “A, hendele ge o꞉gale” a꞉la꞉sio꞉.
Gode eyo꞉ Sodom mogagila꞉ma꞉no꞉ asulo꞉ a꞉no꞉ Ablahambo꞉ wido꞉
16Kalu otalen a꞉no꞉ dasila꞉sa꞉ga꞉ ha꞉nabiki, Ablaham e i o꞉lia꞉ o꞉luma꞉la꞉lia꞉ga꞉ ha꞉nakiyo꞉, iyo꞉ Sodom amisa꞉no꞉ ololo bebeya꞉i ane. 17-18Iyo꞉ ha꞉nakiyo꞉, Yawe eyo꞉ a꞉la꞉sio꞉, “Nilo꞉ dimidama꞉no꞉wo꞉, Ablahambo꞉wo꞉ mo꞉wo꞉no꞉le dia꞉fa꞉no꞉. Mo꞉wo꞉ Ablaham eya a꞉la꞉ta꞉ga꞉yo꞉ kaluka꞉isaleyo꞉ modo꞉ fa꞉la꞉dowaki, so꞉lo꞉wo꞉ halaido꞉ doma꞉ib. A꞉la꞉ta꞉ga꞉ henfelo꞉ amilo꞉ so꞉lo꞉ sab a꞉no꞉ tambo eya a꞉la꞉ta꞉ga꞉yo꞉ nafale mesea꞉ki ta꞉fa꞉no꞉. 19Nilo꞉ e asulakilo꞉ da꞉fe alifa꞉ a꞉no꞉ mo꞉wo꞉ we. Eyo꞉ ene so꞉wa o꞉lia꞉ kaluka꞉isale e ayamilo꞉ sa꞉sen o꞉lia꞉mo꞉wo꞉, Yawe ene mano꞉ kudu hamana꞉ki, Ablaham eyo꞉ walama꞉ib ko꞉lo꞉, iyo꞉ Godeya꞉ siwa꞉l amilo꞉ man digalo꞉ a꞉no꞉lia꞉, kaluka꞉isale o꞉lia꞉lo꞉ nafa dimidan man a꞉no꞉lia꞉yo꞉, tambo kudu ha꞉na꞉mela꞉ib. Iliyo꞉ a꞉la꞉dimidalikiyo꞉, Yawe eyo꞉ Ablaham emo꞉lo꞉ dinali sio꞉ a꞉no꞉ tambo hendele o꞉li fa꞉la꞉doma꞉ki dimidama꞉ib.” 20A꞉la꞉ta꞉ga꞉ Yawe eyo꞉ to nowo꞉ wa꞉ka a꞉sio꞉, “Sodom o꞉lia꞉ Gomola kaluka꞉isaleya꞉lo꞉ man mogago꞉le ko꞉li ko꞉lilo꞉ dimida꞉lab a꞉no꞉ ilikiyo꞉, kaluka꞉isale nolo꞉ mo꞉beaki, ililo꞉ nemo꞉lo꞉ ho꞉le sa꞉la꞉sen a꞉no꞉ ne dabu. 21A꞉la꞉fo꞉ko꞉lo꞉ ne tina꞉sa꞉ga꞉, ililo꞉ man mogago꞉ dimida꞉lab a꞉no꞉ alobanama꞉no꞉ ko꞉lo꞉, nelo꞉ dabu aumbo꞉ hendele dimida꞉laba꞉le a꞉la꞉likiyo꞉, niyo꞉ ba꞉ba꞉no꞉.” Yawe eyo꞉ a꞉la꞉sio꞉.
22A꞉la꞉ta꞉ga꞉ kalu a꞉la꞉ nowo꞉ Sodom doba꞉da꞉ alobanaga꞉ta꞉ga꞉ ane. Ko꞉sega Yawe e Ablaham o꞉lia꞉ a꞉naka o꞉elen. 23Ablaham e Yawe elo꞉wa ha꞉na꞉ga꞉yo꞉, a꞉la꞉dabu ba꞉ba꞉, “Giyo꞉ mogago꞉ kalu a꞉no꞉ yasalakiyo꞉, digalo꞉ kaluwo꞉lo꞉ yasala꞉ma꞉no꞉wa꞉le? 24Digalo꞉ kaluka꞉isale do꞉la꞉fo꞉ bila꞉fo꞉wo꞉ amisa꞉n a꞉namio꞉ alabo꞉lalega, giyo꞉ tambo yasala꞉ma꞉no꞉wa꞉le? Giyo꞉ digalo꞉ kaluwo꞉ asulakiyo꞉, amisa꞉n a꞉no꞉ o꞉li mesea꞉ki ta꞉fa꞉no꞉wa꞉le? 25Digalo꞉ kalu o꞉lia꞉ mogago꞉ kalu o꞉lia꞉yo꞉ giyo꞉ ua yasala꞉ma꞉no꞉ a꞉la꞉bo꞉ dimida꞉so꞉boka꞉! Giyo꞉ ko꞉lo꞉ a꞉la꞉dimidalega, kalu nafa o꞉lia꞉ mogago꞉ a꞉no꞉lia꞉yo꞉ falasilo꞉wo꞉ ua imilo꞉ dimia꞉ib. Ko꞉sega giyo꞉ man a꞉la꞉bo꞉ mada mo꞉dimida꞉sen. Henfelo꞉ amilo꞉ man aloba꞉dano꞉ ge ko꞉lo꞉, giyo꞉ kaluwa꞉lo꞉ man dimidab a꞉na ilikiyo꞉, wa꞉lo꞉ enedo꞉leyo꞉ aloba꞉da꞉sa꞉ga꞉ dimia꞉bi.”
26Ablaham eyo꞉ a꞉la꞉sa꞉labiki, Yawe eyo꞉ a꞉ma꞉la꞉ sa꞉laki, “Digalo꞉ kalu do꞉la꞉fo꞉ bila꞉fo꞉wo꞉ Sodom amisa꞉n amio꞉ ba꞉dalega, niyo꞉ i a꞉no꞉ ko꞉lo꞉ asulakiyo꞉, kaluka꞉isaleyo꞉ tambo o꞉li mesea꞉ki ta꞉fa꞉no꞉.” 27A꞉la꞉ta꞉ga꞉ Ablaham eyo꞉ wa꞉ka a꞉la꞉sio꞉, “Ne ba o꞉ngo꞉malo꞉ngo꞉ kalu ko꞉sega, niyo꞉ Kalu Alanbo꞉wo꞉ towo꞉ sa꞉la꞉lo꞉l. 28Sodom amisa꞉n amio꞉, digalo꞉ kaluwo꞉ do꞉la꞉fo꞉ bila꞉fo꞉wo꞉ mo꞉dowaki, giyo꞉ do꞉la꞉fo꞉ fa꞉la꞉da꞉in a꞉la꞉ta꞉ga꞉ bila꞉fo꞉ a꞉no꞉ko꞉ elena ba꞉dalega, tambo yasala꞉ma꞉no꞉wa꞉le?”
A꞉la꞉dabu ba꞉dabiki, Yawe eyo꞉ a꞉ma꞉la꞉ a꞉la꞉sio꞉, “Do꞉la꞉fo꞉ fa꞉la꞉da꞉in a꞉la꞉ta꞉ga꞉ bila꞉fo꞉ko꞉ a꞉lalega, niyo꞉ mo꞉yasala꞉ma꞉no꞉.”
29A꞉la꞉ta꞉ga꞉ Ablaham eyo꞉ wa꞉ka dabu ba꞉dakiyo꞉, “Do꞉la꞉fo꞉ fa꞉la꞉da꞉in dowalega, wagama꞉no꞉wo꞉?”
“Do꞉la꞉fo꞉ fa꞉la꞉da꞉in a꞉no꞉ko꞉ dowalega, niyo꞉ mo꞉dimidama꞉no꞉.”
30A꞉la꞉ta꞉ga꞉ Ablaham eyo꞉ wa꞉ka sio꞉, “Niyo꞉ wa꞉ka sa꞉ma꞉nigo꞉l ko꞉lo꞉, Kalu Alan giyo꞉ nemo꞉wo꞉ gadia꞉so꞉bo. Digalo꞉ kaluwo꞉ do꞉la꞉fo꞉ otalen ba꞉dalega, o꞉b dimidama꞉no꞉wo꞉?”
Eyo꞉ a꞉ma꞉la꞉ sa꞉laki, “Do꞉la꞉fo꞉ otalen ba꞉dalega, niyo꞉ mo꞉dimidama꞉no꞉.”
31A꞉la꞉ta꞉ga꞉ Ablaham eyo꞉ a꞉la꞉sio꞉, “Kalu Alan gimo꞉wo꞉ niyo꞉ towo꞉ wa꞉ka a꞉sa꞉ma꞉nigo꞉l. Digalo꞉ kaluwo꞉ do꞉la꞉fo꞉ a꞉la꞉ ba꞉dalega, waima꞉no꞉wo꞉?”
A꞉la꞉dabu ba꞉dabiki, eyo꞉ a꞉ma꞉la꞉ sa꞉laki, “Kalu do꞉la꞉fo꞉ a꞉la꞉ ba꞉dalega, niyo꞉ mo꞉yasala꞉ma꞉no꞉.”
32A꞉la꞉ta꞉ga꞉ Ablaham eyo꞉ wa꞉ka a꞉sa꞉laki, “Kalu Alan, niyo꞉ to imilise nowo꞉ ka sa꞉ma꞉nigo꞉l ko꞉lo꞉ ge gadia꞉so꞉bo. Digalo꞉ kaluwo꞉ do꞉la꞉fo꞉ a꞉no꞉ko꞉ ba꞉dalega, o꞉b dimidama꞉no꞉wo꞉?”
Eyo꞉ a꞉ma꞉la꞉ sa꞉laki, “Digalo꞉ kaluwo꞉ do꞉la꞉fo꞉ eleno꞉lalega, niyo꞉ i asulakiyo꞉, tambowo꞉ mo꞉yasala꞉ma꞉no꞉.”
33Yaweyo꞉ e o꞉lia꞉lo꞉ tola꞉leno꞉ eletakiyo꞉ ane. A꞉la꞉ta꞉ga꞉ Ablaham elo꞉ a꞉ma꞉la꞉ ene aya ane.
اکنون انتخاب شده:
Mo꞉mo꞉do꞉ 18: BCO
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 (Active), Wycliffe Bible Translators, Inc. All rights reserved.