Daa 21
21
Izaaki ia
1Dii ɛfãaikɛ̀ Salaɛ lá a òwa, a kɛ̀ɛ̀ lá à a lɛgbɛ̃̀wa. 2Ɔ̃ à nɔsì, à nɛ'ì ń Ablahaũo gɔ̃ɛ ũ a zikũ guu gɔɔ pɔ Lua dìlɛɛwa.#Hɛb 11.11 3Ablahaũ tɔkpà nɛpiɛ Izaaki. 4À tɔ̃zɔ̃̀ɛ̀ a gɔɔ swaaɔ̃dezĩ lá Lua dìlɛɛ̀wa.#Daa 17.12; Zĩn 7.8 5À kà wɛ̃̀ basɔo a nɛpi igɔɔ. 6Ɔ̃ Sala mɛ̀: Lua yaalɔyã kɛ̀mɛɛ, mɛ́ gbɛ̃́ pɔ mà pii a yaalɔmanɔ. 7A ò lɔ: Wa we o Ablahaũɛ yãa má gɔ̃ nɛade ũe? Kási ma nɛgɔ̃ɛ ìaanɔ aà zikũ guu.
8Nɛpi gbãakũ̀, à kɛ̃̀ yɔ̃́wa, ɔ̃ Ablahaũ aà kɛ̃a yɔ̃́wa dikpɛkɛ̀. 9Sala è nɛ pɔ Egipi nɔɛ Hagaa ì ń Ablahaũo ìɔ Izaaki yaalɔɛ, 10ɔ̃ a ò Ablahaũɛ: Zɔpi ya ń a nɛo, asa zɔnɛ a e tubible ń ma nɛ Izaakioo.#Gal 4.29-30 11Yãpi Ablahaũ pɔ yà maamaa, asa aà nɛɛ, 12ɔ̃ Lua òɛ̀: Nsu to n pɔ ya n nɛ ń n zɔnɔɛpio yãmusuo. Yã pɔ Sala lɛ́ onɛ pii ma, asa Izaaki buiɔ ɔ̃ wali onɛ́ n buiɔ.#Lom 9.7; Hɛb 11.18 13Má tó zɔnɛpi buikɛ sɔ̃, asa n nɛɛ. 14Ɔ̃ Ablahaũ fɛ̀lɛ kɔɔkɔɔ, à blɛ sɛ̀ ń ituuo, a kpà Hagaawa. A dìɛ̀, ɔ̃ à aà nɛ kpàwà lɔ. À aà gbàɛ, ɔ̃ à gɛ̀ lɛ́ liaaliaa Bɛɛsɛba gbáau. 15Kɛ́ í làamá, à ɛwaasonapi tò lí gbau, 16ɔ̃ à gɛ̀ zɔ̃̀lɛ aɛ kazu lɛlɛa zã lɛu, asa à mɛ̀ á ye à a nɛ gaa eo. Kɛ́ à gɛ̀ zɔ̃̀lɛ kãaa màa, ɔ̃ à nà ɔɔlɔwa.
17Lua ɛwaasonapi ɔɔlɔ mà, ɔ̃ Lua Malaika lɛzù Hagaazi za musu à mɛ̀: Bɔmɛ n lei Hagaa? Nsu vĩakɛo, asa Lua ɛwaasonapi ɔɔlɔ mà gu pɔ a kuu. 18Fɛlɛ ǹ n nɛpi sɛ ǹ aà kũ a ɔwa, asa má tó aà gɔ̃ bui zɔ̃ɔ ũɛ. 19Lua nɔɛpi wɛ́ kɛ̃̀ɛ̀, ɔ̃ à lɔ̀ɔ è. À gɛ̀ à a itɔ̀ tuu pai, ɔ̃ à mɔ̀ a kpà a nɛpiwa, a mì.
20Lua ku ń ɛwaasonapio e à gɛ̀ zɔ̃ɔkũ̀. Ìɔ ku gbáau, ɔ̃ à gɔ̃̀ toena ũ. 21Gɔɔ pɔ a ku Palana gbáau ɔ̃ aà da Egipi busu nɔ sɛ̀ɛ̀.
Ablahaũ ń Abimɛlɛkio lɛdoũkɛa
22Gɔɔ bee Abimɛlɛki ń a zĩgɔ̃ɔ gbɛ̃zɔ̃ɔ Pikɔlio gɛ̀ Ablahaũ kĩi aa òɛ̀: Lua kunnɔ yã pɔ nlɛ kɛ guu pii. 23Lɛgbɛ̃mɛɛ la gɔ̃̀ɔ ǹ mɛ ń sì ń Luao, kɛ́ ńyɔ̃ bɔ ma kpɛo ge ma nɛɔ ge ma buiɔ. Lá ma gbɛ̃kɛkɛ̀nɛ, kɛmɛɛ màa sɔ̃ ń busu pɔ ń ku a guuo. 24Ɔ̃ Ablahaũ òɛ̀: Má lɛgbɛ̃nɛ. 25Ɔ̃ Ablahaũ lɔ̀ɔ pɔ Abimɛlɛki zĩkɛnaɔ sìwa yã sɛ̀lɛ a sìuɛ̀. 26Abimɛlɛki mɛ̀: Má gbɛ̃́ pɔ aa yã bee kɛ̀ɔ dɔ̃o, ni omɛɛ yãao, ma maàn gbã. 27Ɔ̃ Ablahaũ sãɔ ń zuɔ kũ̀kũ a kpà Abimɛlɛkiwa, ɔ̃ aa lɛdoũkɛ̀ ń kɔ̃o. 28Ɔ̃ Ablahaũ sãnunu bɔ̀ mɛn sopla, a kàlɛ adoa. 29Abimɛlɛki aà là à mɛ̀: Sã mɛn sopla pɔ n ń kalɛ ńdoapiɔ yã dɛ kpelewa ni? 30Ɔ̃ a wèwà à mɛ̀: Sã mɛn soplapiɔ si seela ũ kɛ́ mamɛ ma lɔ̀ɔpi yɔ̃̀. 31Ayãmɛto wà tɔkpà gupiɛ Bɛɛsɛba,#21.31 Bee mɛ̀ lɛgbɛ̃lɔɔ asa wekĩi ɔ̃ aa lɛgbɛ̃̀ukɔ̃ɛ. 32Màa ɔ̃ aa lɛdoũkɛ̀ Bɛɛsɛba, ɔ̃ Abimɛlɛki ń a zĩgɔ̃ɔ gbɛ̃zɔ̃ɔ Pikɔlio aa ɛ̀a tà Filitɛ̃ɔ busuu. 33Ablahaũ baa lí bà Bɛɛsɛba, ɔ̃ à Dii Lua Gɔɔpiide sìsi we. 34Ɔ̃ à gɔɔplakɛ̀ Filitɛ̃ɔ busupiu.
اکنون انتخاب شده:
Daa 21: Boo2024
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Boko Bible © SIM International, 2024.