METIU 20
20
Angur Arvgdo Ager Gerya:nckvdv:dc
1“Kapila:nc taycng among migom mo:pvdc okumru:tum akoncmpinnc sc:kobv rokompc bvk angur arvgdok ager gerncko makapc cmna gvpakka:ji. 2Ager gernckvdv:dokki longcdcm adoli: apirko bipc cmna lupomvnsuge:la, bv bulum bvk angurarvgdo:pc mclvgto. 3Odokkc ko nang ayirkopc idodo gvlenna gvnamc attar koko mo:di:do akke cmmumpc du:nckonckkcm ka:to; odokkc bulum bv luto, 4‘Nolusin ngok angurarvgpc gvkang, odokkc okodcmci bipcnammcnc ngo nolum biyc.’ Cdcmpila bulu gvkang. 5Ayir vyvngkolang anyiko idodo odokkc ayir aumkopc idodo bv cdcmv:pc lckoda ito. 6Odokkc ayir anggoko idodo bv gvlento odokkc akkem dagla du:dopc ka:to; odokkc bv bulum luto, ‘Kapila nolu longc lo:bu:scm cmmumpc dagla du:n?’ 7Bulu bvm luto, ‘Kapilanc sc:kosin ngolum ager germopc gogmang.’ Bv bulum luto, ‘Nolusin ngok angurba:riolo:pc gvkang.’
8“Odokkc yumc ayir a:namc, angur arvgdok ru:tumdc bvk ka:ya:moya:ncdcm luto, ‘Ager gerya:nckvdv:dcm goga:tok odokkc buluk gerrc murkong kvdv:dcm bitok, lcddarkodokkc biya:bomna gerangarpo:ncdo:pc.’ 9Odokkc cdvlo cdc ayir vyvng anggoko germonamkvdv:dc gva:tonc, appv:dc adoli: apir apirko pa:to. 10Cdcmpidodo gerangarpo:ncdc gva:dodo, bulu mc:tungai bulu bojcyangko pa:ycpc; ckvdaggom buluk appv:dc adoli: apir apirongko pa:to. 11Odokkc cdcm pangge:la okumdok ru:tumdcm aglv:la bvn-bvnaikang, scmpc lula, 12‘Cdc lcddarkcdc ayir akkongko gerka, odokkc no bulum ngolugvng kvddvkko pa:moto sc:kobulu longc lobu:dok jo:pcnam jo:to odokkc do:nycsin kangkcrcpto.’
13“Ckvdaggom bv bulukkolok akoncm lubito, ‘Ajona, ngo nolum oko imurcmsin imang; nolu adoli:k togcsumangalang? 14Okodc nokkcnc cdcm la:tok, odokkc gvkangkuk; Ngo lcddarkcscm nolum bikamdcmpc bipc cmna bilv:to. 15Okko ngokkc du:nc cdcm mcngkamdcmpci ipa:ma:lang? Cdcmanggom no ngo ammem ainc agerko ibinamdcm amikdvgdagnci?
16“Cdcmpila lcddarkcdc gvpongaryc, odokkc gvpongarncdc lcddaryc.”
Jisubv Bvk Sinam Agomdcm Lcumpc Lunam
(Mark 10.32-34; Lu:k 18.31-34)
17Odokkc Jisubv Jerusalempc gvdodcm Bv agom tadjvgla gvmvnnc tani: vyvngkolang anyidcm angupc gvyodboto, odokkc lambcdo Bv bulum luto,
18“Ka:tok, ngolu Jerusalempc gvdag; odokkc tani:kc Awodcm kumnam ager gergcbonc kvdv:dcm odokkc poyirnckvdv:dok alaglo tolvgyc, odokkc bulu Bvm mokepcnamc cmna aima:pc lulvgyc, 19Odokkc angu tani: opvnno moki: moatdopc lulvgyc odokkc somotangkokki dcmyc odokkc kuruslo mokeyc, odokkc Bvm lowum longcdo moturycku.”
Anc Akonclok Kumna:sola Lurcnam
(Mark 10.35-45)
20Odo Jebedi:kc awokvdv:dok ancdc Bvkkolo:pc gva:to, bvk awokvdvmdcm gvbola, odokkc Bvk kcra:lo lcbvng tuma:la bv kumna o:kaiko Bvkkolok koto.
21Odokkc Bv bvm tauto, “No okoko madu:n?” Bv Bvm lubito “Lulvgteipcn sc ngok awo anyiscm, nok lagbvgpc akonc odokkc lakkepc akonc teddopc, nok migom du:tcng mo:pvdo.”
22Cmpige:la Jisubv lubito, “No okkom kodu:song no kinmang. Oko tv:nancdo ngo tv:ycnc cdcm nolu tv:nala:pcyc?” 23Bvm bulu luto, “Nolu ngok tv:nancdokki tv:yc, ckvdaggom ngok lagbvkpc odokkc ngok lakkepc tedmonamdcm ngok luscgla:nammang ckvdaggom cdc sck lcgang ngok Abubv mosv:la lc:tagnc odokbulukkc.”
24Odokkc cdvlo angu vyv:dc cdcm tattonc, bulu cdc bvrokumsudcm aglv:la dungkinma:pc ikang. 25Ckvdaggom Jisubv bulum Bvkkolo:pc goga:to odokkc luto, “Nolu kindag Ami ope:kvdv:dok ru:tumdc buluk tayc:lo ru:tumpc idag, odokkc buluk bottcnc tani:kvdv:dc ilanggvlangcm bulum lcngkandag. 26Cdc noluk ara:lo ima:jc; ckvdaggom sc:kobvi noluk ara:lo bottcncpc iycnc bv noluk pagbopc ipa:ru:yc, 27Odokkc sc:kobvi gvpongarncpc iycnc bv noluk ager gerya:ncpc ipa:ru:yc; 28Cdcmyam tani:kc Awodci ila:sa:la bikosukapcmang ikasangkapc gvto, odokkc Bvk turnamcm bojcrungcm rclatnakupc cmna bikapc gvka.”
Jisubv Miglun Tani: Anyiko Ka:begmokunam
(Mark 10.46-52; Lu:k 18.35-43)
29Odokkc bulu Jeriko dokkc gvkunammc bojcrungko tani:yc yadla Bvkkolo:pc gva:to. 30Odokkc ka:toka, miglunc tani: anyikonc ali:lambc ru:yido tedtu:la dungai, cdvlo bulu tadbegtonc Jisubv:jc odok gvpatla gvdag cmna, jc:la gogto, “Ngolum aya:teipcn, Dawidkc Auwa!”
31Yadkumsunc tani:kvdv:dc bvnyim ge:tumto, bulum aso:pc du:toka cmna; ckvdaggom bulu bottaya:pc jc:to, “Ru:tuma ngolum aya:teika, Dawidkc Auwa!”
32Odokkc Jisubv du:tedto odokkc bulum gogto, scmpc lula, “Ngo noluk lcga:pc okkom iteika cmna mc:dang?”
33Bulu Bvm luto, “Ru:tuma, ngoluk amikkvdv:dcmsin darmoteikuka.”
34Odokkc Jisubv ayang-abola buluk amikkvdv:dcm riyitbito, odokkc oddung bulu ka:begamkangku odokkc Bvk lcdulo gvmvnamkangku.
اکنون انتخاب شده:
METIU 20: MISIBSI
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
