JO:N 5
5
Pa:ta:do Csa:mokunam
1Odok lcdudo Jiwudi:kvdv:dok dopun-dojar longcko dungai odokkc Jisubv Jerusalempc gvkang. 2Cdcmpinamc Jerusalemdo Me:r Soben Yabgodok anindo Hibriulo Betja:ta cmna lunam pa:tangko dungai, okodokkc tu:yap molennam okum songoko dungaji. 3Odo bojcrungko mosimola:ma:nc gvla:nc dungai, miglunc, lambc gvla:ma:nc, intungko sinnc, 4asidc budsa:ycpc cmna toya:la du:la. 5Odo tani:ako dungai sc:kobv dv:tak yingum kolang pi:nyikopc mola:ma:ncka:ji. 6Jisubv cdvlo ka:begtoji odokkc bv odo bojcrungko kcdla du:namc ika:bong cmna kintoji, bvm Bv luto, “No csa:moteikuka cmna mc:dagnci?”
7Mola:ma:nc tani:dc Bvm lubito, “Miganga ngokkc ngom pa:tangolo gvbonc tani:yc sc:kosin kamang cdvlo asidc budsa:ycji, odokkc cdvlo ngo gviycji akonc ngomyam koryi:po:dag.”
8Jisubv bvm luto, “Darobtoka nok asubdcm yedsa:tok, odokkc gvtok.” 9Odo vgcmpc cdc tani:dc csangamkangku, odokkc bvk amrong asubdcm la:sangge:la gvkangku.
10Cdcmpinamc cdc logcdc Ager germa:pc yodla du:nam longgai. Cmpige:la Jiwudi: kvdv:dc csa:mokunam tani:dcm luto, “Silo ager germa:pc yodla du:nanc longgc, no amrong asubdcm jo:namdc lujvg-lurodcmpc jo:murc.” 11Cmpige:la bv bulum lubito, “Ngom csa:mokunc tani:dc ngom luto, ‘Nok amrong asubdcm la:sala bomna gvkangkuka.’ ” 12Bulu Bvm tawuto, “Sc:ko tani:dcn nom luncdc, ‘Nok amrong asubdcm la:sa:la bomna gvkangkuka cmncdc?’” 13Cdcmpinamc cdc csa:mokunam tani:dc cdc Bv sc:ka:song kinmangai, kapila:nc Jisubv gvpakkangku, odo mo:takdo tani:yc yadkumsula:yam.
14Lcdudom, Jisubv bvm kumko okumdo rvgsutoku, odokkc bvm luto, “Ka:toka no aikangkunc! Lckoda pa:bcm iyokubong, okkosin cdcmyam aiya:ma:pc nokkc ima:dopc.” 15Odokkc tani:dc gvkangku odokkc Jiwudi:kvdv:dcm lubitoku jc cdc Jisubvai sc:ko bvm csa:motokuji. 16Odokkc cdda:na Jiwudi:kvdv:dc kapila Jisumc ipusire:ycm ikaji, kapila:nc Bv Ager germa:pc yodal du:do longcdom cdcm gerto. 17Ckvdaggom Jisubv bulum luto, “Ngok Abubv su:paksin gertvla dung, odokkc ngo ager gerla dung.” 18Cdcmpilangv:na Jiwudi: kvdv:dc Bvm mokepc cmna makanc, lcga:dc Bv ager germa:pc yodla du:namo:dcm tadma:pc imangai cmpige:la Ru:ncpvncmc Bvk avkc Abbo cmna gogdag, av avdcm Ru:ncpvnckc kvddvnc cmna lula.
Awodok Ager Gerla:nam
19Jisubv bulum luto, “Aroru:pc, aroru:pc, ngo nolum lubidung, Awodc Bvk avkc mcngkampc ila:mang, cdcmpige:la Bvk Abudc okodcm gerla du:ji cdcm kangge:la:pak; kapila:nc oko okodcmci Bv gerdagnc, Awodcm cdcmv:pc idag. 20Kapila:nc Abudc Awodcm aipc mc:dag, odokkc Bv oko okkom avdc idagnc lcngkandag, nolu mc:la mcngap-la:ma:dopc. 21Kapila:nc Abudc sinncm moturge:kula bulum turrnamcm bikunammcmpc, cdcmv:pc Awodc sc:komci mc:dagnc bvmmci turnamcm bidag. 22Abudc sc:komsin kcbangcm ba:mang, cmpige:la appvng kcbang ba:pcnammcm Awodcm togc:lvgtag, 23appvngcjen Awodcm mcnggcm mcnggcsudopc, bulu Abudcm mcnggcm mcngkamv:pc. Sc:kobv Awodcm mcnggcm mc:ma:ycnc Abudcm mcnggcm mc:mang sc:ko Bvm mclvgtu:ji. 24Aroru:pc, aroru:pc, ngo nolum lubidung, sc:kobv ngok gomugcm tadge:la Bvm mc:jvgdagnc sc:kobv ngom mclvgtagnc, turyarla turnamc dung; bv kcbang bangkolo gvangkumang, cmpige:la sikolokkc turnamlo:pc gvbatsutokubong.
25“Aroru:pc, aroru:pc, ngo nolum lubidung, ayirdc pvnga:du:bong, odokkc cdc su:pagvngbong, cdvlo sinckvdv:dc Ru:ncpvnckc Awodok gomugcm tadbegycnc, odokkc cdc sc:kobulu tadycnc turyc. 26Kapila:nc Abudokkc kapc avkc turnamc du:ji, cdcmv:pc Awodcmsin bvkkolo turnamc du:dopc Bv bito, 27Odokkc Bvm kcbangcm ba:la:dopc sottom bito, kapila:nc Bv tani:kc Awodc. 28Cdcm mc:la mcngapla:ma:pc iyoka; kapila:nc ayirdc pvnga:du:bong cdvlo agolok du:nc appv:dc gomugdcm tadyc odokkc gvlenamyc, 29sc:kobulu ainc agercm gertonc, turkunam turnamlo:pc turycku, odokkc sc:kobulu aima:nc agercm gertonc, kcba: ba:nam lcga:pc turkunam lo:pc turycku.
Jisumc Lukanbinam Kvdvng
30“Ngo avkc ilang-gvlangkokki okkomsin ila:mang; ngok tannamdcmpc, ngo kcbangcm ba:do; odokkc ngok kcba:dc arodag, kapila:nc ngok mcngkamcm ngo mamang cmpige:la Bvk mcngkamcm mado sc:ko ngom mclvgtu:ji.
31“Ngo avkc agomcm avyc lukansubimvlo, ngok lukansubinamdc aroma:yc; 32akoda dung sc:kobv ngok agomcm lukanbidagji, odokkc ngo kindag ngok agomcm Bv lukanbinamdc arro. 33Nolu Jo:nkolo:pc mclvgto, odokkc bv arodcm lukan lubito. 34Ngok lukan lubinamdc tani:lokkcmang; cmpige:la ngo scm ludung nolu turycpc cmna. 35Bv dorra du:nc unjvgnc saki:kai, odokkc nolu bvk pva:do asudowko mc:poko mc:lvgdagai. 36Cmpige:la oko lukan lubinamdc ngokkolo du:nc cdc Jo:nkcdcmyam bottaya:dag; kapila:nc oko agerdcm ngok Abubv ngom gertok cmna togc:lvgtagnc, sc ngok gernam agerkvdvngarsc, ngom lukancm lubidag jc Abubv ngom mclvgtag. 37Odokkc Abudc sc:ko ngom mclvgtagnc avdci ngom lukancm lubidag. Bvk gomugcm nolu cdvlosin tadkvmang, Bvk dumsimigmom nolu cdvlosin kangkvmang, 38Odokkc nolu Bvk agomcm cdvlosin noluk asinno du:mang, kapila:nc sc:kobv mclvgtagnc Bvm nolu mc:jvgmang. 39Nolu Ru:nckc agom jvggabdcm madag, kapila:nc nolu mc:dag jc odobulu nolukkc turyarla turnamdc dung cmna; odokkc cdcbuluna jc ngom lukan lubinckvdv:dc. 40Ckvdaggom nolu ngokkolo:pc gvangge:mang cmdag nolu turnamcm pa:pcnammcm.
41“Ngo tani:kvdv:dok aidag cmna lunamcm mamang. 42Cmpige:la ngo kindag jc noluk ara:lo Ru:ncpvnckc ayangc kamang. 43Ngok Abukc aminnok ngo gvdung, odokkc nolu ngom torvgsumang; sc:koiycdan avkc aminno gvmvlo, bvm nolu torvgsuycpc. 44Nolu kapc mc:jvgycn, sc:kobv akon akonnokkcm aidag cmnamcm mancdcm odokkc Ru:ncpvnckolokkc gvinc aidag cmnamdcm mama:ncdcm? 45Ngo noluk Abukc kcra:lo lugc gcbiyc cmna mcngkvyoka; cdc Mose:bva:mvn nolum lugc gcbincdc, sckkolo nolu mc:tinsudagaji. 46Nolu Mose:mc mc:jvgdagmvlo, nolu ngom mc:jvgya:pc, kapila:nc bv ngok gomugcm adka. 47Cmpige:la nolu bvk adnamdcm mc:jvgma:mvlo, kapc nolu ngok gomugkvdv:dcm mc:jvgycn?”
اکنون انتخاب شده:
JO:N 5: MISIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
