THILSIAM THU 43
43
Joseph Suapite Benjamin Tawh A Hungkitnau
1Tichun, zia gam ah chun kial chu a ke nasa ma ma a.
2Ahi’n, Aigupta gam ah bu a puak to uh kha a nêk zaw phat un, a pau chun a kiang un, “chia kit unla, bu neukhat bêk hang paw kit un,” a ti’n.
3Judah chun a kiang in, “Zia pa chun, ‘La nau neupen uh la hun pui lo uh chun ka mêl mu pua’n lau,’ a ti ahi;
4ka suapiu hi ka kiang ua la sawl ding chun, bu hun chawk piak ing ka tiu in;
5la hun sawl lo ding chun vang chia pua’ng kau: Zia pa chun ka kiang ua, ‘La nau uh la hun pui lo uh chun ka mêl mu pua’n lau,’ a ti ngal in,” ti’n a dawnhu a.
6Israel chun, “Bang ziak ah nau dang la nei uh nasan la hil ua, kei â ding ah phalo tak hun gen la hiu em?” a ti’n.
7Amau chun, “Zia pa chun, ‘La pau a dam nalai em? Suapi dang la nei awm?’ ti’n ka chanchin uh leh I Inkuan chanchin uh ei dot ziak ah, zia thu ei dot dungzui ah chu ka gen mai uh ahi: ‘La nau uh chu hun pui un,’ ti’n ah ti chu kua’n he khel khel ngal lo,” a tiu a.
8Chun, Judah chun a pa Israel kiang ah chun, “Nau chu ka kiang un hungsak mai in; tichun, kipan ing ka tiu in, chia mai ‘kau: kei uh tawh, nang tawh, I nausenteu hi thilo ah, I dam theina ding un.
9A chungchâng thu ah hin keima’n a mawpaw pek mai ka; keima ngei ama chung ah hin mawpua’n ei ngai inla: ama chu la kiang ka hun pui tung kît lo ah, la ma ka dinsak kît lo chun, a maw chu kumkhua’n paw mai ing ka.
10Khawdâng sawt lo hileng uh, tu’hin a niveinale hung tung kit hial ta ding ka hiu ah,” ti’n a dawnhu a.
11Ziaphatchun, a pau Israel chun a kiang un, “Chuti ahi ding leh, zia gual hin hiu in: La dip ua khan zia gam ah thilpha khenkhat: thingnâi damdawite, khuaizute, gimtuite, murrate, theihawngte leh vaimakhate neucha chiat in ziapa kiang ah chu kipak thu genna dingin puak piak unla.
12Chuleh, dangka le a le’ni keng un. La dip ua paisa um khale paw kit chiat unla; a la mu khial khâk pal uh le himaithei ahiziak in.
13La nau uh chule pui unla, zia pa kiang ah chun chia kit mai un;
14Benjamin tawh la suapiu khat hile a hun thâdok theina dingin, zia pa chu El Shaddai in ngilneina pia ta hen. Keima ka hileh chu ka chate ka chân leh ka chân himai ta hen,” a ti tai.
15Chutichun, amau in kipakman dingte chu chawi in, dangka le a le’ni kenbe in, Benjamin le a pui tau a. Aigupta gam lam in a chia kit tau a; Joseph ma-âng in a ding kit tau hi.
16Joseph in a kiang ua Benjamin um chu a mu phât in, a In enkoltu kiang in, “Ziate saw In sung ah pui lût inla, sa that in, nêk ding siam inla, sûn leh ka kiang ah an ne ding a hiu,” a ti’n.
17Joseph thupiak gual ah chun a bawl ta’n; amau chu Joseph In sung ah chun a pui lût a.
18Joseph In sung ah a pui lût phat un a lau ma mau ah; “I chia masak chung ua I dip ua dangka ei siam piak kît ziak ua khan ei hiti bawl uh hiding a hita hilam: I chung ua lemchâng hawl ah ei sawisa’n, eimau tawh I sabiltungteu hitawh suak ah ei man ding a hiu hilam,” a kitiu a.
19Joseph In enkoltu chu a vanai ua, kotkhak bul ah chun a vaho ua:
20“Aw he pu, ka hung masak chung ua khan bu chaw ding bep ah hung ka hiu a:
21Ahi’n, giabuk ka tun ua, ka dipteu chu ka hon ua leh en in, ka dangkau chu a dip in a jat ngai ma a la um chiat in: Tu’n ka dangkau chu ka hun paw kit uh ahi.
22Chuleh, bu chawkna dingin dangka dang le ka hun paw kit ui; ka dangkau chu ka dip ua kua’n a la koi ahi la ka hepuau in,” a tiu a.
23Ama chun, “Thamuang tak in um unla lau kiu in: Pathian, la pau Pathian chun la dip ua chu a go a hun piak la hiu chulam: La dangkau kha a kim in ka la mu nai,” a ti’n. Chun, Simeon chu a kiang un a hun puidaw piak tai.
24Amau chu Joseph In ah chun a pui lût ah, a keng silna ding uh tui le a pia’n; a sabiltungteu chu an a piak sung ah chun,
25kipakman a puakteu kha Joseph an ne’ a hung masang in a la siam tup diam un: zia’ chu an ne ding a hiu ti a he ta’ngal un.
26Joseph In ah a hung phat chun, a kipakman hun puakteu chu In sung ah a kiang in a chawi lut un, leitual si’n chibai a bûk chiat tau a.
27A chanchin uh a dong ah, “La pau a chanchin la gen uh têksepu chu a pha jel na em? Dam in a um nalai nam?” a ti’n.
28Amau chun, “Ka pau, la suak chu hing leh dam in a um nai,” a tiu a. Chun, a luu kûn in chibai a bûk kit ua.
29Ama chu a hung dakdok ah, a nau Benjamin, a nu chapa chu a mu’n, “Zia kha la nau neupen uh, a chanchin la gen uh kha a hem?” a ti’n. “Ka chapa, Pathian in hepi ta hen,” a ti nalai a.
30Chun, Joseph in a nau a mu phât ah chun a thasiat ma ma tâk ziakin, kapdok ding a hung kisa ta’n. A pindan ah lût in, zia tak ah chun a vakap tai.
31A mai a phiat ah, a hung pawtdok kit ah, a kisûm ham ham ah, “Ankuang siam un,” a ti’n.
32Ama â ding a kithuk in, amau inle amau â ding chiat a kithuk un, a kiang ua Aigupta mite chunle amau â ding chiat a kithuk un; Aigupta mite tawh Hebrai mite’n an nêk khawm chu Aigupta mite â ding ah ten um tak ahiziak in a ne’khawm ngai puau a.
33A upa pen ah kipat a chapang pen tiang in, a upat dungzui un Joseph âng in a kitiansak ah; a ki-entuau ah, mak a sa ma mau a.
34Joseph dawkân ah kipat chun an nêk dingte chu a hawm jak un; Benjamin chanvo chu a dang cheng â sâng in ale’ nga’n a tam zawi. Tichun, uain a dawn ua, ama tawh lim tak in a kipawl khawm tau hi.
اکنون انتخاب شده:
THILSIAM THU 43: VAIPBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.