THILSIAM THU 39
39
Joseph Tawh Potiphar Ji
1Ziaphatchun, Joseph chu Aigupta gam in a pui tau ah; Pharaoh nuai ah mivêng pawl lakah hotu, Aigupta mi Potiphar chun zia tak ah hun pui suk Ishmaelte khut ah kipat chun a la chaw ta’n.
2 #
Nas 7.9
Lalpa chu Joseph kiang in a um zing ah; ama chu mi lawting tak a hung hi’n: chun a pu Aigupta mi In ah chun a um tai.
3 Lalpa chu a kiang in a um zing ah; a thil hi taphot ah a lawtinsak hi ti a pu chunle a he tai.
4Tichun, Joseph in a pu hepina a chang ah, a na chu a sêm sek ah. Ama chunle a Inkuante chung ah hotu’n a siam ta’n. A nei zosia chu a khut in a koi tai.
5A In enkol hotu’n a siam ah, a nei zosia chung ah thunei ah a siam ni’ kipat chun, Joseph ziakin Lalpa’n Aigupta mi chu a maljawl ta’n: In lam leh lou lam in a nei zosia chu Lalpa’n a maljawl tai.
6Tichun, a nei zosia Joseph khut in a koitha ta’n; a kiang ah thil um him him chu a hetpi ta pua’n, ama an nêk ding bep tilo ngal chu hetphâk a nei ta puai.
Joseph chu mi pian pha tak leh mêlpha ma ma ahi.
7Zia nung sawt lo ah chun, a pu ji chun Joseph a hun dawicha ta’n: “Ei luppi in,” ti’n a jawl ta’n.
8Himaleh, ama chu a nuam lo hial ah, a pu ji kiang ah chun, “En in, ka pu’n zia In sung ah hin ka kiang ah bang bang a um em tile a he’pha ta pua’n, a nei zosia ka khut in a koi tai.
9Zia In ah hin kei sâng ah lian zaw kuama a um pua’n; a ji la hiziak in nangma bep lo ngal chu kei â ding ah phal lo a nei puai. Bang ziakin em zia tawhbang gitlona huaisia chu ka bawl ah, Pathian chung ah thil ka hi’khial mai ding?” ti’n a dawnhu a.
10Nisi’n in Joseph chu jawl maleh, ama luppi ding a hem, a kiang ah um ding a hem chule a nuam him him puai.
11Zia hun lai vêl ah chun, ni khat chu a na sêm ding ah In sung a valut phatin, In sung ah chun kuama dang le a um puau a;
12a pi chun, “Ei luppi in,” ti’n a puan in a la man ta’n. Ama’nle a puan chu a khut ah nusia in a taidok ta’n.
13Chuleh, a puan chu a khut ah nusia in a taidok theng tai ti a het phat in,
14a Inkuanpiteu chu a kodok ah, a kiang un, “En tiam un, ei hi’mualpho dingin Hebrai mi pakhat ka kiang un ka pawsal in a hun pui lût tâk hi! Ei hi’mualpho gua’n ka kiang in a hung lut ah, ngai tak in ka kiko jak ta ahi.
15Ka kiko git a het phat in, ka kiang ah a puansil nusia in a taidok tai,” a ti’n.
16Chuleh, a pu a hung tun masia a puan chu a kiang in a la koi zing a;
17a pawsal kiang in a chanchin zosia a gen ah, “Hebrai mi suak ah la hun pui khan, ei hi’mualpho ding gua’n ka kiang in a hung lut ah;
18ahi’n, ka la kiko jak phatin a puan nusia in a taidok hi,” a ti tai.
19Chun, Joseph pu chun a ji’n a kiang ah, “Zia la suakpa hin hiti gual ah hin ei bawl hi,” a ti thu chu a het in a lungna ma ma ta’n.
20Joseph chu a pu’n a pui ah, suangkul ah lal in mi a gawtte koikhawmna lam ah chun a khum ta’n; tichun, suangkul ah chun a um den tai.
21 #
Nas 7.9
Himaleh, Lalpa chu Joseph kiang in a um pek ah, a chung in a ngilnei ah; suangkul vêngpa hepina a donsak hi.
22Suangkul vengpa chun suangkul ngâk zosia chu Joseph khut in a vopsak sik sek ta’n. Thilbawl ding zosia chu Joseph khut in a koi tai.
23 Lalpa chu Joseph kiang in a um ah, a thil hi’ tapo chu Lalpa’n a lawtinsak ziakin, suangkul vêngpa chun a khut ah thil um tapo chu a en se se ta puai.
اکنون انتخاب شده:
THILSIAM THU 39: VAIPBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.