PAWTDAWNA THU 35
35
Sabbath Dante
1Mosi chun Israelte zosia a ko khawm ah, a kiang un: “Zia hi ahi Lalpa’n la bawl ding ua thu a hun piak chu:
2 #
Pdt 20.8-11; 23.12; 31.15; 34.21; Thp 23.3; Dan 5.12-14 Ni guk sung nasepna la mat diu a hia, a ni sagi ni ahileh vang nang uh â ding ah ni zek thiangtho, Lalpa â ding ah chawldamna Sabbath hi’n ah; kuale zia ni ah bang a hem khat bawl taphot chu tha ngal ding ahi.
3Sabbath ni chun la chênnau mun taphot ah mei la sêm him him lo ding uh ahi,” a tia.
Biakbûk Siamna Ding ah Kisakna
(Pdt 25.1-9)
4Mosi chun Israel kikhawm zosiate kiang ah chun: “Zia hi ahi Lalpa’n thu a hun piak chu:
5La lak ua kipat in Lalpa â ding ah thilpiak hun lakhawm chiat un; kuale Lalpa â ding ah piak thatnopna nei taphot in ziate hi hun pekhawm un: sana, dangka, sum-eng;
6pat dum, a sandup, a sandâng leh puan malngat tawh kêlcha multe tawh;
7belamchal vun kidia nipsa tawh savun pha tak ah kisiamte tawh, thinggi thing,
8sathau, thaumei tui â ding, kinu’ ding leh hâl namtui dingte,
9thiampu awmphaw leh a puanâk chual ah bel ding Onik suang leh suang mantam chi chuam chuamte le hun pekhawm un,” a tia.
10La lak ua mi khutthiam zosia chu hung khawm uh hen la, Lalpa’n bawl ding ah thu a piak zosiate chu bawl uh hen; a biakbûk,
11a puan In ding leh a khu dingte, a bâng ding, a bankhuam ding leh a kitunna dingte tawh;
12Thuthung thingkuang tawh a jawnna ding molte, ja’ngaina chutpha leh a puanjak dingte,
13dawkan leh a jawnna ding molte, a matchâk zosiate tawh, a chung ah um zing ding ah kikoi vaithum tawh;
14a salvâk ding thaumei leh a tunna leh a matchâk zosiate, a thaumei leh a tui ding ah sathaute tawh;
15gimtui hâlna mâichâm, a jawnna ding molte tawh, kinu’ chi sathau dingte, hâl namtui dingte leh a biakbûk kotkhak ah puanjak dingte tawh;
16hâlmang thilpiak mâichâm, a sum-eng lên tawh, a jawnna ding molte tawh, a matchâk zosia, tui kuangpi tawh a tunna pum in;
17biakbûk sung ah puanjak dingte, a bankhuamte leh a kitunna ding ah kikhuakte leh a huang sung kotkhak ah puanjak dingte tawh;
18biakbûk kildenna dingte, a huang sung ûmna kildenna dingte leh a kaimatna ding khauhualte:
19mun thiangtho ah nasepna kicheina ding mêlpha tak tak ah siamte, thiampute’n na a sep hun ua a âk ding uh, thiampu Aron sil leh chên thiangtho leh a chapate sil leh chên dingte tawh, a tii, a tia.
Biakbûk A Ding ah Thil piak Lakkhawmna
20Ziaphatchun, Israel mipi kikhawm zosia chu Mosi kiang ah kipat in a peljak tau a.
21Mi tin lak ah lungthim chaw’phul ah um leh lunggil tak ah phalna nei zosia a hung ua, biakbûk sakna ding ah matchâk ding, a poimaw taphot, sil leh chên thiangtho ah siam dingte tawh pum in Lalpa â dingin a hun lakhawm tau a.
22Chutichun, a numei, a pawsal kidang lo ah piak nopna lungthim nei zosiate chu a hung khawm ua; a chauchateu, a bilbateu, a min namnau khutsebite, khite, sana’ kicheina chitinte a hun pekhawm tau a; mi tin sana piak ding nei zosiate chun Lalpa â dingin a hun pechiat tau a.
23Mi tin pat dum, a sandup leh a sandâng nei leh puan malngat leh kêlmulte, belamchal vun kidianipte, savun pha nei zosiate chun a hun chawi khawm un.
24Mi tin dangka leh sum-eng piak ding nei taphot in Lalpa â dingin a hun piau ah; chuleh, thinggi thing matchâk chuam chuam â ding ah mat tâk nei taphot inle a hun lakhawm ua.
25Numei them thiam zosia’nle pat a khêk ua, zia a patkhêk uh, a dum, a sandup leh a sandângte leh puan malngatte chu a hun lakhawm un;
26numei khutthiam, a lungthim uh chaw’phul ah um zosiate chunle kêlmulte a khêk ua.
27Chun, thiampu awmphaw leh puanâk chual jemhoina dingin, vaihawmte chunle Onik suang leh suang mantam chi chuam chuamte a hun lau a;
28gimtuite leh thaumei â ding ah sathaute, kinu’ ding chi sathau leh hâl namtui dingte le a hun lakhawm un.
29Israelte zosia, a numei, a pawsal kidang lo ah Lalpa â ding ah amau lungtup dungzui chiat ah piak nopna nei zosia chun, Mosi’n thu a piak dungzui chiat in, Lalpa â ding ah kiphalna thilpiak a hun chawi khawm chiat tau a.
Bezalel leh Oholiab
(Pdt 31.1-11)
30Mosi chun Israelte kiang ah chun: “Ngai tiam un, Lalpa chun Judah nam ah mi Hur chapa Uri, zia mipa chapa Bezalel chu a teldok tai;
31zia mipa chu lemhiatnate, hetthiamnate, hetnate, bangkim bawldan thiamnate;
32thilbawl ding lem he tak ah suangtua ding dan thiamnate, sana leh dangka, sum-eng ah bawldan thiamnate;
33suang mantam ât ding dan chi chuam chuamte, thing cheimawi ding dante leh bangkim bawl ding dan ah khut thiamnate nei dingin, Pathian Thagau in a lua dim tai,” a tia.
34Chuleh, ama kithuapi ding Dan nam ah mi Ahisamak chapa Oholiab tawh, a sepkhawm theina ding ua a hiltheina dingin a chokphûl a.
35Ama chu nasep tincheng sêm ding ah khut thiamna, pat a dum, a sandup leh a sandângte siam dan leh puan malngat jem bawl leh ga dan leh, thilbawl ding dan zosia guanggal thiamnate nei dingin lungthim pilna’n a thuam tai.
اکنون انتخاب شده:
PAWTDAWNA THU 35: VAIPBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.