آیات محبوب کتاب مقدس از Isajos 43

به اشتراک گذاشتن

Ake, Me keráva neví butý, akaná joj sykadjola, ci tumé na kaména te džinén pal davá? Me keráva drom pe félda, réki (leniá) pe čhučí phuv.

Kóli tu javésa te piridžas pir paní, Me som túsa; ci pir réki (leniá) – jone tut na tasadiakirena; poddžasa ke jag – joj tut na shačkirla.

Ne tumé na priripirena pal proginé dyvesá, na duminéna pal dová, so sys ĥará.

Akaná adiáke rakiréla Raj Devél, Savó sozdyjá tut, Jakovo, i Savó dyjá džiibén túke, Izrailjo: “Na dar, pal-dová so Me vykindjom tut, khardjom tut tyré lavésa, tu san Miro.

Pal-dová so tu san drógo dre Miré jakhá, i jacián drieván kuč i Mánge tu jacián pir iló, to Me otdáva javire manušén pal túte i narody pal tyró di.

Pal-dová so Me som Raj Devél, tyró Devél, Svénto Izrailjoskiro, Zrakhibnari tyró; Me Jegípto, Jefiopija, Saveja (Šeba) otdyjom pal túte, sob (kaj) te vykinav tut.

Na dar, dykh, Me som túsa; vastokóstyr Me janáva tyró kherítko ródo, zapadostyr skedáva tut.

Me, Me Kokoró, otmekáva tyré gréhi vaš Péske Kokoreske, Me na priripirava gréhi tyré butýr.

A Miré manušá, savé dophenena, pal čačipén, – phenéla Raj Devél, – tumé i Miro pishári, konés Me vykedyjom, sob (kaj) tumé te džinén i te patián Mánge, so davá Me som; angledýr na sys nikoli javire Devlés i na javéla.

Me, Me som Raj Devél i nane javirés Zrakhibnaris apríč Mánde.

Angledýr saréstyr Me sómas adasavó, nikón na zrakhéla Miré vastéstyr; Me keráva, i kon davá otparuvela?

Feldytka murdalá (zvieri) pe félda Man vyšarena, šarena šakaly i čirikliá (strausy), pal-dová so Me pe čhučí phuv davá paní, Me keráva réki (leniá) pe šukí mal (stiep), sob (kaj) te p'jel Miro narodo, savó Me vykedyjom. Davá narodo Me sozdyjom vaš Péske; jov déla patýv Mánge.

Ke paš-rat (sieviero) phenáva: “Otdé!” – i ke paš-dyvés (jugo): “Na rikir, lýdža duralypnastyr Miré čhavorén i Miré čhajén phuvjákire jagorendyr (krajendyr); kažnones, kon kharélape Miré lavésa, konés Me sozdyjom vaš Miro baripén, konéske Me dyjom džiibén.”

Adiáke rakiréla Raj Devél, Savó otkerdia drom pe mórjo (derjáv), Savó otkerdia drom pir zoralé paniá. Savó vylydžijá gren i maribnýtka vurdená, xaladén i zor; saré pasine khetané, na uštyné, murdine, syr momolytka (svietil'niki), xasiné.

Me som Raj Devél, tumaró Svénto, Kodová, Kon sozdyjá Izrailjo, tumaró Králi.