آیات محبوب کتاب مقدس از Mātiú 24

به اشتراک گذاشتن

Pea ko e me‘a ‘i he ope ‘o e maumau lao, ‘e faka‘a‘au ‘o momoko ‘a e ‘ofa ‘a e tokolahi. Ka ko ia te ne kātaki ‘o a‘u ki he ngata‘anga, ko e toko taha ko ia te ne mo‘ui.

Pea ‘oua ke fanongonongo ki māmani kātoa ‘a e ongoongo lelei ko eni ‘o e pule‘anga, ke ai ha fakamatala ki he ngaahi kakai kotoa pē, pea toki hoko ‘a e ngata‘anga.

Pea ‘e faifai pea te mou fanongo ki ha ngaahi tau, mo ha ngaahi tala tau: tokanga ke ‘oua na‘a fakamanavasi‘i ai kimoutolu: he kuo pau ke hoko ia, kae kei tuai pē ‘a e ngata‘anga.

Koe‘uhi ‘e tu‘u ha kakai ki ha kakai, mo ha pule‘anga ki ha pule‘anga: pea ‘e ai ha ngaahi honge mo ha ngaahi mofuike ‘i he ngaahi potu kehekehe. Ka ko e ngaahi me‘a kotoa ko ia ko e kamata‘anga pē ‘o e langā.

‘E mole ‘a e langi mo māmani, ka ko ‘eku ngaahi lea ‘e ‘ikai ‘aupito mole.

Koe‘uhi ‘e ai ha tokolahi te nau ha‘u ‘i he hingoa ‘o‘oku, mo nau pehē, Ko au ko e Mīsaia; pea te nau taki hē ha tokolahi.

Ko e taimi ko ia te nau tukuange kimoutolu ki he fakamamahi, pea te nau tāmate‘i kimoutolu: pea te mou fehi‘anekina ‘e he ngaahi kakai kehekehe, ko e me‘a ‘i he hingoa ‘o‘oku. Pea ko e taimi ko ia ‘e tūkia ha tokolahi, pea te nau tau‘aki faka‘ilo kinautolu, mo fefehi‘anaki. Pea ‘e tokolahi ha kau palōfita loi ‘e tupu hake, pea te nau taki hē ha tokolahi.

Pea tali ‘e Sīsū ‘o ne pehē kiate kinautolu, Vakavakai, na‘a taki hē kimoutolu ‘e ha taha.

Ko ia, ke toka teuteu ‘a kimoutolu foki: he ko e hoko mai ‘a e Fanautama ‘a Tangata ‘e fai ‘i ha taimi ‘oku ‘ikai te mou ‘amanaki ai kiate ia.

Ko ia, ke mou le‘o; he ‘oku ‘ikai te mou ‘ilo pe ko e ‘aho fē ‘e hoko mai ai ‘a homou ‘Eiki.

Ka ko e me‘a ki he ‘aho ko ia mo hono houa, ‘oku ‘ikai ha taha ‘oku ‘ilo ki ai; ‘io, pe ko e kau ‘āngelo ‘i he langi; pea na‘a mo e ‘Alo ‘oku ‘ikai; ngata pē ‘i he Tamai toko taha.

Koe‘uhi ‘e tupu hake ha kau mīsaia loi, mo ha kau palōfita loi, pea ‘e ha‘u mo kinautolu ha ngaahi faka‘ilonga lahi mo e ngaahi me‘a fakaofo; ‘io, ka ne lava, na‘a mo e kakai fili ‘e taki hē ai.

Kae hangē ko e taimi ‘o Noa, ‘e pehē foki ‘a e hoko mai ‘a e Fanautama ‘a Tangata. He hangē na‘e nofo ‘a e kakai ‘i he kuonga ‘o e Lōmaki, ‘o nau kai mo inu, ‘o nau ma‘u uaifi mo ma‘u husepāniti, ‘o a‘u ki he ‘aho ko ia na‘e hū ai ‘a Noa ki he ‘a‘ake; pea na‘e ‘ikai te nau ‘alo‘iloa kae‘oua ke hoko mai ‘a e Lōmaki, ‘o ‘ave kinautolu fuli pē: ‘e pehē foki ‘a e hoko mai ‘a e Fanautama ‘a Tangata.