Blackfoot Blackfoot people are found in Canada and the USA: the Blackfoot Confederacy is in southern Alberta and consists of Siksika, Blood, and Pikani (North Peigan); the South Peigan occupy the Blackfeet Indian Reservation in Montana, USA. The language is called Siksiká which means Blackfoot. Parts of the Bible were first published in Blackfoot in 1890.
Gospel of John The Blackfoot Gospel of John called Annaahk John Manistsitsinikatahpi Jesus Manistsipaitapiihpiai was translated by Wycliffe Bible Translators and Blackfoot people and published by the Canadian Bible Society in 1979. A slight revision was made in 2025-2026 to both the text and audio.

Translated by Wycliffe Bible Translators. Reviewed by Blackfoot people with help from Wycliffe/SIL and the Canadian Bible Society. Published by the Canadian Bible Society, 1979, 2026.

Annaahk John Manistsitsinikatahpi Jesus Manistsipaitapiihpiai

Óóki. Ánnika póóhsapoohtsika Jesus sotámopamaahkiohsiwa omii ómahksikimi Galilee (máttanistoohpa Tiberius). Kii akáítapiiyi itohpóʼkiisapooyaawa omii otsítapoohpi Jesus. Náínoyiiyaawa Jesus opisatáístamatstohkssiistsi manístohkottotoahsayi áísttsiistomiksi. Ánnihkayii iihtohpóʼkiióoyaawa.
Jesus itsitápamisoo omii isspahkóyi. Ostóyi ki omiiksi ománikapiimiksi itáakáopiiyaawa.
Ánnihka ákattayakoʼtsstsiiwa omii ómahksiksistsikoi omííksi Jews otsítohkanaʼpssatoohpiaawa iihtsitóʼtsikamotsíípiahpiaawa Egypt isskóóhtsika.
Óóki. Omáa Jesus sotámssapiwa. Sotáminoyiiwa niitáʼpakaitapiiyi otsipóóhsapoohsaawa. Kii itanístsiiwa omíi Philip, “Mátsitsstsiihpa ááhkitohpommaaoʼsi mááhkitotoisapanistsoohpi ááhkohtsiisoahpiaawa amóóksi. Ákoohksikioʼpa?”
Áámohka Jesus kákohtaniiwa mááhkstskímatahsayi. Ostóyi ákaissksinima otáyaakanisttsiihpi. Óki Philip itanístsiiwayi, “Kii ákanistsoohtoohpa aáwahsini niʼtómahksikiipippiaawa iimakíʼnaksiisoahki manistsíʼtsitapiihpi.”
Óóki omáa Andrew ostóyi ánnikskayi Jesus ománikapiimiksi. Simon Peter ómohpapiʼihpáyi, itanístsiiwa omíi Jesus, “Óómayii saahkómaapiwa náíʼtsaawaawa niisitói kíítaani ki nátoʼkammi iʼnákomiiksi. Kii mátakohtsapanístsiiyisoayaawa amóóksi akáítapiiyiksi.”
Jesus itanístsiiwa ománikapiimiksi “Anistókaawa mááhkopissaawa.” Óóki ánnima ííkskaoʼtoyihkoi ki amííksi matápiiksi itáakáopiiyaawa. Omííksi nínaaiksi nisitóómahksikiipippitapiiyaawa. Aakííksi ki pookááíksi mátsitsinóksaawaiksi.
Óóki. Jesus áóʼtsim omiistsi kíítaanistsi. Iihtatsímoihkaawaistsi. Sotámohtániitsiisoyiiwa omííksi náópiiksi. Kii níʼtoyi máttohtanistsiisoyiiwaiksi omííksi mamííksi. Kii omííksi matápiiksi sotámokoyiiyaawa.
Óóki. Otáóhkanaisskaoʼkoyssaawa Jesus itanístsiiwa ománikapiimiksi, “Óóki. Stámsiikoʼtsika otohksóahsoaawaistsi. Pinohtsítohksisstakik.” Ki ánniayi áóʼmatapsiikoʼtakiiyaawa ksóahsini. Iihtohtóíʼtoomiaawa miistsíssksimatakssistsi itáísapihtaaoʼpistsi. Nátsikopotoi ómohtohtoiʼtoohpoaawaistsi okátaoatoohpoaawaistsi omííksi akáítapiiksi. Áámostsi iihtóʼtsstsiiyi anníístsiska nisitáápayinistsi.
Óóki. Omííksi matápiiksi otáíʼnissaawa Jesus otsipisátaistamatsstohkssini ki itáwaaniiyaawa “Ámaoʼk anááhka áwaatoyiʼpoyiiwahka áyoohkoawahka mááhkitoʼtoohsi annóo ksááhkommi.”
Óóki. Ánniai Jesus itssksinóyiiwaiksi otákssaaksskohtoinayáttsookaiksi ki ánnihkayi iihtsíʼtáyiistapáaatsiiwaiksi. Itápsspi iwóowa isspahkóístsi.
Óóki. Ki áóʼtakowa. Omííksi Jesus ománikapiimiksi sotámitapsainnisóoyaawa omiim ómahksikimiiyi. Sotámsapáakáopiiyaawa omiia ááhkiohsaʼtsisi. Kii itomátapitapaahkiohsiiyaawa omiim akáítapisskoyi Capernaum. Ákaisskiinattsi. Omáa Jesus mátomiitaoʼtóowaatsaiksi. Ákaomatapsopówa. Kii omii aohkííyi áómatapohpaiʼkimsskaawa.
Óóki. Ákaanistáípiaahkiohsiiyaawa ááhkáyokskaaʼsi kiáyaa ááhkaisáaaʼsi. Ki itomátapoowa annaahka Jesus iihtsáótatsaawaawahkaawa aohkííyi. Áítamaakitoʼtoowaiksi. Sotáminoyiiyaawayi. Iihtsskííʼtsaayaawa. Ki Jesus itanístsiiwaiksi, “Niisto ánnaoʼka. Pinikóʼpooka.” Óóki. Ííksstatsiiyaawa omíi Jesus mááhksapáakáopissi. Kii itsíkkamitoʼtooyaawa omiia issowóóhtsia otáítapoohpiaawai.
Óóki. Ánnia mattsiksístsikoyi kii omííkska akáítapiikska mii sákiitopámaʼpawaawahkaayaawa. Issksinímiaawa namíʼtokskaawa pokááhkioohsaʼtsi itáísstsiwa ánnii issksiksístsiko. Kii issksinóyiiyaawa Jesus otsáohpoksapáakáopiimahsayi ománikapiimiksi, ki otsítsskímmatahsaawáyi. Ománikapiimiiksi iihtohkóíkiiyaawa am i niʼtókskai ááhkiohsaʼtsi. Amííksi matápiiksi niitsiksímsstayaawa, “Tsááhtaa ááhkanistohkottopamóowahtaa Jesus.”
Ki ánnika óómistsayii mattááhkiohsaʼtsísaawa iihtóʼtóoyaawa omii akáítapisskoi Tiberias. Itóʼtssikaahkioohsiiyaawa amiiya omííksiska akáítapiikska otsítsoyihpiaawa napayííni. Itsóyiiyaawa omiistsi kíítaanistsi anniihka Jesus ómohtsitatsímoihkaahpihkaistsi.
Óóki. Omííksi akáítapiiksi issksinóyiiyaawa Jesus kii ománikapiimiksi otsawáttsakiitaʼpawaawahkaahsaiksi kii ánnihkayii oostóaawa iihtsápáakáopiiyaawa omíístsi iʼnakááhkiohsaʼtsistsi, itapááhkiohsiiyaawa Capernaum. Itotáʼpssamiiyaawa Jesus.
Óóki. Ki áʼohkonoyiiyaawayi. Ánnimai apámoohtsi omii ómahksikimi itohkóonoyiiyaawayi ki ááʼnistsiiyaawayi “Omáa áíssksinimaatstohki tsá anistsíi kitsítoʼtoohpa.”
Jesus itsipóʼtanistsiiwaiksi, “Óóki. Kitákanistohpoaawa niitsííyi. Áámohka pisátaistamatstohkssinihka kitákohkottohtoʼssksinookihpoaawa nitámihpi. Kii kimátotsistapiʼtsiʼpoaawa. Kimátohtaʼpssammokihpoaawa kitotsistapíʼtsissoaayi tánisttsiihpi. Kikákohtaʼpaissammokihpoaawa anníístsiska kómohtokoyihpoaawaistska kíítaanistska. Kómohtaiyikaʼkimaahpoaawa kááhkattohkóyissoaayi. Annííhka aáoahsinihka amohka kitáíksimsstatoohpoaayihka mátaksisamaisstsiiwaatsi. Ki itsstsííhpa ákáíssksitaisstsiʼpa. Itotóísapiwa ánni aáowahsi. Ákohtoʼtaissksipaitapiioʼpa. Ánnihkayi kitákohkottohtsiiyikaʼkimaahpoaawa. Níístoakaoʼka annaahka Matápiiwahka. Kitákohkottohkotohpoaawa amoohka ákohtoʼtaissksipaitapiioʼpihka. Ki nínna Áʼpistotookiwa kikáwaistamatsookoaawa nitáʼpaoʼtomoahsi.”
Sotámaniiyaawa omííksi matápiiksi, “Áʼpistotookiwa tsáa óísstaawa nááhkanistaʼpoʼtomoahsinnaani?”
Jesus itanístsiiwaiksi, “Kitáísstakkoaawa Áʼpistotookiwa kááhkomaiʼtookssoaayi niistóyi otóʼtsskoaayi.”
Ki omííksi matápiiksi itanííyaawa, “Óóki. Kitákohkottsipiʼkanisttsii nááhksinissinnaani kááhkohtoʼtomaiʼtoohsinnaani. Kitákohkottsipisátsskaʼsi. Ásaakanioʼpái amoohka náípisatsiisoahpiaawayihka kitsíístapaahsinnooniksi. Ítsoatoomiaawayi omiim otsítaʼpaisttotspiaawai. Omíístsi natóísínakssiistsi itssínaaiʼpa ‘Moses iihtsíísoyiiwaiksi napayíni iihtóʼtsainnistsiiwa isspóóhtsi.’”
Óóki. Áámohka otáaniihpoaawayihka ánnihkayi Jesus iihtanístsiiwaiksi “Kitákanistohpoaawa niitsííyi. Omáa Moses osto ánnayi mátsiisakatooma anniihka innííhkahtoohpihka napayíni. Omáa nínna ánnayi, ostóyi iyísakatomayi. Anniihka omáa Moses otsíísakssinihka mátamiiwatsiksi anniihka innííhkahtoʼpi napayíni. Niitapánaʼsiwa nínna otomátsskahtakssini ánnii kíítaani. Anniihka napayínihka, Áʼpistotookiwa otomátskahtakssinihka ánnihkayii anniihka iihtsínniihkahtoophihka isspóóhtsi. Ótapiʼssini iihtohkótawayi mááhkitaissksipaitapiiʼssi.”
Ki itanístsiiyaawa omíi Jesus, “Ki noohkáísksaohkokkinnaan áámohka kómohtaiʼpoyiihpihka naapayínihka.”
Jesus itanístsiiwaiksi “Niistóahkaoʼka amoohka napayínihka. Matápiiksi ákohtoʼtsiitaaksipaitapiiyaawa. Kanáóhpoʼkiisapooyiksi niistóyi ákomiiksistsawattsisttsoʼkiniiyaawa ki nítohkanaomaiʼtookiiksi mátakonoaiʼnakiwaiksa. Ki kikáwaanistohpoaawa kiistóaawa kimátakomaiʼtookihpoaawa, kííwa kitsinóókihpoaawayi. Nínna nitákohkokka tókskammiksi matápiiksi kii akohkanaomatapomaiʼtakiiyaawa. Ki omáa matápiiwa ikkamómatapomaiʼtakisi nimátaksstsimimmáwaatsiksi. Takaa nómohtoʼtoohpi isspóóhtsi nááhkanisttotsissii annaahka nitóʼtsskookahka Áʼpistotookiwahka otsitsííihtaanistsi. Nimátohtoʼtoo nááhkanisttotsissii niistówa nitáwattsitsiihtaanistsi. Ki ostóyi niitsitsííhtatsiiwa amííksi nítohkoyihpiksi matápiiksi mááhksaiʼtsstsissi nitáaʼtsaai. Ki nitákitohkanaissksipoáaáttsaayaawa aáoʼtsstsiisi sakóóyiksistsikoi. Ánnistskaoʼkiaawa otsitsííhtaanistsi nitóʼtsskooka Áʼpistotookiwa. Takaa niitsitsííhtaawa nínna Áʼpistotookiwa amííksiska táónookiiksi támssi anniska ohkóyi ikkamómaiʼtootsiinikiaawa ákitoʼtsimiaawa áíssksipaitapiiʼssini. Ki nitákohkanaissksipoáaáttsaayaawa aáoʼtsstsiisi sakóóyiksistsikoyi.”
Óóki. Amiiksi istóʼtotamaʼpssiiksi Jews iihtáísataiʼpoyiiyaawa omíi Jesus otáánissayi, “Niistóahkaoʼka omiihka napayínihka iihtóʼtsainniihkahtooʼpihka isspóóhtsi.” Áwaaniiyaawa, “Ostóyi ánnaoʼka annaahka Jesus, ohkóyi Joseph. Kiistónnoona issksinóayi ónni ki oksísstsi. Ákohkottsawaniiwa ‘Nómohtoʼtoo isspóóhtsi.’”
Jesus itanístsiiwaiksi “Pináttsataiʼpoyika. Kimátakohkottomaiʼtookihpoaawa ikkámsawanistaiksimstattsiinoainiki nínna kááhkomaiʼtakssoaayi. Ki omííksi táómaiʼtookiksi nitákssksipoáaáttsaayaawa aáoʼtsstsiisi sakóóyiksistsikoyi. Óómiksika isskóóhtsiksika áwaatoyiʼpoyiiksika, náíkayissíínapsskakiiyaawa Áʼpistotookiwa kitákohkanaissksinimáatsíyissoaayi. Ikkamáyisstsiyinoainiki, ikkámssksiniminoaainiki otssksinimáatstohkssini ki tákínaiʼtomatapomaiʼtookihpoaawa. Nimátawaaniihpa otsítsstsissi matápii okáínoahsi nínni. Niistówa nómohtoʼtoowa Áʼpistotookiwa. Niníʼtsitapii nitsinoáwa. Óóki. Kitákanistohpoaawa niitsííyi. Iihkanáómaiʼtakiiksi ákaiksistohkotayaawa amoohka áíssksipaitapiiʼssinihka. Nistóahkaoʼka amoohka napayínihk matápiiksi mááhkohtsipaitapiiʼssaawa. Kitsíístapaahsoaawaiksi omiim otsítsaakiitaʼpaisttotspiaawayi saoʼkíoohtsi itsííʼniiyaawa kííwa ómohtsoyihpiaawa otsipisatsíísakssoaayi. Aamohka nomohtaiʼpoyihpihka napiyínihka iihtóʼtsainnistsiiwa isspóóhtsi. Amííksi iihtsóyiiksi mátakónoaiʼniiwaiksa. Niistóahkaoʼka amoohka napayínihka manipáítapiʼssini ómohtoʼtsstsiihpihka. Iihtohkánaoyiiksi áksawonoaissiksipaitapiiyaawa. Ki áámohk nómohtaiʼpoyihpihka napayíínihka tanistápawaani noostómi. Nitákohtsiistapihkahtoohpa nostómi annóksi matápiiksi annóo ksááhkomma mááhkohtsipaitapiiʼssaawa.” Óóki. Ánnika omííksi istóʼtotamaʼpssiiksi Jews itomátapakohkootsiiyaawa. “Áámohka nínaawahka tsááhtaa ááhkayaakanistohkottsiisookiwahtaoʼtsi oostómi.”
Kii ánnihkayii Jesus iihtanístsiiwaiksi, “Kitakaokamoʼtanistohpoaawa. Niistówakaoʼka annaahka Matápiiwahka. Saohtsóyiinoaainiki noostómi, kii nitsáápani saohtssímiinoainiki kimátsiitaʼpipaitapiyihpoaawa. Iihkánohtaoyiiksi nostómi, iihtssímiiksi nitsáápani ákohtoʼtsimiaawa áísksipaitapiiʼssini. Kii aáoʼtsstsiisi sakóóyiiksistsikoyi nitákitssksipoáaáttsaayaawa. Nitsíímanistoohpa amoohka nitáwaanistoʼpihka nostómi aáwahsini kii nitsáápani anistápiwa ááhkohtaisimioʼsi. Omáa matápiiwa ikkámohtaoyisi noostómi ikkámohtaisimisi nitsáápani ákitohpipaitapiiwa niistóí ki nitákitohpipaitapii ostóyi. Annaahka Nínnahk Áʼpistotookiwahka nitóʼtsskookahka áíssksipaitapiiwa kii nómohtsiistapipaitapiiyi otáíssksipaitapiʼssini. Óóki. Niʼtói niitsiiwa iihkánohtáooyiiksi niistóyi. Ákohtsistapipaitapiiyaawa nitsipáítapiʼssini. Óóki anniihka nómohtaiʼpoyihpihka napayíínihka iihtóʼtsainniihkahtoʼpihka isspóóhtsi, mátsiʼtómanistapiiwa náípisatsiisoahpiaawa kitsíístapaahsowaahsoaawaiksi. Iiʼnííyaawa kííwa ómohtsoyihpiaawa. Ánnohka omííksi iihtsóyiiksi amoohka napayínihka nómohtaiʼpoyihpihka áksaónoaissiksipaitapiiyaawa.” Ánniayii áániiwa Jesus, anniihka otsítsipstssksinimaatstohkihpihka omííksi Jews otsítawaatsimoihkaahpoaayi omii akáitapisskoyi Capernaum.
Óóki. Otáíʼksistsisstsiwakatoohsaawa áámostska amííksi Jesus otáíssksinimaatsaaiksi iihpóʼkiiwóoyiiksi akáítapiiyi itanííksi “Ikókaʼpohtakoyi áámostska otaníssiistsi. Mátoohkohkottsisstsiwakatoʼpaistsi.” Omííksi Jesus otáíssksinimaatsaaiksi iihpáʼkiiwooyiksi iimáánistaohkaanistoomiaawa otáániihpi. Iimáánistaisataiʼpoyiiyaawa. Jesus sotámssksinima otáwaaniihpiaiksi kííwa otsawóóhtsiihpiaistsi. Ki ánnihkayii iihtanístsiiwaiksi, “Óóki. Kómohtsawaahsiʼtakihpoaawa kitáwaanistohpoaawaistsi. Ánnoohka kitákohtsitsiistapáaákkihpoaawa. Óóki, tsá kitákanistsiʼtakihpoaawa ikkamínookiinoainiki aiʼsskitápsspommáoyiniki omiima nómohtoʼtoohpi. Niistóakaoʼka annaahka Matápiiwahka. Natowóttaka ánnahkayii ákohkottohkokkiwa manipáítapiʼssini. Omáa kátaohkotawa manipáítapiʼssini opáítapiʼssini mátohpanioʼpaatsi. Natowóttaka iihtáyissitapiiwa nitsíʼpoahsistsi, áámostska kitáwaanistohpoaawaistska. Áámostska nitsíʼpoahsistska ánnistskayi iihtáóhkotsiiwa matápiiyi manipáítapiʼssini. Kii kiistóaawa itsstsííhpa nimátomaiʼtookaiksaawa.” Áámohka omáa Jesus iihtanííiwa otsítsikayissksinissi anniihka otsístsitsaomatapoohsi annííksi kátaʼyaomaiʼtakiiksi, kii máttssksinoyiiwa annííska otáksisimiomátskaokiska.
Kii Jesus máttanistsiiwa omííksi matápiiksi, “Ki ánnihkayii kámohtanistohpoaawa, ikkámsawanistaiksimsstattsootsiinoainiki annááhka nínnahka kimátakohkottomaiʼtookihpoaawa.”
Ki ánniayii omííksi otáíssksinimaatsaaiksi iihpóʼkiiooyiksi itakáítapiiyi iimatápssksiistapooyiiksi. Itsáwattomaiʼtakiiyaawa. Ki ánniayii Jesus áánistsiiwa omííksi nátsikopotsiiksi ománikapiimiksi, “Kii kiistóaawa kikátaoʼkattsiksimsstakkihpoaawa kááhkoohkáttsiistapáakkssoayi?” Otsítanikka amíi Simon Peter, “Nitsínaaimi. Mátsitsstsiihpa noohkítssimmi nááhkomaiʼtoannaani. Kiistówa kiníʼtsitapiiyi áísksipaitapiiʼssini iihtóʼtsstsiiwa kitánissini. Ki niistónnaana annoohka nikáómaiʼtakihpinnaan ki kítssksinoohpinnaan kiistówa ánniskaoʼkinai Áʼpistotookiwa anniska ómohtakohkoikiihpiska mááhksikamotíípiokssi.”
Jesus sotámanistsiiwaiksi. “Kítssksiniihpoaawa kítawattssiikoʼtoohpoaawa kanistsístsikopotsiitapiiyihpoaayi. Ki ináóʼkitsspiihtsiihpa kiistóaawa áwakkaamiiwa Makáʼpatoʼsiyi.” Óóki. Jesus niitapáwaaniiwa anniska Judas, Simon Iscariot ohkóyi. Ostóyi ánnahkaoʼka áksisimiomatskáiwa Jesusi. Ostóyi noohkáttsitsinssi omííksi náátsikopotsiiksi.

بشنويد John 6