Blackfoot Blackfoot people are found in Canada and the USA: the Blackfoot Confederacy is in southern Alberta and consists of Siksika, Blood, and Pikani (North Peigan); the South Peigan occupy the Blackfeet Indian Reservation in Montana, USA. The language is called Siksiká which means Blackfoot. Parts of the Bible were first published in Blackfoot in 1890.
Gospel of John The Blackfoot Gospel of John called Annaahk John Manistsitsinikatahpi Jesus Manistsipaitapiihpiai was translated by Wycliffe Bible Translators and Blackfoot people and published by the Canadian Bible Society in 1979. A slight revision was made in 2025-2026 to both the text and audio.

Translated by Wycliffe Bible Translators. Reviewed by Blackfoot people with help from Wycliffe/SIL and the Canadian Bible Society. Published by the Canadian Bible Society, 1979, 2026.

Annaahk John Manistsitsinikatahpi Jesus Manistsipaitapiihpiai

Óóki. Ki ánnika póóhsapoohtsika sotámoʼtsstsiiwa omii ómahksiksistsikoi. Omííksi Jews otómahksiksistsikomssoaawa. Ki ánniayii omáa Jesus itsitápoowa Jerusalem.
Kii omii Jerusalem itsstsííwa omiihkai atánakssini itáísapaohkiimioʼpi. Itóʼtsstsiiwa omii kitsími niitsínihkatoohpi íímahkihkinaohkitsim. Áámohka itáísapaohkiimioʼpi iihtanístsinihkatoomiaawayi Bethzatha. Itsstsííyi amóstsi nisitóyi oyíkihtaani iihtáístaahtaaoʼpi. Ki itsípstaisstsiiyi akáítapiiyi áísttsiistoomiksi; náápsstsiiyaawa, áíʼniikaayaawa, ki áíʼniistoomiaawa. [Áyoohkimiyaawa omiihka aohkííyi mááhkiʼnakawattsimsskaahsi. Áʼpistotookiwa otátoyitapiimi itáíkkamsokitápsainnisooyinai amiihka aohkííyihka. Mátainoawa. Kii itsipíʼkawattsikimsskimayi. Ki omáa íítomssowoowa aiksistáwakimsskaasi ánnayi ákitamiʼtsitaohtohkottotoawa otsísttsiistomssini.]
Ki ánnimayi áámo nínaawa ákaanistáisamisttsiyistomiwa niiyíppo nánisiikopotoisstoyii. Omíi Jesus osótaminooka otsítsisttohkaisstsissi. Osótamssksinookayi okáísamanistaissi. Otsítanikkayi, “Kikátaiʼsstááhpa kááhkohkoisokaʼpssii?” Omóa áísttsiyistomiwa itanííwa “Ki mátsitsstsiiʼpa nááhksspommoki nááhkitapssóyíipoʼtooki awáttsikimsskaasi aohkííyi. Táíssksaohkoikayisskitsimokoowa.” Omáa Jesus sotámanistsiiwayi, “Stámiipoaoot. Stámoʼtsita kisííʼkaani. Kii stámiipoomatapoot.”
Ki omáa nínaawa itsíkkamsokaʼpssiwa. Sotámoʼtsima osíʼkaani. Sotámiipoomatapoowa.
Óóki. Issikópiiksistsikowa annihka ksiistsikóyihka. Ki ánnihkayi omiiksi istóʼtotamaʼpssiiksi Jews iihtanístsiiyaawa omíiska iihkóttotoayiska, “Óóki. Issikópiiksistsikowa ánnohka. Akákihtsimaani iihtawáánioʼpa ákohkottsaitohpaatakioʼpa siʼkááni.” Kii itsipóʼtanistsiiwaiksi, “Annááhkai nítohkottotooka, nitáánikka, ‘Stámoʼtsita kisíʼkaani. Stámiipoomatapoot.’ ” Otsítanikkaiksi “Takáa kitáánikka.” Ki omáa iihkóttotoawa iináóʼksaissksinoyiiwa áánistahpiayi omíi Jesus. Akáítapiiyi itáʼpawaawahkaiksi omiim. Ki Jesus ákaitaisimiiyistapoowa.
Óóki. Ánnika Jesus itóʼtáattsiimiiwa omíi ótohkottotoai. Itoʼtáatsiimiiwayi ómahkitawaatsimoihkaaoʼpi. Ki itanístsiiwayi, “Óóki. Ánnoohka kikáísokaʼpssi. Ksiwáatoota kipahtsáʼpssistsi. Sayiksíwatoominikiaawa kitákohtoʼtsitsskokohkoyi.”
Óóki. Omáa nínawa itsíístapoowa. Iitóísopoatomoyiiwa Jesusi ánniskaoʼkini anniska ótohkottotookiska issikópiiksistsikoi. Itanístsiiwa omííksi istóʼtotamaʼpssiiksi Jews, “Annááhka nítohkottotooka áánistawa Jesus.” Ki ánnihkayii omííksi oʼtotámaʼpssiiksi iihtomátapoksistotoyiiyaawa Jesus takaa itawánisttotosim áámostska ánna ánistapaʼpiistska issikópiiksistsikosi.
Jesus itanístsiiwaiksi ómohtáohkottotsimaahpi ímakssikopiiksistsikosi. Itanííwa, “Nínna Áʼpistotookiwa, mátomaikakssikaʼpoʼtakiwaatsi kii niistówa ninóóhkattaʼpaoʼtaki.”
Ánnyayii áániiwa Jesusa. Kii ánnihkayii omííksi istóʼtotamaʼpssiiksi Jews iihtsíítaʼpayiikaʼkimaayaiksi mááhksiʼniyissaiksi. Áwaaniiyaawa omiiksi nínaaiksi, “Jesus áíssinnima omíístsi issikópiiksistsikookakihtsimaanistsi. Ki máttsitsspiaiʼtaniiwa otónnimmahsayi Áʼpistotookiiyi, ki ánniayii mííksistaniwa ostóyi otáíʼtoomanistssayi Áʼpistotookiiyi.” Ánniayii iihtokímmiiyaawa omiiksi istóʼtotamaʼpssiksi Jews anniiska Jesusiska.
Ki ánnihkayii Jesus iihtanístsiiwaiksi anniihka ómohtaniihpihka “Nínna mátáónoaiksistaʼpoʼtaki ki ánnihkayii ninóóhkattohtaʼpaoʼtaki ímakssikopiiksistsikosi.” Áánistsiiwaiksi, “Nitohkoyimíyissi Áʼpistotookiwa nómohtanistaʼpaissi ostóyi manistáʼpaisspi. Nimátawawattanisttotsiiʼpaatsi niistówa. Ostóyi táwaistamáatsooka manistáʼpaisspi niʼtóí nááhkoohkattanistaʼpaissi. Ki nitsítawanisttotsiiʼpi nanistáwaistamattsíyihpi. Nínna nitsíkohtakomimmoka nitohkoyímmíyissi ki ánnihkayii nitáwaistamáttsooka annohka ostóí manistáʼpaisspi, niʼtoi nááhkoohkattanistaʼpaissi. Ki ninóóhkattaistamáatsooka nááhkanisttotsiihpa anniihka nitsipisátaistamatstohkatoohpihka. Ki nitsítsstakka nááhkoʼtsitssksipisatanisttsissi ki ánniayii kitákanistsskaiʼtakiáttsookoaawa.
Nátoʼkai nitáʼpsskonataʼpistsi nitsítsstáyihpistsi nááhkanisttotsissi. Nitákanikka nááhkanipaitapiáttsaahsi matápiiwa, ki nitákanikka nááhkokakihtsimatahsi matápiiwa.
Ṉinna, ostóyi áíssksipoáaáttsiiwa ákaiʼniiksi, ki ákattsskohkotsiiwaiksi niipáítapiʼssini. Kii niistówa, tákoohkattomatskahtaki manipáítapiʼssini. Nítsstatawa tákohkotawa. Takaa nitónnimmawa Áʼpistotookiwa, kii ánnihkayii nómohtanistaʼpaissi ostóyi manistáʼpaisspi.
Óóki. Ki nítohkokka nááhkokakihtsimatahsi matápiiwa. Ostóyi mátakokakihtsimatsiiwaatsi matápiiksi. Niisto ánnahkayii tákokakihtsimaa.
Ostóyi nítohkokka nááhkomatskahtoohsi manipáítapiʼssini ki nááhkokakihtsimatahsi matápiiwa, kiistóaawa kááhkohtainaaimmokihpoaawa. Nínna kitáwaanikkoaawa kááhkainaimmokssoaayi oostóyi ánni kanistáínaaimmahpoaawayi. Takaa nítohkoyimmoka. Ikkámsawáínaimmokiinoainiki niʼtóyi ákanistsiwa kááhksawainaimmoawaawa annaahka nínnahka, takaa ostóí nitsítapipoʼtooka annóo.
Kitáyoohtsiʼpoaawa kitáwanistohpoaawa. Ki ánnihkayii kitákohkottomaiʼtoawaawa annaahka nitsítapipoʼtookahka ánnom. Kii ikkamómaiʼtoainoainiki ki tákohkokkoaawa áíssksipaitapiʼssini. Ikkamáómaiʼtakiinoainiki kimátakohtokakihtsimattspoaawa kitokáʼpanisttsissoaawaistsi. Kitáksskomatapáaatoʼpoaawa anniihka manipáítapiʼssinihka. Kimátakónoaiʼtaʼpiʼnihpoaawa. Kitákanistohpoaawa niitsííyi. Ákanistsiwa íssoohtsika ki ákaomatapanistsiwa matápiiksi amokska nitáyisstsiwokikska ki ánnikskai ákoʼtsimiaawa anniihka manipáítapiʼssinihka. Ki mííksi matápiiksi kátaʼyayisstsiiksi mátakoʼtsímaiksaa áámohka manipáítapiʼssinihka. Ííkanistssiiyaawa ánni ákaiʼniiyaawa. Ikkamáyisstsiiyisaawa ákoʼtsimiaawa anniihka manipáítapiʼssinihka. Takaa niipáítapiiʼssini iihtsíístapitsstsiihpa nínna Áʼpistotookiwa. Ki niʼtóyi niistóyi ohkóyi. Nítohkokka mááhkohtsitsiistapitsstsissi niistóyi niipáítapiiʼssini. Ki niistóyi niníʼtaohkokka nááhkokakihtsimatahsi matápiiwa. Takaa niistóakaoʼka annaahka Matápiiwahka íkayissiinapanistawahka otákoʼtoohsi. Kii pinohtsípisatsiʼtakik áámohka nitáwaaniihpihka. Íssoohtsika iʼnííksi itoyáaksstsaaiksi nitákohkanayoohtookiaawa nitaiʼpoyissi. Ki ákitssksipoáooyaawa. Omííksi iikámoʼtsipaitapiiksi ákohtsitssksipoáaáttsaayaawa mááhkiipaitapiiʼssaawa, kii omííksi saókamoʼtsipaitapiiksi ákohtsitssksipoáaáttsaayaawa ááhkokakihtsimatahsaawa. Niistówa mátsitsstsiihpa nitákohkottawattanisttsiihpi; nanistóóhtoahpi Áʼpistotookiwa ki ánniayii tákanistokakihtsimaa. Nimátaʼpaisskiihpa nááhkanisttotsissii nitáwattsitsiihtaanistsi. Otsitsííhtaanistsi annaahka nitóʼtsskookahka, ánnistskayii nitáwanisttotsiihpi. Ánnihkayii kitákohtoʼtssksiniihpoaawa nitáókamoʼtokakihtsimaahsi.
Óóki. Niistówa nanistsíʼtsitapiiyihpi ikkamáwattsiʼpoatomoohsiiniki kimátakstsinaoʼmaiʼtookihpoaawa. Ki ináóʼkitsstsiihpa istsíka nitáókamoʼtáíʼpoatomooka. Kii nítssksiniihpa oostóyi i ihtáómaniiʼpoyiiwa niistóyi. Nimátohtaiʼpoyiihpa omáa John. Kiistóaawa kitsítapssksksimoʼtaahpoaawa John, ki íímanistoma manístohtaiʼpoyihpi niistói. Kii ki niistówa nimátakstsinaiʼtotosttohpa matápiiksi nitáíʼpoatomookiksi. Kitsííksstatohpoaawa kááhksikamotsíípiotssoayi. Ánnihkayii nómohtsitotostto John. Ostóyi annaahka Johna otsíʼpoahsini ánni anáʼkimaʼtsisi. Iihpakóyittsi, kii áanaʼkakiwa. Kiistóaawa kitsístsitsaoʼksistsisstsiiwawaawa. Nipíʼkanisttsissiistsi annohka kitákohkottohtoʼtssksiniihpoaawa nitsipóóhsapsskoyissi Áʼpistotookiwa. John kinóóhkattanikkoaawa nitsipóóhsapsskoyissi Áʼpistotookiyi. Ki amóstska nipíʼkanisttsissiistska iʼtsítsskstsiimatoomiaawa John otánissiistsi. Ki annaahka nínnahka nitóʼtsskookahka, íímanistooma nanistsíʼpoatomóyihpi. Kiistóaawa kimátónoayoohtoawaawa. Kimátsinoawaawa manistsínaʼpi. Kimátohtaikiihpoaawa Áʼpistotookiwa otáániihpi. Ki ánnihkayi kómohtsawaakomaiʼtookihpoaawa. Niistóakaoʼka anniska otóʼtsskoayiska.
Kíniitaʼpiyikokakiópaatoohpoaawa omiistsi natóísínaakssiistsi. Kanistsíksimsstaahpoaawa kitákohtohkooʼtsiihpoaawa áíssksipaitapiiʼssini. Amíístsi natóisínaakssistsi iihtáókamoʼtsiʼpoyiiyaa niistóyi. Ki kimíssksawaisstaahpoaawa kááhkomaiʼtookssoaawayi kááhkohtohkotohsoayi amoohka manipáítapiiʼssinihka, amoohkkitáyiikaʼkimatoohpoayihka.
Áámohka nimáátohtanistoohpa kááhkohtsitsspimmokssoaayi. Nómohtanistoʼpa kitsayikakakomímmahsoaayi Áʼpistotookiwa. Niistówa nómohtoʼtoowa nááhkitaʼpoʼtomoahsii Nínna Áʼpistotookiwa. Kii kítsstsimimmokihpoaawa. Ikkamítsstsiihki kayísstaʼpitawaanii Áʼpistotooki otsipóóhsapsskoyissi kitákitsiksimatomaiʼtoawaawa.
Kikááksstaahpoaawa kááhksokimmíyissoaayi matápiiwa. Ki ánnihkayi kómohtsaohkottomaiʼtakihpoaawa. Kitákohkottaʼpaisskiihpoaawa kááhksokimmíyissoaayi annaahka Áʼpistotookiwahka kákiʼtsitsstsiiwahka.
Niistówa nimátakanistawa nínna kááhkohtokakihtsimáyissoaayi kitsawáomaiʼtakssoaayi. Moses ánnahkai áakanistsiiwayi. Kiistóaawa kááhkanistaiksimsstaahpoaawa Moses mááhkanistahsi Áʼpistotookiiyi kitókamoʼtsipaitapiʼsoaayi annohka komohtáísapoohsoaayi otokákihtsimaani. Saa. Mátanistsiiwa. Iihtáíʼpoyiiwa kanístssaommitsitapiʼsspoaawayi komohtsawáómaiʼtookssoaayi. Kimííksistsawaomaiʼtoawaawa. Takaa ánnihkayii iihtsitsíkayissitsinssinaimi natóísínaakiaʼtsiistsi nitákoʼtoohsi. Ánnihkayii kómohtanistohpoaawa ikkamómaiʼtoainoainiki ki ánniayii kitákoohkattomaiʼtookihpoaawa. Kii kimátsiitaʼpomaiʼtsiihpoaawa osínakssiistsi. Ki ánnohkayii kitákstamoohkattsaomaiʼtookihpoaawa nitáwaaniihpi.” Ánniayi áániiwa Jesus.

بشنويد John 5