ROM 16
16
Pol Penang Atum Aphan Kardom Kepi
1Neli nanglitum aphan pachinilo, ilitum angjir, Phobe ke inut mesen abangpilo. Alangli ke Senkria arongsopi kedo amondoli mate kroi-asong adikonpilo. 2Arnam amonit atum keklem nangji asonthot-le nang-litum Hemphu amen pen alangliphan chaknon, lapen alangli nanglitum pen akerap kenangji ason an nanglitum alangliphan rapdunnon; pima alangli methangta ake-ongpi amonit atum aphan rapdunlo lapen neliphanta nerapdunlo.
3Neli pen Khristo akam keklem rap rap atum, Prisilla lapen Akkuila aphan neli kardom pi iktha.#Akam 18.2 4Alanglitum neliphan ajok kethi aphan anta phereredet-lo. Neli alanglitum aphan chorolo, lapen neli anchot kali, Jihudi kalidet atum amondoli mate kroi-asong anta alanglitum aphan chorolo. 5Hala amethang ahem along kechingrumbom amondoli mate kroi-asong aphanta neli kardom pi iktha. Neli kechinghon abang, Epanetas aphanta neli kardom pi-iktha. Asia adet Khristo aphan kekroicheng abang alangli helo. 6Nanglitum aphan jasemet nangkechepadukpi abang, Meri aphanta neli kardom pi-iktha. 7Neli sonthak thak a-Jihudi atum, Andronikas lapen Junias aphanta neli kardom pi-iktha. Alanglitumke neli pen phatek jang rap rap-lo. Alanglitumke Khristo aketoitang atumlo, lapen alanglitum aphan kadokave atum chinipamelo. Neli Khristo aphan kekroikre ako penta halatum ke Khristian planget-lo.
8Neli kechinghon a-Khristian, Ampliatas aphanta neli kardom pi-iktha. 9Neli pen Khristo akam keklem rap rap abang, Urbanas lapen neli kechinghon ajirpo, Stekhis aphanta neli kardom pi-iktha. 10Apellas aphanta neli kardom pi-iktha. Alangli ke Khristo aphan kekroi thirklong abang-lo pusi monit atum puhurlo. Aristobulas ahem ehum amonit atum aphanta neli kardom pi-iktha. 11Herodian aphanta neli kardom pi-iktha; alanglita neli sonthak thak a-Jihudilo, lapen Narkisas ahem amonit atum angbong pen Khristian keplangtang atum aphanta neli kardom pi-iktha.
12Hemphu akam jasemet keklem kechepaduk atum, Triphana lapen Traiphas aphanta neli kardom pi-iktha, lapen Hemphu aphan jasemet kam keklem kechepadukpi abang neli kechinghon a-Parsis aphanta neli kardom pi-iktha. 13Hemphu akam keklem anong kethedung abang, Rufus aphanta neli kardom pi-iktha, lapen alangli pei aphanta neli kardom pi-iktha. Alangli neliphan amethang asopo asonthotsi chemathalo.#Mar 15.21 14Asinkritas, Phlegon, Harmes, Patrobas, Harmas, lapen halatum along kedo Khristian akorte atum an aphanta neli kardom pi-iktha. 15Philologas lapen Julia, Nereus lapen alangli ingjirpi, Olimpas lapen halatum along kedo Arnam amonit an aphanta neli kardom pi-iktha.
16Kangthir akar-u pen nanglitum kardom chepiseroinon. Khristo amondoli mate kroi-asong atum an nanglitum aphan kardom nangpi-dunlo.
Kejut Akepare
17Korte marli atum, neli nanglitum aphan choningrilo: nanglitum kecharlitang alam pen kechingbarbe alam thansi monit atum angbong abe abe kethak, lapen monit atum aphan pap kepaklem atum aphan pangtheknon, lapen halatum pen chepahelonon. 18Pima lason keklem atum ke e-Hemphu Khristo aphan keklempi atum kalilo, bonta amethang methang apok aphansi klemlo. Halatum alam kedok pen lapen kero parlin alam pensi thangta kechinine atum aphan chobeibomlo. 19Pima nanglitum birta keme kekroi thirklong-lo, lake kadokave atum angno klangdak-lo. Lasi nanglitum pen apot neli ning arong-lo. Nanglitum keme alam anat giani keplangji, bonta kehingno anat ado kavedetjisi neli ning hang-lo. 20Lapen ning kangsam ekepi a-Arnam prapjin pen Soitan aphan pavirsi nanglitum akengpak arum biji.
E-Hemphu Jisu Khristo akangjinso nanglitum along padonang.
21Neli long kam keklem nangkeche-rapdun abang, Timothi, lapen neli sonthak thak a-Jihudi atum, Lusias, Jemon lapen Sosipater jokta nanglitum aphan kardom nangpidunlo.#Akam 16.1
22Labangso aloh ketok abang, neli, Tortias jokta nanglitum aphan Khristian akardom nangpidunlo.#Akam 19.29; 1 Kor 1.14; 2 Tim 4.20
23Neliphan lapen mondoli amonit atum aphan amethang ahem kechak abang, Gaias jokta nanglitum aphan kardom nangpidunlo. Labangso arong-sopi atangka kerim abang, Erastas lapen ekorte Kuartas jokta nanglitum aphan kardom nangpidunlo.
24E-Hemphu Jisu Khristo akang-jinso nanglitum kadokave along padonang! Amen.#Ajehak hastro barim hei hei along labangso alam ketok ave
Kejutsi Arnam Aphan Kero Akardom Kepi
25Tangte ilitum Arnam adak atur pathelonang! Neli kepachethang a-Jisu Khristo alamjir a-Birta Keme, lapen suri suri aningkan pen kepatu, bonta nonke keklangtang, akedip joi ahok alam ateng pen Arnam ke nanglitum akekroi pathir un. 26Bonta nonke Arnam amontri atum ketok alam pen ajok labangso ahok alam klangdak-lo; lapen kadokave amonit atum Arnam aphan kroisi ahukumta kekroijisi kaita kerengver a-Arnam hukum pisi labangso alam kadokave akhei aphan pachinidak-lo.
27Arnam ke inutnat; alangli ke kadokave asonta gianilo. Jisu Khristo pen apot ilitum labangso Arnam aphan kejut un-e akai apar akai anta adak atur pathelonang! Amen.
Currently Selected:
ROM 16: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
