MATHIU 26
26
Jisu Aphan Kepathiji Abidi Keri
(Mar 14.1-2; Luk 22.1-2; Jon 11.45-53)
1Jisu la kadokave alam ningje tangdet aphi asangho atum aphan pulo, 2“Nangtum chinilo, non nini aphi Kejok kechematha-dam akechopi a-Mei doji lapen Monit a-Sopo aphan thengparpan athak kepathijisi hotur atum arideng hodaiji.”#Keba 12.1-27
3Anke kurusar kethe atum lapen akesar atum ha Kaiaphas pu kurusar akethenei ahem chingrumsi, 4Jisu aphan kenepjoiji lapen kepathiji abidi chingvai damlo. 5Bonta latum pulo, “Chojun ahut etum klem nangne, pima rat atum huriseiji.”
Bethani Arongsopi Along Inut Arlosopi Jisu Aphu Athak Jangthu Kedung
(Mar 14.3-9; Jon 12.1-8)
6Bethani arongsopi along Simon pu inut si-i kelong abang ahem Jisu dodamlo. 7Alangli an kecho ahut inut arloso ador kesopik ajangthu nempru Alabastar pu a-arlong abong pen vansi alangli long vang-lo, lapen labangpi alangli phuthak la dungjirlo.#Luk 7.37-38 8Ansi asangho atum la thek longsi aning thisi pulo, “Pisi la kepavirthap varet-loma? 9Pima la jor asonte penang atangka longsi keduk kelak atum aphan pi thekji apot-lo.” 10Bonta Jisu latum akematha chinisi latum aphan pulo, “Labangpi aphan kopi athesi pasung-loma? Pima alangli nephan kam kemesi klemtang-lo. 11Atheke keduk kelak atum ke kaiketa nangtum along doverji, bonta neke nangtum along kaike doverve.#Keth 15.11 12Pima alangli la kenempru ajangthu nebang athak kedung pen ajok nephan kepipji aphan sik tang-lo. 13Chenamsi ne nangtum aphan nangpulang, pirthe adang labangso abirta keme kepachethang adim aling labangpi aphan kechemathathu-ji aphan la alangli keklemtang akamta thandetji.”
Jisu Aphan Hotur Arideng Kehodaiji Aphan Judas Kechechak
(Mar 14.10-11; Luk 22.3-6)
14Ansi asangho bangkrehini angbong pen Judas Iskariot pu inut abang kurusar kethe atum along damsi 15pulo, “Ne nangtum arideng Jisu nanghodaite nangtum nephan kopi nepijima?” Ansi latum rup atangka thomkep lakhasi alangliphan pilo.#Zeka 11.12 16Lapen halabangso ahut pen mamat alangli Jisu aphan halatum arideng kehodaijisi asoi keme ribomlo.
Jisu Amethang Asangho Atum Pen Kejok Amei A-an Kecho
(Mar 14.12-21; Luk 22.7-14,21-23; Jon 13.21-30)
17Thap kave ahim akechopi amei aphrang arni asangho atum Jisu along vangsi pulo, “Kejok a-Mei a-an kechoji aphan netum nangphan kodaksi adim sik dam nangjima?”
18Alangli latum aphan pulo, “Ha rongsopi damra inut amonit aphan pudamnon, ‘Thanbang pulo, neliphan apor chok tang-lo, neli nangli hemsi neli sangho atum pen Kejok a-Mei a-an chopo.’” 19Jisu latum aphan hukum kepi asonthotsi asangho atum klemlo lapen Kejok a-Mei a-an sik-lo. 20Arni ingsamsi alangli asangho atum pen pen an kechojisi ingnilo. 21Latum an kecho ahut alangli pulo, “Chenamsi ne nangtum aphan nangpulang, nangtum angbong inut abang nephan hotur arideng hodaipo.” 22Asangho atum aning dukpiksi abangphutin kepuhurji pangcheng-lo, “Neke kali, Hemphu, kalima?” 23Bonta alangli thaksi pulo, “Ne pen kasu along kecharvang abangsi nephan hotur arideng hodaipo.#Lun 41.9 24Chenamsi alangli lamjir ketoktang asonthotsi Monit a-Sopo dampo, bonta Monit a-Sopo aphan hotur arideng kehodai abang ko-an akepherememe akesung pho nangpo! Alangli amahang thekthedet asonte alangliphan memuji apot-lo.” 25Alangliphan hotur arideng kehodai abang, Judas thaksi pulo, “Ne ma, Hemphu?” Jisu alangliphan thaksi pulo, “Nang putang-lo.”
Hemphu A-an Kecho
(Mar 14.22-26; Luk 22.14-22; 1 Kor 11.23-25)
26Jisu lapen asangho atum kecho ahut, Jisu him eplang ensi ahirjume hang-lo, lapen la bengsi asangho atum aphan pisi pulo, “La enra chonon, lake nebang arpumlo.” 27Ansi alangli harlung ehong ensi Arnam aphan rosi latum aphan pisi pulo, “Nangtum kadokave la juntha; 28pima lake kechechak Aron kemi aphan, nevilo. Pap hei hei kediyaji aphan nevi ongdung atum apharman dung-lo.#Zeka 13.7 29Ne nangtum aphan nangpulang, ne pini pen mo ne-Po arat angbong nangtum pen drakha ahorlang kemi jun rap-rap longletik ke, ne labangso adrakha ahorlang nangtum pen jun rap-rap-relo.” 30Ansi latum kero alun lunsi ha Oliv anglong damjuilo
Pitor Chekobirbedetji Pu Jisu Kethanmek
(Mar 14.27-31; Luk 22.31-34; Jon 13.36-38)
31Ansi Jisu latum aphan pulo, “Paningve ajo amat nangtum do-an katkoiji, lapen nephan inutpet nang-o tekangbupji; pima, la toktang-lo, ‘Ne biresak kevi abang aphan thengbopji, lapen biresak ahur pratseiji.’#Mat 28.16 32Bonta ne thurdet aphi nangtum aphrang ne ha Galili adet damji.” 33Ansi Pitor thaksi alangliphan pulo, “Kadokave atumle nangphan nang-obup setta neke nangphan nang o-edetji.” 34Jisu alangliphan pulo, “Chenamsi ne nangphan nangpulang, paningve ajo mamat, vo ejon kuke ako nang nephan batai kethom chinine pusi pudetji.” 35Pitor alangliphan thaksi pulo, “Ne nang pen thirap-rap nangji setta nangphan chekobirbe be vekji.” Lapen asangho atum anta lasonthotsi puhurlo.
Jisu Gethsemane Along Arnam Kardom
(Mar 14.32-42; Luk 22.39-46)
36Ansi Jisu amethang asangho atum pen ha Gethsemane pu adim damlo, lapen alangli latum aphan pulo, “Ne hadak Arnam kardom dam ahut nangtum ladak-le ingni-phrongtha.” 37Alangli Pitor lapen Jebedi asopo bang hini aphan ari cheponlo, lapen alangli aning keduk lapen kematha kesung pangcheng-lo. 38Ansi alangli halatum aphan pulo, “Kethiji dokdok an ne ning duk-lo. Dak-le dora no kang-ar penle donon.” 39Alangli penang an akehelo damsi longle athak domkhrupsi Arnam ardomlo, “O Po, jongsi unte labangso aharlung ne long pen pahelotha! Bonta ne ning kehang kali, nang ning kehangle papleng nang.” 40Alangli asangho atum along vangsi latum aphan amek kejangklip thek long-lo, lapen alangli Pitor aphan pulo, “Nangtum porphai isi anta ne pen inghongding un-e det-loma? 41Nangtum asat kepho nangne detji aphanle inghongdingra Arnam ardomnon. Chenamsi karjong ke aning hang, bonta okke ajakong ave.” 42Puthot batai hini aphong alangli damsi Arnam ardomsi pulo, “O ne Po, ne la junjete labangso kesung aharlung pahelo un-e, tangte, nang ning kehangle papleng nang.” 43Lapen alangli puthot vangthulo lapen asangho atum aphan amek kejangklip thek long-lo, pima latum mek-i parlo. 44Jisu latum aphan otekangsi puthot damthulo, lapen esonpet alamthe pensi batai kethom aphong Arnam ardomlo. 45Ansi alangli asangho atum along vangsi pulo, “Nangtum non anta mek jangbomsi sangbom-langma? Langtha! Monit a-Sopo aphan papi atum arideng kehodaiji apor nangletang-lo. 46Thurnon, dam lonang. Langtha, nephan hotur arideng kehodaiji abang nangletang-lo.”
Jisu Aphan Kenep
(Mar 14.43-50; Luk 22.47-53; Jon 18.3-12)
47Jisu la keningjebom ahut asangho bang krehini atum angbong pen inut Judas pu abang vang-lo, lapen alangli penpen kurusar kethe atum lapen akesar atum nangketoidun a-armu ake-ongpi atum nokjir lapen kaibong chevansi vang-lo. 48Lapen alangliphan hotur arideng kehodai abang halatum aphan angthek pisi pulo, “Ne kangjupji abang aling helo, alanglilo; laphanle nepnon.” 49Hala mamat alangli Jisu along kengdet damsi pulo, “Kardom, Hemphu!” Ansi Judas Jisu aphan ingjup-lo.
50Jisu alangliphan pulo, “Jirpo, nang keklemji akam klem seraknon.” Ansi halatum vangsi Jisu aphan otthipsi nepchek-lo. 51Jisu along kedun inut abang ari chirungsi anokjir chesat-lo lapen akethenei akurusar aban aphan thusi ihi ano chorphlak-lo. 52Ansi Jisu alangliphan pulo, “Nang nokjir la adim methang alongle chebi thunon. Pima nokjir ke-en atum an nokjir pensi virdetji. 53Ne Po nelong ongdung apherangke nangketoiji aphan ne choningri thekthe pusi nangtum mathaloma? 54Bonta lapu lote lason plang nangji pu Hastro along ketok alam kopusonsi chekok un poma?” 55Halabangso ahut Jisu armu atum aphan pulo, “Dokait aphan ason thak-thaksi nokjir lapen kaibong vansi neliphan kenepjisi vang-loma? Arnivang neli Kardomhemthepi along ingnisi lam thanbomlo, bonta nanglitum neliphan nepnedet-lo.#Luk 19.47; 21.37 56Bonta la kadokave ke Hastro along Arnam amontri atum kethantang alam kepachekokji aphanlo.” Ansi asangho atum an alangliphan otekangsi katkoilo.
Kangsai Amei Along Jisu Aphan Kangsai
(Mar 14.53-65; Luk 22.54-55,63-71; Jon 18.13-14,19-24)
57Ansi Jisu aphan kenep atum alangliphan ha Kaiaphas pu kurusar akethenei angno ponlo. Hadak aron thekser lapen akesar atum chepangrum pet-lo. 58Pitor achar achar pen alangli phi phi dunsi ha kurusar akethenei ahem kesang angdeng along an dunlo. Lapen kangsai kejut an kechini dunji aphan alangli ha arlo an lut dunsi chedanbang atum along ingni dunlo. 59Jisu aphan kepathijisi kurusar kethe atum lapen kangsai amei atum anta alangli bethursi chobei ahaki ribomlo. 60Ansi kechobei ahaki ake-ongpi atum vang-lo lapen kechobei ahaki pilo, setta thangnat adai ketinji alamthe long thekthedet-lo. Aphisi bang hini atum vangsi 61pulo, “Labangso abang pulo, ‘Ne Kardomhemthepi phrisi nithom angbong kimthusi patangji.’ ”#Jon 2.19
62Kurusar akethenei abang thursi alangliphan pulo, “Nangli thangta kethak dunji alam avema? Latum adai ketin alamthe kopusonma?” 63Bonta Jisu dojoilo. Lapen kurusar akethenei abang alangliphan pulo, “Kerengver Arnam amen pen ne nangliphan seme pilang: Tangte punon, nangli heloma, Arnam a-Sopo, Khristo loma?” 64Jisu alangliphan thaksi pulo, “Nangli la putang-lo. Tebonta neli nanglitum aphan nangpulang, non pen apara nanglitum Monit a-Sopo aphan ha Jakong Kethenei abang ar-esi kangni, lapen sining anghun pen kevang thek longpo.”#Dan 7.13 65Ansi kurusar akethenei abang amethang keche-um ape chingseksi pulo, “Alangli Arnam aphan pinremlo. La apar ilitum kopi ahaki nangjilangma? Alangli non Arnam aphan kepinrem nanglitum arjulong-lo.#Levi 24.16 66Nangtum kopisi kemathama?” Lapen halatum thaksi pulo, “Alangli kethi nangji adai do.”#Levi 24.16 67Ansi halatum alangli mahang along ingthok-lo, lapen alangliphan chok-lo lapen akaprek atum alangli kecheng ardepphratsi pulo,#Isa 50.6 68“Montri tha, Khristo! Nangliphan matsi nangkechokma, putha?”
Pitor Jisu Aphan Kechekobirbe
(Mar 14.66-72; Luk 22.56-62; Jon 18.15-18,25-27)
69Kurusar akethenei abanpi inut abang kevang ahut Pitor kangsai ahem atikup alongsi ingnilo lapen labangpi alanglilong vangsi pulo, “Nanglita Galili a-Jisu along dolo.” 70Bonta alangli kadokave angno chekobirbedetsi pulo, “Nangli kepu alam neli chinine.” 71Lapen Pitor ha kangsai ahem atikup anghap along an kedam ahut akaprek abanpi alangliphan thek long-lo lapen hadak karjapphrong atum aphan thanlo, “Labangso abang Nazareth a-Jisu along dolo.” 72Alangli puthot chekrongkredet-lo, lapen seme tangsi pulo, “Neli labangso abang aphan chinine.” 73Malomso aphi hadak karjapphrong atum Pitor adung vangsi pulo, “Ahok-lo, nanglita halatum angbong inut abang-lo; pima nangli keningje pensi la klangdak-lo.” 74Ansi Pitor athikpet pen seme tangsi pulo, “Ahokpet pen neli nangliphan nangthanlang, nephuthak adai padonang! Neli labangso abang aphan chininevek-lo.” Halabangso ahut mamat vo ejon ku-lo, 75lapen alangliphan Jisu kepu, “Vo ejon kuke ako nang nephan batai kethom chekobirbedetji,” pu alam Pitor chemathadamlo. Pitor ingtan damsi jasemet chirulo.
Currently Selected:
MATHIU 26: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.