MATHIU 25
25
Bangkep Animsopimar Alamlir
1“Ansi sining Arat ke bangkep animsopimar atum amethang methang athengtom cheponrepsi piso kechepangriji apinso aphan kangthumjisi kedam atum ason plangji.#Luk 12.35 2Halatum bangpho ke kelu lapen bangpho ke abidi kedo atumlo. 3Kelu atum ke amethang methang athengtom kechepon ahut akaprek ajangthu cheponpedet-lo. 4Bonta abidi kedo atum ke amethang methang athengtom along jangthu paplengsetsi damlo. 5Bonta hala kechepangri apinso abang kevang padersi halatum kadokave ta amek jangklip-lo.
6“Ansi jirlo apor kehon abang hangsi pulo, ‘Langtha, piso kechepangriji apinso nangletang-lo! Alangliphan kangthumjile nangbarra vanghurnon.’ 7Ansi halabangso animsopimar atum thurpetsi amethang methang athengtom chesik-lo. 8Ansi kelu atum abidi kedo atum aphan pulo, ‘Nangtum ajangthu netum aphan asap nepitha, pima netum athengtom mepji dokdok-lo.’ 9Bonta abidi kedo atum thaksi pulo, ‘Pi thekthe, pima netum lapen nangtum aphan ke la dordedetji. La alar nangtum ha kejor atum along damra nangtum methang methang aphan chenam damnon.’ 10Halatum kenamdam ahut piso kechepangriji apinso abang vang-lo, lapen kechesiktang atum alangli pen pen piso kepangri akechopi adim lutdun rap-rap-lo, lapen inghap inghap-het-lo.
11“Aphisi halabangso animsopimar atum vangsi pulo, ‘Hemphu, Hemphu! Nelitum aphan inghap nang ingputha.’#Luk 13.25 12Bonta alangli thaksi pulo, ‘Chenamsi neli nanglitum aphan nangpulang, neli nanglitum aphan nangchinine.’#Luk 13.25
13“Lahelo nangtum no kechepang-ar penle donon, pima nangtum halabangso arni, kalite apor chinine.
Bang Kethom Aban Atum Alamlir
(Luk 19.11-27)
14“Halabangso ahut sining Arat keplangji lapuson helo. Ephong inut amonit adet kaprek damji dokdok-lo. Ansi alangli aban atum aphan hangpetsi alangli khi kedo-an latum arideng hodai tekang-lo. 15Alangli abangphutin aphanta amethang methang ajakong ateng pensi pilo: inut abang aphan ser atangka suri pho pilo, akaprek abang aphan suri hini, lapen anut kaprek abang aphan suri isi atangka pilo. Ansi alangli adet kaprek damjuilo. 16Hala mamat suri pho atangka kelong abang damsi la pen bepar klemlo, lapen akaprek suri pho ale long-lo. 17Lapusonthotsi suri hini kelong abangta akaprek suri hini ale long-lo. 18Bonta suri isi kelong abang ke damsi longle along hilik tuksi ahemphu aser patujoilo.
19“Ajir dingklui aphi labangso aban atum ahemphu vang-lo, lapen latum pen chelakha rep-lo. 20Hala suri pho atangka kelong aban alangli long vangsi ansose suri pho atangka alangli ingno vansi pulo, ‘Hemphu, nangli neliphan suri pho atangka nepi tekang-lo. Langtha neli ansose suri pho atangka longtang-lo.’ 21Ahemphu alangliphan pulo, ‘Me-ongchot-lo, keme lapen kekroithirklong aban.’ Nangli asapnat atangka pen klem-ipamelo. Neli nangliphan ake-ongpi amar ahemphu nangbatpo. Nangli nangli hemphu pen chehok rap-raptha.
22“Lapen suri hini atangka kelong abangta alangli long vangsi pulo, ‘Hemphu, nangli neliphan suri hini atangka tekang-lo. Langtha, neli ansose suri hini atangka longtang-lo!” 23Ahemphu alangliphan pulo, ‘Me-ongchot-lo, keme lapen kekroithirklong aban. Nangli asapnat atangka penta klem-ipamelo. Neli ake-ongpi amar ahemphu nangbatpo. Nangli nangli hemphu pen chehok rap-raptha.’
24“Lapen suri isi kelong abangta alangli long vangsi pulo, ‘Hemphu, neli chinilo, nanglike ning ingtangrak abang-lo, atheke nanglike sok ke-e-e adimsi sok kerot lapen chili kerik-re adimsi sok kepangrum abang-lo. 25Neli la pherelo, lasi neli damsi suri isi atangka longle arlosi patudamjoilo. Langnon, lahelo nangli tangka-lo.
26“Bonta ahemphu abang thaksi alangliphan pulo, ‘O nang kehingno lapen keselet aban! Neli ke sok ke-e-e adimsi sok ke rot lapen kerik-re adimsi sok pangrumlo, lake nang chiniloma? 27Tangte nangli neli tangka tangka-apuru alongle bidamkok asonte neli kevangthu ahut la neli tangka lapen aleta longji apot-lo. 28Ansi alangli long pen atangka endetsi hala suri kep atangka kedo abang aphansi la pithudet-lo. 29Pima akhi kedo abang aphan pithuji, lasi alangli akhi do-oji, bonta thangta kavedet abang along pen kedo-anta thi pondetji.#Mat 13.12; Mar 4.25; Luk 8.18 30La keningjoino aban aphan ingtan akangtingkuk adimle varphitnon; hadak chiru charnapsi aso chardengji.’#Mat 8.12; 22.13; Luk 13.28
Kangsai Padu Alam
31“Bonta Monit a-Sopo adak atur pen lapen apherangke atum do-an pen kevangji ahut, alangli adak atur kethe anghoi along ingniji.#Mat 16.27; 19.28 32Lapen kadokave arat atum aphan alangli ingno pangrumpetji lapen biresak kevi abangle bi lapen biresak ahur aphan kepaprek asonthotsi alanglita inut pen anut kaprek aphan paprekji. 33Alangli dhoromi atum an aphan ke alangli ar-e anat chebiji lapen akaprek atum aphan ke arvi anatsi biji. 34Anke Recho alangli ar-e anat kedo atum aphan pupo, ‘Vangnon, ne-Po ahirjume kelong atum, pirthe kepinchong ahut pen nangtum aphan nang kesikpi arat chepahemphu non; 35pima ne an kangchir ahut nangtum nephan an nepilo, ne lang kang-it ahut nangtum nephan lang ne pajunlo, nephan chininedet setta nangtum nephan chak-lo; 36ne reng angse ahut nangtum nephan pe-ri nepindeng-lo, ne sodet ahut nangtum nephan nelanalo; nephan phatek kebeng ahut nangtum nelong vang-lo.’
37“Ansi dhoromi atum alangliphan thaksi pupo, ‘Hemphu, mantusi netum nangphan an kangchir thek-longsi an nangpacho loma? Kalite lang kang-it ahut lang nangpajun loma? 38Lapen mantusi netum kechinine abang aphan, atheke la nangphan alohi chak-loma? Kalite nangreng angse ahut nangphan pe-ri nangpindeng loma? 39Lapen netum mantusi nang kesodet, kalite phatek kejang ahut nangphan langdam loma?’ 40Ansi Recho halatum aphan thaksi puji, ‘Chenamsi ne nangtum aphan nangpulang, la ne korte akebinei abang aphan setta la son keklem abang aling ke nephansi klemlo.’
41“Anke alangli arvi anat kedo atum aphan pupo, ‘Nedung pen damnon, ahirjuno kelongtang atum; Hi-i Sarpo lapen apherangke atum aphan kesikpitang, kejut un-e ame along damnon. 42Pima ne an ingchirlo setta nangtum an nepachochelo, ne lang ing-it-lo setta nangtum lang nepajunjelo; 43ne alohi kedoji aphan vang-lo setta nangtum nephan chakchedet-lo; ne reng angselo setta nangtum nephan pe-ri nepindengde-det-lo, lapen ne sodet-lo lapen phatek jang-lo setta nangtum nelong vangvedet-lo.’
44“Ansi halatum alangliphan thaksi pulo, ‘Hemphu, netum mantusi nang an kangchir, kalite lang kang-it kalite alohi kedoji aphan kevang, kalite reng angse, kalite kesodet, kalite phatek kejang thek longsi nangphan ru-thaithedet-loma?’ 45Ansi alangli halatum aphan thaksi pupo, ‘Chenamsi ne nangtum aphan nangpulang, la kebinei abang aphan setta keklemkledet aling ke nephanta klemkledet-lo.’ 46Ansi latum kejut un-epin akesung angbong lutdamji, bonta dhoromi atum kejut un-e achethe angbong lutdamji.”#Dan 12.2
Currently Selected:
MATHIU 25: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.