Wɨjalangasakyaꞌ 22

1Nabaai ejelɨya dazai aalya naange' walyɨvanɨka pɨrɨvɨna nɨmɨnyɨ yɨbwarɨdaakuna. Aalya daza' aalya gaala'ne sa' yuna sɨnɨmwavananya'bɨ' aaizɨya'bɨ' kɨmihɨta yadaa'nyɨya'. Yɨ aalya daza' Gotɨyalyɨ Sipɨzipɨya Dɨwɨnyalyɨ sanɨdaare kingɨnamwaalyɨta savɨdaa'nyɨ yɨma'naka 2anga naanga dazabanna tutaanya naangevɨ tɨnnyaba walyuna. Aalɨmaangebaarɨ dihɨrɨjɨ kengihɨrɨjɨ yɨta gaala ya'nyɨ' waayɨ'. Kwarame pɨrɨvɨ tɨka munne atɨraai sɨvɨlyɨrɨdaa'nyɨ pwaraai yɨ'nadengɨ. Yuya lawe sɨkaavɨ yɨsɨla daza yɨ'nadengɨ. Nabaai yɨta sare yɨkɨwasa ajɨmya yuyangɨyaraavɨ tewaanya nawɨ'nya yɨma'nya'nengɨ. 3Nabaai Dɨkevɨ wɨmarasɨ'nya'ne gazasa' kunebe. Yuya daza ayɨna warade mɨ'. Gotɨyalyɨ Dɨwɨnyalyɨ sanɨdaare kingɨnamwaalyɨsa' anga naanga dazaba waradevanyɨ. Nabaai Gotɨyare yaasɨwa'wawɨnyara gamɨnyɨ lotuya wɨmaripɨ'devanyɨ. 4Nabaai gamɨre sɨnnyɨ' wangabɨ'devanyɨ. Nabaai gamɨnne yaya' kumɨre yamengɨnyɨra. 5Sawɨsa' ayahi jɨnnade' mɨ'. Sarevɨ nabaai sahwaraavɨ laamɨvananyavɨre baakesɨ nyɨlyare baakesɨ sawaarɨna ayahi wɨgainade' mɨ'. Naangei Gotɨyai sahwaraavɨ baake' wɨjaavade'nanyɨ. Nabaai yuyagaa' yuyagaa' sahwara kingɨya mwaaibɨ'devanyɨ.

Jizaazai walaabatherɨnesɨ.

6Nabaai ejelɨyai nɨmɨnyɨ dara wɨdɨna “Yagaala yuya daza yuna naanga nebulyangɨra. A'mwe yuyara sahɨnɨngɨna dɨragɨnna lɨmwabɨzangɨ. Naangei Gotɨyarɨ wɨ'nawɨjɨwaakadɨvɨsaraavɨre kuryaraavɨ dɨhaa'bwa'dei gamɨre yagaalya' wɨjɨwaakya'na gamɨre ejelɨyarɨ maryasaabakelyɨ. Gamɨre yaasɨwa'wawɨnyaraavɨ wibwarɨdaakwia'na yuya daza yɨme'nya'bɨ' yɨma'nya'nenna maryasaabakelyɨ. 7‘Yɨthaanyi! Nɨmɨ yɨme'nya'bɨ' walaabɨdeinyɨreva.’ A'mwei yagaala bukuya davɨ warɨke mɨdɨnajai yɨ yagaala Gotɨyai gɨthɨwake wɨ'nama'mwaanya wɨ'nawɨjɨwaakɨyagaala daza mɨdɨnajai yɨ a'mwe dazai yɨlaaya yada tewaanaanga winadelyɨ.”

8Jonɨnnyɨ yagaala dazahɨnɨ kadɨka wɨ'nena yuya dazahɨnɨ tɨnna wangamweinyɨ nɨmɨ. Kadɨka mena wɨ'nena tɨnna mena wanganena “Sahwarɨ lotuya yɨma!” dena kwadaai gɨlɨna yena ejelɨyare sɨvigɨ'nyɨryawɨ yuya daza nyɨbwarɨdaakwakeryawɨ walamwaaina. 9Mena walamwaaina kyɨwa sahwai nɨmɨnyɨ wɨdɨna “Gɨmɨ sasara minna! Gɨmɨjɨ gɨmɨre ja'mwera kwara wɨ'nawɨjɨwaakadɨvɨsarajɨ ye'mwannawɨdaayadɨnyainyɨ. Avaaiwawɨnyainyɨ. Nabaai a'mwe yuyara bukuya davɨre yagaalya mɨdɨdɨvɨsarajɨ avaaiwawɨnyainyɨ. Yɨ Gotɨyai yune gave pwainanyarɨ lotuya nayaa dɨragɨnna jɨ!” 10Nabaai sahwai nɨmɨnyɨ wɨdɨna “Gotɨyare yagaala daza kadɨka wɨ'nama'mwaanya wɨ'nawɨjɨwaakɨyagaala daza bukuya dathɨrɨ warɨkengɨ mamarabɨku'dɨnnera! A'mwera wangabɨka! Sare' dare'nanyɨ. Gotɨyare daza ya'negaa' aya kɨgaa' mena yɨwaka. 11‘Aayagaa' sagaa' a'mwei yɨda'maraangebwi marasɨ'nɨkei kayaa'nanyabwi yadei kayaa'nanyabwi kuna yana! A'mwei kayaa'na gɨrɨkita'nanyabwi yadei kayaa'na gɨrɨkita'nanyabwi kuna yana! Nabaai a'mwei tewaanya yɨda'maraangebwi yadei tewaanya yɨda'maraangebwi kuna yana! A'mwei nawɨ'nyai gɨrɨ'maayai mwaalajai nawɨ'nyai gɨrɨ'maayai kuna mwaalaneva!’ 12Yɨthaanyi! Nɨmɨ yɨme'nya'bɨ' walaabɨdeinyɨra. Nɨmɨre tɨvɨkɨsabwi lɨmwaga'mujɨ walaabɨdeinyɨ. A'mwe gazarɨzarɨ gamɨre yade yune saburɨne'na wɨrɨvɨkɨrɨdeinyɨra. 13Nɨmɨ aaya sɨnnawɨnyainyɨ (A). Aaya dɨvineinyɨ (Z). Yɨ nɨmɨ yuya sangɨne'na aaya kaavɨlyainyɨ. Yuya dɨragɨnya sa yunebanna yɨ'mwannadɨnyainyɨ.

14A'mwera kunnya baazɨ'ma'nya aalya yɨpɨjara yɨlaaya yadɨvɨ' tewaanaanga winadere. Sarera ‘Tɨka munne yɨta gaala'nyɨkɨ yɨnɨga maranaana! Anga naanga dazabanne kaadihɨsangɨ yɨnɨga wɨlawaana!’ deva yɨpɨnerera. 15Gotɨyare anga naangeba mwasɨlaa jɨlɨkerajɨ a'mwe gɨri'nya yadɨvɨsarajɨ kayaa'nanya gɨrɨkita'nanyabwi yadɨvɨsarajɨ a'mweraavɨ tamakadɨvɨsarajɨ a'mwe sɨlaangeraavɨjɨ yɨsaraavɨjɨ kwaasɨgotɨyaraavɨjɨ wɨdadɨvɨsarajɨ gazarazara kwaasɨyabwina wɨvu'nadera kwaasɨ yadɨvɨsarajɨ a'mwe dazara mwalɨbainyɨna yɨpɨ'dere mwasɨlaa. Anga nawɨ'nya savɨ wɨlaabɨpɨ'dera mɨ'.”

16“Nɨmɨ Jizaazainyɨ nɨmɨre ejelɨyarɨ sarɨmɨnyawɨnna yɨhɨmaryasaabɨwa. Nɨmɨnyɨne kusɨlaanyangɨya anga geva gevanyaihɨrɨna yagaala daza jalɨkurakya'nerɨ yɨhɨmaryasaabɨweinyɨ. Nɨmɨ sahwainyɨ Yɨta Devitɨmɨ aaya kaavɨlyavɨ pwipulyainyɨ. Nɨmɨ gamɨre Kaimɨraayainyɨ. Nɨmɨ sɨlɨngaamɨnya yɨrɨkwinyagaa' lɨvamwaja yade' kaabwe sahɨrɨ'nyɨ.”

17Kurya Tewaanyalyɨ Sipɨzipɨya Dɨwɨnyare sɨdɨraayasɨ sawaai dɨna “Kaaja!” A'mwei yagaala daza' wɨ'nojɨ sai dara dana! “Kaaja!” Nabaai a'mwei aalya'na mɨjɨka balojɨ sai bana! “Aalya' nɨma!” yawɨrojɨ aalya gaala'ne' Gotɨyare yanga naange' bamaarana!

18Nɨmɨ yagaala dɨragɨnya' wɨdɨvanɨge. A'mwe gazaizai Gotɨyare wɨ'nawɨjɨwaakɨyagaala daza bukuya dɨrɨ warɨke kadɨka wɨ'nɨvanɨkerɨ dɨragɨnna dara jalɨkurakɨvanɨge. Saigɨ yagaala dazangɨna yagaala pɨrɨ' mɨje'mwamwɨya yɨjaigɨ bukuya dathɨrɨ wana kayaa'nanya daza kayaaka yɨgalya'nenna yɨda'nɨke sa Gotɨyai gɨmɨnyɨ mɨje'mwamwɨya gyatheigɨnyɨ. 19Nabaai bukuya dɨrɨ Gotɨyare wɨ'nawɨjɨwaakɨyagaala dazangɨ yagaala pɨrɨ' marasɨ'nɨjaigɨ Gotɨyai gɨmɨnyɨ gamɨre nawɨ'nyaanga bukuya dathɨrɨ yɨda'nɨkenna gɨmarasɨ'nadeigɨ. Yɨ sasareigɨ gɨmɨnyɨne yɨta gaala'ne sɨkɨ tɨka munne dɨmaranadeigɨ mɨ'. Yɨ sasareigɨ anga naanga nawɨ'nya dazaba yɨnɨga wi'na dɨmwaaideigɨ mɨ'. Aawa. Dazaburɨ gɨmarasɨ'nadeigɨnyɨ.

20Yuya dazanna jalɨkurakɨvanɨka dazai dahaa' dara dɨna “Yayo, nɨmɨ yɨme'nya'bɨ' walaabɨdeinyɨra!”

Sahɨrɨsɨ. Nebula naangesɨra. Naanga Jizaazai dalaama!

21Yanga gaimwanga naanga Jizaazare' sarɨmɨ yuyaihɨlyɨ yɨhye'mwannamwaalana!

Currently Selected:

Wɨjalangasakyaꞌ 22: byr

Highlight

Copy

Compare