Wɨjalangasakyaꞌ 1

1Sɨnnawɨ yagaala datha' lɨka yulyarakesɨ. Yɨ Jizaazai Kɨraazɨtɨyai ku'maayaba marima'naabakesɨ. Sahwai nemɨnyɨne'na yoimavakesɨ. Gotɨyai daza' Jizaazarɨ yɨmwangakesɨ. Jizaazai gannya yaasɨwa'wawɨnyaraavɨna yɨbwarɨdaakwia'ne' yɨme'nya'bɨ' yɨma'nadenna wɨjaavakesɨ. Sai nemɨnyɨna kunya, yawɨsa nejaavanɨ' yuya dazanna dare. Sai gamɨre mamaayarɨ ejelɨyarɨ Jonɨnnyawɨnna maryasaaba'. Nɨmɨ gamɨre yaasɨwa'wawɨnyainyɨna yɨ sai yagaalya' nyɨjaava'. 2Nɨmɨ Jonɨnnyɨ yuya dazangɨ tɨnna mena wangamwa. Yɨ nɨmɨ tɨnna wanganene yunebanna Gotɨyare yagaalya' ku'maayaba jalɨkurakɨvanɨge. Yɨ yagaala Jizaazai Kɨraazɨtɨyai nyɨjalɨkurakaka daza'na jalɨkurakɨvanɨge. Nɨmɨ dara dɨvanɨge. Yagaala daza' yɨ nebulyasɨ. 3A'mwei Gotɨyare yagaala datha dɨvidaa'nya yɨma'nade wanganadadelyɨ nabaai yagaala Gotɨyarɨ wɨ'nawɨjɨwaakadɨnya a'mwe yɨ'bwa'nawɨ'nadɨvɨsara kadɨka wɨ'nadɨvɨ' sahwara Gotɨyare yagaala yɨda'mwe datha' sara mɨdɨdɨvɨsarajɨ yɨlaaya yadɨvɨ' tewaanaanga winaderera. Sare' dare'nanyɨ. Gotɨyai mena dake yɨda'manɨge datha yɨma'nadehaa' yɨ sagaa' maalɨkegaakɨ.

Kɨraazɨtɨyare kusɨlaanyangɨya anga ata purɨdaa'nyɨ pwaraalyangɨna Jonɨ yɨdavake'nesɨ.

4Kɨraazɨtɨyare kusɨlaanyangɨyaihi anga ata purɨdaa'nyɨ pwaraalya sabanyaihi!

Nɨmɨ Jonɨnnyɨ yagaala datha' sarɨmɨ Ezɨya sɨmagɨ mwaaihasaihɨrɨna yɨda'mwesɨ. Dahaa' Gotɨyai mwaalɨkei, sahwai kɨgaakuna kuna mwaalakei, dɨvidaa'nyɨ kuna yɨma'naabathei yɨ sahwai sarɨmɨnyɨ yange'na yɨhɨgaimwagana! Sarɨmɨnyɨ kwaamu'nanyabwi yɨhyana! Nabaai Kurya ata purɨdaa'nyɨ pwaraalyara (Kurya Nawɨ'nya Naangei) Gotɨyare kingɨnamwaalyɨsavɨ daakasara sarɨmɨnyɨ yange'na yɨhɨgaimwabɨka! Sarɨmɨnyɨ kwaamu'nanyabwi yɨhyɨpɨka! 5Nabaai Jizaazai Kɨraazɨtɨyai sai Gotɨyare yawɨta yuya nebulya'na yɨda'na jalɨkurakadei sai aaya mudɨ'nanyai a'mwe bainɨkeraayawɨ ayɨna dɨkaavakei sai kingɨya yuyara Kwaakevakɨ mwaaihasaraavɨ maremwaaidei yɨ sai sarɨmɨnyɨ yange'na yɨhɨgaimwagana! Sarɨmɨnyɨ kwaamu'nanyabwi yɨhyana!

Sai nemɨnyɨ kale yange'na neyadei, yɨ sai gamɨre tawe savɨ nemɨre kayaa'nanyanna marasɨ'nakelyɨ. Kayaa'nanya sa nevwɨyɨnɨkeina mamwaalya'ne'na balakelyɨ. 6Sai nemɨnyɨ maremwaidaanyainaavɨ nemwaaihada yɨ Gotɨyarɨ gannya Ganɨmaangerɨ wɨdaaya'neina Gotɨyarɨna mubɨthɨka yɨra'daanyaina “Su! Su!” wɨdadaa yɨlaaya wiadaa gamɨnyɨ makidaa yadaanyainaavɨ nemwaaihakelyɨ. Sasarerɨne yaya naange' byaanna naangesɨ dɨragɨnna ya'nebulyɨ yuyagaa' yuyagaa' kuna warana! Sahɨrɨsɨra. Nebula naangesɨ.

7Yɨthaanyi! “Sai yɨraayavɨ waimanaabɨko.”

Yuyaraavɨre tɨnnyaraalyɨ sahwarɨ wangabɨ'derɨnera.

A'mwata wɨlɨvadaakweta kwarajɨ wangabɨ'derɨnera.

Malɨmwagyara yɨta yuyavakaavɨyara wangabɨ'derera.

Sahwara sɨduta kwalaalya yawɨpɨ'dere.

We'! Gamɨnyɨne lɨke'na jakɨnna dɨpɨ'dere.

Yo! Sahɨrɨsɨra. Nebula naangesɨ.

8Naangei Gotɨyai dara dɨvanɨ' “Nɨmɨ yune sahwainyɨ aaya sɨnnawɨnne nebulya'nanyainyɨ (A). Nabaai wana nebulya'na aaya dɨvineinyɨ (Z). Sɨnnawɨnyainyɨ. Aayaangeinyɨ.” Yɨ dazai dahaa' mwaalɨkei kɨgaakuna kuna mwaalakei dɨvidaa'nyɨ kuna yɨma'naabathei sai Dɨragɨnya Yuyangɨ Aaya Kaavɨlyalyɨ. Yuyangɨ Mɨnyagɨnyalyɨ.

Kɨraazɨtɨyarɨ A'mweraavɨne Kaimɨraayarɨ Jonɨ tɨnna wanganake'nesɨ.

9Nɨmɨ Jonɨnnyɨ sarɨmɨnyɨ sɨrya'mweinyɨ. Nɨmɨ sarɨmɨjɨ Jizaazarɨ taanginyavɨjɨ Gotɨyai nemaremwaaidevɨjɨ taanga nejaavadɨvɨ' dɨragɨnna da'daanyaburɨjɨ sangɨ ye'mwannamwaaidɨnyainyɨ. Sareinyɨ Gotɨyare yagaalya' wɨjɨwakamarye'najɨ Jizaazarɨna jalɨkurakene'najɨ Ahu'manna Paatɨmozɨ wo'nɨkeba kalavuza nyɨmaaresainyɨ. 10Yɨrɨka Naangeregaa' (Kɨraazɨtɨyarɨna yɨ'bwa'nawɨ'nadaanyagaa') Kuryai nɨmɨnyɨna dɨragɨnna bulamwaaina nyɨwa'. Sara nyadaa'nyɨ nɨmɨnyɨ dusɨdaasɨ nɨmɨ maangwɨraaya pɨrɨ' wɨ'nyɨna. Maangwɨraaya sa' jaka dɨragɨnna dɨna pihulɨyavɨre jake'bɨsa'. 11Maangwɨraaya daza' dara dɨna “Yuyangɨ tɨnna wangamanɨgɨnya, sa gɨmɨ nayaa pɨkarya jɨtha'! Pɨkarɨyɨkwiavɨ ya'gɨzɨ anga ata purɨdaa'nyɨ pwaraala dangɨne Kɨraazɨtɨyare kusɨlaanyangɨyaraavɨna jaasɨ! Yɨ Anga Epazaazɨjɨ Sɨmenaajɨ Pehamaamɨjɨ Taayataairajɨ Saathɨzɨjɨ Pilathelɨpɨyajɨ Layothɨzɨyajɨ anga sangɨna dɨmarayaasɨ!”

12Nɨmɨ “A'mwe yagaala nyɨdɨvanɨka sarɨ wanganɨma!” dena gɨnyɨwannyɨna. Mena gɨnyɨwannyɨna yena yɨ laamɨvananya' yɨlakya'ne golɨya ata purɨdaa'nyɨ pwaraala sa wa'dɨ'nyɨya tɨnna wanganna. 13Yɨ a'mwe pwai laamɨvananya' yɨlakya'ne dazangɨ tɨnnyaba daa'dɨ'nyɨ nɨmɨ tɨnna wanganna. Sai yɨ a'mweraavɨne kaimɨraayaibɨsai. Sai baazɨ'ma'nya saamɨnaange' yune sɨvɨla kedɨvɨ yalawakɨnanya' baazɨ'ma'nakei, yɨ sai munnaanya golɨya' gannya kɨhɨsavɨ pwɨyɨnakei. 14Gannya mɨnyagɨnyavɨ mɨjasa' yune nebulya'na yaake'nanya', sipɨzipɨyavɨre arɨlya'bɨsa' yɨ wɨvɨtɨrata yaake'bɨsa'. Yɨ gamɨre tɨnnyai dɨtaalɨsa'bɨ' yɨdadaasɨ. 15Yɨ gamɨre sɨvɨlyɨraai wana nebulya'na dɨ'baaka mwadadaasɨ, arɨnga kwaari'mata bɨraazɨya' dɨka naangevɨ yɨra'dɨvɨtabaaibɨsɨraai. Nabaai nɨmɨ kadɨka wɨ'nɨwe' gamɨre yagaaimaangwɨraaya' aalɨjaka naange' yɨnnadevaaibɨ' kinnɨwa' wɨ'nɨwa. 16Sai aangasɨrɨ sɨlɨngaamɨnya ata purɨdaa'nyɨ pwaraalya lɨmwagarɨ'. Yɨ kwaari'masɨramɨnya pɨrɨ' gurɨmaanga yuyɨmagɨnyaai yɨnɨke' sa' gamɨre maangevɨdaasɨ waraka mwasaba walyaabɨnɨke'. Nyɨlyai sɨrɨgwajahaa' nyɨla dɨragɨnna dadevaaibɨ' gamɨre sɨnnyɨ' baaka naange' wɨmwadɨwa'.

17Sahwarɨ nɨmɨ tɨnna wanganena lɨka yena gamɨre sɨvɨlyɨraaryaba wala'na. Yɨ nɨmɨ wana a'mwe mena bainɨkeibɨsainyɨ. Sara kye sai nɨmɨnyɨ aangasi yɨlanyakaka dɨna “Gɨmɨ lɨka kuna minnera! Nɨmɨ aaya sɨnnawɨnya nebulya'nanyainyɨ. Yɨ nɨmɨ aaya dɨvidaa'nya nebulya'nanyainyɨ. 18Yɨ nɨmɨ gaala mwaalya'nebwi aaya kaavɨlyainyɨ. Yɨthaa! Kɨgaa' nɨmɨ mena baleinyɨ, kɨrɨ', yɨthaa, yuyagaa' yuyagaa'ne gaala mwaaiheinyɨ. Nɨmɨ barya'ne kiya' lɨmwaga'dɨ Bainɨkeraavɨre Angebanne kiya' lɨmwagake. Yɨ sareinyɨ dɨragɨnnakeinyɨ ‘Aawa,’ kada'mujɨ a'mwe pwai mabalyɨ yadelyɨ. Pwai bainɨkei bainɨkeraavɨreba yagalya'ma'na yadelyɨ. Nɨmɨ ‘Yo,’ kada'mujɨ pwai balɨna yadelyɨ. 19Sarevɨdaa'nyɨ yɨ gɨmɨ pɨkarya nayaa jɨtha'! Yagaala gɨmɨ tɨnna wangamwaanyangɨne' yɨ dahaa' warɨkengɨnesɨ sahɨnɨ dɨvidaa'nyɨ yɨma'naabathennajɨ jɨthaka! 20Yɨ gɨmɨ tɨnna wangamwaanya sɨlɨngaamɨnya ata purɨdaa'nyɨ pwaraala daza nɨmɨre aangasɨrɨ wa'dɨsɨyannajɨ laamɨvananya' yɨlakya'ne golɨya kɨnɨnnaka ata purɨdaa'nyɨ pwaraala dazannajɨ yɨ Gotɨyai yoimavajalɨkurakya dazanne aaya kaavɨlya' daresɨ. Sɨlɨngaamɨnya ata purɨdaa'nyɨ pwaraala daza yɨ sa Kɨraazɨtɨyainyɨre kusɨlaanyangɨyara anga ata purɨdaa'nyɨ pwaraalyangɨ mwaalyaraavɨre mamaayara. Yɨ laamɨvananya' yɨlakya'ne golɨnaka ata purɨdaa'nyɨ pwaraala daza Kɨraazɨtɨyainyɨre kusɨlaanyangɨyara anga ata purɨdaa'nyɨ pwaraala sangɨ mwaalyare.”

Currently Selected:

Wɨjalangasakyaꞌ 1: byr

Highlight

Copy

Compare