Wɨjalangasakyaꞌ 14

Sipɨzipɨya Dɨwɨnyare daata mudɨke' desa'nesɨ.

1Nɨmɨ tɨnna ayɨna wanganna. Yɨthaanyi! Mugunya Saayonɨ Sipɨzipɨya Dɨwɨnyai daa'dɨ'nyɨ yɨ a'mwe kwalaalya (144,000) sara sahwalyɨ ye'mwannadaa'dapi tɨnna wanganna. Sahwara kumɨre yamengɨ Dɨwɨnyarɨne yayasɨ yɨ gannya Ganɨmaangerɨne yayasɨ yɨda'nɨkera mwaaiha'. 2Yɨ purinya nawɨ'nya Sɨgunyavɨdaa'nyɨ kyɨnnɨgavɨwa' nɨmɨ kadɨka wɨ'nɨwa. Purinya sa' aalya naange aalɨjaka yɨnnadevaaibɨ', yɨ yɨ'munya pida jaka naanga yɨnnadevaaibɨsa'. Nɨmɨ purinya daza' kadɨka wɨ'nɨwe' yɨ sa' pɨradaza'bɨsavɨ. Yɨ sa' arɨnga a'mwera gitaaya tadaapi pɨradazɨyagaala yɨnnadevaaibɨsa'. 3Sahwara Gotɨyare kingɨnamwaalyɨsavɨ kusɨmagɨjɨ yɨ daraai daraala gaala kɨnɨnnakeraavɨ tɨnnyarɨjɨ a'mwe naangeraavɨ tɨnnyarɨjɨ saba daata mudɨka pɨrɨ' dɨna yɨvanɨga'. A'mwe Kwaakevakɨyaraavɨ a'mwe (144,000) kwalaalya dazara ayɨna mubɨnɨkera yune sahwara daata daza' yawɨramaapɨnere. Aane pwai kwai aawa. 4A'mwe dazara sahwara a'mwe sajɨ gɨrɨkita'nanya sabwi yevera mɨ'. Sare' dare'nanyɨ. Sahwara sɨdɨraaya nawɨ'nya mwaaidɨvɨtabaaibɨsara Gotɨyarɨ yagalya'mavetara mɨ'. Kwaakevakɨya kayaa'nanya saburaavɨ lɨmwagetara mɨ'. A'mwe dazara sahwara Dɨwɨnyai “Saburɨ kaanya wɨma!” dada yadevanyarɨ mɨdɨnna yadɨvɨsare. A'mwe dazara sahwara a'mwe pwaraayawɨdaa'nyɨ Gotɨyai ayɨna mubakere. Gotɨyai gannyaraavɨ maarakera, Dɨwɨnyai kwarɨjɨnera. Yɨ tɨka munne aaya mudɨ'nanya Gotɨyarɨna wɨjayaatabaaibɨ' sahwara Gotɨyalyɨ Dɨwɨnya Sipɨzipɨyalyɨ saraarera aaya mudɨ'nanyara mwaaiha'. 5Sahwara kumɨre maangevɨ kwaasɨ yagaala kunera. Kwaasɨ yagaala majadɨvɨsara. Sahwara yɨwetawakya maayara.

Ejelɨya daraai dalyara desa'nesɨ.

6Yɨ ejelɨya pwai sɨgunyavɨ tɨnnyaba kavɨlakuwa' nɨmɨ tɨnna wanganna. Sai yagaala tewaanya' yuyagaa' yuyagaa'ne' kɨnɨnnakei. Yɨ sai yagaala daza' a'mwera kwaakevakɨ mwaaihasaraavɨ wɨjɨwaakya'nei. Sai ajɨmya yuyangɨya gazasavɨyaraavɨjɨ yɨta gazavaasavaakɨyaraavɨjɨ yagaala ge gejɨyaraavɨjɨ kɨlaaka nabinabinyajɨyaraavɨjɨ wɨjɨwaakya'nelyɨ. 7Sai maangwɨraaya jaka dɨragɨnna dara dɨna “Yɨrɨkegaa' mena yɨma'nɨwa'. Gotɨyai a'mwe yuyaraavɨ kotɨyavɨ maryawɨbwarya'ne'na sarɨna lɨka nayaa yadɨvɨ' gamɨnne yaya' munyaba dɨmakɨlyi! Byaanna kɨnɨnnakerɨ yɨlaaya ji! Sɨgunya' sasɨ kwaakesɨ saalaalyasɨ aalɨyɨmɨnya yuya kɨnɨjɨ yavɨkaryaakei Gotɨyarɨ lotuya nayaa ji!”

8Ejelɨya aaya mudɨ'nanyai mena pɨlakuna wɨna kyɨwa' munyaba ejelɨya pwai mɨdɨnaabɨna yaka dɨna “Anga naanga Bavɨlonɨ sa' kayaaka yada mena bwala'mwa'. Mena bwala'mwa'. Anga naanga Bavɨlonɨ dazahɨba yadevwi a'mwe ajɨmya yuyangɨyara gamɨre gɨrɨkita'nanya dɨragɨnyabwi mɨdɨnya'na yɨ dare'bɨsasɨ. Sa' waainɨya dɨragɨnya' wɨjavadaasɨ sahwara nyɨna. Kɨrɨ' sare'na Gotɨyai yuyaraavɨna sɨnna tɨke' wɨdaya'ne' yɨma'nɨwakesɨ.”

9Yɨ dɨvidaa'nyɨ ejelɨya pwai saraarɨ mɨdɨnaabɨna yaka jaka dɨragɨnna dara dɨna “Nabaai a'mwe kwai sɨgyaarya aaya mudɨ'nanya dazarɨna yɨ gamɨre a'mwa'mwerɨnajɨ lotuya yajai yɨ ‘Baave' yamevɨ maarɨde' dɨngaka? Asavɨ maarɨde' dɨngaka?’ dada maarojɨ 10yɨ yajai gamɨ sahwai waainɨya pɨrɨ' nadelyɨ. Waainɨya daza' yɨ Gotɨyare sɨnna tɨka wɨdaya'na. Gotɨyai aayagaa' aalyasɨ waainɨya sasɨ ye'mwagakya yaka mɨ'. Aawa. Nabaai sai waainɨya sa' gamɨre sɨnna tɨke' yɨ kaapɨya kayaa'nanya' tɨvɨkɨrya'nevɨ dɨmavadelyɨ. Sara dɨmavawɨjaavɨna kyojɨ a'mwe dazai sɨgyaaryare baavanakei yune nadelyɨ. Yɨ a'mwe dazai daanga kayaa'nanya' maaradelyɨ. Yɨ ejelɨya nawɨ'nyaraavɨre tɨnnyarɨjɨ yɨ Sipɨzipɨya Dɨwɨnyare tɨnnyarɨjɨ dɨka awitalange'na warɨkevɨ sɨla saalɨpaaya nadevɨ kayaa'nanya daza' maaradelyɨ. 11Yɨ jɨsa' yida dɨka dazavɨ yɨ sareraavɨna daange' wɨjaavɨna. Yɨ jɨta daza' nabaai yuyagaa' yuyagaa' yimwaainagothe'. Yɨ a'mwe dazara sɨgyaaryarɨ gamɨre a'mwa'mwerɨjɨ lotuya yadɨvɨsarajɨ baave' gamɨnne yayavɨne' maarajai gazaizalyɨ sara nyɨlyavɨjɨ sawɨsavɨjɨ kave kwaamusabwi maapɨ'dera mɨ'.”

12Sasare dazabwi yɨma'najavɨ yɨ Gotɨyare a'mwe tewaanyara dɨragɨnna daapɨka! Yɨ a'mwera Gotɨyare kɨwɨnya mɨdɨnna, yɨ Jizaazarɨ dɨragɨnna lɨmwagapɨjara dɨragɨnna daapɨka!

13Yɨ nɨmɨ kadɨka wɨ'nyɨna yadaazɨ Sɨgunyavɨdaa'nyɨ maangwɨraaya pɨrɨ' dara dɨna “Pɨkarya dara jɨtha'! ‘Dahaa'daasɨ a'mwera Naangerɨ dɨragɨnna wɨlamwaaidɨvɨ' jalɨkurakadɨvɨ' yɨ balapɨjɨ a'mwe bainɨka dazara yɨ sahwara yɨlaaya yadɨvɨ' tewaanaanga winadere.’ ” Kurya Tewaanyai kwalyɨ dɨvanɨ' “Yo, yɨ sahwara yadɨvɨta yagɨyagɨ wawɨnya daza, daanga maa'dɨvɨta daza yagalya'mavapɨjɨ yɨ kave mwaaibɨ'dere. Sare' dare'nanyɨ. Sahwara yaasɨwa' wɨya yadɨvɨ' mɨ'. Aawa. Sahwara tewaanya yadɨvɨta sabwi, yɨ daza' sahwarajɨ ye'mwannɨgwɨya yade'. Yɨ kumɨre dɨragɨnyabwi ku'maayabanna yɨma'naabathesɨ.”

Yɨrɨka Kwaakevakɨ tɨka munne maaryagaa'nesɨ.

14Nabaai nɨmɨ tɨnna ayɨna wanganna. Yɨthaanyi! Yɨraaya yaaka pɨrɨ' wa'dɨsɨ yɨ pwai yɨraayavɨ A'mweraavɨne Kaimɨraayaibɨsai yɨlamwaalɨ'. Sai gamɨre mɨnyagɨnyavɨ kingɨmwaaihɨ'nya golɨya' kɨnɨnnakei. Yɨ sai gamɨre asɨrɨ kwaari'masɨ' wana lɨka gurɨmaanga dɨ'bwarakɨnɨki' lɨmwagakei. 15Yɨ Gotɨyare Anga nawɨ'nyavɨdaa'nyɨ ejelɨya pwai walyaabɨna yaka yɨraayavɨ mwaalɨka dazarɨ jaka naanga dara dɨna “Gɨmɨre kwaari'masɨsɨ witɨya tɨka munne dɨthaka! Yuya tɨka munne Kwaakevakɨya mya mena yɨlake'na dɨthaka! Yɨ dahaa' yɨrɨka tɨka munne daza maarya'negaakɨ.” 16Sara kudɨwa' a'mwe dazai yɨraayavɨ mwaalɨkei sai gannya kwaari'masɨ' lɨmwagarakisɨ tɨka munne Kwaakevakɨya mya yɨlake davɨna yaka maryɨ'bwarakɨna yɨwakelyɨ.

17Yɨ ejelɨya pwai Anga nawɨ'nya Sɨgunyavɨ mannɨkevɨdaa'nyɨ walyaabɨna. Nabaai sai kwalyɨ kwaari'mata dɨ'bwarakɨnɨki' lɨmwagakerɨnera. 18Yɨ nabaai ejelɨya pwai kwaraanyaba yagalya'mavaka kaanna bɨna. Yɨ ejelɨya dazai dɨkevɨ maremwaalya'ne dɨragɨnya' kɨnɨnnakei. Yɨ sai ejelɨya kwaari'mata lɨka gurɨmaanga dɨ'bwarakɨnɨki' lɨmwamwakerɨ jaka dɨragɨnna wɨdɨna mu'nyadɨvɨsaraavɨna “Gɨnnya kwaari'mata dazɨ' lɨka dɨ'bwarakɨnɨki' maara'gɨzɨ yuya tɨka munne Kwaakevakɨya gɨraipɨwɨlyabaarɨya dɨtha'! Yɨ mari'bwarakɨna yɨja warɨna ya! Gamɨre tɨka munne yuya, gɨraipɨya yuya mya mena yɨlake'na sara dɨthavamari'bwarakya!” 19Sara wɨdɨna kyɨwa' ejelɨya dazai gamɨre kwaari'masɨ' lɨmwagaka yɨ Kwaakevakɨya yuya tɨka munne wɨla gɨraipɨyavɨya yɨme'nya'bɨ' kɨhɨmavamaa'na yaka yɨ mari'bwarakɨna. Yɨ sai kɨhɨmavamaa'na, sɨla naanga gɨraipɨya tɨma'mwanga ya'nevɨ kusawɨ tɨka munne daza mari'bwarakɨna. Sɨla naanga daza' yɨ Gotɨyare sɨnna tɨka wɨdayasɨ. 20Yɨ anga naangeba mwasɨlaa warɨka sɨla dazavɨ pwai gɨraipɨya yuya tɨma'mwanna. Sara yadaa'nyɨ sɨla savɨ mwasɨlaa tawe' walyaabɨna. Tawe walyaabɨna yada kaanya kuna kuna wawoka yune 1,600 sɨtaathɨyamɨya (300 kilomitaayavɨna) yaka munyaba ozɨyaraavɨre maangeyabanna (a'mwe tutaayai yunebanna) yɨnɨga wi'na yɨlaabɨna yɨwakesɨ.

Currently Selected:

Wɨjalangasakyaꞌ 14: byr

Highlight

Copy

Compare