Jenɨzɨzɨ 31
31
Jaikopɨ Laivanɨmɨna lɨkaanya wɨyaa'.
(31:1-21)
1-16Jaikopɨ dara wɨ'nake' “Laivanɨmɨre gawaalɨvava ‘Nenɨmaangere gɨlyɨvɨta yuya maa'delyɨra,’ dathɨvanɨgava!” Mi'na daka nabaai dara wanganake' “Laivanɨ jɨkurya nyɨvanɨkei daaka!” Sara kada' Gotɨyai Jaikopɨmɨ wɨda' “Gɨnnya angewɨnna ayawɨnna dɨwodera. Nɨmɨjɨ wawakadera.” Mi'na kuda' Jaikopɨ Rasalavɨjɨ Lɨyaavɨjɨ wɨdɨna “Nɨmɨ kɨrɨnɨmaangerɨne wawɨnya naanga yadɨnyainyɨ. Wawɨnaangeinyɨ yadaari gamɨ kwaasɨ nyɨdadelyɨ. Kwaasɨ kanyɨda' Gotɨyai kɨrɨnɨmaangere jɨlɨkyaawarya kwalaalyara nyɨjaawa'dɨ'. Nabaai Gotɨyai nyɨdɨwa' ‘Gɨnnya angewɨnna dɨwona!’ ” Sara wɨdɨna kya' Rasalasɨ Lɨyaasɨ sawaai wɨdahi “Gotɨyai sara gɨthɨwake' sara jɨ!”
17-21Mi'na kudahi Jaikopɨ “Nɨmaamaanga Aazakɨ Kainanɨ mwaalyaryawɨnna wɨma!” daka gannya balaangengɨ gannya kaimɨraayangɨ jɨlɨkyaawaryangɨ maarɨna yaka wawa'. Sa' Rasala' ganɨmaangere sɨvuya'bɨsa' kuka maarɨna. Kuka maarɨna kya' Laivanɨ navɨka mwaala'.
Laivanɨ Jaikopɨmɨ mɨdɨnyaa'.
(31:22-42)
22-42Laivanɨ “Jaikopɨ kaanna wɨna kyɨwa'dɨ',” wɨ'naka Jaikopɨmɨ mɨdɨnna ya'. Kaanna wɨna wɨna, sawɨta ati ata purɨdaasɨ pwaraai kajɨnna' tusavɨ mɨjaahalaka wɨda' “Baarɨ' yɨwaana? Kwaasɨ baa'na yagɨna nyɨraavaangewaarɨ wɨla yɨrakɨnɨkewaarɨ baa'na makwasɨwaabɨna? Nabaai nɨmɨre sɨvuya'bɨsa' kuka baa'na maryawalyaadɨna? Lɨka be'na yulyaragɨna wɨwa'dɨ? ‘Nɨmɨ Jaikopɨmɨ mala tamɨma!’ dena sawɨsavɨ waja ya'nyawaaihe. Gɨmɨre Gotɨyai waja nyɨjawaalɨ' ‘Jaikopɨmɨna kave duthana!’ ” Sara kuda' Jaikopɨ wɨdɨna “Gɨmɨre sɨvuya'bɨsa' kuka mamaryɨwa'de. Lɨka yulyarena dɨwa'de ‘Laivanɨ garaavaangewaarɨna nanyɨpalamaaradɨka!’ ” Mi'na kuda' Laivanɨ Jaikopɨmɨre gɨlyɨvɨsangɨ tɨnna wanganaka sa' gamɨre sɨvuya'bɨsa' Rasala' lɨka yulyakake' mabɨrɨmaarya'. Mabɨrɨmaaryakegaa' Jaikopɨ Laivanɨmɨ maanga wɨda' “Baa'neka! Gɨmɨre wawɨnya yadaari gɨmɨre jɨlɨkyaawarya kwala naanga yɨma'nyɨna kye' nɨmɨ mamaranyena. Gɨmɨre jɨlɨkyaawarya kunewɨ bɨrena bɨrena nɨmɨre gɨzaave. Sa' yuyagaa' nɨmɨnyɨne kwaasɨ yagɨ. Gɨmɨ kwaasɨ kyagɨ nɨmɨre Gotɨyai nyɨgaimwagaka sawɨsavɨ mayagaala gɨzawaalɨ',” wɨdɨna ya'.
Jaikopɨjɨ Laivanɨjɨ saraai “Nya'mwei,” dɨnyei.
(31:43-55)
43-55Laivanɨ wɨda' “Nyɨraavaangewaalyɨ, aataasɨ, aataravajɨ nɨmɨre jɨlɨkyaawaryajɨ mwaaiha'. Sa' baarɨ' yɨjɨwa?” Sara kuda' Jaikopɨjɨ Laivanɨjɨ yagaala naanga kadɨnagi Laivanɨ wɨda' “Naarɨmɨ geva geva kamwaalakwolyɨ Gotɨyai nehwanganadelyɨra. Nyɨraavaangewaarɨna kayaa'na kamaremwaala'gɨzɨ Gotɨyai gwanganadeigɨnyɨra. Gɨmɨ a'mwe pɨrɨvɨ kamaara'gɨzɨ gwanganadelyɨra.” Mi'na kuda' Jaikopɨjɨyara sɨla marakɨna kye' Laivanɨ wɨda' “Sɨla naanga tɨhwawɨnya maramadakɨwaasa' gɨmɨnyɨna malya'na nɨmɨ mwavɨlayɨ yɨdeinyɨ. Nabaai nɨmɨnyɨna malya'na gɨmɨ mwavɨlayɨ jɨtheigɨnyɨra. Gotɨyarɨna gɨthɨwe' nebulyasɨ.” Sara kuda' Jaikopɨ wɨda', “Sɨla naanga mwavɨlayɨ yɨdeinyɨ malya'nesɨ.” Jaikopɨ nebwina wɨdaka jɨlɨkyaawaryarɨ Gotɨyarɨna tamaka yɨdɨka yɨna kya' Jaikopɨjɨ Laivanɨjɨ nagi. Yɨrɨke' kavura' Laivanɨ se wa'mwarakei dɨkaa'na yaka garaavaangewaarɨjɨ kɨrɨmɨre kaimɨraayangɨjɨ sangɨ yɨlaaya yɨgala'. Yɨlaaya yɨgalaka yagaala tewaanya wɨdaka gannya angewɨnna wawa'.
Currently Selected:
Jenɨzɨzɨ 31: byr
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.