Galezɨya 6

“Pware taanga dɨmakwona!” wɨdake'nesɨ.

1Nya'mweihi, sarɨmɨ dara yennɨpɨja' “O, nemɨjɨyarɨ yɨwetawakya' jɨma'nɨwaka!” Gotɨyare Kuryarɨ mɨdɨdɨvɨsaihi sarɨ nayaa yavada'gaina jɨla! Bɨrala, maanga nudɨpɨdɨka! Aawa. Kave bwiwanna wɨdɨna jɨla! Gɨnnya mwaalyabwi nayaa jawɨka! “Nɨmɨ kave mwaala'mujɨ Saataanɨ avaalyabwi yɨde'na nanyɨmwaaihadɨka!” da'gɨzɨ Kuryarɨ dɨragɨnyavɨ dɨmwaala! 2Da'na yɨhɨthɨvanɨge. Gazaizarɨ taanga widaa'nyɨ wɨgaimwange'na taanga sa dɨmakama! Duhaimwana! Sara ya'gɨzɨ Kɨraazɨtɨyare kɨwɨnya' mi'na jɨthesɨ. 3Sare' dare'nesɨ. Pwai myawɨranna! “Pwara kayaa'na yɨvanɨgasara maalɨkera, nɨmɨ naangeinyɨ. Dazabwi myɨ yɨdeinyɨ.” Sara yawɨ'de sa' kwaasɨ yawɨ'devulyɨ. 4Kɨrɨ' gazaizai gannya yɨvanɨkengɨ nayaa yawɨbwata yannelyɨ. “Tewaanyasɨ,” dozɨ sare'na yɨlaaya yannelyɨ. Sai myawɨrina “Pwai kayaa'na yɨvanɨke', sainyɨ tewaanna yɨvanɨgeinyɨ,” sabwi myawɨrannelyɨ. 5Aawa. Gazaizai gannya yɨvanɨkengɨna Gotɨyai yawɨbwata yadelyɨ.

6Kɨraazɨtɨyare yagaala yɨhɨzɨwaakadɨvɨsaraavɨ pwaihi kadɨka wɨ'nadɨvɨsaihi tewaanya yuya jaapaina yɨpɨneihɨlyɨ. 7Sɨmunya kayaa'nanya' myawɨpɨna! Gotɨyarɨ kwaasɨyara pihadɨka yɨpɨjaraavɨna Gotɨyai yuna yawɨ'manɨkelyɨ. Sare' dare'nesɨ. A'mwe pwai burɨdaza yɨ sahɨnɨ maaradelyɨ. 8Sai kayaa'nanya burɨdazai kayaa'nanya maaradevaaibɨ' pwai a'mweraavɨre sɨmunyabwina gamɨre kɨlaakevɨ yajai kayaaka yɨgainadelyɨ. Kɨrɨ' pwai tewaanya burɨdazai tewaanya maaradevaaibɨ' pwai gamɨre kuryarɨ tewaanya burɨdazai yɨ Kuryai Tewaanyarɨ yuyagaa' yuyagaa'ne gaalyabwi maaradelyɨ. 9Nemɨ tewaanyabwi yadaa sɨmunya waryaanya myawɨraanna! Sare' dare'nesɨ. Kuryarɨ dɨragɨnna kuna yaajaina Gotɨyai dahɨlakakegaa' tewaanyanna maraadeinera. Sare'na nayaanna yadawaajɨ maa'na maneyɨnanna! 10Sarevɨdaa'nyɨ yuya'na yaajahaa' yuyaraavɨ tewaanna wiaana! Yɨ, Kɨraazɨtɨyarɨ lɨmwadɨvɨsabulyɨyaraavɨ kɨnɨdakaavɨ dɨragɨnna tewaanna wiaana!

Yagaala aaya'nesɨ.

11Pwai nɨmɨre yagaalya' kyavɨkaryɨwa' dahaa' pɨkarɨyɨsarɨ' maarena nɨnnya atasɨ pɨkarya yɨhyavɨkarivanɨge. Nɨmɨre pɨkarya naanga danganyɨla! Pɨkarya sa tɨnna wanganapɨjɨ “O, Polɨ nebwina neyavɨkariwaka!” dɨthɨnyide'nanyɨ. 12A'mwera kɨlaaka mwasɨmagɨnna yawɨ'na “Kɨraazɨtɨyarera yawɨ'manɨga' ‘Kɨraazɨtɨyai yɨsavɨ kabala' kɨlaaka daya'nebwi maalɨkebwi yɨma'nɨwaka!’ Sare'na sɨnna tɨka wɨda'daawojɨ Juyara kayaa'na naneyɨpɨdɨka!” Nabaai “Sahwara Kɨraazɨtɨyai Jizaazarɨne yɨta yovihɨrarannɨkevɨna maanga nanedɨpɨdɨka!” deva “Sarɨnnya kɨlaakejɨkaavɨ dɨtha'nyɨla!” wɨjɨwaakɨna yɨhyɨvanɨgasare. 13Sare' dare'nesɨ. Kɨlaaka daya'nebulyɨyara Kɨwɨnya yuya' navɨka yadɨvɨ' myadɨvɨsare. Aawa. Sahwara yawɨ'na “Juyara nemɨnyɨna dɨnyɨna ‘Kɨraazɨtɨyarera sahwara kɨlaaka daya'nebwi Galezɨya mwaalyaraavɨ yɨvanɨgasara tewaanyarera!’ dɨnyɨna yɨpɨka!” Sara yawɨ'na yadɨvɨsa'na yɨhɨzɨwaakɨvanɨga' kunnya yaya makimanɨgasara. 14Sabaaibɨ' nɨnnya yaya' makina myɨwɨneinyɨ. Arɨkawɨ. Nemɨre Naanga Jizaazai Kɨraazɨtɨyai yɨsavɨ balakere yaya' makimanɨgesɨ. Yɨ, balake'na Kwaakevakɨyabura kadathɨwaga' sabura manyɨmaremwaalɨke'nanyɨ. Kɨraazɨtɨyai baidaa'nyɨ nɨmɨre sɨmunya aya' balakesɨ. “Kwaakevakɨyaburaavɨna mamwaalyɨ yɨdeinyɨ,” yawɨkeinyɨ, Naangei yɨsavɨ sara balake'na. 15Kɨlaakejɨ' daya'ne' yaasɨwa'nanya', kɨlaalejɨ' madaya'ne' yaasɨwa'nanyasɨ. Gotɨyai mudɨkeinaavɨ nemwaaihade' naangesɨ. Sare'na, Kɨraazɨtɨyai yɨsavɨ balakerɨ yaya' makimanɨgesɨ. 16Yɨhɨthɨwe' yɨvanɨgasaihi Kɨraazɨtɨyareihi, Gotɨyare Yɨzɨrelɨya nebulyaihɨrɨ Gotɨyai gannya kwaamu'nanyaburɨ tewaanya yɨhɨmwaaihana! Gotɨyai kale'na yɨhɨgaimwagana!

17Aaya' yɨhɨthɨma! Aane pwai kwai taanga manyɨjaavanna! Sare' dare'nesɨ. Jizaazarɨ wɨdaayadɨnyainyɨna pwara kayaa'na nyesa'na nɨmɨre kɨlaakevɨ yɨwihwaarya naange warɨkengɨ. Sare'na Apozelɨyainyɨ Kɨwɨnyabulyɨyara taanga manyɨjaavɨpɨna! 18Nya'mweihi, nemɨre Naanga Jizaazai Kɨraazɨtɨyai yuyaihɨre kuryaraavɨ yange'na yɨhɨgaimwagana! Sahɨrɨsɨ. Nebula naangesɨ.

Polɨ

Currently Selected:

Galezɨya 6: byr

Highlight

Copy

Compare