Galezɨya 1

1Nyɨdasaabadeinyɨ Polɨnyɨ yɨkwia da' yavɨkarivanɨge. A'mwera nyɨdasaabadɨvɨtainyɨ mɨ'. A'mwe pwarɨ Gotɨyai kuda' “Polɨmɨ wɨdaasaderɨ dumwaaihya!” kuda' sai nyɨdahɨlakakainyɨ mɨ'. Aawa. Jizaazai Kɨraazɨtɨyalyɨ Gotɨyai Nenɨmaangelyɨ “Apozelɨyaigɨnyɨ gɨthaasakadeigɨnyɨ,” nyɨdahɨla nyɨdahɨlakagɨlyainyɨ. Gotɨya sai Kɨraazɨtɨyai balakerɨ yɨdɨkaavakelyɨ. 2Nɨmɨjɨ neya'mwera Kɨraazɨtɨyarɨ wɨ'nya'nera dava mwaaihasarajɨ Kɨraazɨtɨyare kusɨlaanyangɨyaihɨrɨ yɨhɨthɨvanɨgo “Neya'mweihi!” Kwaaka Galezɨya pɨwɨ pɨwɨ mwaaihasaihɨrɨ “Neya'mweihi,” yɨhɨthɨvanɨgo. 3Nabaai, Gotɨyai Nenɨmaangelyɨ Naanga Jizaazai Kɨraazɨtɨyalyɨ yanga gaimwangebwina yɨhyɨka! Sanɨdaare kwaamu'nanyaburɨ kuna tewaanya yɨhɨmwaaihyɨka! 4Kɨraazɨtɨyai sahwai nemɨre kayaa'nanyanne'na wɨjaavɨnaka bala'. Dahaasa kayaa'nanyaraavɨre kayaa'nanyabwina “Padaihasamaarɨma!” daka bala'. Nemɨre Gotɨyai Nenɨmaangere sɨmunyavɨna bala'. 5Gotɨyai tewaanyabwi sara kya' gamɨre yaya' munyaba makɨlaana! “Yuyagaa' yuyagaa' byaannakeigɨ!” wɨdaana! Naanga sahɨrɨsɨra!

Yagaala tewaanya' gave pɨrɨ'na warɨke'nesɨ.

6Akai. Sarɨmɨnyɨna atɨka maru'na'manɨge. Gotɨyai kyɨhɨthahɨlaka' Kɨraazɨtɨyai yange'na yɨhɨgaimwaga'. Sara kyɨhɨhaimwaga' maalɨkegaa' “Sahwarɨ yagalya'mavaadeina dɨngaka?” yawɨ'dɨvɨ' yagaala tewaanya ge' mɨdɨnya'na yawɨ'manɨgasaihi daa! 7Sare' yagaala tewaanya ge' mwari'. Aawa. A'mwe pwara sarɨmɨre sɨmunya kwalaalya yɨhɨzaavanɨgava. Kɨraazɨtɨyarɨne yagaala tewaanya'na “Nayaa yavada'galaana!” yawɨreva kɨrɨ' maragɨnyɨwamanɨgava. 8Sɨnnawɨ yagaala tewaanya' yɨhɨtho gavesɨra. Nemɨ saina “Yagaala tewaanya aya' waramaryana!” daaza' yagaala tewaanya mudɨke' yɨhɨthaaza' Dɨkevɨ nemarasɨ'nana! Sɨgunyavɨdaasa ejelɨyai mamaayai yagaala tewaanya mudɨke' yɨhɨthaza' Dɨkevɨ wɨmarasɨ'nana! 9Kɨgaa' mi'na yɨhɨtho kɨrɨ' dahaa' ayahi nayaa yɨhɨthɨma! Sɨnnawɨ yagaala tewaanya' yɨhɨtho' mi'na yawɨ'mwaa'. Nabaai dahaa' a'mwe pwai “Yagaala aya' waramaryana!” daza' yagaala ge' yɨhɨthɨvanɨkerɨ Dɨkevɨ wɨmarasɨ'nana!

10Sare' yagaala yɨhɨthɨwe'na dɨna “A'mwera ‘Polɨ tewaanyalyɨ,’ yawɨpɨka!” dadɨ dɨvanɨgeinyɨ daaka! Arɨkawɨ. Gotɨyai nɨmɨnyɨna “ ‘Nebulya' dadelyɨ,’ yawɨrana!” dadɨ dɨvanɨgeinyɨ. “A'mwera nɨmɨnyɨna yɨlaaya yɨpɨka!” yawɨ'mujɨ kwajɨ Kɨraazɨtɨyare yaasɨwa'wawɨnyainyɨ kamwaaimudɨka.

Polɨ Apozelɨyarɨ Kɨraazɨtɨyai wɨdaasakei yɨma'nake'nesɨ.

11Nya'mweihi, sare' nayaa yɨhɨthɨma! Yagaala tewaanya' wɨdadɨnya' a'mweraavɨre yagaala' mɨka. 12Sare' dare'nesɨ. A'mwe pwarɨ mamaarye. A'mwe pwai manyɨjɨwaakya'. Arɨkawɨ. Jizaazai Kɨraazɨtɨyai sahwai nyɨbwarɨdaakwakelyɨ.

13Sare' dare'nesɨ. Kɨgaa' yeinyɨrebwi mi'na wɨ'ne'. Juyaraavɨ Ne sɨnnawɨnyaraavɨrebwi dɨragɨnna mɨdɨdɨ Gotɨyare kusɨlaanyaraavɨ naanna kayaa'na yadɨ “Sahwaraavɨrebwi yuna kayaaka yɨgalɨma!” dadɨ dɨragɨnna sara ye. 14Juyainaavɨrebwi dɨragɨnna yadɨ nɨmɨre Yɨsavaakɨyara nyɨnyakwalaangeraavɨ wavɨla'na ye. Ne sɨnnawɨnyaraavɨre kɨwɨnya sahwara maalɨ'na mɨdɨdaapɨjɨ sahwainyɨ naanna mɨdɨneinyɨ. 15Kɨrɨ' Gotɨyai gevwi yawɨraka nyɨnaangevɨre munyɨkɨ kuna mwaalegaa' “Polɨmɨ yange'na wɨgaimwagɨdeinyɨ,” yawɨraka nabaai, “Nyɨdaayadei yɨma'nana!” daka nyɨjɨvwaramaarya'nei mena nyɨdahɨlakyaa'. 16Sara nyɨdahɨlakaka gamɨregaa' a'mweinyɨ Gawaalɨvaangerɨna nyɨbwarɨdaakwa'. “Nɨmɨnyɨna navɨka yawɨ'dɨvɨsaraavɨ ajɨmya yuyangɨyaraavɨ yagaala tewaanya' Kɨraazɨtɨyarɨne' wɨdana!” daka nyɨbwarɨdaakwa'. Mi'na kanyɨbwarɨdaakwa' sagaa' Naangere yagaalya'na yɨwaarasa'na a'mwe pwaraayawɨnna mwɨye. 17Sagaa' pwara Wɨdaasadera mi'na yɨma'nyaasarera. Dɨvidaasɨ Nyɨdaasakeinyɨ yɨma'neinyɨ. Sagaa' Jeruzaalemɨna Wɨdaasade sahwaraavɨ yɨwaarasa'na myɨlaawie. Aawa. Kwaaka Arevɨya a'mwamaayabanna wawena dɨvi Anga Damaazɨkazɨna ayɨna yagalaawena bahe. 18Naangerɨ kanyɨbwarɨdaakwa' kwarame dawaai da' kanyavɨlava' sagaa' Jeruzaalemɨna Pitarɨ wɨja'neinyɨ angyɨrɨ'maasa'neinyɨ yɨlaawena wikɨya gave dawaai gamɨnyawɨ mwaale. 19Sareinyɨ Wɨdaasade kwalaalyara tɨnna mwanganyena Jemɨzai Naangere gahwaalaangerɨjɨ Pitarɨjɨ saraarɨ tɨnna wangane.

20Sareinyɨ yagaala da' yɨhɨthɨvanɨge' nebulyasɨ. Gotɨyai kadɨka yuya nyu'nadaa'nyɨ “Kwaasɨ yagaala myɨhɨzɨvanɨgeinyɨ. (Daaina!)” yavɨkaryɨweinyɨ.

21Kwaaka Juthɨya Jeruzaalemɨdaasɨ Kwaaka Sɨrɨya Kwaaka Sɨlɨzɨya anga mannɨkebanna wawe. 22Sagaa' Kwaaka Juthɨya mwaalyara Kɨraazɨtɨyarɨ lɨmwadɨvɨsara kusɨlaanyangɨyara nɨmɨre sɨnnyɨkɨ manyanganye'. 23Sarera pwaraavɨre yagaala dara wɨ'nesa' “O, a'mwei kayaa'na neyakei ‘Kɨraazɨtɨyarɨ lɨmwabɨneihɨlyɨ,’ wɨdɨvanɨkei daaka! Sai ‘Sabwi kayaaka yɨgalɨma!’ dakei yagaala tewaanya' duthɨvanɨka!” 24Sara wɨ'nesa'na nɨmɨnyɨna Gotɨyarɨ “Byaannakeigɨnyɨra,” wɨdɨna ye'.

Currently Selected:

Galezɨya 1: byr

Highlight

Copy

Compare