Epazaazɨ 3

Polɨ Maaveraavɨna wawɨnya yake'nesɨ.

1Yuya sa'na Gotɨyarɨ wɨdɨvanɨge. Sainyɨ Polɨnyɨ ajɨmya yuyangɨyaihɨrɨ wɨdɨna “Kɨwɨnya maayaihɨrɨ Gotɨyai yɨhɨmaaranneihɨlyɨ,” wɨdɨna yɨhye'na sɨnna tɨka wɨdavakera kalavuzangevɨ nyɨmwaaihe'. Kɨraazɨtɨyai Jizaazare kalavuzainyɨ. 2Kadɨka mi'na wɨ'nɨpɨja' “Gotɨyai Polɨmɨ wɨdɨna ‘Maaveraavɨne' nɨmɨre yanga gaimwangeburɨne wawɨnya' ja!’ wɨdɨna yakei daaka!” 3Gotɨyai kɨgaa' yawɨ'na “Maaverajɨ nɨmɨrera yɨma'nɨpɨ'derera,” yawɨ'na yake' lɨka yulya'dɨ'nyɨ Gotɨyai nyɨbwarɨdaakwa'. Yoimavajalɨkurakya sabwi pɨkarya maalɨ'na mi'na yavɨkariwa. 4Sarɨmɨ yagaala sa' tɨnna wanganapɨjɨ dara danganyide' “O, Kɨraazɨtɨyai a'mweraavɨna yake' yoimavajalɨkurakya'ne' Polɨ mi'na yawɨ'manɨkei daaka!” 5Dahaa' lɨka yulyarya'ne' gamɨre Wɨdaasade gɨrɨ'maayaraavɨjɨ gamɨnyɨ wɨ'nawɨjɨwaakadɨvɨsaraavɨjɨ Kuryai wɨjalangasakakabaaibɨ' kɨgaa' mɨjɨyɨma'nɨgavya pɨnɨngɨ a'mweraavɨ sara myɨbwarɨdaakwia'. 6Yoimavajalɨkurakya' dara dɨnɨkesɨ. Ajɨmya yuyangɨyara yagaala tewaanya' wɨ'nadɨvɨ' Kɨraazɨtɨyai Jizaazarɨ lɨmwadɨvɨ' sahwarɨ wɨlawɨmwaaihade'na sahwarajɨ Juyarajɨ Gotɨyare tewaanya yuyanna ye'mwannamaapɨ'dere. Nabaai kɨlaaka gavejɨkɨyara ye'mwannamwaaibɨ'de. Nabaai Gotɨyare yune naanga nebulya'na wɨja' ye'mwannajapalamaapɨ'dere. Sara dɨnɨkesɨ.

7Yagaala tewaanya sa' wɨdadɨnyainyɨ. Gotɨyai yange'na tewaanna nyɨgaimwada yange' nyɨjaavada gamɨre wɨdaayadɨnyainyɨ nyɨmwaaiha'. Sai dɨragɨnna yaka wawɨnya sa' kanyɨjaava' yagaala tewaanya' dɨragɨnna wɨdadɨnyainyɨ. Nɨmɨ yawɨ'manɨge. 8Nɨmɨ maalɨkeinyɨ. Kɨraazɨtɨyare tewaanya pwara naangerera. Maalɨkeinyɨ kɨrɨ' Gotɨyai yange'na tewaanna nyɨgaimwada nyɨda' “Kɨraazɨtɨyare tewaanaanga naangenna ajɨmya yuyangɨyaraavɨ duthathe'na gɨthaasɨwa. 9Nɨmɨ tewaanyabwi sɨnnawɨdaa'nyɨ nɨmɨnyɨ lɨka yulyakyenya' dahaa' yoimavajalɨkurakyabwi yuyara wangabɨ'de'na gɨthaasɨwa.” Gotɨyai yuyangɨ wakyaakei sara yakelyɨ. 10Lɨka yulyaryaake' dahaa' ku'maayaba warɨ'. Gotɨyai “Kɨraazɨtɨyarɨ wɨ'nya'nera kusɨlaanyara mi'na maaresabwina Sɨgunyavɨya naangerajɨ dɨragɨnyarajɨ dara wangabɨka! ‘Gazarazaraavɨ Gotɨyai tewaanna yadelyɨ. Sɨmunnakei yawɨta tewaanaanga yawɨ'dela!’ ” daka gannya yanga gaimwangebwi nyɨjaava'. 11Nabaai, Gotɨyai kwaaka mwakyaakegaa' mi'na yawɨryaake'na sara yake'nanyɨ. Gotɨyai sara kyawɨryaa' Kɨraazɨtɨyai Jizaazai nemɨre Naangei sara yake'nanyɨ. 12Sarevɨ lɨmwadaa gamɨnyɨ wɨlamwaaiho'na nemɨ lɨka myadaa Gotɨyai mwaalɨkewɨ gazagaasagaa' wɨdadaanya'nanyɨ. 13Sare'na dɨragɨnna yɨhɨthɨma! Maaveihɨrɨ yɨhɨgaimwamanɨge'na pwara kayaa'na nyɨvanɨga'. Sare'na yawɨta kwalaalya myawɨpɨna! “Kɨraazɨtɨyarebwi yagalya'mavaana!” myawɨpɨna! Sarɨmɨ tewaanna dɨmwaalyide'na daanga nyɨvɨmanɨke' yɨ sa' sarɨmɨre byaannyasɨ.

Kɨraazɨtɨyai nemɨnyɨna kale wiade'nesɨ.

14Gotɨyai tewaanna yaka sare'na kwadaai gɨlena Nenɨmaangerɨ wɨdɨvanɨge. 15Sai Nenɨmaangei mwaalɨke'na Sɨgunyavɨya yuya kuvɨnɨmaangerajɨ Kwaakevakɨya yuya kuvɨnɨmaangerajɨ saraavɨne aaya kaavɨlyabwi wo'nɨkesɨ. 16Sarɨmɨnyɨna “Sarei gamɨre dɨragɨnya yuyangɨ gamɨre byaannyaburɨne aaya kaavɨlyanna sarɨmɨre kurya kusawɨnyara dɨragɨnna yɨvaimwannemwaaibɨka! Sarɨmɨre munyɨkaavɨ gamɨre Kuryai dɨragɨnya sa' yɨhɨzaavojɨ sarɨmɨre kuryaraavɨ dɨragɨnyaraavɨ yɨhɨmwaaihana!” dena wɨdɨvanɨge. 17Kɨraazɨtɨyarɨ nayaa lɨmwadɨvɨsavɨna sarɨmɨre sɨmunyangɨ Kɨraazɨtɨyai kuna wɨlayɨhɨmwaalana! Yɨsare pwipula kwaakevɨ dɨragɨnna waayɨkabaaibɨ', nabaai, ange' dɨragɨnna wɨdaakunɨkabaaibɨ' kale nayaa yɨhyada dɨragɨnna jawɨramwaalyɨla! 18Sara yapɨjɨ Gotɨyare tewaanya yuyarajɨ Gotɨyare dɨragɨnya' maa'dɨvɨ' dara jawɨramaarila! “Ai, nemɨnyɨna Kɨraazɨtɨyarɨ tewaanya wɨvu'nade naange' daaka!” Yuya bwakulaawɨka bwakulaawɨka aagangɨ wavɨlavɨkesɨra. Naangaangesɨ kale sa'. Sare'na sarɨmɨnyɨna “Gotɨyai gannya dɨragɨnya' wɨjaavana!” dena sahwarɨ wɨdɨvanɨge. 19Kale yada yuya' yɨnahu myawɨri yɨpɨne' Kɨraazɨtɨyarɨ kale yade' jawɨramaarila! “Gotɨyare yuya gamɨ sarɨ yuneba warɨkenna nemɨre munyɨkaavɨ, sɨmunyangɨ yuneba wɨlanewarana!” dapɨjɨ sara jawɨramaarila!

20Gotɨyare dɨragɨnya' nemɨre munyɨkaavɨ yade'na nemɨ Gotɨyarɨ widanganaaja yuyangɨjɨ yawɨraaja yuyangɨjɨ wavɨlavade naanga naanga yadelyɨ Gotɨyai. 21Sarerɨ “Byaannakeigɨ!” wɨdaana! Gotɨyai kuda' Kɨraazɨtɨyai Jizaazai yuyaraavɨna balake'na Gotɨyarɨ “Byaannakeigɨ!” wɨdaana! Kɨraazɨtɨyarɨ lɨmwange'nera kusɨlaanya yuyara “Byaannakeigɨ!” wɨdɨpɨka! Dɨvi yuyagaa' gazagaasagaa' waragothehaa' yuyaina sara wɨdaana! Naanga sahɨrɨsɨra.

Currently Selected:

Epazaazɨ 3: byr

Highlight

Copy

Compare