Epazaazɨ 1

1Polɨnyɨ yɨkwia da' pɨkarya yavɨkarivanɨgeinyɨ. Gotɨyai gamɨre sɨmunyavɨ mena kanyɨdahɨlaka' Kɨraazɨtɨyai Jizaazai Nyɨdaasadeinyɨ yɨma'ne Apozelɨyainyɨ. Gotɨyare tewaanyaihɨrɨ Gotɨyai yɨhɨthahɨlakakeihi Anga Epazaazɨ mwaalyaihɨrɨna yavɨkarivanɨge. Kɨraazɨtɨyai Jizaazarɨ wɨlamwaaihasa'na Kɨraazɨtɨyarɨ dɨragɨnna lɨmwadɨvɨsaihɨrɨna yavɨkarivanɨgeihɨlyɨ. 2Gotɨyai Nenɨmaangelyɨ Naanga Jizaazai Kɨraazɨtɨyalyɨ sanɨdaai yanga tewaanna yɨhɨgaimwagika! Kɨrɨmɨre kwaamu'nanyabwi yɨhwarana!

Kɨraazɨtɨyarɨna Gotɨyai nemɨre kuryaraavɨna tewaanya nejaavade'nesɨ.

3Kɨraazɨtɨyarɨna Gotɨyai Kɨraazɨtɨyarɨ wɨlanemwaaihake'na Sɨgunyavɨya tewaanya naanga yuya nemɨre kuryaraavɨna yanga nejaavakengɨ. Sare'na Gotɨyarɨ nemɨre Naanga Jizaazai Kɨraazɨtɨyare Ganɨmaangerɨ tewaanya yɨlaaya maryaana! 4Sare' kɨgaakuna Gotɨyai Kwaakeva' mwakyaakegaa' nemɨnyɨna yawɨ'na “Sahwara nɨmɨrera yɨma'nɨpɨka! Nyɨbwaalɨvɨ wɨlamwaaibɨ'de'na sahwara tewaanyara yɨma'nɨpɨ'dere. Nɨmɨnyaba yɨwetawakya maayara yɨma'nɨpɨ'dere.” Nemɨnyɨna sara yawɨ'na yakabaaibɨ' mi'na nedahɨlakyaa'. 5Sarei kale wiada tewaanya wɨvu'nada sɨnnawɨ nemɨnyɨna yawɨ'na “Kɨraazɨtɨyai Jizaazai balade'na nɨmɨnyɨ nyɨbwaalɨvaangera wɨmwaaihɨdeinyɨ!” Gotɨyai nayaa yawɨ'na “Tewaanyabwi yɨma! Sara yɨdeinyɨ,” sara yawɨ'na yadei sara nedahɨlakyaa'. 6Kɨraazɨtɨyarɨna yɨlaaya wɨvu'naderɨna Gotɨyai yange'na tewaanna negaimwagakelyɨ. Yɨ sasarei sare yanga gaimwanga byaannakevɨna sahwarɨ yɨlaaya naanga wiaana! 7Kɨraazɨtɨyai sai balaka gannya tawevɨna wɨla nevwɨyɨnɨkeinaavɨ nemubake', nemɨre yɨwetawakyanna marasɨ'nɨkesɨ. Sare'na Gotɨyare yanga gaimwangebwine aaya kaavɨlyanna sara neyakengɨ. 8Sai yanga yanga tewaanna naanga negaimwagakengɨ. Gotɨyai sɨmunya nawɨ'nyavɨjɨ sɨduta tewaanyaburɨjɨ gamɨre yanga gaimwanga sabwi nejaava'. 9Sarei gannya sɨmunyavɨ yawɨ'na “Kɨraazɨtɨyarɨna tewaanna yɨma!” daka sɨnnawɨ sagaa' lɨka yulyasa' wa'dɨ'nyɨ dahaasagaa' gamɨre yoimavajalɨkurakya sa' ku'maayaba neyɨbwarɨdaakwa'. 10Pɨgasa yuyagasa mi'na yaka nawɨ'nyagaa' dahɨlakyaakegaa' sɨnnawɨ yawɨ'na “Kɨraazɨtɨyai balade'na yuyangɨ Sɨgunyavɨyajɨ Kwaakevakɨyajɨ sangɨ kye'mwannemwaaiha'mujɨ Kɨraazɨtɨyai Mɨnyagɨnyai maremwaalana!” Sara yawɨ'na yaakebwina dahaa' yuyangɨna Kɨraazɨtɨyai Naangei mwaalɨ'. Sare' neyɨbwarɨdaakwa'.

11Gotɨyai yawɨ'na “Sara yɨdeinyɨ. Sɨmunya nayaa yawɨra'mujɨ yɨdeinyɨ.” Sara yawɨ'na yake'na yuya yadelyɨ. Sare'na Gotɨyai aayawɨdaa'nyɨ mena yawɨrake'na sare'na nedahɨlakyaa' “Sahwara nɨmɨre tewaanya maapɨka! Kɨraazɨtɨyarɨ kwɨlamwaaiha'mujɨ nɨmɨrera mwaaibɨka!” 12Sare'na nemɨ Kɨraazɨtɨyarɨ wɨ'nona dahaa' sɨnnawɨnyaina Kɨraazɨtɨyarɨ nayaa yemwaaihoine. Gotɨyai yuya sara tewaanna yaka byaannyavɨna Gotɨyarɨ yɨlaaya naanga wiaana!

13Nabaai, sarɨmɨ Kɨraazɨtɨyarɨ wɨlamwaaihasa'na avaaina yɨhya'. Sarɨmɨ yagaala nebulya' kadɨka wɨ'ne'. Sa' yagaala tewaanya' Gotɨyai yɨhɨvadaihasamaarakesɨ yagaala sa'. Sarɨmɨ kadɨka wɨ'neva Kɨraazɨtɨyarɨ kalɨmwagare' Kuryai Tewaanyarɨ yɨ gamɨre yavɨkwajɨkerɨ yɨhɨzaava'. Yɨhɨzaavake'na “Gamɨreinera,” wɨdɨvanɨga'. Kurya sarɨna Gotɨyai yune naanga nebulya'na wɨdakelyɨra. 14Gotɨyai yawɨ'na “Dahaa' sɨnnawɨnyai Kuryai Tewaanyarɨ wɨjaawe'na nɨmɨrera dara yawɨpɨka! ‘O, Gotɨyai nedake Sɨgunyavɨ naanga tewaanya yuya nejaavadelyɨ.’ ” Gamɨreinaavɨ yuna neyaarojɨyagaa'na yuya daza nejaavadelyɨ. Sare' gamɨre byaannya'na yɨlaaya naanga wiaana!

Polɨ Gotɨyarɨ wɨdake'nesɨ.

15Yuya sarevɨ nɨmɨ sainyɨ wɨ'nyɨna “Anga Epazaazɨ mwaalyara Naanga Jizaazarɨ nayaa lɨmwamanɨga'. Gotɨyare tewaanya yuyaraavɨna tewaanya wɨvu'naderera,” wɨ'nyɨna yena 16kwadɨka mwamujainyɨ sarɨmɨnyɨna Gotɨyarɨ yɨlaaya wiadɨ “Su! Su!” wɨdadɨnyainyɨ. Gotɨyarɨ wɨdadɨnyagaa' sarɨmɨnyɨna yawɨ'dɨ wɨdadɨnyainyɨ. 17Sarɨmɨnyɨna “Nemɨre Naanga Jizaazai Kɨraazɨtɨyare Gotɨyai, Nenɨmaanga byaannakei sahwaraavɨre kuryaraavɨna sɨmunya nawɨ'nya' wɨjaavana! Sahwaraavɨna gamɨ sahwarɨ yunebanna wɨjalangasakɨnana!” dena wɨdadɨnyainyɨ. 18Sarɨmɨre sɨmunyangɨ gamɨre baake' kwakojɨ gamɨre nebulya' nayaa danganyide'nanyɨ. Yɨ dara jawɨranganyide'nanyɨ. Sahwai yɨhɨzɨvwaramaarakevɨna yemwaaidɨvɨsabule! Yemwaalya sabwi yawɨramaapɨkajɨ! Nabaai, Gotɨyare byaannyavɨne nawɨ'nyannanya gamɨrenna gannyaihɨrɨna yɨhɨzaavadenge! 19Nemɨ lɨmwange'neinaavɨ gamɨre dɨragɨnya naange' neyɨvanɨkevɨna gannya dɨ'naka naangaange' yuya wavɨla'de' wɨjɨwaainana! Dɨragɨnya sa' naange' 20Kɨraazɨtɨyarɨna yake' avaalyasɨ. Dɨragɨnya sasɨ Kɨraazɨtɨyarɨ bainɨkeraayawɨ yɨdɨkaavaka Sɨgunyavɨ dɨragɨnyaba gamɨre aangasɨmagɨ walamwaaiha'. 21Saba munya ke'beva Kɨraazɨtɨyai Naangei maremwaalɨ'. Kɨraazɨtɨyare dɨragɨnya' maremwaaidɨvɨta yuyarajɨ ga'maanɨya yuyarajɨ dɨragɨnya yuyarajɨ naanga yuyarajɨ saraavɨre dɨragɨnyangɨ wavɨla'desɨ. Nabaai, yaya makinɨkeraavɨ kekyɨrɨ' munyaba maremwaalɨkelyɨ. Dahaasara, Kwaakevakɨya yaya naangejɨyara gaveraavɨna mɨ'. Aawa. Sɨgunyavɨ mwalaadehaasa yaya naangejɨyaraaavɨ Naangei maremwaalɨkelyɨ. 22Dahaasara, Kɨraazɨtɨyai maremwaaideva Gotɨyai yuyaraavɨ wɨmwaaihada Kɨraazɨtɨyare sɨvɨlyɨraarɨ amwi yuyara mwaaiha' maalɨkera. Nabaai, Gotɨyai Kɨraazɨtɨyare kusɨlaanyainaavɨna nemɨre Naangerɨ wɨmwaaihɨwa' yuyanna. Sai nemɨre Mɨnyagɨnyarɨ wɨmwaaihɨwa'. 23Kɨraazɨtɨyare kusɨlaanya' yɨ sa' gamɨre kɨlaakejɨkɨ. Sare' nemɨnyɨ Kɨraazɨtɨyare kɨlaakejɨkɨyainaavɨ nemwaaihɨwakesɨ. Kɨraazɨtɨyai sara nedada gannya dɨragɨnya' nejaavada gannya sɨmunya'na yɨvanɨgoinera. Kɨraazɨtɨyai Sɨgunyavɨ, Kwaakevakɨ yuyangɨ yuneba wɨlamwaaiderɨ gamɨreina yuna wɨlamwaaihoinera.

Currently Selected:

Epazaazɨ 1: byr

Highlight

Copy

Compare