Apozelɨyara 28

Ahu'manna Molɨta mwaalesa'nesɨ.

1Kwaakevakɨ tewaanya mwaalogaa' dara yawɨro' “O, ahu'manna da' Molɨta wo'nɨke' daaka!” 2Burɨka nevadaa'nyɨ yɨrɨla nedadaa'nyɨ saba mwaalyara a'mwe tewaanyara nemɨnyɨna kale maalɨ'na muya'. Sare' dare'nesɨ. Sahwara dɨka yɨra'na yeva “Yuyaihi, dɨkevɨ jɨmwannyɨla!” nede'. 3Kanede' dɨka savɨ kamwaalo Polɨ dɨkewaka marikwa'na yaka dɨkevɨ bulyɨra'na yadaasɨ naawɨnaanyai dɨka kwi'na' dɨkewakɨdaasɨ bwalyuna yaka Polɨmɨre asavɨ tɨka bwalyada'na ya'. 4Tɨka bwalyada'daasɨ naawɨnaanyai gamɨre asavɨ lɨngwɨre'na kya' Maavera saba mwaalyara tɨnna wanganeva dɨne' “A'mwe dai a'mwe pwarɨ tamakakei kɨrɨ' naawɨnaanyai kada'mwa' kayaa'nanyai balannelyɨra. Saalaalyavɨ balanne kwai yɨwakei baladelyɨra.” 5Kadɨne' Polɨ naawɨnaanyarɨ dɨkevɨ marirɨkurasɨ'na yaka kayaa'na myɨma'nyɨ yaka tewaanyai mwaalɨna ya'. 6Tewaanyai mwaalaka mwaalaka kya' “Sare asa' mɨlamakina yade' dɨngaka? Yarai balɨna yadei dɨngaka?” Sara deva yemwaaina ye'. Yemwaaina yemwaaina yeva dara wanganesa' “Ai, tewaanyai kuna damwaalɨka!” Deva sɨduta pɨbwi yawɨ'na yeva dɨnyɨna ye' “A'mwe dai Gotɨyaibɨsalyɨra.”

7Sabadaasɨ aya kɨba wawɨnya pɨnɨ warɨna ya'. Wawɨnya sangɨ gyakwai Pavɨlaazai ahu'manna savɨ maremwaaidelyɨra. A'mwe sai kale wiadaa'nyɨ neda' “Nɨmɨre angevɨ angyɨrɨ'maata nyɨla!” Kaneda' sawɨta dawaai dasavɨ wa'mwa'na yo. 8Pavɨlaazare ganɨmaangei kɨlaakejɨ' dɨ'mudɨnakei lɨkulya tɨnakei warɨna ya'. Gannya yɨ'bɨnyavɨ wa'dɨ'nyɨ ku'dɨkevɨ Polɨ wɨlaka gamɨnyɨna Gotɨyarɨ wɨdaka asawaai kadathɨwaga' nabalya yarai yɨwɨna ya'. 9Sara kya' ahu'manna savɨ mwaalyara nabalɨnakera kadɨka wɨ'neva nemɨnyawɨnna bɨna kye' Polɨ tewaanna yɨna ya'. 10Savɨdaasɨ yanga naanga wɨjaavɨna neyeva dɨvi sɨpɨya' nemakwawakegaa' sɨpɨyavɨ nemɨnyɨne wapaayajɨ aalyasɨ yɨvɨsajɨ saza wɨlakɨna ye'.

Molɨtadaasɨ Anga Romɨnesɨ.

11Lawe dɨkaai dɨ' ahu'manna savɨ mwaalona sɨpɨya pɨrɨvɨ yɨlamwaaina kyo makuna neya'. Sɨpɨya sa' Anga Alekɨzaadɨrɨyadaasa' burɨkegaa' ahu'mannyavɨ warakesɨra. Sɨpɨya sa' yaya' Kaazɨtojɨ Polaakɨzalyɨ gɨra'mɨraalyaraalya' wo'nɨkesɨra. 12Makuna neyaka anga Saairakyuzɨna yɨ'mavaawɨna kya' saba sawɨta dawaai dasavɨ mwaalɨna yo. 13Mwaalɨna kyo sɨpɨya' makuna neyaka anga Rɨzɨyaamɨna yɨ'ma'na ya'. Yɨ'ma'na kya' yɨrɨka pɨrɨvɨ dusɨdaasɨ yɨhusa' yɨna kya' sawɨta dawaai kajɨnna' anga Pyutɨyolaaina sɨpɨya' yarai makuna neya'. 14Makuna kaneya' dara wangano' “Anga davɨ mwaalyara pwara neya'mwera daaka!” Sara kado sahwara yɨwaara'na neye' “Wikɨya pɨrɨ' dava dɨmwaalyideihi daaka?” Yɨwaara'na kaneye' saba mwaalɨna yo. Mena mwaalɨna yona Romɨneina kwaakaanya wɨna yo. 15Kwaakaanya wɨna yadaawojɨ Romɨ mwaalyara neya'mwera nemɨnyɨna kadɨka dara wɨ'nesa' “Polɨjɨ pwara Kɨraazɨtɨyarerajɨ jɨnɨgava!” Sara deva pwara Maaketɨya Aapɨyaazɨna wɨjɨmaa'nyɨna kaneye' pwara anga Se Warya Dawaai Dasabanna wɨjɨmaa'nyɨna neye'. Wɨjɨmaa'nyɨna kaneye' Polɨ kumɨnyɨ tɨnna wanganaka Gotɨyarɨ “Su! Su!” wɨdɨna yaka gamɨre sɨmunyavɨ yɨvaimwangebwi maaraka yɨlaaya yɨna ya'.

Anga Romɨ Polɨ mwaalake'nesɨ.

16Romɨna yɨ'mavaawɨna kyo ga'maanɨyara nede' “Polɨ kalavuzangevɨ mamwaalyɨ yade'na ange'na bɨrojɨ savɨ mwaaladelyɨra. Aawɨlata pwai damelyɨ mwaaladelyɨra.”

17Yɨrɨka dawaai dasa kavura' Polɨ Juya naanga mɨnyagɨnyaraavɨna yɨkabya'na yagaala wɨdaasɨna ya'. Wɨdaasɨna kya' a'mwera yɨkabɨna kye' wɨda' “Nya'mweihi, nemɨre Juyaraavɨna kayaa'na myeinyɨra. Nemɨre Ne sɨnnawɨnyaraavɨrebwi kayaa'na myeinyɨra. Sara mi kye kɨrɨ' Jeruzaalemɨ nyɨvwɨyeva kalavuzainyɨ Romɨyaraavɨ nyɨmarɨmwange'. 18Kanyɨmarɨmwange' Romɨyara nyɨwaaraveva dara yawɨresa' ‘O, a'mwe dai balya'na kayaa'na myakei daaka!’ Sara deva dɨnyɨna ‘Kalavuzangevɨdaasɨ yune'na wɨdasaana!’ 19Dɨnyɨna sara kye' Juyara wɨde' ‘Arɨkawɨnyɨ.’ Sara kude' nɨmɨre anga naanga sɨmagɨnya sahwaraavɨna ‘Kotɨya' yagaainakeinyɨ yɨderera,’ mujena ‘Gave pɨbwina darɨka?’ dena wɨde ‘A'mwe Naanga Sizaai kadɨka nyu'nana!’ 20Sarevɨdaa'nyɨ yɨhwanganɨde'najɨ yɨhɨthɨde'najɨ ‘Jɨkabyɨla,’ sara wɨdasaabɨwa. Sare' dare'nesɨ. Yɨzɨrelɨyaina pwai sɨgunyavɨdaasarɨna yemwaidaanyarɨna senɨya nyɨvwɨyɨnɨkeinyɨ mwaaihe.” 21Kumɨ wɨde' “Gɨmɨnyɨna Kwaaka Juthɨyadaasa paazɨya mamaaryona. Sabadaasara neya'mwera gɨmɨnyɨna maneje'. Gɨmɨnyɨne kayaa'nanyanna sahwara maneje'. 22Manejesaina gɨmɨre yawɨsa' kadɨka wɨ'naanneinera. Sare' dare'nesɨ. Yuyaba a'mwera gɨmɨre Kɨraazɨtɨyareraavɨna kayaa'na wɨdadɨvɨ', nabaai, kaneda'gɨzɨ kadɨka wɨ'naadeinera.”

23Pɨgaa' Polɨjɨ Juyarajɨ dahɨlakesagaa' yɨma'nyɨna kya' gamɨnyawɨnna a'mwe kwala naangera bɨna ye'. Mena bɨna kye' sagaa' mwanyavɨdaa'nyɨ sawɨtɨrɨnyagaa'na Gotɨyai dɨragɨnna nemaremwaaide'na Polɨ wɨjalɨkurakɨna wɨjalɨkurakɨna ya'. Sana yada Ne Mozɨzare kɨwɨnyangɨjɨ Gotɨyarɨ wɨ'nawɨjɨwakyaasaraavɨre yagaalyangɨjɨ Jizaazarɨ nayaa lɨmwagasa'na wɨjɨwaaka'. 24Kujɨwaaka' pwara gamɨre yagaalya' wɨ'nesa' kɨrɨ' pwara mu'nye'. 25Sara yeva yagaala kwalaalya dɨnyɨna kye' yagaala pɨrɨ' Polɨ wɨda' “Kɨgaakuna Kuryai Tewaanyai Gotɨyarɨ wɨ'nawɨjɨwakyaakei Pɨropetɨya Aazaayarɨ nebwina kujaa' sarɨmɨre Ne sɨnnawɨnyaraavɨna Aazaayai sara wɨjaa'. 26Wɨjaake' dara dɨnɨke'

‘Wawa'gɨzɨ a'mwe daraavɨ duthathera

“Kadɨke'na wɨ'nyɨna yapɨjɨ

myawɨramaari jideihɨlyɨra.

Tɨnna wanganna wanganna yapɨjɨ myawɨranganyɨ jideihɨlyɨra.”

27A'mwe daraavɨre sɨduta kayaaka yɨnɨke'na

Kunnya kadɨka taanga tɨla'nyɨna yesara

Kunnya tɨnnya tɨbarya ya'na yesarera.

Sara myesa' kunnya tɨnna kwangabɨthɨka!

Sara myesa' kunnya kadɨka ku'nɨpɨdɨka!

Sara myesa' kunnya sɨduta kyawɨpɨdɨka!’

Gotɨyai dɨnɨka

‘Kunnyabwi yagalya'mapɨjɨ kwajɨ

Nɨmɨnyawɨnna gɨnyɨwannɨpɨjɨ kwajɨ

Kumɨnyɨ nayaa kyavada'gaimudɨka!’ ”

28Yagaala pɨrɨsɨ Polɨ wɨda' “Sarevɨdaa'nyɨ dara jawɨryide' ‘O, Gotɨyai a'mweraavɨne padaihasamaasabwine yagaala ajɨmya yuyangɨyaraavɨ duthaasɨwaka!’ Yɨhɨthɨvanɨge. Sahwara Gotɨyare yagaalya' kadɨka wɨ'nɨpɨ'derera.” 29Polɨ sara kuda' Juyara pwara “Polɨ nebulya'na nedɨwaka,” dadɨvɨ' pwara “Sai kwaasɨ nedɨwaka,” dadɨvɨ' maanga kuna dɨdɨvɨ' ya'ma'na ye'.

30Kwarame pɨrɨwaai wavɨla'daasɨ Anga Romɨ Polɨ ange'na mubada saba mwaaida pwara angyɨrɨ'maata yadɨvɨsa'na Gotɨyare yagaalya' wɨ'nya'ne'na Polɨ yɨlaaya yadelyɨra. 31Yɨlaaya yada Gotɨyai a'mweraavɨ maremwaaide'na wɨdada Naanga Kɨraazɨtɨya Jizaazarɨna wɨjɨwaakadelyɨra. Dɨragɨnna wɨdada pwara gamɨnyɨ mujadɨvɨkɨ “Yagaala sa madɨnna!” Mujɨ yadɨvɨkɨra.

Currently Selected:

Apozelɨyara 28: byr

Highlight

Compare

Copy