2 Tezalonaaika 3
3
Tezalonaaika mwaalyara Apozelɨyaraavɨna Gotɨyarɨ wɨja'nesɨ.
1Neya'mweihi, yagaala pɨnɨ yavɨkaryaana! Nemɨnyɨna Gotɨyarɨ duzɨla! “Apozelɨyaraavɨ wɨgaimwagana! Tezalonaaika nemɨnyaba Naangere yagaalya' kanede' ‘Nebulyasɨ. Byaannakesɨ,’ dɨnona yarai maarobaaibɨ' gazabazaba pwara yarai lɨmwabɨka!” dapɨjɨ duzɨla! 2Nabaai “A'mwe kayaa'nanyara, a'mwe sɨmɨlɨkasɨyara Apozelɨyaraavɨ kayaa'na nyɨpɨdɨka! Apozelɨyaraavɨ padaihasamaarana!” dapɨjɨ sara duzɨla! Sare' dare'nesɨ. A'mwe yuyara Naangerɨ malɨmwagyɨvanɨgasare.
3Pwara Naangerɨ malɨmwagyɨvanɨgata kɨrɨ' Naangei dɨna “Sasara yɨdeinyɨ,” dada sasara yadelyɨra. Lɨmwannɨkelyɨ. Sarei “Kayaa'nanyai (Saataanɨ) Tezalonaaika mwaalyaraavɨ kayaaka nyadɨka!” dozɨ dɨragɨnyaihɨrɨ yɨhɨmwaaihade', dame mareyɨhɨdaavadeihɨlyɨ. 4Sarɨmɨnyɨna Naangerɨ wɨlamwaaiho'na nemɨ dɨragɨnna yawɨ'manɨgo. Ya, Tezalonaaika mwaalyara nemɨre yagaalya' mɨdɨmwaasarera. Nemɨ wɨdaaza' mɨdɨbɨ'derera.
5Naangei sarɨmɨre sɨmunya kyɨhɨbwarɨdaakwojɨ sarɨmɨ dara jawɨryide “Ya, Gotɨyarɨ nemɨnyɨna kale wiadelyɨ. Sare'na Kɨraazɨtɨyai dɨragɨnna mwaalakabaaibɨ' nemɨ dɨragɨnna mwalaadeinera.” Naangei sara yɨhibwarɨdaakwana!
A'mwera wawɨnya ya'nesɨ.
6Neya'mweihi, Naanga Jizaazai Kɨraazɨtɨyai gannya dɨragɨnya' mi'na kanejaava' gamɨre yayavɨ dɨragɨnna yɨhɨthaana! Ja'mwei Kɨraazɨtɨyarei nemɨre kɨwɨnya wɨdo' mamɨdɨnyɨvanɨkeryawɨ mye'mwannamwaaidɨnna! Sai wawɨnya myai yaasɨwa'na mwaalɨkeryawɨnna mwɨnnera! 7Sare' dare'nesɨ. Sarɨmɨnyaba nemɨ yobaaibɨ' sahwaihi yɨpɨja'na nayaa yawɨ'mwaa'. Nemɨ yaasɨwa'na mwaalya myo. 8Aane pwai kwai wɨgaimwange'na wapaaya saza yanga nejaavake tɨka manyo. Yaasɨwa'maarya myo. Aawa. “Pwara nemɨnyɨne'na bɨrɨrya nyɨda'gwaihɨnapɨdɨka!” dona nɨgwia wɨjaavo. Sareina wawɨnya naanga yona. Yɨrɨkevɨ yɨna, sawɨsavɨ yɨna. 9Nemɨ “Tezalonaaika mwaalyara negaimwabɨka!” yawɨraajɨ kwajɨ Naangei sare'na “Wikɨra,” kadathɨka. Kɨrɨ' nemɨ yawɨ'na “Tezalonaaika mwaalyara nemɨ yɨvanɨgovaaibɨ' mɨdɨbɨka!” dona sara yoinera. 10Sare' dare'nesɨ. Sarɨmɨnyaba mwaalonegaa' kɨwɨnya da' yɨhɨzɨwaako. Pwai dɨna “Wawɨnya myɨwɨneinyɨ. Aala,” dɨna yaja' wapaaya mujaavɨnnera! 11Sare' dare'nesɨ. Sarɨmɨnyɨna kadɨka dara wɨ'nɨwo' “O, Tezalonaaika mwaalyara pwara wawɨnya myadɨvɨ' yaasɨwa'na mwaaihasara daa'! ‘Pwaraavɨre wawɨnya maremwaalɨma!’ dadɨvɨ' kumɨre wawɨnya myɨvanɨgasara daaka!” Sara dona yɨhɨthɨwo. 12Sareraavɨ dɨragɨnna wɨdaana! Naanga Jizaazai Kɨraazɨtɨyai gannya dɨragɨnya' kanejaava' kɨwɨnya wɨjɨwakaana! “Sahwara kunnya wawɨnya' kave yɨpɨka! Kunnya wapaaya saza maranɨpɨka!” dona wawɨnya'na gɨthɨvanɨgoigɨnyɨ. 13Neya'mweihi, tewaanya ya'nebwina maa'na myɨhyɨnanna! 14Nemɨ pɨkarɨyɨkwia davɨ yavɨkaryɨwo'na pwai kwai yawɨ'na “Sabwi myɨwɨnera!” yawɨ'na yojɨ sare' myɨ kyojɨ nayaa tɨnna wanganapɨjɨ gamɨnyaba mamwaaibɨnera! “Sahwai wagɨla maarana!” dapɨjɨ mamwaaibɨna! 15Sareihi dara myawɨri jɨla! “Ai, sahwai yɨkamaangelyɨ.” Aawa, dara jawɨrila! “Sahwai nya'mwei mwaalɨke'na kave yavada'galɨdeinyɨ.”
Yagaala aaya'nesɨ.
16Naangei gamɨ sai kwaamu'nanyaburɨne aaya kaavɨlyai yuyagaa' yuyabwina sarɨmɨnyɨ gamɨre kwaamu'nanyabwi yɨhɨzaavana! Naangei sarɨmɨjɨ kuna mwaalana! 17Polɨnyɨ nɨnnya asɨlyɨ pɨkarya yɨda'manɨgesɨ “Neya'mweihi! Neya'mwengihi!” Pɨkarɨyɨkwia' yavɨkaryadɨ yuyagaa' yagaala aaya gave' nɨnnya asɨlyɨ yavɨkaryadɨnyainyɨ. Sareinyɨre pɨkarya tɨnna wanganapɨjɨ dara jawɨryide “Ya, Polɨmɨre paazɨyasɨra.” 18Nemɨre Naanga Jizaazai Kɨraazɨtɨyai sarɨmɨnyɨ yange'na tewaanna yɨhɨgaimwagana!
Polɨ
Currently Selected:
2 Tezalonaaika 3: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
