2 Pitai 3

Naanga nebulya' “Naangei walaabatherɨnesɨ.”

1Nɨmɨre nya'mweihɨrɨna tewaanya nyɨvu'nadeihi, pɨkarya datha' ayawɨdaasɨ sarɨmɨnyɨna yɨda'mwesɨ. Pɨkarɨyɨkwia pɨrɨwaala dazawaarɨ sarɨmɨre sɨmunya yɨda'maraange' yɨdɨkavɨmwaaihya'ne' yɨhɨzaawesɨ. Yagaala da'na ayɨna jawɨryide'nanyɨ. 2Kɨgaakuna Gotɨyarɨ wɨ'nawɨjɨwakyaata nawɨ'nyara dɨnɨkenna dɨvidaa'nyɨ Kɨraazɨtɨyarɨna yɨma'nya'nengɨna ayɨna jawɨrila! Nabaai Naangei nevadaihasamaarakerɨne kɨwɨnya dɨnɨke' sarɨmɨre Nedasaabadeinaavɨre maangi' kadɨka wɨ'nesa' ayɨna jawɨrila!

3Yagaala dazavɨne yawɨta sɨnnawɨnya' daresɨ. Yɨrɨka aayarɨkaavɨ a'mwe puri'nyarabɨ' bɨraiyagaala dadɨvɨsara yɨma'nyɨna yapɨjɨ kunnya sɨmunyavɨ dɨka widade kayaa'nanya sabwi mɨdɨdɨvɨ' 4bɨraiyagaala dara dɨpɨ'dere “Sai yune naanga nebulya'na dake' ayɨna bathei dɨngaka! Sarei gawɨ mwaalɨka! Sai mabivanɨke'. Sare' dare'nanyɨ. Ne sɨnnawɨnyara se balevegaa'daasɨ dahaakɨgaasɨ yuya sa sɨnnawɨ waryaakabaaibɨ' kuna warɨka Gotɨyai wakyaakegaa'daasɨ.” 5“Sɨnnawɨ waryaakabaaibɨ' kuna warɨkeva,” ja kwaasɨya' dare'nanyɨ. Sahwara sɨmunya daza dɨragɨnna yawɨ'dɨvɨ' darevɨ kumɨre sɨmunyavɨdaa'nyɨ yawɨrangadɨvɨtara mɨ'. Sare' kumɨnyɨna lɨka yulya'dɨ'nyɨ myawɨri. Sɨnnawɨ kɨgaakuna Gotɨyai yagaalya' kajaa' sɨgunya' warɨna yaakesɨ. Nabaai Gotɨyare yagaala savɨ aalya' sara kyaa' Kwaakevakɨ aalyavɨ wɨlayɨma'nyɨna yaka aalyavɨ tɨnnyaba warɨna. Wakyaakegaa'. 6Kɨrɨ' nabaai dɨvidaa'nyɨ Gotɨyai yagaalya' kajaa' Kwaakevakɨ aalyaaka naange' yɨma'nyɨna kyaa' Kwaakeva' aalya savɨ kayaaka yɨma'nyɨna yaakevakɨ. Sare' myawɨri yɨvanɨga'. 7Yune yagaala dazahɨrɨ' sɨgunyasɨ Kwaakevasɨ dahaa' warɨkewaarɨ yɨtavalɨmwagarɨ'. Sara yaka dɨke' yɨma'naabathehaa'na yemwaalɨ'. Yɨ Yɨrɨka Aayagaa' Gotɨyarɨna bule'na wɨjaavadɨvɨsaraavɨ kotɨya' yawɨbwarya'na yɨtavalɨmwagarɨkesɨ. Sagaa' sahwara kayaaka yɨma'nɨpɨ'dehaa'nanyɨ.

8Nɨmɨre nya'mweihɨrɨna tewaanya nyɨvu'nadeihi, yawɨta pɨrɨ'na sɨmunya navɨka nyɨpɨdɨka! Naangere sɨmunyavɨdaa'nyɨ yawɨ'manɨ' “Yɨrɨka gave pɨgaa'na kwarame waanɨ taawɨzanɨyabɨsasɨ (1,000). Kwarame waanɨ taawɨzanɨya daza yɨrɨka gave pɨgaa'bɨsangɨ.” Nemɨre yawɨ'na “Yɨrɨkerɨ' maalɨkegaakɨ. Kwarame waanɨ taawɨzanɨya saamɨnyagaakɨra.” Kɨrɨ' gamɨnyɨ aawa. Avaalyagaakɨra. Sare'na gamɨregaa' walaabathelyɨ. 9Sɨnnawɨ Naangei yune naanga nebulya'na daka sa'na sai yɨma'nya'nei kave kave mivanɨ'. Sarevɨna a'mwe pwara yawɨ'dɨvɨtabaaibɨ' kave kave sabwina mivanɨ'. Aawa. Sai yawɨ'na “A'mwe kwaala pwai nyɨwawodɨka!” Aawa. Sai dɨna “A'mwe yuyara sɨmunya mudɨkebwi yawɨramaapɨka! Nyɨlɨmwabɨka!” Sarevɨdaa'nyɨ sahwai sarɨmɨnyɨna yawɨ'da sai kuna yemwaalɨ'. 10Sai yawɨbwarya'nei walaabozɨ kɨrɨ' Naangerɨne Yɨrɨkegaa' a'mwe kuka ya'nei badevaaibɨ' yɨma'nadehaakɨ. Yɨrɨka sarɨkɨ sagaa' sɨgunya' yɨ'munya naanga pilojɨ yɨwɨnama'na yadesɨ. Sahɨba nyɨlyalyɨ lawelyɨ sɨlɨngaamɨnyajɨ sa dɨke' nasɨ'na kyojɨ aalya'bɨ' yɨma'nyɨna, yɨwɨna yadengɨ. Yuya kwaaka kɨvakɨ warɨka sajɨ sahɨvakɨ yadɨvɨta sajɨ yuya sa Gotɨyai ku'maayaba marima'naabathengɨ.

11Yuya sasare sa aalya'bɨta mena sara yɨma'nadenna gatha'dareihi mwaaibɨneihɨlaka! Sarɨmɨ tewaanyaburɨna yamaryadɨvɨ' Gotɨyare yuya sabwi nayaa dɨmɨdɨnyɨla! 12Sasare saburɨ Gotɨyare Yɨrɨka sagaa'na nayaa yemwaaidɨvɨ' yɨ Yɨrɨka Naanga sagaa' yaraina yɨma'nade'na sarɨmɨ Naangere wawɨnya dɨragɨnna nayaa jɨla! Naanga Yɨrɨka dazagaa' sɨgunya' dɨka nasɨ'na yadesɨ. Dɨkwara'munanga naange' gamɨre yuya warɨka saba sa dɨka nasɨ'nojɨ aalya'bɨ' yɨma'nadengɨ. 13Kɨrɨ' Gotɨyai yune naanga nebulya'na mena jaakevɨ sɨgunya mudɨkevasɨ kwaaka mudɨkevasɨ sawaarɨna yemwaaiho. Sahɨba yune yɨda'maraangebwina waradevera.

14Nɨmɨre nya'mweihɨrɨna tewaanya nyɨvu'nadeihi, sarevɨdaa'nyɨ dazanna yemwaaidɨvɨ' Naangerɨne nayaa dɨragɨnna yadɨvɨ' nawɨ'nya yɨda'na mwaaidɨvɨ' Naangegaa' Gotɨyare tɨnnyarɨ yɨwetawakya pɨnɨjɨyaihi namwaaibɨthɨka! Sipɨzipɨya yɨwihwaarya maayara gɨrɨkita'nanya maayarabɨsaihi dɨmwaalyɨla! Nabaai sarɨmɨ Gotɨyalyɨ avaaizɨmunya'na dɨmwaalyɨla! Gotɨyare kwaamusaburɨ dɨmwaalyɨla! Sarɨmɨ nawɨ'nya kuna sara mwaaidapi dɨvi Gotɨyai yɨhwanganadelyɨra. 15Naangei nemɨnyɨ kave neyada kuna yemwaalɨ'. Sare'na nayaa dara jawɨrila! “Sasare sabwi a'mwe kwainaavɨ kuna nevadaihasamaaradevwina.” Gotɨyai sɨmunya tewaanya' kujaava' nemɨre neya'mwerɨna tewaanya nevu'nadei Polɨ sai kwalyɨ sarɨmɨnyɨna pɨkarya avaala sahɨbaaibɨ'na yɨdavakelyɨ. 16Yo, gamɨre pɨkarɨyɨkwia yuyangɨ, dazahɨnɨnna dadelyɨ. Nabaai yagaala pɨnɨ pɨkarɨyɨkwia dazangɨ warɨke nayaa yawɨramaarya'na yagɨyagɨ wawɨnyasɨ. A'mwera sɨduta maayara kumɨre sɨmunya dɨragɨnya mwaryadesɨyara Polɨmɨre yagaala daza mariwɨnakadɨvɨ' Gotɨyare Bukuyavɨya yagaala yuya pɨnɨngɨjɨ mariwɨnakadɨvɨtabaaibɨsasɨ. Nabaai sasare sara yadɨvɨ' kumɨ dazahwara kayaaka yɨgainya'nerera.

17Nɨmɨre nya'mweihɨrɨna tewaanya nyɨvu'nadeihi, sɨnnawɨ mi'na yɨhɨthɨwe'na yuya dazanna mena yawɨ'dɨvɨsaihɨlyɨ. Mi'na yɨhɨthɨwe yuya sasarevɨdaa'nyɨ sarɨmɨ saihi mala nayaa jɨwannyɨla! A'mwe kɨwɨnya galazekɨvaidɨvɨsaraavɨre kwaasɨ yagaalya sarɨmɨnyɨ yɨhɨmwagi'nadaawori sarɨmɨ nebulyavɨ dɨragɨnna madaayɨ nyɨpɨka! Nalaraawɨpɨka! 18Aawa. Sarɨmɨ Naangere yanga gaimwanga naangevɨ dɨmwaalyɨla! Sahwai nemɨre Naangei, nevadaihasamaa'dei, Jizaazai Kɨraazɨtɨyalyɨ. Sarerɨ yanga gaimwanga dazavɨjɨ sahwarɨ sɨmunya yawɨramaarya'nevɨjɨ dɨragɨnna dɨvada'galedaayɨla! Sarevɨ sarɨmɨ yanga naanga daza' ayɨna pɨnɨjɨ kuna naanna dɨmaaryɨla! Sara yadɨvɨ' sarɨmɨ Kɨraazɨtɨyarɨ yawɨta sɨmunyabwi kwalaalya kuna dɨmaaryɨla! Dahaasɨ yuyagaa' yuyagaa'ne yɨrɨkesɨ gamɨre yaya' munyaba makɨlaana! Sai byaannakelyɨ. Sarei yuyagaa' yuyagaa' kuna naanga mwaalana!

Pitai

Currently Selected:

2 Pitai 3: byr

Highlight

Copy

Compare