2 Koridɨ 1

1Koridɨ Mwaalyaihi, nya'mweihi

Polɨnyɨ Gotɨyare sɨmunyavɨ Kɨraazɨtɨyai Jizaazai gamɨnyɨneba nyɨdaasadeinyɨ nyɨdahɨlakakeinyɨ pɨkarya da' yɨhithawasɨwaabe. Nɨmɨjɨ neya'mwei Timotilyɨ sainaai Gotɨyare kusɨlaanyavɨyaihi anga Koridɨ mwaaihasaihɨlyɨ Pɨrovijɨ Gɨriza yuneba Gotɨyare tewaanyara mwaaihasarajɨ saihɨrɨna yɨhɨthɨwoi. 2Gotɨyai Nenɨmaangelyɨ Naanga Jizaazai Kɨraazɨtɨya kwalyɨ yanga gaimwange'na tewaanna yɨhika! Yakɨlyɨyagaa' kwaamu'nanyaburɨ tewaanna yɨhɨmwaaihika!

Gotɨyai kugaimwaga' Polɨ suya wɨdake'nesɨ.

3Gotɨyarɨ yɨlaaya nayaa maryaana! Sai Gotɨyai nemɨre Naanga Jizaazai Kɨraazɨtɨyarɨ Ganɨmaangelyɨ. Yɨ sai Nɨmwai kale'na gaimwanga naange'na aaya kaavɨlyalyɨ. Yɨ sai Gotɨyai a'mwe yuyaraavɨre sɨmunyavɨ taanginya yuyanna yɨvaimwadelyɨ. 4Sahwai yuya taanginya neyɨma'nadengɨna nemɨre sɨmunyavɨ nayaa neyɨvaimwadelyɨ. Sarevɨdaa'nyɨ Gotɨyai nemɨre sɨmunyavɨ neyɨvaimwadevaaibɨsavɨ yɨ nemɨ sareina a'mweraavɨre sɨmunyavɨ taanginya gazasa' kɨnɨnnakeraavɨ yɨnɨga wi'na yɨvaimwagaanneine. 5Neyɨvaimwade sa' dare'nanyɨ. Daanga naange' Kɨraazɨtɨyai maarakesɨ. Nabaai nemɨ kwainajɨ ma'daanyasɨ. Yɨ daange' yune naanga neyɨma'nadevaaibɨ' yɨ nabaai Kɨraazɨtɨyarɨ nemɨre sɨmunyavɨ yɨvaimwangebwi yune naanga neyɨma'nade'nanyɨ. 6Nabaai nemɨ taanginya' maraaja daza' Gotɨyai sarɨmɨnyɨne sɨmunyavɨ yɨhivaimwagya'nesɨ sahwai yɨhɨvadaihasamaarya'nesɨ sara yɨma'nade'nanyɨ. Yɨ nabaai Gotɨyai nemɨre sɨmunyavɨ neyɨvaimwagaza' yɨ sa' sarɨmɨre sɨmunya kɨrɨvɨjɨ yɨvaimwagathesɨ. Nabaai Gotɨyai sarɨmɨre sɨmunyangɨ kave kihyojɨ yɨ nemɨ daanga ma'daanyabaaibɨ' sarɨmɨ sasare maapɨja' dɨragɨnna daavapɨjɨ nayaa jide'nanyɨ. 7Nemɨ dara yawɨ'manɨgo. Sarɨmɨ daange' nemɨjɨ ye'mwannamaa'manɨgatabaaibɨ' nabaai sarɨmɨre sɨmunyavɨ nemɨnyɨjɨ yɨvaimwangebwi dɨneye'mwannamaaryideihɨlyɨ. Yɨ sare'na nemɨ dɨragɨnna dara yemwaidaanyɨ. Yɨ sarɨmɨ dɨragɨnna dɨthaayideihɨlyɨ.

8Sare' darevɨnyɨ. Nya'mweihi, nemɨre sɨmunyavɨ dara yawɨ'manɨgo. Nemɨnyɨ Pɨrovijɨ Ezɨya dazavɨ neyɨma'nake' taanginya dazavɨna sarɨmɨ jawɨranganyɨla! Taanginya naanga sa' nemarulawakakesɨ. Yada yɨ nemɨre dɨragɨnyavɨ nebulya'na wavɨlava'. Sarevɨdaa'nyɨ yɨ nemɨ dara yawɨro. Nemɨ gaalyaina mwalaadeina daaka! Nemɨ balaadeinera. 9Naanga nebulya'nanyasɨ. Nemɨ saina taanginya' yɨbwakɨmanɨgo. Yawɨbwa'dei mena dakabaaibɨ' nemɨ balaade'na. Yɨ Gotɨyai “Kumɨ kunnya dɨragɨnya sabwina nyawɨralɨmwagapɨdɨka! Aawa. Nɨmɨ a'mwe bainɨkeraavɨ ayahi yɨdɨkaa'dɨnyainyɨ nayaa yawɨralɨmwagapɨka!” kada' sasare sa' yɨma'nakesɨ. 10Kayaa'nanaanga daza nemɨnyɨ kayaa'na neramakadaasɨ Gotɨyai sahwai nemɨnyɨ ayɨna nevadaihasamaarakelyɨ. Yɨ nabaai dahaa' sahwai kuna nevadaihasamaa'manɨkelyɨ. Yɨ nemɨ sahwarɨna dɨragɨnna lɨmwadaa nayaa dara yemwaaimanɨgoinera “Yɨ nabaai dɨvi kɨgaasɨ sahwai ayɨna nevadaihasamaaradelyɨ.” 11Yɨ sarɨmɨ Gotɨyarɨ wɨja'na nemɨnyɨ nayaa ye'mwannanegaimwadaapɨjɨ sara nevadaihasamaaradelyɨ. Sarevɨdaa'nyɨ Gotɨyai a'mwe kwalaalyaraavɨre yɨdaanganya' kadɨka wɨ'nada yɨ sahwai yanga tewaanna neyaja'na yɨ yuya kwalaalya dazara wɨ'napɨjɨ yɨ nemɨnyɨna Gotɨyarɨ “Su! Su!” wɨdɨpɨ'derera kwala naangera. Yɨ “Sare' yɨma'nana!” dona yɨhɨthɨwo.

Polɨ Koridɨ mwaalyaraavɨ kwaasɨ mujake'nesɨ.

12Sare' darevɨnyɨ. Nemɨ nemɨnyɨne yaya' munyaba makinya' yaasɨwa'na mɨ'. Aawa. Sare' daresɨ. Nemɨre sɨmunyai padaihɨrakyai dara jalɨkurakadelyɨ. Kwaaka davakɨ mwaalyaraayawɨ nemɨ kaanya yamaryadaanyanna nawɨ'nya yagoinera. Yɨ nabaai sarɨmɨnyɨ nawɨ'nya naanga yagoinera. Yɨ daresɨ. Gotɨyai nemɨnyɨ tewaanaanga sabwinajɨ yɨda'nanya nebulya'nanyabwinajɨ nejaavadevurɨ sara yagovulyɨ. A'mwe kɨlaakejɨkɨyabulyɨyaraavɨre sɨdusabwi nemarima'naabadevwi mɨ'. Aawa. Gotɨyare yune yanga gaimwange'na negaimwadaasɨ nemɨ kaanya sasara yamaryoinera. 13Sare' darevɨnyɨ. Nemɨ sarɨmɨnyɨna yagaala ge' yɨda'daanyaina mɨ'. Aawa. Yagaalya' sarɨmɨ yɨnɨga wi'na dangadɨvɨsagaa' yagaala savɨre aaya kaavɨlyavɨ jawɨranganyideihɨlyɨ sa' sahɨrɨ'na. Yunegaa' sarɨmɨ nemɨnyɨna nebulya'na jawɨryideihɨlyɨreva dɨragɨnna lɨmwadɨ yemwaaihe. 14Sɨnnawɨ sagaa' nemɨnyɨna maalɨ'na yawɨretabaaibɨ' yɨ yunegaa' nebulya'na jawɨryideihɨlyɨ. Yɨ daresɨ. Nemɨre Naanga Jizaazare Yɨrɨkerɨkɨ sarɨmɨre nayaa dɨmwaalyide'na nemɨ sarɨmɨnyɨne yaya' munyaba makɨlaadevaaibɨ' yɨ sarɨmɨ nemɨ Gotɨyare yagaalya' makaboinaavɨne yaya' munyaba dɨmakɨlyideihɨlyɨ.

15Yɨ sɨmunya dazasarevɨ dɨragɨnna dara yawɨrakɨwa'de. Sɨnnawɨ sarɨmɨnyawɨdaasɨ wɨdeinyɨra. “Yɨ pɨgasaai yanga gaimwange' maapɨka!” da'mujɨ sarɨmɨnyawɨnna ayɨna wɨdeinyɨra. 16Yɨ saba nɨmɨ mwaala'mujɨ yɨhyahalya'mava'mujɨ Maazathonɨyana kaanya yamarya'na wɨdeinyɨ. Yɨ Maazathonɨya yagalya'mava'mujɨ pɨgasaai sarɨmɨnyawɨnna ayahi bɨdeinyɨ. Yɨ nɨmɨ sarɨmɨnyɨna yawɨ'manɨge. Nɨmɨnyɨ kamaranyaasapɨjɨ nɨmɨ Juthɨyana wɨde'nanyɨ. Sara yawɨrakɨwa'de. 17Gatha'darevaka! Sara yawɨrakɨwa'de kɨrɨ' sarɨmɨnyawɨnna mabiwa'de. Sarevɨdaa'nyɨ nɨmɨ yagaalya' gazare dɨwa'deinyɨ daaka! Aawa. “Sara yɨdeinyɨ,” nebwina dadɨnyainyɨ. A'mweraavɨre kɨlaakejɨkɨyabwina yawɨrakadɨnya “Nɨmɨ yagaala dadɨ ‘Yo! Yo!’ kɨrɨ' ‘Aawa! Aawa!’ sɨmunyavɨ yawɨrɨma!” dadɨ yawɨrakadɨnyainyɨ daa! Aawa. “Sara yɨdeinyɨ,” dena yɨwa'deinyɨ. 18Gotɨyai nebulyabwi lɨmwaga'devɨ nemɨ kwainajɨ nebulya'na wɨdadaanyainera. Yɨ yagaala sa' sarɨmɨnyɨne' yɨhɨthadaanya' maangevɨ “Yo!” wa'dori kɨrɨ' sɨmunyavɨ “Aawa!” yawɨ'manɨgo' mɨ'. 19Sare' darevɨnyɨ. Gotɨyai nebulya'na yadere Gawaalɨvaangei Kɨraazɨtɨyai Jizaazarɨna sarɨmɨnyaba nemɨ yɨhɨzɨwaakolyɨ. Yɨ nɨmɨjɨ Saailaazalyɨ Timotilyɨ saina yɨhɨzɨwaakoi sahwai pɨgaa' “Yayo!” pɨgaa' “Aawano!” kɨnɨnnakei mɨ'. Aawa. Yuyagaa' sahwai gamɨre yune naanga nebulya'na daka yuya sangɨna “Yayo!” kɨnɨnnakelyɨ. Yuyagaa' nebulyabwi kɨnɨnnakelyɨ. 20Sare' darevɨnyɨ. Gotɨyai yune naanga nebulya'na wɨjaake gazasa' yɨ Kɨraazɨtɨyai “Yayo!” daka yunebanna sara yakelyɨ. Sahwarɨ kumɨre “Yayo!” wɨwarɨ'. Sarevɨdaa'nyɨ Kɨraazɨtɨyarɨ Gotɨyai yune naanga nebulya'na wɨjaake yunebanna yɨma'nake'na Gotɨyarɨne yaya' makɨlya'neina Gotɨyarɨ wɨdadaanyɨ. Nebulyasɨ. Sara yɨma'nana! 21Yɨ Kɨraazɨtɨyarɨ wɨlamwaaihovɨ nemɨnyɨ yɨ sarɨmɨ kwaihɨrɨjɨ dɨragɨnya neyɨvaimwadei yɨ yune gamɨ sai Gotɨyalyɨ. Yɨ sai nemɨnyɨ dahɨlakya'nei gannya Kuryarɨ nemɨre mɨnyagɨnyangɨ dɨngakelyɨ. 22Sahwai nemɨnyɨna yawɨ'na “Sahwara dɨragɨnna dara yawɨpɨka! ‘Nebulyasɨ. Nemɨ Gotɨyareinera. Nemɨnyɨ dɨragɨnna nemaredaa'deinera.’ ” Sara yawɨ'na yaka gamɨre yavɨkwajɨke' nejaavada nemɨ sara yɨma'nya'neinaavɨna gannya Kuryarɨ yanga nejaavakelyɨ. Nabaai nemɨre sɨmunyangɨ sɨnnawɨnya'bɨsai Kurya Tewaanyarɨ nejaavakelyɨ. Gotɨyai gannya yuya nejaaya'nenna Kurya Tewaanyai pimagɨnya naangeva' mena nejaavakelyɨ. Yɨ nemɨ dara yawɨ'daanyɨ. Naanga nebulya'nanyasɨ. Gotɨyai gannya Kurya Tewaanyarɨ nejaavake'na dɨvi yuya nejaavadelyɨ.

23Nabaai nɨmɨ sainyɨ Gotɨyai sasarei nɨmɨnyɨne jalɨkurakya'nerɨ jaka wɨdɨwa. Yɨ nɨmɨ kwaasɨ dɨwɨja' nɨmɨre gaalyabwi yɨwawadesɨ. Kɨrɨ' aawa. Nɨmɨ naanga nebulya'na dɨvanɨge. Nɨmɨ sarɨmɨnyɨ yavada'gaidɨ taanginya ayɨna wɨjaaya'na “Aala!” dɨwa'de. Sarevɨdaasɨ “Sarɨmɨnyawɨ Koridɨna bɨdeinyɨ,” dɨwa'de kɨrɨ' nɨmɨ yarai wɨwa'deinyɨ mɨ'. 24Sare kɨrɨvɨ nemɨ sarɨmɨre lɨmwangeburɨ dɨragɨnna mamareyɨhɨmwaalyɨgo. Aawa. Sarɨmɨre yɨlaayabwi marima'naabya'na nemɨ yɨhye'mwannayɨhɨvaimwadaanyaine. Sare' darevɨnyɨ. Kɨraazɨtɨyarɨ dɨragɨnna lɨmwangeburɨ sarɨmɨ dɨragɨnna mena daa'manɨgasaihɨlyɨ.

Currently Selected:

2 Koridɨ 1: byr

Highlight

Copy

Compare